Yog cov neeg uas twb tau txais kev cawmdim lawm, cov ntseeg Vajtswv yuav loj hlob hauv txoj kev pehawm thiab nyob ze Vajtswv txhua hnub. Tiamsis tus uas peb tab tom pehawm nws nyiam cov neeg uas los cuag nws tag nrho nws lub siab thiab ntsujplig. Yog cov neeg muaj tus yamntxwv zoo li Yexus Khetos, peb yuav tau ua li cas rau tej koob hmoov uas Vajtswv pub rau peb thiab siv tej koob hmoov ntawd zoo li cas nyob hauv txoj kev pehawm Vajtswv kom thiaj coj txoj kev txhawb zog los txhawb tau lwm tus?
Hnub no, yog hnub 13/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Macnab dhau ntawm Zaj kawm TUS VAJTSWV NTAWM SAB NTSUJPLIG THIAB QHOV TSEEB.
“Rau qhov Vajtswv tsis xav kom peb ua dog ua dig, tiamsis nws xav kom peb ua muaj hauvpaus hauvntsis thiaj muaj kev kaj siab” (1 Kauleethaus 14:33).
Ua ntej uas ntsib Vajtswv, kuv yog ib tug neeg muaj lub siab tawv. Dhau ntawm kuv tus kheej lawm, kuv yeej tsis quav ntsej txog leej twg li. Nyob rau ib ceg kaum twg ntawd, qhov no nws yog rau peb txhua tus, txog rau thaum Vajtswv txoj kev hlub ua siab ntev ntws los rau hauv peb lub siab dhau ntawm Vaj Ntsujplig (Loos 5:5). Tiamsis Tswv Yexus tau los cuag kuv.
Vajtswv tib leeg tub tau tso kuv dim ntawm kuv tus kheej tus yamntxwv thiab pub rau kuv muaj lub neej nrog lub homphiaj tshiab. Thiab Vaj Ntsujplig pib hloov pauv kuv lub siab tawv. Txawm yog kuv yog ib tug neeg xav ntau los, Vajtswv maj mam los cuag kuv, ua ntej Vajtswv hloov pauv kuv lub hlwb los ntawm muab txhua yam hauv kuv tso rov qab kom muaj chaw nyob hauv kuv. Vajtswv ua rau kuv pom txog lub tswv yim uas Vajtswv tau kav lub ntiajteb no li cas, thiab tib neeg yog cov uas muaj tus yamntxwv zoo li Vajtswv, peb yuav tau coj li cas. Kuv tau ua txhaum Vajtswv txoj kevcai, thiab twb yog tej yam phem ntawd ua rau kuv saj tsis tau Vajtswv txoj kev ywj pheej thiab Vajtswv txoj kev zoo. Kuv yuav tau cia Vajtswv rov qab tso txhua yam hauv kuv lub neej tshiab no nyob hauv Yexus Khetos.
Tiamsis tom qab ntawd kuv pom txog qee yam. Kuv yeej tsis nyob ze Vajtswv tiag. Kuv xav tias kuv twb nkag siab thiab mloog Vajtswv lus lawm. Vajtswv ua rau kuv ntsia pom lub siab yog lub hauv paus ntawm txojsia (Pajlug 4:23). Tiamsis cuag li kuv lub siab thiab lub hlwb nws nyob tsis tau ua ke. Kuv cheem tsum Vajtswv ua rau kom kuv lub siab loj hlob tuaj, thiab Vajtswv qhia rau kuv paub tias kuv txoj kev hlub pub rau Vajtswv yuav loj hlob tuaj thaum uas kuv puv npo Vajtswv tus ntsujplig. Vajtswv tau kuv coj mus cuag Vajtswv:
“Lub sijhawm ntawd tabtom los, thiab lub sijhawm ntawd twb los txog lawm; cov neeg uas pehawm Leej Txiv yuav pehawm ntawm sab Ntsujplig thiab qhov tseeb, rau qhov Leej Txiv xav kom sawvdaws muaj nplooj siab dawb paug pehawm nws tiag. Vajtswv yog Ntsujplig, cov uas pehawm Vajtswv yuav tsum pehawm ntawm sab ntsujplig thiab qhov tseeb.” (Yauhas 4:23-24).
Vajtswv xav kom kuv pehawm Vajtswv tsis yog tsuas yog los ntawm txoj kev xav xwb, tiamsis kuv yuav tau hlub Vajtswv tag kuv lub hlwb, tus ntsujplig, txhais tias hlub Vajtswv tag siab, tas ntsujplig.
Thiab kuv thiaj pib txoj kev nrhiav Vajtswv lub siab ob peb xyoos. Nyob hauv txoj kev ntawd, kuv pom tias: Vajtswv yog tus Tswv ntawm sab ntsujplig thiab qhov tseeb. Thaum pib Vajtswv yog txojlus (logos) tus uas muab lub ntuj tso nyias nyob muaj nyias chaw (Yauhas1). Thiab Vajtswv kuj yog tus Tswv ua haujlwm saum dej, los ntawm Vajtswv txoj kev tsim ib puas tsav yam, Vajtswv ua rau lub ntiajteb dhau los zoo nkauj kawg nkaus raws li tej uas peb pom (Chivkeeb 1).
Vim peb txhua tus ntseeg rau ntawm Tswv Yexus Khetos peb thiaj tau cawm dim ntawm txojkev txhuam, thiab thaum uas Vajtswv cawm peb, Vajtswv kuj pub rau peb muaj Vajtswv tus ntsujplig. Txhais tias peb tau txais kev ywj pheej, vim Vajtswv yog ntsujplig, Vajtswv tus ntsujplig nyob qhov twg, ces kev ywj pheej nyob qhov ntawd (2 Kauleethaus 3:17). Tamsim no peb tau txais kev ywj pheej. Yog Vajtswv tus Ntsujplig thaum ub tau tsim lub ntiajteb zoo kawg nkaus no los ntawm qhov uas tsis muaj dabtsi, ces tamsim no kuj muaj cuab kav pub rau peb tej koob hmoov kom ua dejnum nyob rau hauv Vajtswv tsev neeg, thiab ua dejnum pub rau lub ntiajteb uas puas tsuaj no. Ib yam li Paulus tau hais nyob hauv 1 Kauleethaus 14:26, tej koob hmoov no yuav ua kom muaj nqis rau lwm tus dhau los ntawm peb txoj kev pehawm Vajtswv nrog lwm tus ntseeg ua ke.
Thaum peb tuaj ua ke, peb txhua tus tau Vajtswv pub txoj koob hmoov, muaj peev xwm, tej zaug yuav yog ib zaj nkauj, ib zaj kawm sab ntsujplig, txhais Vajtswv tejlus, siv tej ntawd los sib txhawb.
Peb txhua tus nyias yuav tau coj nyias yam los sib txhawb vim Vaj Ntsujplig tau tso peb dim thiab coj peb los nyob ua ke, kom peb nthuav tawm Vajtswv.
Paulus twb ceeb toom Pawg Ntseeg. Qhov tseeb nyob hauv Vajtswv txojlus qhia rau peb paub tias Pawg Ntseeg yuav tsum nyob muaj chaw hauv txoj kev pehawm ua ke, thiab sawv daws puav leej yuav tau txais kev ywj pheej los nthuav tawm nyias txoj koob hmoov los sib txhawb nyob hauv Yexus Khetos lub cev. Ib yam li ntawd, nyob hauv lub tsev me me ntawd, peb yuav tawg paj txi txiv, Vajtswv pub rau peb muaj pib nyob hauv Pawg Ntseeg kom txhua tus yuav loj hlob.
“Yog li ntawd cov kwvtij, nej cia li muab siab rau qhia Vajtswv txojlus, tiamsis nej tsis txhob txwv tus uas hais tau lus txawv txawv. Txhua yam uas nej ua, nej yuav tsum ua kom zoo thiab tsis txhob lam ua dog ua dig.” (1 Kauleethaus 14:39-40).
Thov caw nrog kuv peb thov Vajtswv ua ke:
Kuv tus Vajtswv, kuv thov qhuas Koj yog kuv tus Vajtswv ntawm sab ntsujplig thiab qhov tseeb. Koj tau qhia rau kuv paub tias paub koj yog txojsia ntev dhawv mus ib txhis, kuv xav kom paub tseeb koj thiab tau nplua mias nyob rau hauv koj txojsia. Thov Vajtswv koj qhib kuv lub qhov muag ntawm sab ntsuj plig kom kuv paub koj, thov koj cob kuv dhau ntawm txoj kev pehawm, kom peb ci qhov pom kev rau koj. Thov Vajtswv ua rau kom kuv lub sijhawm pehawm koj thaum nyob ib leeg lossis nrog Pawg Ntseeg pehawm ua ke puav leej tau txhawb zog. Peb thov txhawb nqa koj yog peb txhua tus Vajtswv.
Kuv thov hauv Tswv Yexus Khetos lub npe. Amees.
Cov kwv tij txhua tus, koj puas paub tias yus tab tom pehawm Vajtswv thiab ua dejnum pub rau tus Vajtswv uas yog qhov tseeb? Thov Vaj Ntsujplig puv npo rau hauv koj lub siab, kom Vajtswv pab kom koj tawg paj txiv thaum koj siv tej koob hmoov los ua Vajtswv dejnum. Nyob twj ywm rau hauv txoj kev pehawm Vajtswv ua ke – yog tus Vajtswv uas ntawm sab ntsujplig thiab qhov tseeb – thiab nthuav tawm koj lub npe rau tej neeg ib ncig.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply