Lơ 28/11/2023: ƠI ADAI DƯI KƠTANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Hơmâo mơ̆ đơđa ih bưp lu tơlơi sat truh nanao amăng tơlơi hơdip ih? Ih ƀuh abih bang tơlơi dŏ gah rơngiao tơlơi ih dưi ngă? Kar hăng ih hlăk dŏ ƀơi hlŭng dlăm yua kơ abih bang tơlơi ƀu rơbat djơ̆ jơlan ôh? Boh Pơhiăp Khua Yang hrơi anai či alum pơđur ih đaŏ kơnang bĕ Ơi Adai jing Pô Dưi Kơtang či djru ih găn rơgao hĭ abih bang tơlơi tơnap.

Hrơi anai, lơ 28/11/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Maria Schleicher tui hăng akŏ tơlơi hrăm ƠI ADAI DƯI KƠTANG

“Ơ Khua Yang Ơi Adai Dưi Kơtang, Pô Hlăk Hơmâo Ră Anai, laih anŭn Pô Hơmâo Laih, Gơmơi bơni hơơč kơ Ih, yua kơ Ih hơmâo djă tơlơi dưi prŏng prin, Laih anŭn wai lăng. (Tơlơi Bơrơđah 11:17)

Amăng mông rơngiă tơlơi čang rơmang amăng tơlơi hơdip, Boh Pơhiăp Khua Yang amăng hră Tơlơi Bơrơđah 11:17 alum pơđur ƀing ta lu biă mă:

“Ơ Khua Yang Ơi Adai Dưi Kơtang, Pô Hlăk Hơmâo Ră Anai, laih anŭn Pô Hơmâo Laih, gơmơi bơni hơơč kơ Ih, yua kơ Ih hơmâo djă tơlơi dưi prŏng prin, laih anŭn wai lăng”.

Găn mơng jơlan Boh Pơhiăp anai, Boh Pơhiăp Khua Yang hơmâo brơi kơ ƀing ta thâo Ơi Adai jing Pô či git gai wai lăng abih bang adai rơngit lŏn tơnah anai, jing Pô blŭng hlâo laih anŭn Pô dŏ nanao truh rơnuk tuč. Hloh kơ anŭn dơ̆ng, Khua Yang jing Pô Dưi Kơtang, jing Pô dưi ngă abih bang tơlơi găn rơgao hloh kơ tơlơi ƀing ta dưi pơmĭn.

Tui anŭn, wơt dah kâo hlăk bưp lu tơlơi sat amăng tơlơi hơdip, ƀôdah hlăk bưp lu tơlơi tơnap tap, Khua Yang jing Pô pơhơdơr brơi kơ kâo thâo Ơi Adai jing Pơtao. Ñu jing Ơi Adai Dưi Kơtang.

Amăng hră Čơdơ̆ng Phŭn 17:1, ƀing ta ƀuh Ơi Adai pơhiăp hăng Abraham tui anai: “Kâo jing Ơi Adai Dưi Kơtang; rơbat nao bĕ ƀơi anăp Kâo laih anŭn hơdip hiam klă hlom ƀom”. Ơi Adai mơng rơnuk Čơdơ̆ng Phŭn ăt jing Ơi Adai hơmâo pơrơđah rai amăng hră Tơlơi Bơrơđah. Ñu jing PÔ HLĂK HƠM O, PÔ HƠM O LAIH. Khua Yang pơsĭt Ñu či ngă abih bang tơlơi Ñu hơmâo ƀuăn brơi kơ ƀing ta amăng tơlơi kiăng hiam klă Ñu.

Wơt dah ră anai ƀing ta aka tŭ mă tơlơi Khua Yang ƀuăn ôh, samơ̆ gir añ dŏ tơguan hrơi hiam klă Ñu. Abraham hơmâo đup gưt kơ Khua Yang laih anŭn dŏ tơguan ană tơlơi ƀuăn wơt dah ñu hơmâo lu thŭn laih. Sĭt yơh, đaŏ kơnang bĕ kơ Khua Yang jing Pô thâo abih bang tơlơi amăng tơlơi hơdip ƀing ta laih anŭn nanao ngă lu bruă prŏng, hling hlang amăng tơlơi hơdip ƀing ta. Bruă ƀing ta khŏm ngă anŭn jing đaŏ kơnang kơ Khua Yang amăng abih bang tơlơi, rơbat tui Khua Yang. Rĭm hrơi rơgao ƀing ta hlăk yak rơbat nao pơ anăp hăng tơlơi pap Khua Yang pha brơi.

Ơi Adai jing Pô Hơmâo mă Ñu Pô laih anŭn Pô Dŏ Nanao Hlong Lar. Ñu jing Pô hiam klă. Ñu jing Pô git gai hrơi mông laih anŭn Ñu nanao hơmâo hrơdră jơlan hiam klă brơi kơ rĭm čô mơnuih kơsem hơduah Ñu.

Rơkâo ƀing ta pioh mông iâu laĭ hrŏm hơbĭt

Bơni kơ Khua Yang yua Ih jing Pô Dưi Kơtang, jing Pô pha pran kơtang kơ kâo laih anŭn git gai amăng abih bang tơlơi amăng tơlơi hơdip kâo. Rơkâo Khua Yang djru kâo thâo đaŏ kơnang laih anŭn jao abih bang tơlơi ƀlơ̆ng bơngơ̆t kâo brơi kơ Ih. Kâo đaŏ kơ Ih jing Pô hơmâo pha brơi kơ kâo tơlơi rơnuk rơnua, laih anŭn pha brơi pran kơtang brơi kơ kâo kiăng dưi găn rơgao abih bang tơlơi gleh tơnap tap amăng tơlơi hơdip anai. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, wơt dah mông anai ih hlăk bưp tơlơi truh hiưm pă, samơ̆ kơčăng bĕ Ơi Adai nanao dŏ hrŏm hăng ih. Đaŏ kơnang bĕ kơ Khua Yang yua kơ Boh Pơihiăp Khua Yang amăng Hơdrôm Hră Tơlơi Ơi Adai Pơhiăp hơmâo brơi ƀing ta hơdơr Khua Yang jing Pô Dưi Kơtang, jing Pô pha brơi pran kơ tang kơ ƀing ta laih anŭn git gai abih bang tơlơi amăng tơlơi hơdip ƀing ta. Tui anŭn, pơyơr đĭ bĕ tơlơi bơni hơơč kơ Ơi Adai. Ñu yơh jing Alpha laih anŭn Ômêga, Pô blŭng hlâo laih anŭn Pô hnal tuč. Đaŏ kơnang bĕ kơ Khua Yang amăng abih črăn tơlơi hơdip ih.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glaĭ ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.