Nyob hauv lub neej nrog tus Tswv mus, cov ntseeg Vajtswv txhua hnub tau nqua hu kom yuav tau ua kom tus neeg qub tuag mus thiab ua ib lub neej tshiab nrog Tswv Yexus ua ke. Thaum tseem nyob hauv sab nqaij tawv no, peb ntsib ntau yam kev txhaum, nyob ntiajteb, tus kheej txoj kev tsis mloog lus. Yog li Vajtswv txojlus yuav coj cov ntseeg kev zoo li cas kom thiaj ua tau lub neej muaj yeej?
Hnub no, yog hnub 25/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Aaron Bull dhau ntawm Zaj kawm TSO TEJ KEV PHEM TSEG.
“Tej kev sim siab uas nej raug yeej yog tej kev sim siab uas sawvdaws raug. Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev” (1 Kauleethaus 10:13).
Kuv nyiam mloog Jimmy Buffett cov nkauj. Txawm yog muaj ib txhia zaj nkauj kuv tsis thooj yim pes tsawg, tiamsis kuv phim cov nkauj no. Muaj ib zaj nkauj uas kuv nyiam heev vim nws ua rau kuv xav txog tej lub ntsiab lus ntawm sab ntsujplig hauv Vajluskub. Zaj nkauj ntawd muaj lub npe hu tias “Qhov chaw tsaus ntuj”
Zaj nkauj no nws yog xav hais txog ib qhov chaw uas tib neeg muab tej yam tsis zoo tso rau hauv. Ntawm no tsis yog thaj chaw rau nyiaj txiag, tiamsis yog tib neeg qhov chaw zais kev txhaum.
Txawm yog koj ntseeg thiab tsis ntseeg los tej kev phem uas tus sau txoj nkauj tau hais txog puav leej muaj nyob hauv Vajluskub. Piv txwv li: Khav theeb, ntshaw ua nkauj nraug, tsis tswj tus kheej, npau taws, ntshaw noj haus, nyiam nrog lwm tus sib txeeb, thiab tub nkeeg. Ib qhov uas kuv nyiam zaj nkauj no yog thaum kuv paub tias kuv tau ua ib yam txhaum nyob hauv tej kev txhaum no, ces cov ntsiab lus ntawm zaj nkauj ntawd nws pheej ntxhia hauv kuv lub taubhau. Koj puas xam tau tias kuv tau ua txhaum qhov kev txhaum twg? Cuag li ntawm no yog txoj kev uas Vajtswv ntuas kuv txog tej kev txhaum uas kuv tab tom raug rub mus rau hauv.
Ib feem ntawm zaj nkauj muaj lub ntsiab lus li no:
“Oh tej cwjpwm tsis zoo – ua rau tib neeg lub siab qaug laim, ua rau tib neeg lub neej puas tsuaj”.
Zaj nkauj no hais txog ib qhov tseeb: tej kev phem ntawd muaj ib hnub twg yuav dhau los ua mlom nyob rau hauv peb lub neej. Txawm yog peb yuav siv zog zais los ntawm txoj kev twg los nws yeej yuav nrhuav tshem peb lub neej yog tias peb pheej tu tej kev txhaum ntawd. Tej kev phem no luag lwm tus yuav ntsia pom dhau ntawm peb tej chaw ua haujlwm, peb tsev neeg thaum uas peb nrog tej menyuam nyob lossis tej txij nkawm ua ke. Thiab peb paub tias tej kev phem ntawd tsis tsim nyog muab nthuav tawm rau tej neeg ib ncig pom.
Vajtswv txojlus hais nyob hauv Teev Npe 32:23 “…Yog nej tsis ua li ntawd, nej yuav raug txim vim nej tej kev txhaum.”
Peb yuav daws tej kev txhaum no zoo li cas? Yuav ua li cas peb thiaj yuav khiav dim tej ntawd? Lo lus teb hais tias yuav tau thov Vajtswv, thov Vajtswv ntau dua thiab muaj siab thov tiag tiag. Peb yuav tau thov kom Vajtswv zam txim rau peb ib qhov kev txhaum zuj zus. Hais meej meej qhov kev txhaum uas peb tau ua thiab lees tej kev txhaum ntawd tiag tiag, thov Vajtswv pab kom peb tsis txais tej ntawd. Tiamsis tus txiav txim nws yog peb seb peb yuav xaiv raws li Vajtswv lub siab nyiam lossis raws li yus lub siab ntshaw. Vajtswv cog lus yuav tsis muaj ib zaum twg cia tej kev sim siab ntawd nws tshwm tuaj tshaj peb lub zog, yuav qhib kev kom peb tawm taus. Vim Vajtswv txojlus hais meej meej nyob hauv Vajluskub:
“Tej kev sim siab uas nej raug yeej yog tej kev sim siab uas sawvdaws raug. Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev” (1 Kauleethaus 10:13).
Lwm nqe ntxiv nyob hauv zaj nkauj: “Tso tseg txoj kev hais daws yus tus kheej, Tswv Ntuj nyob saud yeej paub zoo txhua yam”
Ntawm no yog qhov tseeb, Vajtswv yog tus ntsia pom txhua yam, peb yuav tsis muaj ib yam dabtsi zais tau Vajtswv! Yog li hnub no, koj puas tseem tuav rawv tej yam tsis zoo ntawd hauv koj lub neej? Koj puas txiav txim siab vam khom Vajtswv lub zog muab koj tus cwjpwm daws pov tseg?
Thov caw nrog kuv peb thov Vajtswv ua ke:
Peb ua Vajtswv Koj tsaug koj niaj hnub nrog nraim peb hauv txojkev dawbhuv. Koj paub tias peb yuav tau tawm tsam nrog kev txhaum thiab peb tus neeg qub txhua hnub. Thov Vajtswv zam txim vim muaj ntau zaug peb cia tej yam tsis zoo ua puag peb lub neej. Thov Koj tus ntsujplig puv npo kuv lub siab, taw qhia rau peb paub tej kev txhaum twg ua rau koj nyuaj siab. Thov Vajtswv pab kom peb muaj kev txawj ntse paub ua lub neej nyob rau tej hnub peb ua qhua nyob lub ntiajteb no. Kuv thov hauv Tswv Yexus Khetos lub npe. Amees.
Cov kwv tij, peb yog cov neeg uas tau suav tias ncaj ncees los ntawm Tswv Yexus Khetos cov ntshav, tau rub tawm hauv qhov tsaus ntuj los rau ntawm qhov kaj. Yog li, puas tseem muaj qhov kev txhaum twg tab tom tuav koj lub neej cia? Muaj lub neej qub twg tab tom ua rau lwm tus ntsia tsis pom Yexus Khetos dhau ntawm koj lub neej? Thov Vajtswv zam txim thiab mloog Vajtswv lo lus caw: muab tej tus cwjpwm qub uas pheej ntxias peb yav dhau los daws pov tseg thiab caum qab lub neej nthuav tawm qhov kaj pub rau lwm tus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply