Lơ 01/12/2023: DƯI HLOH KƠ TƠLƠI ɃING TA MƯN

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi
Hơmâo mơ̆ đơđa ih hơƀlŏk glaĭ kơ hơdôm boh pơhiăp laih anŭn bruă ngă ih hơmâo ngă amăng mông ih hil, ƀôdah amăng mông ih mưn ƀu mơak ôh? Ƀôdah hơmâo mơ̆n đơđa ih aka thâo hluh rơđah đong kơ sa bruă, klih yua kơ hơmâo tơlơi găn mơng tơlơi ih mưn?

Hrơi anai, lơ 01/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Missey Butler tui hăng akŏ tơlơi hrăm DƯI HLOH KƠ TƠLƠI ɃING TA MƯN

“Abih bang tơlơi pha brơi čơmah laih anŭn gơnam brơi klă tum leng kơ trŭn mơ̆ng adai, mơ̆ng Ama kơ tơlơi bơngač soh sel, amăng Ñu ƀu hơmâo tơlơi pơplih ôh, kŏn hơmâo tơ-u kơ tơlơi pơplih lơi” (Yakơ 1:17)

Tơlơi drơi jăn mưn anŭn jing sa tơlơi tơbiă rai mơ̆ng amăng lăm pran jua mơnuih ƀing ta. Ƀing ta dưi pơhmutu tơlơi ƀing ta mưn kar hăng “khul kơthul pơđông hyu” ñu rai laih anŭn đuaĭ hĭ. Đơđa ñu bơrơđah rai hăng tơlơi dŏ kơtuă, samơ̆ đơđa ñu rai kar hăng sa čô gơyŭt, mơak biă mă.

Sĭt yơh, ƀing ta ƀu thâo krăn hlâo ôh kơ tơlơi ƀing ta mưn, ƀôdah pô pơkŏn mưn či pơblih hlưm pă. Hơmâo mơ̆n đơđa ƀing ta bơrơđah rai tơlơi ƀing ta mưn jing tolơi mơak hơđơ̆ng. Samơ̆ hơmâo mơ̆n đơđa tơlơi mưn amăng lăm pran jua ƀing ta kar hăng rơbŭ kơthel, ngă kơ ƀing ta giăm rơbuh. Tơlơi ƀing ta mưn nanao pơblih, đơđa ñu rai tañ, đêl đôč, đơđa dlăm, kơtang ƀôdah dŏ hŏng.

Tơdah ƀing ta brơi tơlơi ƀing ta mưn git gai laih anŭn ngă khua, ñu či ngă ƀing ta rơbuh kơtrăm. Samơ̆ bơni kơ Khua Yang yua kơ Ñu jing Pô djru laih anŭn ngă khua kơ tơlơi ƀing ta mưn. Khua Yang khăp kơ ƀing ta laih anŭn djru ƀing ta pơrơđah rai tơlơi ƀing ta mưn hăng tơlơi mơak pran jua Khua Yang. Hloh kơ anŭn dơ̆ng, Ñu ăt pơhơdơr brơi kơ ƀing ta , ƀing ta hơmâo tŭ mă tơlơi dưi laih anŭn dưi wai lăng tơlơi ƀing ta mưn. Bơni kơ Khua Yang yua kơ Ñu hơmâo djru ƀing ta dưi ngă khua kơ tơlơi ƀing ta mưn, ƀu brơi tơlơi ƀing ta mưn git gai ƀing ta ôh.

Wơt dah tơlơi ƀing ta mưn dưi pơblih amăng rĭm hrơi samơ̆ tơlơi sĭt kơ Ơi Adai ƀu pơblih ôh. Djơ̆ mơ̆ anai jing tơlơi Khua Yang ƀuăn kiăng kơ pha brơi tơlơi rơnuk rơnua amăng pran jua ƀing ta? Boh Pơhiăp Khua Yang amăng hră Yakơ 1:17 hơmâo čih: “Abih bang tơlơi pha brơi čơmah laih anŭn gơnam brơi klă tum leng kơ trŭn mơ̆ng adai, mơ̆ng Ama kơ tơlơi bơngač soh sel, amăng Ñu ƀu hơmâo tơlơi pơplih ôh, kŏn hơmâo tơ-u kơ tơlơi pơplih lơi”. Anŭn jing tơlơi sĭt yom pơphăn biă mă tơdang Boh Pơhiăp Ơi Adai hơmâo brơi kơ ƀing ta thâo Ñu jing Pô hrơi tôm brôi, hrơi anai laih anŭn nanao hlong lar ƀu pơblih ôh.

Bơni kơ Khua Yang yua kơ Ñu jing Pô ngă khua kơ tơlơi mưn ƀing ta. Yua mơng Boh Pơhiăp Khua Yang hơmâo djru ƀing ta găn lui hĭ tơlơi hil laih anŭn tơlơi mưn sat. Ơi Adai jing Ama thâo gir añ, thâo khăp laih anŭn bŏ hăng pran jua hiam. Ñu thâo abih bang tơlơi ƀing ta mưn hiưm pă, Ñu djru ƀing ta thâo wai lăng tơlơi mưn ƀing ta tơdang ƀing ta pioh tơlơi đaŏ ƀing ta ƀơi Ñu, laih anŭn đaŏ kơ nang kơ Ñu amăng abih bang tơlơi.

Sĭt yơh, Khua Yang kiăng ƀing ta đaŏ kơnang laih anŭn kơnang kơ Ñu, anăm kơnang kơ tơlơi ƀing ta mưn ôh.

Tơlơi hrăm amăng hơdră Lir Hơbit Khua Yang hrơi anai ngă kơ kâo hơdơr nao kơ Tơlơi Adoh sang anŏ gơmơi juăt adoh nanao, akŏ tơlơi adoh tui anai, Bơngăt Kâo Kơnơ̆ng Kơnang amăng Drah Khua Yang Yêsu: “Wơt dah kơnăm mơmŏt gom hĭ mơta kâo, kâo ăt dŏ kơjăp ƀơi tơlơi pap Ñu pha brơi, wơt dah bưp rơbŭ kơthel kơtang tĭt, kâo ăt djă kơjăp ƀơi anih hơđơ̆ng. Kơnang ƀơi Yêsu kar hăng boh pơtâo prŏng, abih bang anih pơkŏn kar hăng lŏn čuah, anih pơkŏn kar hăng lŏn čuah”.

Rơkâo ƀing ta pioh mông iâu laĭ hrŏm hơbĭt

Ơ Ama Pô khăp hơeng, Ih jing khua tơlơi hơdip kâo, jing Pô thâo rơđah laih anŭn thâo abih bang tơlơi mưn hlăk truh amăng pran jua kâo. Rơkâo Khua Yang djru kâo rơbat tui Ih hăng tơlơi đaŏ kơjăp, ƀu djơ̆ kơnang ƀơi tơlơi pran jua mưn jang jai ôh. Hăng tơlơi pap Ih pha brơi laih anŭn tơlơi Ih wai lăng gôm krôp hơmâo djru kâo nanao dŏ kơjăp amăng Khua Yang. Kâo đaŏ sĭt, wơt tơdah lŏn tơnah anai pơblih samơ̆ Ih jing Pô ƀu pơblih ôh. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, tơdang ƀing ta đaŏ kơnang kơ Khua Yang laih anŭn đaŏ kơnang kơ Ñu amăng abih bang tơlơi, Ñu či djru ƀing ta thâo wai lăng laih anŭn dưi hĭ tơlơi ƀing ta mưn. Tơdah ih hơmâo ruah laih Khua Yang jing Khua kơ tơlơi hơdip ih, mông anŭn Ñu ăt jing khua kơ tơlơi ih mưn mơ̆n. Jao bĕ abih bang tơlơi brơi kơ Khua Yang, rơkâo Ñu wai lăng laih anŭn atat čông ih. Amăng abih bang črăn amăng tơlơi hơdip, bưp tơlơi tơnap tap, dŏ dơ̆ng glaĭ bĕ ƀiă mông kiăng kơ tơña Khua Yang laih anŭn brơi bĕ Yang Bơngăt Ñu mă bruă ƀơi tơlơi hơdip ih.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.