Lơ 08/01/2024: HƠDIP AMĂNG TƠLƠI HM O ɃŎ MƠTA KHUA YANG

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Bơni hơơč kơ Khua Yang yua kơ ƀing ta hmâo tơlơi pap prŏng hloh jing thâo krăn Ñu, dŏ amăng Ñu laih anŭn hơ̆k mơak tŭ mă tơlơi khăp Ñu. Wơ̆t kơ tui anŭn, tơdang bưp lu mơta tơlơi truh amăng tơlơi hơdip tăp năng ngă kơ ƀing ta wơr bĭt kơ tơlơi anai. Amăng mông anăp hăng thŭn phrâo, ƀing ta mă yua bĕ mông găl anai kiăng ep sem glaĭ tơlơi hơdip kơ ƀing ta pô.

Hrơi anai, lơ 08/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Gordon Robertson tui hăng akŏ tơlơi hrăm HƠDIP AMĂNG TƠLƠI HM O ɃŎ MƠTA KHUA YANG.

“Kâo hmâo rơkâo laih mơ̆ng Yêhôwa sa tơlơi laih anŭn či tui hơduah tơlơi anŭn. Anŭn jing tơlơi kâo kiăng abih tơlơi hơdip kâo dưi dŏ amăng sang Yêhôwa laih anŭn rơkâo tơña amăng sang kơkuh pơpŭ Ñu.” (Tơlơi Adoh Hơđăp 27:4)

Blŭng hlâo, ƀing ta khŏm anăp pran jua kơ Khua Yang kiăng kơ dưi jing hĭ rơun tơdu laih anŭn hreč hăng Ñu. Kơwưh rơkâo bĕ kơ Yang Bơngăt Hiam kơsem lăng glaĭ kơ pran jua ƀing ta laih anŭn djru kơ ƀing ta mă lui hĭ khul tơlơi khăng amăng lăm. Hmâo mơ̆ kơ hlơi ngă kơ ƀing ih ruă pran jua? Djơ̆ mơ̆ ƀing ih hlăk ngă tơlơi soh? Khul tơlơi anai ngă kơ pran jua ƀing ih khăng laih anŭn ngă joh tơglưh tơlơi lir pơgop tơ̆ng krah ƀing ih hăng Pô Dưi Kơtang. Brơi nao jĕ giăm gah Ñu kiăng kơ Ñu pap brơi, pơrơgoh abih bang tơlơi soh laih anŭn pơhlao abih bang tơlơi ruă amăng pran jua kơ ƀing ih. Tơdang ƀing ta mơhao laih anŭn hơduah tơlơi tơpă Ñu, tơlơi Ñu kiăng jing hĭ tơlơi ƀing ta kiăng.

Kar hăng Đawit hmâo pơhiăp amăng Tơlơi Adoh Hơđăp 27:4 tui anai:

“Kâo hmâo rơkâo laih mơ̆ng Yêhôwa sa tơlơi laih anŭn či tui hơduah tơlơi anŭn. Anŭn jing tơlơi kâo kiăng abih tơlơi hơdip kâo dưi dŏ amăng sang Yêhôwa laih anŭn rơkâo tơña amăng sang kơkuh pơpŭ Ñu.”

Tui hăng jơlan Hră Ơi Adai Pơhiăp anai, Boh Pơhiăp Khua Yang pơhơdơr kơ ƀing ta brơi khŏm nanao hơduah kơ Khua Yang. Rơkâo kơ Khua Yang djru kơ ƀing ta nanao bă blai Yang Bơngăt Hiam, nanao dŏ amăng tơlơi hmâo ƀŏ mơta Ñu laih anŭn hmâo Ñu pơčrang tơlơi bơngač. Yua kơ anŭn ƀing ta khŏm wai lăng kơjăp pran jua ƀing ta jing sang yang kơ Ơi Adai.

Amăng sang kơkuh pơpŭ kơ ƀing Yuđa, khŏm ngă khul phĕt song mă tơlơi soh laih anŭn pruih đĭ drah ƀơi kơƀang ngă yang kiăng kơ gom lui hĭ tơlơi soh kơ ană mơnuih. Khua Yang Yêsu hmâo ngă abih bang tơlơi anŭn brơi kơ ƀing ta. Tui anŭn yơh ră anai, Khua Yang kiăng kơ ƀing ta pơyơr kơ tơlơi hơgĕt? Ñu čang tơguan kơ pran jua hăng tơlơi adoh bơni mơ̆ng ƀing ta.

Hyư̆m ƀing ta dưi ngă jing kar hăng anŭn? Ƀing ta khŏm bơni hơơč laih anŭn pơpŭ kơ Ñu, ƀing ta khŏm djrưng răng amăng tơlơi ƀing ta pơhiăp. Yua năng ai hmâo mơ̆n ƀing ta yua jơlah bah kơ ƀing ta kiăng kơ tuh tơlơi mơyun ƀôdah hơtŏm apah kơ ƀing mơnuih pơkŏn, ƀôdah ngă kơ mơnuih pơkŏn hơdip ƀôdah djai. Yua kơ anŭn, Khua Yang Yêsu laĭ nao kơ bruă ngă kơ ƀing ta grĭ grañ:

“Samơ̆ mơnơ̆ng hơgĕt tơbiă mơ̆ng amăng bah rai mơ̆ng pran jua, mơnơ̆ng anŭn grĭ grañ mơnuih.”

Anai jing bruă ƀing ta khŏm bơrơđah găn mơ̆ng bruă ngă kơ ƀing ta amăng tơlơi hơdip kơ ƀing ta.

Yua kơ anŭn, ƀing ta khŏm tơña kơ ƀing ta pô ƀing ta hmâo bơrơđah tơlơi čang rơmang, tơlơi hơ̆k mơak, tơlơi tơpă ƀôdah tơlơi rơnŭk rơnua amăng tơlơi hơdip anai mơ̆ ha ƀôdah ƀu bơrơđah ôh? Ha ƀôdah ƀing ta bơrơđah tơlơi ƀlơ̆ng bơngơ̆t, tơlơi rơngot hơning laih anŭn tơlơi ƀuah brŏk? Khul tơlơi anai yơh tơbiă rai mơ̆ng pran jua ƀing ta. Yua kơ anŭn, tơdah amăng pran jua ƀing ta bă khul tơlơi hiam tuia nŭn yơh ƀing ta či bơrơđah khul tơlơi anŭn. Pơtao Đawit yơh jing pô hmâo iâu laĭ hăng Ơi Adai amăng Tơlơi Adoh Hơđăp 19:14 tui anai:

“Ơ Yêhôwa jing Boh Pơtâo laih anŭn jing Pô Pơklaih kâo, rơkâo Ih brơi bah jơlah kâo, laih anŭn tơlơi pơmĭn kâo dưi ngă bơmơak kơ Ih!”

Tơdah ƀing ta hmư̆ boh pơhiăp Khua Yang, gưt tui tơlơi Ñu laĭ laih anŭn ngă bruă bơmơak kơ pran jua Ñu tui anŭn yơh ƀing ta či jing hra laih anŭn tơlơi bơngač pơčrang kơ ƀing mơnuih jum dar ƀing ta. Yua kơ anŭn yak mŭt amăng thŭn phrâo anai, ƀing ta khŏm hmâo kơnuih luă gŭ, hơduah tơlơi pap brơi laih anŭn tơlơi pơblih kơphrâo mơ̆ng Ñu. Khua Yang yơh jing pô ƀuăn tơlơi ƀuăn anai brơi kơ ƀing mơnuih hlơi jing ană bă Ñu amăng Tơlơi Adoh Hơđăp 23:6:

“Sĭt yơh, abih tơlơi hơdip kâo, tơlơi mơyun hiam laih anŭn tơlơi pap drap Ih či đuaĭ tui kâo; kâo či dŏ amăng sang Yêhôwa nanao hlŏng lar.”

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ñu pha brơi kơ ƀing ta tơlơi dưi jing hĭ ană bă Ñu, amăng tơlơi hmâo ƀŏ mơta Ñu laih anŭn hơ̆k mơak mă tŭ tơlơi khăp Ñu. Tơdah amăng pran jua kâo dŏ hmâo khul mơta tơlơi ƀu bơmơak kơ pran jua Ih rơkâo kơ drah Khua Yang Yêsu sut lui laih anŭn pơblih kơphrâo kơ pran jua kâo. Rơkâo Ih djru kơ kâo prăp rơmĕt kơ pran jua kâo laih anŭn hơduah ƀuh tơlơi kơphrâo, tơlơi mơmih amăng tơlơi lir pơgop hăng Ih amăng thŭn phrâo anai. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, brơi mơhao bĕ kơ tơlơi tơpă Ñu laih anŭn mơhao amăng tơlơi hmâo ƀŏ mơta Ñu hloh dơ̆ng. Khua Yang kiăng kơ ƀing ta pơyơr jơlah bah laih anŭn tơlơi hơdip kơ ƀing ta ngă pơ-ư ang anăn Ñu. Brơi pioh bĕ hrơi mông nao pơ Khua Yang, ep lăng glaĭ pran jua kơ ƀing ta, laih anŭn prăp pre mơtam yơh bơrơđah tơlơi čang rơmang, tơlơi hơ̆k mơak, tơlơi tơpă laih anŭn tơlơi rơnŭk rơnua kơ ƀing mơnuih jum dar!

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.