Thov Vajtswv Txhua Hnub 30.10: Dŏ Ataih Mlaih Pran Jua

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Ih pioh mơ̆ bruă tui hơduah Khua Yang hăng hrăm Boh Pơhiăp Ñu jing blŭng hlâo hloh amăng bruă ngă kơ ih rĭm hrơi? Hmâo lu tơhnal tơlơi pơgun laih anŭn wơr bĭt hĭ tơlơi kơñăm kơ ƀing ta anŭn jing hơdip brơi kơ Khua Yang. Tơdang pran jua ƀing ta anăp nao kơ Khua Yang, Ñu či pơrơđah hăng atăt ih amăng abih bang bruă kơ tơlơi hơdip. Khua Yang kiăng ƀing ta anăp pran jua nao kơ Ñu, ăt pioh mông dŏ lir hơbĭt hăng Ñu nanao ƀu ‘dŏ ataih mlaih pran jua’ hăng Khua Yang.

Hrơi anai, lơ 30/10/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Bob Noebel tui hăng akŏ tơlơi hrăm Dŏ Ataih Mlaih Pran Jua

Yua kơ mơta Yêhôwa kơsem lăng djŏp djang lŏn tơnah kiăng djru kơ hlơi pô hmâo pran jua klă tum hăng Ñu. Amăng tơlơi anai, ih hmâo ngă laih tơlơi mlŭk mơgu yua kơ anŭn yơh mơ̆ng hrơi anai truh hrơi tơdơi, ih khŏm či bưp nanao tơlơi pơblah wang.” (2 Tơlơi Čih Ruai 16:9)

Amăng tơlơi hơdip rĭm hrơi ƀing ta pơgŭn hăng lu bruă biă mă. Amăng mông mă bruă ƀôdah ngui đôč tơlơi pơmĭn ƀing ta pơpư̆ mơgơi beč bal hloh drơi jan. Lu čô ƀing ta leng kiăng ngă pơgiơ̆ng hĭ abih bang bruă samơ̆ yua pơgŭn đơi anŭn yơh ƀu hmâo tum mông kiăng ngă pơgiơ̆ng bruă. Anŭn yơh, ƀing ta khŏm yua djơ̆ hnơ̆ng hrơi mông ƀing ta hmâo kiăng ngă pơgiơ̆ng khul bruă ƀing ta kiăng.

Nang ai amăng ƀing ta ăt thâo boh pơhiăp pơroai: Dŏ ataih mlaih pran jua”. Kiăng kơ pia ih či tañ wơr kơ sa čô hlơi pô ƀôdah sa mơnơ̆ng pă anŭn thâo tơdah ră anai ih ƀu ƀuh dơ̆ng ôh pô anŭn ƀôdah mơnơ̆ng anŭn. Boh hră anai ăt kiăng laĭ sa čô mơnuih kơnơ̆ng pơmĭn nao kơ bruă gah rơngiao lu hloh khul bruă amăng lăm.

Gah kơ bơngăt, amuñ biă mă ƀing ta wơr bĭt hĭ Khua Yang tơdang ƀing ta pơgŭn lu đơi hăng tơlơi hơdip rơnŭk anai. Hloh dơ̆ng, ƀing ta juăt nao sang jơnŭm laih anŭn ngă djŏp bruă kiăng kơ arăng ƀuh. Bơ gah lăm pran jua ƀing ta hiưm pă lĕ? Hmâo mơ̆ ƀing ta pioh mông hrăm Boh Pơhiăp Khua Yang laih anŭn iâu laĭ kiăng kơ ƀrư̆ hrơi jĕ Khua Yang jing Pô ƀing ta kơkuh pơpŭ hloh dơ̆ng? Djơ̆ mơ̆ ƀing ta kiăng dưi jing hrŭp hăng Khua Yang Yêsu hloh dơ̆ng. Yua kơ Ñu jing Akŏ, jing phŭn kơ abih Sang Ơi Adai, abih ană bă Khua Yang leng khŏm kơ anăp nao.

Ƀing Pharisi lăng kơ bruă phat kơđi arăng gah rơngiao hloh kơ bruă lir hơbĭt ñu pô hăng Ơi Adai. Khua Yang ƀuah gơñu jing mơnuih pleč blơr yua kơ gơñu iâu laĭ, djru arăng laih anŭn kŏm ƀơ̆ng huă kiăng kơ arăng ƀuh. Kơđai glaĭ, Khua Yang Yêsu pơtô kơ ƀing ding kơna Ñu tơdang iâu laĭ nao bĕ amăng anih hơgơ̆m, ngă bruă hiam laih anŭn kŏm ƀơ̆ng huă anăm brơi kơ arăng thâo ôh. Boh Pơhiăp Khua Yang brơi kơ ƀing ta thâo Khua Yang ƀuah ƀing mơnuih pleč blơr pơrup mă gah rơngiao kiăng kơ arăng ƀuh samơ̆ Ñu brơi pri bơni kơ ƀing mơnuih mă bruă laih anŭn huĭ pơpŭ kơ Ñu sĭt nĭk.

Boh Pơhiăp Khua Yang brơi kơ ƀing ta thâo krăn Ñu nanai lăng kơ ƀing ta:
“Anai nê mơta Yêhôwa lăng nao kơ ƀing mơnuih thâo hwĭ pơpŭ kơ Ñu, Laih anŭn ƀing mơnuih čang rơmang amăng tơlơi khăp pap Ñu”(Tơlơi Adoh Hơđăp 33:18)

“Yua kơ mơta Yêhôwa kơsem lăng djŏp djang lŏn tơnah kiăng djru kơ hlơi pô hmâo pran jua klă tum hăng Ñu. Amăng tơlơi anai, ih hmâo ngă laih tơlơi mlŭk mơgu yua kơ anŭn yơh mơ̆ng hrơi anai truh hrơi tơdơi, ih khŏm či bưp nanao tơlơi pơblah wang.”(2 Tơlơi Čih Ruai 16:9)

“Ñu lăng nanao kơ ƀing mơnuih tơpă, Brơi kơ ƀing gơñu dŏ ber ƀơi gre pơtao hrŏm hơbĭt hăng ƀing pơtao, Ñu pơjing brơi ƀing gơñu dŏ kơjăp, laih anŭn gơñu dưi hmâo tơlơi pơpŭ.” (Jôp 36:7)

Bơni kơ Khua Yang yua kơ Ñu nanao dŏ hơbĭt hăng kâo, ƀu lui kâo wơ̆t dah lu mông pran jua kâo čơlah mơ̆ng Ñu yua kơ bruă gŭn. Boh Pơhiăp Khua Yang hrơi anai pơtrŭt ih tui hơduah Khua Yang bĕ yua kơ Ñu nanao dŏ hrŏm hơbĭt hăng gum djru ih.

Rơkâo ƀing ta pioh mông iâu laĭ hrŏm hơbĭt

Ơ Ama kâo khăp, bơni kơ Khua Yang yua kơ Ih nanao dŏ hơbĭt hăng kâo. Rơkâo kơ Ih pap brơi kâo đa yua kơ lu wơ̆t khul tơlơi pơgŭn amăng tơlơi hơdip rĭm hrơi ngă kơ kâo ataih mơ̆ng Ih. Bơni kơ Khua Yang yua kơ Ih ăt khăp kâo laih anŭn yua Boh Pơhiăp Ih djru kâo nanao tŏng ten đuaĭ tui Ih hăng abih pran jua huĭ pơpŭ kơ Ih tơl hrơi dưi bưp ƀô̆ mơta Ih. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, mơyŭn biă mă tơdang ƀing ta dưi pơlir hơbĭt hăng Khua Yang rĭm hrơi. Tơdang amăng pran jua ih bă blai Boh Pơhiăp Khua Yang, sĭt boh Yang Bơngăt Hiam či pơrơđah amăng tơlơi hơdip ih. Yua kơ anŭn yơh, Kơnang bĕ Khua Yang djru ih dưi hĭ abih tơlơi gleh rơmŏn, gŭn găn laih anŭn djŏp mơta tơhnal pă ngă kơ ih ƀu dưi pioh mông hrăm Boh Pơhiăp Khua Yang laih anŭn tui hơduah Boh Pơhiăp Ñu rĭm hrơi. Kơwưh rơkâo bĕ kơ Khua Yang, Ñu či pha brơi tơlơi pap laih anŭn laĭ glaĭ kơ hlơi pô tŏng ten ngă tui Boh Pơhiăp Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.