Lơ 25/02/2024: GƯT HIĂP HLOM ɃOM

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Khul bruă ƀing ta ngă hăng abih bang boh pơhiăp ƀing ta pơhiăp tơbiă leng tơbiă rai mơ̆ng amăng lăm pran jua. Khua Yang hluh klă rơđah abih bang tơlơi pơmĭn hăng ană mơnuih amăng lăm ƀing ta. Ñu hơ̆k mơak kơ tơlơi gưt hiăp hăng tơlơi hơdip huĭ pơpŭ sĭt kơ ană bă Ñu. Ƀing ta hơdip sa tơlơi hơdip bơmơak pran jua Khua Yang tơdang ƀing ta đup gưt Ñu hlom ƀom.

Hrơi anai, lơ 25/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Cassey Nathan tui hăng akŏ tơlơi hrăm GƯT HIĂP HLOM ɃOM.

“Yêhôwa mơak mơ̆ kơ tơlơi ngă yang čuh laih anŭn khul hlô mơnơ̆ng ngă yang, hloh kơ tơlơi gưt tui boh pơhiăp Ñu? Anai nê, tơlơi gưt hiăp hiam hloh kơ mơnơ̆ng ngă yang, tơlơi ngă tui hiam hloh kơ rơmuă triu tơno.” (1 Samuel 15:22)

Bơnah web jing gơnam phŭn arăng yua kiăng bơrơđah pran jua tơlơi pơmĭn. Amăng rơnŭk thŭn rơgơi anai, ƀing ta juăt lăng gah rơngiao lu hloh. Tui hăng tơlơi phiăn tơdang brơi đĭ rup amăng bơnah web tui anŭn yơh kâo ƀuh dŏ ƀlŏk yua kơ rup pơđah đĭ ƀu hăng tơlơi sĭt abih bang. Sĭt biă mă, ƀing ta hmâo yua laih lu khul mơta rup phinh hăng tơlơi bơngač klă rơđah laih anŭn tơnap biă mă kiăng thâo klă sĭt kơ rup hiam hmâo phiñ anŭn. Rơngiao kơ tơlơi anŭn, ƀing ta juăt khăp khul tơlơi rŏ dah rơgoh hloh jing khul tơlơi rơgoh sĭt hmâo tŭ-ư mơ̆ng Khua Yang.

Amăng Mathiơ 23, ƀing ta ƀuh Khua Yang Yêsu ƀuah kơ tơlơi plơ̆m ƀlơr. Ñu hmâo pơthâo hăng pơtă pơtăn kơ ƀing ding kơna amăng rơnŭk anŭn, amăng rơnŭk ƀing ta ră anai khŏm pơđing tơngia hmư̆, ngă tui laih anŭn gưt tui khul hmâo tơlơi pơtô amăng Hră Ơi Adai Pơhiăp anăm hmư̆ tui bruă ƀing git gai tơlơi đaŏ ngă kơnơ̆ng kiăng kơ arăng ƀuh đôč:
“Abih bruă gơñu ngă kơnơ̆ng kiăng kơ arăng ƀuh đôč. Lăng bĕ khul hrĕ bơnal čih jơlan Hră Ơi Adai Pơhiăp ƀơi anŭn gơñu tuang ƀơi athơi laih anŭn akă ƀơi tơngan gơñu jing prŏng dơ̆ pă. Laih anŭn pơtrŭn grua ao phyung gơñu kơ glong.” (Mathiơ 13:5)

Khua Yang Yêsu hiăp pơyol ƀing ta ƀing Pharisi, ƀing nai pơtô tơlơi juăt laih anŭn ƀing mơnuih dŏ amăng mơta tơlơi đaŏ jing ƀing mơnuih lăng gah rơngiao yom hăng tơlơi tơpă kơ ƀing gơñu samơ̆ amăng pran jua gơñu bă tơlơi pơ-ang pơgao. Khua Yang ƀu bơmơak ôh tơlơi hơdip plơ̆m ƀlor kơ ƀing gơñu. Yua kơ anŭn, Khua Yang laĭ ƀing mơnuih ngă bruă kar hăng anŭn jing mlŭk mơgu laih anŭn pơđar kơ ƀing gơñu khŏm ngă pơrơgoh hĭ abih bang tơlơi pơmĭn sat ƀai amăng pran jua ƀing gơñu. Găn mơ̆ng anŭn, Khua Yang kiăng ƀing ta khŏm bơngơ̆t nao pran jua amăng lăm kiăng kơ arăng tơdang ƀuh khul bruă ƀing ta ngă či pơčang rơđah rup kơ tơlơi hơdip Ñu.

Tơlơi Khua Yang Yêsu pơtô ƀu djơ̆ ôh tơlơi pơtô phrâo. Pơphŭn ñu, Khua Yang kiăng bơrơđah brơi kơ ƀing ta thâo yua kơ hơgĕt Ñu lăng tơlơi gưt hiăp kơ ƀing ta yom hloh kơ mơnơ̆ng ngă yang (1 Samuel 15:22). Amăng Tơlơi Pơgop Hơđăp, Ơi Adai atăt črâo kơ Môis kơ hơdră pơdơ̆ng sang khăn brơi kơ Ñu amăng hrơi tal blŭng amăng thŭn phrâo hmâo čih amăng hră Tơlơi Tơbiă 39-40. Rơngiao kơ anŭn Ñu dŏ atăt črâo kơ bruă dưm pioh khul gơnam djơ̆ anih ñu. Ƀu djơ̆ kơnơ̆ng rĭm gơnam hmâo pioh amăng anih phara ăt dŏ hmâo dơ̆ng mơ̆n đơđa gơnam hmâo pơrơgoh tui hăng tơlơi Ơi Adai atăt črâo kiăng kơ ngă tui. Tŏ tui kơ anŭn, Môis ngă tui tơlơi Khua Yang atăt črâo laih anŭn tơdang truač ia jâu brơi kơ Arôn kiăng kơ ngă bruă pơjao ngă khua ngă yang brơi kơ Ơi Adai ăt mơ̆ng Ơi Adai atăt črâo mơ̆n. Truh kơ hrơi đĭ sang khăn tơlơi guh kơang kơ Ơi Adai bă blai anih anŭn.

Amăng Tơlơi Pơgop Phrâo, drơi jan bơkơnar hăng sang yang kơ Yang Bơngăt Hiam dŏ. Khua Yang Yêsu abih pran jua lăng nao khul tơlơi pơmĭn hăng bruă ngă amăng pran jua ƀing ta. Yua kơ anŭn ƀing ta khŏm hơdip tơlơi hơdip rơgoh hiam laih anŭn kiăng kơ tơlơi ang yang Khua Yang bă blai amăng ƀing ta. Ƀing ta hơdip tơlơi hơdip ngă bơmơak kơ Khua Yang ƀu djơ̆ yua mơ̆ng jơlah bah ƀing ta samơ̆ yua mơ̆ng bruă ngă đup gưt hăng pran jua prăp rơmĕt mơtam kiăng kơ brơrơđah hmâo ƀŏ mơta Ñu dŏ hrŏm amăng tơlơi hơdip ƀing ta.
“Ih či črâo brơi kâo thâo jơlan kơ tơlơi hơdip; Ƀơi anăp Ih hmâo tơlơi mơak mơai rơbeh blai, gah hơnuă Ih hmâo tơlơi hơ̆k mơak nanao hlŏng lar.” (Tơlơi Adoh Hơđăp 16:11)

Yua kơ anŭn tơdang hơdip brơi kơ Khua Yang khŏm phŭn amăng pran jua ƀing ta ƀu djơ̆ ôh tơlơi pơmĭn jang jai amăng mông anŭn đôč. Ƀing ih khŏm hơdip hăng tơlơi ƀing ih ruah tơl kơ bưp Ama Tơlơi Khăp amăng anih Plei Hiam laih anŭn Ñu bơni kơ ƀing ih jing ding kơna tŏng ten hăng hiam klă.

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang yua kơ Ih hmâo yua tơlơi pơhrăm amăng hrơi anai kiăng kơ pơhơdơr kâo hơdơr kâo khŏm hơdip đup gưt laih anŭn ngă bơmơak kơ pran jua Ih. Ƀu djơ̆ kơnơ̆ng amăng boh pơhiăp đôč ôh samơ̆ tơlơi anŭn tơbiă rai mơ̆ng pran jua khăp kơ Ih hăng kiăng ngă bơmơak kơ pran jua Ih. Rơkâo kơ Ih djru kơ kâo nanao ngă tui tơlơi Ih atăt črâo amăng abih bang bruă wơ̆t kơ bruă prŏng ƀôdah bruă anĕt kâo hmâo bưp amăng tơlơi hơdip anai. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, ƀrơi ƀuăn rơ̆ng ngă tui Khua Yang atăt črâo amăng Hră Ơi Adai Pơhiăp kiăng kơ hơdip sa tơlơi hơdip gưt hiăp hăng rơgoh hiam amăng tơlơi hơdip rĭm hrơi kơ ƀing ih. Brơi hrăm hla tui bĕ tơlơi hơdip kơ Khua Yang Yêsu Krist laih anŭn jing pô pơhiăp pơala brơi kơ Ñu amăng lŏn tơnah anai. Brơi bĕ Boh Pơhiăp Ơi Adai pơblih kơ ƀing ih hăng djru kơ ƀing ih nanao bơrơđah pran jua đup gưt Ñu amăng gah lăm truh gah rơngiao. Brơi hơdip bĕ amăng tơlơi hmâo ƀŏ mơta Khua yang hăng ngă bơmơak kơ pran jua Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.