Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
Yàng Jêsus ò lik ling tòm gơlăng bơtau ang gơ crà mơya pơndềt să tus mơ bol he tòm bong ñhơt wang belàt rbah l’ơi. Kơnràñ lơh ală bơta rlau mơ bơta kơlôi sơnưng bol he dê, kơp bơta gơlik gơs jat tơm toh dê tŭ tơngai crih crai Kơnràñ neh ơn. Kơp dơ̆ kirsơnre Yàng Jêsus lik ling bol he geh tơngkah wơl ală jơnau hơ crih crai Kơnràñ dê mơ bơta gơn kơnòm crih crai Yàng ai bol he in.
Ngai do, ngai 23/12/2023, Bơta Hòi Dan Kơp Ngai dan jà ală ồng mò oh mi bơtê bal Jơnau Yàng dê kơnòm dê bơta dong kơl ông Tori Troncone bơh tơnggumê NO – EL KƠNHAI BƠTA GƠN KƠNÒM NIAM
“Ơ Yàng la Yàng Tom Trồ, Bơtau Gơnoar Dờng lam Jơh, Ală broă Kơnràñ dê la dờng ngan mơ krơi is ngan! Ơ Bơtau ală rài dê, ală gùng dà Kơnràñ dê la song ring mơ song ngan!” (Yal tơlik 15:3)
Hiu nhă añ gơs bơta òs mơng bơka ală bơta gơlik gơs tòm yal yau bơh Yàng Lik Ling. Lai or mề añ neh lơh broă hơ̆ mơ tŭ do broă do geh jao wơl añ in. Añ sơntơm tơlik ală rup bơh bơta gơlik gơs tòm yal yau bơh Yàng lik ling tờm hiu he dê. Tŭ sơntơm ơn tơlik gen añ kơlôi tus sèng Sră goh tòm sră Jang 1:14:
“Bơtau Jơnau neh gơlik gơs poac să, ơm digùl bol he, bềng bơta nđàc mơ jơnau song. Bol he neh sền gŏ bơta gơklŏ Kơnràñ dê, kung be bơta gơklŏ Kòn Dùl dê tus bơh Bèp.”
Mơya gơwet mơ añ, añ òs ai lơh krơi ñchi bơh tai Bơtau Dong Klàs geh deh tòm rùp să dô nă cau kơnòm dềt dê. Rlau mơ hơ̆, cau Bơtau hơđăng ală bơtau geh deh bơh dô nă cau ơruh mơ gơs cau bèp đah poàc să la cau jak chai lơh chi. Bơh ò gơs tiah ơpah bic gen tang Yàng Jêsus mut rài tòm wang belàt bong ñhơt. Tŭ Yàng Jêsus geh deh gen mò Mari klơm mơ Kơnràñ tòm dô nơm ôi mơ ơn tơmbic tòm bong ñhơt. Behơ̆ gen, añ ò rgơi wơng ñchi bơh tai Yàng Jêsus lik ling tòm bơta gơlik gơs be.
Mơya ngăn Yàng Jêsus neh mut rai behơ̆. Yàng Jesus ò lik ling tòm tiah gơlăng bơtau ang gơcrà. Mơya Yàng Jêsus pơndềt să tus mơ bol he. Ngăn behơ̆, sătòm Yàng Jesus la Bơtau Jơnau neh gơlik gơs poac să ơm digùl bol he. Rlau mơ hơ̆, ñchi bơh tai Yàng Jêsus, la bơta gơn kơnòm jơh dunnia do dê lik rai tòm wang belàt rbah lơ ơi tus be hơ̆? Ò rgơi dòn ngăn?
Bơh añ òs ơn rùp ală bơta gơlik gơs tòm Ngai Lik Ling gen tang añ mơng bơh broă Yàng Jêsus geh klơm mơ mơ ôi bic tòm bong ñhơt. Behơ̆ gen, tŭ ơn tơlik ală rùp bơh bơta gơlik gơs hơ̆ gen añ kơlôi tus bơta rơndap Yàng Tòm Trồ dê ò ndrơm be ală bơta bol he kơlôi. Rlau mơ hơ̆, Jơnau Yàng tòm Sră goh kung ai bol he in git oă bơta crih crai rlau tai ò di ming bơta Yàng Jêsus geh deh, klơm mơ ôi mơ tơnbic tòm bong ñhơt. Ngăn behơ̆, tŭ cau gơnoăr hwơr Habakuk hồi lùp Yàng Tòm Trồ dong klàs gen Yàng Tòm Trồ đơs lah:
“Rmê tĕ di ală lơgar mơ sền! Ai lơh krơi tĕ! Mơp dơl! Bơh Añ rơp lơh dô bơta tòm ală ngai mê dê, bulah mê ò dòn ală bơta neh yal mê in.”
Jơnau Yàng ai bol he in sền gŏ lah Yàng Tòm Trồ sùm lơh ală broă dơng mơ kalkê lin rlau mơ bơta kơlôi sơnưng bol he dê tŭ bol he ntao diđap ală bơta gơlik gơs gơlơh be ò rgơi lik klas.
Behơ̆ gen, bulah năm do bol he rgơi lòt găn ală broă ò ndrơm be bol he kơp gơn mơya kơnhai Yàng Lik Ling năm do tơngkah bol he in kah lah rài kis jat Yàng la rài kis cơnđòa lòt mơ bơta dòn mơ dơp git lah Kơnràñ lơh ală bơta tòm bơta rơndap Kơnràñ dê. Gen tang, Yàng Jêsus găm sùm la Bơtau hơđăng bơtau, Yàng ală Yàng, la Yàng Tòm Trồ Gơnap Gơnoăr, la Bèp sùm sùm, la Bơtau Dong Klas, Bơtau Dong Twài mơ Bơtau ai bơta gơn kơnòm jơh kòn mơnùs dô in. Behơ̆ bulah bol he ntao dêđap ală bơta gơlik gơs kalkê gen dòn tĕ lah ală bơta dô nus bal gen kwơ ală cau kòñ gơboh Kơnràñ be ông Pol neh cih tòm sră Rô-ma 8:28 “Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê.” Behơ̆ gen, pal ưnngai tĕ Yàng bơh jơnau hơ crih crai ai kơp nă bol he in tòm kơnhai Yàng Lik Ling năm dô.
“Ơ Yàng la Yàng Tom Trồ, Bơtau Gơnoar Dờng lam Jơh, Ală broă Kơnràñ dê la dờng ngan mơ krơi is ngan! Ơ Bơtau ală rài dê, ală gùng dà Kơnràñ dê la song ring mơ song ngan!” (Yal tơlik 15:3)
Dan jà bol he dô nùs bal tòm bơta hòi dan:
Ưnngai Yàng bơh ală lơngai mơ Kơnnràñ ai kòn tòm dô năm neh rlau. Ưnngai Yàng bơh tòm Yàng kòn gơs bơta gơn kơnòm mơ lơngai ngăn Kơnràñ ai. Dan Yàng dong kòn kah lah Kơnràñ la Bơtau lơh Cau Tơm rài kis kòn dê mơ Kơnràñ lơh ală bơta lin rlau mơ bơta kơp gơn mơ bơta hòi dan kòn dê. Kòn dòn kơnòm wil tơl tòm bơta rơndap crih crai Kơnràñ dê. Kòn ai sơnđan Yàng Jêsus Krist hòi dan mơ Yàng Bèp, Amen.
Ơ ală ồng mò oh mi kòñ gơboh, rai kis jat Yàng là rai kis cơnđòa lòt mơ bơta dòn mơ dơp git lah Kơnràñ lơh ală bơta jat bơta rơndăp Kơnràñ dê. Kơp kơnhai Lik Ling la tŭ lơmpah crih crai nang bol he kah wơl lơngai Yàng ai mơ la kơnhai driau chò ơn sèng đơs chò jong ro Kơnràñ. Bañ lơi bơta gơlik gơs ồng mò oh mi sền gŏ lơh bềng gơnăp gơnoăr Yang dê mơya pal dòn kơnòm tĕ Yàng mơ ò dơh gơn kơnơm tŭ tơngai niam Yang dê. Rài kis tơnơ̆ bòl he dê gơri hơ Yang.
NO – EL KƠNHAI BƠTA GƠN KƠNÒM NIAMƠm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply