Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Txhua yam nyob hauv lub neej no puav leej yuav hloov pauv tiamsis Vajtswv tej lus cog tseg yeej yuav nyob mus ib txhis. Txawm yog tiam twg los Vajtswv txojlus yeej tsis hloov pauv. Vajtswv nyob ntawm peb ib sab, tiv thaiv peb, pab peb thiab pab kom peb tiv dhau tej kev txomnyem thaum peb ntseeg thiab thov Vajtswv.
Hnub no, yog hnub 21/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ashley Key dhau ntawm Zaj kawm LO LUS COG TSEG PAB KOM PEB TIV DHAU TXOJ KEV MOB SIAB
“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv porn zoo hu los raws li Vajtswv npaj tseg lawm.” (Loos 8:28).
Tsis ntev los no kuv siv sijhawm ntau los xav txog Malis, tus uas yog Tswv Yexus niam ntawm sab nqaij tawv. Yog ib tug pojniam, ib leej niam kuv nkag siab zoo txog qhov uas ntsib dhau txoj kev txomnyem thaum uas yug menyuam zoo li cas. Malis kuj ntsib dhau txoj kev txomnyem zoo li ntawd thaum uas yug Tswv Yexus Khetos cawm tib neeg ntiajteb uas yog peb tus Tswv Yexus uas hlub peb. Thaum kuv pib xav txog qhov no ces kuv xav tsis thoob vim kuv tsis tau xav txog qhov no yav dhau los. Tseeb tiag, Malis yeej ntsib dhau txoj kev mob thaum uas yug menyuam zoo li txhua tus niam tsev uas lawv yuav tau ntsib dhau.
Tiamsis Vajtswv nrog peb nyob thiab ntxiv zog rau Malis kom pog tiv taus tej kev mob ntawm sab nqaij tawv. Yog li kuv thiaj tsa suab ua Vajtswv tsaug vim Vajtswv pab kuv pom tias Vajtswv cog lus yuav pab kom peb tiv dhau txoj kev mob.
Vajluskub sau ntau txog cov lus cog tseg no. Vajtswv pub rau Yauxej ua npau suav tias nws yuav ua tus kav nws cov kwv tij thiab txhua haiv neeg. Vim li no nws cov tijlaug thiaj ntxub nws thiab muab nws muag rau cov neeg Medias thiab lawv coj yawg mus muag rau Pautifas ua qhev rau yawg. Tom qab uas Yauxej raug muag mus ua qhev nyob rau tim Iziv ces yawg ntsib ntau yam kev sim siab hauv lub neej ntau xyoo. Yawg raug Pautifas pojniam iab liam tias mos pog thiab tseem muab yawg coj mus kaw hauv tsev rau txim, muab yawg tso tseg, cuag li tsis muaj neeg nco txog yawg. Tiamsis txhua yam hloov pauv thaum uas Falaus tus nom cev cawv yog ib tug phooj ywg raug kaw ua ke nrog yawg tau nco txog Yauxej thaum Faulaus cheem tsum neeg pab yawg daws yawg qhov kev npau suav.
Chivkeeb 41 sau txog qhov uas tus nom cev caw no hais rau Falaus tias yawg tau Yauxej txhais nws zaj npau suav yog li Falaus thiaj txib neeg mus tso Yauxej los txhais nws zaj npau suav rau vajntxwv. Tomqab Yauxej txhais nws zaj npau suav tas ces vajntxwv muab Yauxej tsa ua tus nom loj kav tag nrho tebchaws Iziv.
Koj puas pom zoo thiab? Txawm yog Yauxej raug kaw thiab ntsib tej teeb meem nyob hauv lub neej los yawg yeej xaiv ntseeg Vajtswv. Yog li Vajtswv thiaj ua tiav yam uas Vajtswv muab pub rau yawg thaum yawg ntsia pom nyob hauv kev npau suav thaum tseem hluas. Dhau ntawd, Vajtswv kuj cawm Yauxej dim ntawm tej kev mob thiab muab yawg tsaws mus ua ib tug nom loj tsis yog tsuas cawm tebchaws Iziv xwb tiamsis tseem cawm tag nrho haiv neeg Yixalayees. Yauxej thiaj hais li no thaum uas nws ntsib nws cov tijlaug nyob hauv Chivkeeb 50:20:
“Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej porn hnub no ntag.”
Yuav luag ob txhiab xyoo tom qab, peb rov qab kawm tau zaj kawm dhau los ntawm Malis uas yog Tswv Yexus niam. Vim yog yuav tau sau npe yog li Malis thiab Yauxej nkawd thiaj mus rau hauv Npelehees. Nkawd nrhiav tsis tau chaw so vim twb tsis muaj chaw tas lawm yog li Malis thiaj yug tus metub Tswv Yexus hauv nkuaj yaj, muab ntaub qhwv tso pw hauv dab zaub. Tswv Yexus yog tus Cawm Seej tau Vajtswv txib los pab tib neeg ntiajteb. Txawm yog yuav tiv tej kev mob ntawm sab nqaij tawv nrog tej kev mob ntawm ntsujplig los Malis tau xaiv ntseeg Vajtswv tej lus.
Dhau ntawd kuv tseem tau Vajtswv ntuas kom kuv nco txog Yexus Khetos tus Ntoo Khaub Lig thaum uas Tswv Yexus tiv kev txomnyem vim tib neeg ntiajteb tej kev txhaum nyob hauv muaj koj thiab kuv. Vajtswv cog lus tseg tias Vajtswv yuav nrog nraim peb nyob thaum ntsib teeb meem uas peb tab tom ntsib.
Yog tias koj tab tom ntsib kev txomnyem ces cia li thov Vajtswv qhib koj lub qhov muag sab ntsujplig kom koj ntsia pom yam zoo uas Vajtswv tab tom ua pub rau peb. Ib yam li Vajtswv tej lus sau nyob hauv Loos 8:28 sau tias: “Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv porn zoo hu los raws li Vajtswv npaj tseg lawm.” Yog li txhua txoj kev txomnyem uas koj ntsib dhau yuav dhau mus sai sai nyob hauv Vajtswv lub homphiaj uas zoo kawg nkaus. Vajtswv yog tus nrog nraim koj nyob thiab pab kom koj mus dhau lub hav zoo ntawm txoj kev tuag.
Thov Vajtswv pab kom koj pom txog Vajtswv tej lus cog tseg nrog nraim koj nyob txhua zaug uas koj ntsib kev txomnyem. Thov Vajtswv foom koob hmoov nplua mias rau koj thiab tsev neeg nyob rau lub koob tsheej xyoo no.
Thov caw nrog kuv peb thov Vajtswv ua ke
Ua Vajtswv tsaug vim nyob hauv Koj txoj kev hlub zoo koj pab kom kuv ruaj siab tiv dhau tej cua daj cua dub thiab kev txomnyem nyob hauv lub neej no. Thov Vajtswv pab kom kuv yim hnub yim saj tau txoj kev kaj siab uas Vajtswv koj pub kuv nyob rau hauv koob tsheej xyoo no thiab kuj pab kuv dim ntawm tej teeb meem hauv lub neej. Kuv thov hauv Tswv Yexus Khetos lub npe. Amees.
Cov kwv tij txhua tus, yeej tsis muaj ib yam dabtsi ua rau peb ntshai yog tias peb pheeb ruaj ruaj rau ntawm Vajtswv tej lus cog tseg pab kom peb tiv dhau tej kev txomnyem. Dhau ntawm tej kev sim siab Vajtswv yuav rub peb tes nce kom siab thiab saj tau Vajtswv txoj kev tab ncuab. Txhob hnov qab ua Vajtswv tsaug thiab qhia rau sawv daws paub txog tej haujlwm tseem ceeb uas Vajtswv tau ua nyob rau hauv koj lub neej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply