Lơ 14/01/2024: MÔNG DŎ PƠDƠI

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Amăng rơnŭk ƀing ta hơdip ră anai, tơlơi hơdip ječ meč laih anŭn lu tơlơi pơgun biă mă. Ƀing ta đuaĭ tui bruă mă, kơtraŏ lu tơlơi laih anŭn ruă akŏ rĭm hrơi. Hrơi mông rơgao hĭ laih anŭn ƀing ta ƀu dưi hmâo mông dŏ pơdơi ôh. Samơ̆, Boh Pơhiăp Khua Yang brơi kơ ƀing ta thâo tơlơi dŏ pơdơi ƀu kơnơ̆ng jing sa tơlơi khŏm hmâo anai ăt jing tơlơi yom biă mă kơ drơi jan wơ̆t gah bơngăt.

Hrơi anai, lơ 14/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Mariel Davenport tui hăng akŏ tơlơi hrăm MÔNG DŎ PƠDƠI.

“Yêhôwa jing Pô wai lăng kâo, Kâo ƀu či kơƀah hơgĕt gĕt ôh. Ñu brơi kâo dŏ pơdơi ƀơi đang rơ̆k mơda, Ba kâo nao pơ hang ia jơngeh.” (Tơlơi Adoh Hơđăp 23:1-2)

Hiưm ih hlăk gui lu tơlơi kơtraŏ rơgao kơ pran ih mơ̆? Ƀơi bơbra ih ăt glăm lu bruă, tơlơi blơ̆ng bơngơ̆t? Hrơi anai, Pô Wai Triu Hiam Klă iâu mơthưr ƀing ta: dŏ pơdơi. Nang ai hlơi pô ăt kiăng kơ pơdơi. Samơ̆ nang ai ƀing ta či kĭ kơ̆… ƀu djơ̆ yua kơ ƀing ta ƀu kiăng ôh, samơ̆ yua kơ ƀing ta ƀu hmâo mông kiăng pơdơi ôh lu bruă đơi.

Samơ̆, Boh Pơhiăp Khua Yang laĭ kơ ƀing ta:
Yêhôwa jing Pô wai lăng kâo, Kâo ƀu či kơƀah hơgĕt gĕt ôh. Ñu brơi kâo dŏ pơdơi ƀơi đang rơ̆k mơda, Ba kâo nao pơ hang ia jơngeh.” (Tơlơi Adoh Hơđăp 23:1-2)

Tơdang kơsem dlăm kơ boh hră “Ñu brơi kâo dŏ pơdơi”, kâo pơmĭn nao kơ tơlơi yom kiăng kơ tơlơi anai. Tơlơi kiăng pia pơ anai ƀu djơ̆ jing “Ñu pơtă kâo dŏ pơdơi” ƀôdah “Ñu iâu mơthưr kâo dŏ pơdơi”.

Ư ưh, boh hră ‘rabas’ amăng hră Hêbrơ jing sa tơlơi pơđar, pơdơi bĕ; lưh lui kơtraŏ ƀôdah bruă ngă; đih pơdơi amăng tơlơi hơđơ̆ng rơnŭk. Khua Yang hlăk pơđar kơ ƀing ta lưh lui hĭ tơlơi kơtraŏ laih anŭn pioh brơi bơngăt jua pơdơi amăng Ñu.

Anih Ñu kiăng ƀing ta pơdơi anŭn jing sa anih mơak. Kơyâo pơtâo čư̆ čan tring Yuđa ƀu mơtah hiam lơi. Anai jing anih kro krañ, čơđang hăng bă čoah. Ƀing wai triu khŏm pioh lu mông mă bruă amăng tơdrŏn; kai hmua, jŭ pla… kiăng hmâo rơ̆k mơtah mơda, čem khul triu ƀơ̆ng. Tơdơi kơ ngă giơ̆ng bruă laih, ƀing wai phư lui khul triu ƀơ̆ng rơ̆k rơngai.

Pô Wai Lăng bơngăt ƀing ta ăt kiăng ih hăng kâo hmâo tơlơi rơngai yua mơ̆ng bruă Ñu hmâo pơgiơ̆ng laih ƀơi kơyâo bơrơkal. Tơdah Ñu dưi pơklaih ƀing ta, sĭt Ñu ăt dưi djru pơgiơ̆ng hĭ abih tơlơi ƀing ta hlăk bơngơ̆t hăng gui kơtraŏ!

Jao bĕ abih bang tơlơi ƀlơ̆ng bơngơ̆t ƀing gih kơ Ñu, yua kơ Ñu wai lăng čem rong ƀing gih nanao. (1 Phirơ 5:7)

Mông anai, tơ̆ng krah khul tơlơi blơ̆ng bơngơ̆t, gleh pơmĭn kơ ih… Khua Yang kơ abih adai rơngit hlăk pơđar kơ ih jao bĕ abih bang tơlơi đĭ kơ Ñu. Brơi bĕ kơ Ñu dưm dăp laih anŭn ngă abih tơlơi anŭn tui hăng mông gal laih anŭn hơdră hiam klă Ñu! Ƀing ta kơnơ̆ng anăp jua pơmĭn nao kơ Ñu, pơmĭn kơ Boh Pơhiăp Ñu laih anŭn abih bruă Ñu hmâo ngă pơgiơ̆ng laih.

Tal dua, tơlơi kiăng pia amăng jơlan boh pơhiăp anai ƀu djơ̆ kiăng laĭ jing pơdơi gah kơ drơi jan… Khua Yang Yêsu pơhơdơr kơ tơlơi pơmĭn anai amăng Mathiơ 11:28 “Ơ abih bang mơnuih rơmơ̆n hăng gui kơtraŏ, rai bĕ pơ Kâo, Kâo či brơi kơ ƀing gih dŏ pơdơi.

Boh hră ‘dŏ pơdơi’ pơanai kiăng laĭ jing ‘hơđơ̆ng tŏng krah lu bruă mă’. Khua Yang Yêsu ƀu pơđar ƀing ding kơna khŏm pơdơi abih sa hrơi kŏm, wơ̆t dah Ñu pơtă kơ ƀing ta yua 1/7 hrơi mông kiăng pơdơi gah drơi jan (kiăng laĭ hrơi Sabat).

‘Dŏ pơdơi’ pơanai kiăng pia gah bơngăt ƀing ta khŏm hơđơ̆ng ƀơi anăp Ñu. Kiăng laĭ khŏm hơđơ̆ng pơmĭn Boh Pơhiăp Ñu tơ̆ng krah dơnai ur hia ană bă, ră ruai hăng Ñu ƀơi anih rao mŏng jam, sum ao hlăk lâp, pơlir hăng Ñu tơdang ngă lu mơta bruă yang đar rim hrơi.

Ama kơ ƀing ta ƀu kiăng ƀing ta gir glăm khul tơlơi kơtraŏ bơ kơnơ̆ng hơjan Ñu yơh dưi glăm. Tơ̆ng krah bruă lu la amăng tơlơi hơdip, Ñu kiăng ƀing ta lui hĭ abih tơlơi blơ̆ng bơngơ̆t, jao đĭ amăng tơngan Ñu, dŏ hơđơ̆ng hăng pơdơi amăng tơngan mơyang Ñu.

Rơkâo ƀing ta pioh mông iâu laĭ hrŏm hơbĭt
Ơ Khua Yang, hrơi anai kâo jao kơ Ih khul tơlơi pơmĭn kơtraŏ kâo hlăk bưp, kâo thâo krăn Ih ƀu brơi kâo dŏ amăng tơlơi kơƀah. Rơkâo kơ Ih pha brơi tơlơi dưi mơyang kiăng kơ kâo gưt tui laih anŭn hơduah ƀuh tơlơi pơdơi amăng Ih, kâo đaŏ Ih či čem rong kâo. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, hrơi anai ih hăng kâo čih bĕ abih khul tơlơi kơtraŏ ngă kơ ƀing ta ƀu hmâo mông pơdơi. Tơdơi kơ anŭn, pioh bĕ gah yŭ tơkai Khua Yang laih anŭn lưh lui hĭ abih bang! Kơđai kơ gui kơtraŏ hăng djŏp tơlơi blơ̆ng bơngơ̆t, brơi ƀing ta pioh bĕ tơlơi pơmĭn ƀing ta dŏ pơdơi hĭ laih anŭn hơin kơnang kơ Pô Wai Lăng Hiam Klă – jing anih pơdơi rơnŭk hơđơ̆ng kơ ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.