Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
Lơh mbe lơi nàng bol he rgơi dòp geh bơta kõn gơboh Yàng Tòm Trồ dê? Kah té lah Yàng sền sơwí bol he jat sơnoa rnoas Kơnrãn dê. Kơnrãn kõn gơboh bol he ò di bơh bơta pơnđơl pràn bol he dê mơya bơh bơta kõn nđàc dờng ơnàng Kơnrãn dê. Tòm gar mat Yàng dê, bol he geh kòp la song ring tài bơh bol he dòn dê mhàm màng Yàng Jesus dê. Yàng kõn gơboh mơ toh glài ală cau lơi tus mơ Kơnrãn bơh bơta dòn ngan.
Ngai do, ngai 13/12/2023, tơnggu rơndap Bơta Hòi Dan Kòp Ngai dan jà oh mi ơm iat kơlôi sơnơng bal Jơnau Yàng mơ cau cih sră Larry Cox, Jr. gan dê tơnggume BƠTA KÕN GƠBOH MƠ TOH GLÀI.
“Dilah bol he yal glài he dê, gen Kơnrãn la Bơtau lơh jat jơnau ho Kơnrãn dê mơ la Bơtau song ring rơp toh glài bol he in, mơ rào bol he in goh jơh ală bơta ò song ring.” (I Jang 1:9)
Sră Goh cih oă bơh bơtau Dabit tài bơh rài kis ồng dê gơs bơta gơring tus hơđang oă cau. Bulah ồng jơh nùs kõn gơboh Yàng, duh khoai Kơnrãn mơya ồng gam kòl gơtup pờ tai bơh tồi glài. Do la bơta bơtê ai kòp nă bol he in tòm tú bơtê bơh rài kis bơtau Dabit dê.
Đơs ngan lah bơtau Dabit kis hơđơm bơta boh lam ò di la kis tòm rài bơta nđàc. Lài mơtú ồng tìs glài rềs àr bơrnàn mơ mò Batseba gen ồng dòp geh oă bơta phalin dờng màng tòm ală bơta tòm lơh mơ Yàng neh cèng tus ồng in.
Ò di mìng behớ lơm, tòm tú Dabit gam lơh bơtau, khai at gơnoar dớ dùl tòm dô nơm dà lơgar, khai at bồ jơh dô kơnwhal mơ la cau at bồ mpồl ling. Ồng dòp lềng gơnoar broă dờng màng ngan. Rlau mơhớ, ồng kung geh oă cau duh rngòt. Oă cau kun bồ di đap ồng. Rlau tai ồng la cau gơs rùp să đah bơdìh niam mơné. Ồng gơs tơl ală bơta niam rlau jơh.
Lài mơtú Batseba gơs mat tòm tap 11-12 sră II Samuel gen bơtau Dabit jòi gùng dà nang ai bơta nđàc jơi bơtian hìu nhă Jônathan in tài bơh să tòm ồng Jônathan neh dong tồ bơta kis bơtau dê. Bơtau Dabit jòi bàn kòn klau Jônathan dê, sơnđan la Mephibôset, kòl gơlte bàr đah jơng gen tàng ồng gơs nùs nđàc sơngềt. Sơnđing dê sră II Samuel 9, bol he sền gó nùs nhơm ai pà bơtau Dabit dê gơwèt mơ jơi bơtian Jônathan dê. Rlau mơ hớ, ồng kung gơs nùs nhơm pơndềt să gen tàng ồng ò kõn Mephibôset pal cun gơltang di đap mat ồng. Rlau mơ hớ tai, ồng sền dờng màng bơta lơh yô di gùl ồng mơ Jônathan gen tàng ồng gơwèt mơ jơi bơtian bơyô he dê be cau ơm rềp bal.
Tú tơngai lòt gan jơl tus dê kơnhai phang la tú tơngai mơ ală cau bơtau at mpồl ling lik lòt tòm lơh. Bơtau Dabit sôr Jôap bal mơ ală cau duh broă khai dê mơ jơh dô mpồl ling Israel lik lòt tòm lơh. Ai bơtau Dabit gen ơm wơl tòm Jerusalem. Dô mhô ne, Dabit guh bơh cơnòng bic mơ lòt yơng hơđang rkang. Bơh hơđang rkang hìu, Bơtau sền gó dô nă cau ùr, sơnđan la Batseba khai um dà, cau ùr dô hang mơné ngan. Dabit sôr cau kup cèng Batseba tus ho khai mơ bic mơ khai. Tú neh lơh goh să tòm khai bơh di bơta bớ bơl rau gen khai rê hìu.
Cau ùr hớ neh bun. Dô nă cau sùm kis niam nùs Yàng be Bơtau Dabit neh lơh cau ùr hớ in gơlik gơs bun. Dilah bơtau Dabit ơm tòm rài do gen nền cê kòl mpồl Cau Dòn Yàng sang lòi bulah ồng la cau dòn bơr Yàng sơl.
Tơnớ mơ ală bơta neh gơlik gơs, Bơtau Dabit sồr ồng Uri la bau klau Batseba rê tìp he. Bơtau Dabit sồr ơm wơl tòm Jerusalem tơnớ jà ồng sào sa mhô. Àng drim tơnớ, ồng sồr Jôap ơn ồng Uri hơđap tiah sơrbơng roh rlau jơh tòm tiah tòm lơh dê, sir gen lòi ồng Uri nàng cau sò tơm in tơnchơt. Bơh nàng pồn ndơp tồi glài he dê mơ ồng neh tơn chơt bau klau mò Batseba dê. Ồng ò di mìng tìs glài rềs àr bơrnàn lơm mơya ồng kung tìs glài tơn chơt cau.
Tơnớ mò Batseba neh jơh ală ngai nĩm bồc gen bơtau rò mò rê hơ gơlang bơtau mơ gơlik gơs bau ùr bơtau dê. Ồng neh geh bơta ồng hàm kõn he dê.
Bulah ồng Dabit tìs glài behớ, mơya Yàng Tòm Trồ gam kõn gơboh ồng mơ toh glài ồng in tòm tú ồng git gơjrãn sang glài.
Tòm oă jó tú tơngai, tòm tú sền bơta yal yau dô gen ãn sền gơ be la dô bơta yal yau be òs bơh gơ ò gơs bơta kas màng lơi gơwèt mơ ãn. Mơya tú do, ãn dòp git bơta yal yau dô gơs gơtha kwơ màng ngan gơwèt mơ ãn. Bulah ồng Dabit tìs glài mơya Kơnrãn gam kõn gơboh mơ toh glài ồng in.
Să tòm Yàng Tòm Trồ neh kõn gơboh bol he gen tàng bol he ò càng pal jôi oă gùng dà tai nàng dòp geh bơta kõn gơboh Kơnrãn dê. Bulah ãn bic jó jòng hơđang cơnòng nàng sền Tivi gen Kơnrãn kung ò tòm gơl bơta sền sơwí Kơnrãn dê gơwèt mơ ãn. Bulah ãn gơs nùs nhơm iơh bơsak gen Yàng gam kõn gơboh ãn mơ tòm gơl ãn kòp ngai nàng sơlo ndròm mơ Yàng rlau tai. Bulah ãn la cau tìs oă bơta tìs glài mơ ya Yàng gam dòp rò ãn.
Kah té lah Yàng sền sơwí he jat sơnoa rnoas Kơnrãn dê. Tòm gar mat Yàng, bol he geh kòp la song ring tài bơh bol he dòn dê mhàm màng Yàng Jesu dê. Bơh jơnau song do lơh bol he in dòn lah Yàng la Bơtau kõn gơboh bol he mơ bol he geh ơm tòm Kơnrãn sùm sùm tòm tú bol he srò ryas tòm Kơnrãn.
Đơs behớ ò gơs gơtha lah ãn kừ pơnjat tìs glài tai, kis tòm tồi glài tai tài bơh bulah mbe lơi gen Yàng kung kõn gơboh ãn. Bơta kõn đơs lah bulah bol he pơnđơl pràn kar lơi gen kung ò rgơi nàng bơnsong bơta tồi glài. Yàng Tòm Trồ dòp rò bol he tài bơh bơta dòn bol he dê ơn tòm Yàng Jesus ò di la bơh bơta niam bol he dê. Ai gơwèt mơ cau neh dòn dòp Yàng Jesus ngan gen “Bol he neh chơt gơwèt mơ tồi glài, gen mbe bol he gam tìs tòm tồi glài taih?” (Rôma 6:2)
Dan jà bol he dô nùs bal tòm bơta hòi dan:
Ưn ngài Yàng bơh Kơnrãn la Bơtau Kõn gơboh kòn mơ bơta kõn gơboh ài gòi mơ gam sùm sùm. Ưn ngài Yàng bulah kòn la cau mbe lơi gen Kơnrãn gam dòp rò kòn tòm tú kòn gơjrẵn sang glài rê wơl mơ Kơnrãn. Dan jơnau Yàng tề lam kòn tòm kòp bơta kơlôi sơnơng, broă lơh mơ jơnau đơs nàng kòn sùm kis niam nùs Kơnrãn. Kòn hòi dan tòm sơnđan Yàng Jesus Krist, Amen.
Ơ ală cau ơm iat kõn gơboh, kơnòm bơta kõn gơboh dờng ơnàng Yàng Jesus dê mơ bol he geh jrơm ndơp jơh ală tồi glài mơ geh kòp la song ring di đap mat Kơnrãn. Kơnrãn hồ toh ală bơta tìs bol he dê tòm tú bol jơh nùs gơjrẵn sang glài di đap mat Kơnrãn. Behớ bãn lòi tồi glài bơh yau kơryan bol he tus mơ Yàng. Mơya pờ té nùs mơ dòp rò bơta nđàc dong twài Yàng dê ai pà gòi mơ ò cang bơta lơi.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply