Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Tej zaug peb txhua tus puav leej muaj ntau zaug hnov nqe Vajluskub uas hais tias “khoom nyob qhov twg lub siab kuj nyob qhov ntawd”. Tiamsis kom saj tau lub neej ntseeg Vajtswv tiag tiag thiab paub tseeb tias khoom ntiajteb tsuas yog tej uas nyob ib vuag dua thiab yuav dhau mus ces ho yog ib yam uas tsis yooj yim li.
Hnub no, yog hnub 02/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Laura Bagby dhau ntawm Zaj kawm KEV NTSHAW TSIS MUAJ TSEEB.
“Rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd.” (Mathais 6:21).
Muaj ib hnub thaum uas tab tom mus yuav zaub kuv thiaj mus txog rau ntawm ib qhov chaw muag khoom. Tom qab uas kuv xaiv tau tej khoom uas kuv cheem tsum, kuv nqa los rau ntawm qhov chaw them nyiaj thiab tawm los. lub sijhawm ntawd, cua pib ntsawj loj heev yog li kuv thiaj siv zog tuav kuv lub tsheb kom txhob pub tsoo lwm tus lub. Tomqab muab khoom tso rau hauv tsheb tas, kuv muab lub tsheb thawb rov tso rau qhov qub, tsav tsheb rov qab los tsev.
Tom qab teeb meem tshwm tuaj thaum uas muaj dua lwm lub tsheb thawb cia li npuj kuv lub tsheb pob tw. Thaum ntawd kuv xav tias ntshai lub tsheb thawb ntawd nws twb nyob ntawd ua ntej uas kuv tsav tsheb mus. Yog li kuv thiaj maj mam nqes tsheb thiab muab thawb mus tso rau ntawm qhov chaw tso kom thiaj tsis tsoo lwm tus li.
Thaum kuv rov qab los kuv mam ua tib zoo saib seb puas muaj kab kes twg nyob ntawm kuv lub tsheb. Kuv ntsia pom muaj ob peb kab txhuam me me nyob saum tsheb. Tiamsis thaum kuv ua tib zoo saib pom muaj qhov mlos tob nyob ntawm lub log tsheb sab xis. Kuv ntseeg tsis tau tias ib lub tsheb thawb xwb thaum raug cua ntsawj nws ho ua rau lwm yam puag loj npaum ntawd.
Kuv tsis nkag siab tias vim li cas qhov no ho tshwmsim los raug kuv. Tsis tsim nyog raug zoo li no. Vim li cas ho muaj ib tug neeg twg tsis ceev faj tso kom zoo ho cia lub tsheb ntawd npuj kuv li? Lawv tsis paub tias qhov uas lawv ua ntawd yuav ua tej yam tsis zoo los raug rau lwm tus los?
Thaum ntawd, kuv chim thiab npau taws heev thaum pom tej no tshwmsim tuaj. Yog tias zoo li ob peb xyoo dhau los mas, tej zaug kuv yuav tsis quav ntsej txog tej no. Tiamsis thaum no txhua qhov kev siv nyiaj puav leej dhau los ua teeb meem loj thaum uas kuv tab tom khaws nyiaj cia tseg los them rau kuv lub tsheb tshiab. Kuv xav tias tej qhov txhuam ntawd tsis txhob muaj nyob ntawm kuv lub tsheb tshiab. Tsis tas li ntawd, tus neeg zoo tsis tas yuav raug ris tej yam phem tshwm los rau yus.
Ob peb hnub tom qab kuv rov mus saib kuv lub tsheb thaum uas tab tom los nag. Thaum mus ti kuv lub tsheb kuv rov qab pom ib qhov txhuam zoo li qhov zaug tas los tiamsis thaum no yog lwm qhov chaw. Qhov txhuam no nyob kiag ntawm kuv lub log tsheb. Txawm yog tsis loj npaum li zaug tas los, tiamsis nws pom tseeb dua.
Kuv tswj tsis tau kuv tus kheej thiab kuv npau taws rau Vajtswv. Tus Tswv yam dabtsi tab tom tshwmsim? Vim li cas Vajtswv koj ho tsis pab tiv thaiv kuv lub tsheb? Vim li cas koj ho cia tej ntawd tshwmsim los raug rau kuv? Vim li cas tej teeb meem no ho tshwmsim kiag rau hauv ib kiab xwb?
Txhua yam tshwmsim tuaj ua rau kuv ntshai, npau taws thiab tswj tsis tau tus kheej. Tsis tas li ntawd xwb, txawm yog tej nyuag teeb meem me me xwb los kuj ua rau kuv muaj kev tu siab.
Tom qab uas ua tib zoo xav txog ob qhov xwm txheej tau tshwmsim ntawd ces Vajtswv qhia ib zaj kawm rau kuv txog txoj kev kuv yuav tau cia siab rau leej twg thiab cia siab rau yam dab tsi. Kuv yeej lees hais tias muaj tej zaug kuv pheeb cia siab rau tej uas nyob ib ntus hauv ntiajteb no ntau dua li uas ntseeg siab rau Vajtswv. Thiab kuv tseem tsis paub kuv tus kheej txog thaum uas pheej muaj tej teeb meem zoo li ntawd tshwmsim tuaj. Kuv ua raws li kuv txoj kev xav thiab tsis ntseeg rau Vajtswv txoj kev zoo thiab Vajtswv txoj kev muab pub. Kuv pom tias kuv tsuas cia siab rau kuv lub peev xwm, kuv tej nyiaj txiag thiab yam zoo uas kuv ua xwb. Tiamsis ntawd ho yog tej uas nyob ib vuag hauv ntiajteb no thiab yuav yooj yim dhau mus. Kuv lub neej kuj yuav yaj tshis mus zoo ib yam li txoj kev ua pa thiab xwb.
Ua Vajtswv tsaug vim Vajtswv pab kuv kawm tau txoj kev tswj kuv tus kheej txoj kev xav thiab tsis cia tej kev xav tsis zoo ntawd ua rau kuv tswj tsis tau kuv tus kheej. Yam uas kuv yuav tau ua yog tswj kuv txoj kev xav thiab pab kom kuv ntsia pom yam zoo. Txawm yog muaj tej qhov txhuam me ntawm kuv lub tsheb los tsheb nws yeej tseem khiav taus. Nws yeej tseem tsis ua li cas. Yeej tsis muaj dabtsi phem tshwm los rau kuv.
Kuj ib yam li ntawd, nyob hauv lub neej ntawm sab ntsujlig, peb yuav tau ntseeg siab rau Vajtswv lub homphiaj, tseeb tiag, tej kev npau suav, tej yam yus ntshaw yuav ua, lub ntiajteb no yuav yooj yim ploj mus tiamsis peb tus ntsujplig yuav nyob mus ib txhis hauv Vajtswv lub tebchaws. Yog li, peb yuav tau qhuas Vajtswv txawm yog peb tab tom ntsib qhov kev sim siab twg.
Thov caw nrog kuv peb thov Vajtswv ua ke:
Vajtswv ntuj, kuv ua koj tsaug txog Vajtswv koj txojlus hnub no qhia kom kuv tsis txhob vam khom rau tej khoom ntiajteb thiab tej yam uas nyob ib vuag dua hauv lub ntiajteb no. Kuv pom tias tej kev npau suav, kev ntshaw thiab tej yam uas nyob hauv lub ntiajteb tamsim no yuav yooj yim ploj mus thiab yam kuv yuav ua yog npaj rau txojsia ib txhis nyob hauv Vajtswv lub tebchaws. Thov Vajtswv koj pab kom kuv vam khom rau ntawm Vajtswv koj yog tus pub txhua yam nyob mus ib txhis rau kuv. Kuv taij thov los ntawm tus Tswv Yexus Khetos lub npe. Amees.
Cov kwv tij txhua tus, tej kev xav uas koj nthuav tawm rau sab nraud pib ntawm yam uas koj ntseeg rau leej twg thiab vam khom rau yam dabtsi, thaum kom saib ntsoov rau Vajtswv, vam khom Vajtswv thiab mloog Vajtswv lus. Koj yuav tsis ua raws li koj lub siab ntshaw, thiab tus cwjpwm ntawm koj tus kheej. Vajtswv txojlus yuav pab kom koj ua lub neej nrog txoj kev nco tshav ntuj thiab ua Vajtswv tsaug, pauv qhov uas koj pheej npau taws, iab siab. Cia Vajtswv txojlus loj hlob thiab tawg paj txi txiv nyob hauv koj lub siab txhua hnub.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply