“Kuv mam thov Vajtswv rau koj” yog ib lo lus uas ib txwm hnov nyob hauv cov ntseeg Vajtswv. Vim li cas thov Vajtswv rau lwm tus ho tseem ceeb heev li ntawd? Peb puav leej paub thov Vajtswv pab ua rau Vajtswv zoo siab, thiab txoj kev zoo siab thaum txais tau yog koj paub tias Vajtswv tsis tso cov neeg uas hu Nws lub npe tseg. Dhau los ntawm Vajtswv tej lus teb, koj txoj kev ntseeg yuav yim hnub yim loj hlob nyob hauv txoj kev nrog tus Tswv mus ua ke.
Hnub no, yog hnub 24/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm IB LEEG THOV VAJTSWV RAU IB LEEG.
“Tus Tswv teb Eliyas tej lus thov, ces tus tub ntawd txawm ua pa thiab rov muaj sia lawm” (1 Vajntxwv 17:22).
Tau txais kev kho zoo tus mob ung thư. Muaj nyiaj los them nqi tsev tom qab ntau hnub. Lub neej txijnkawm tom qab sib nrauj rov qab tau kho zoo. Pom txoj kev txhawb zog thaum nyuaj siab. Khiav dhau txoj kev xav tua tus kheej pov tseg. Nrhiav tau lub hauv paus ntawm txoj kev ua neej. Ntawm no yog qee lo lus ua tsaug kuv txais tau tom qab uas ntau xyoo thov Vajtswv pab rau lwm tus.
Kuv twb thov Vajtswv rau tsheej txhiab tus tib neeg los ntawm txoj kev thov Vajtswv hauv CBN, nyob rau lub sijhawm thov Vajtswv ua ke hauv tsev ua haujlwm, hauv tej kev tshaj tawm, ntawm tej rooj sab laj, nyob hauv tej chaw pehawm Vajtswv, nyob rau tej lub sijhawm mus tshaj tawm Txojmoo Zoo thiab nyob tom tej kev. Kuv nrhiav tau txoj kev zoo siab thaum uas pab thov Vajtswv rau lwm tus, tshwj xeeb yog lawv tej teeb meem lub sijhawm ntawd cuag li lawv tag kev cia siab thiab tsis muaj kev cia siab ntxiv lawm. Zoo kawg nkaus thaum uas kuv paub tias kuv cov lus thov muaj hwjchim ua rau lwm tus muaj kev hloov pauv nyob hauv lawv lub neej. Kuv paub qhov no tsis yog los ntawm kuv los, tiamsis yog los ntawm Vajtswv los, yog tus pab kuv, kho zoo kuv tej mob nkeeg, thiab pub kom kuv rov qab muaj lub neej zoo.
Tiamsis ntau zaug kuv pom txoj kev thov Vajtswv rau lwm tus tseem yooj yim dua li uas thov rau yus tus kheej. Txawm yog saj tau lub hwjchim ntawm txoj kev thov Vajtswv los, kuv paub tias kuv kuj cheem tsum lwm tus thov Vajtswv rau kuv thiab. Tshwj xeeb yog nyob hauv tej kev cheem tsum uas tseem ceeb. Vajtswv siv cov ua haujlwm nyob hauv CBN, tej kwv tij nyob hauv Pawg Ntseeg, nrog tej neeg zej zog, tej phooj ywg thiab ntau zaug yog cov neeg uas kuv yeej ib txwm tsis tau paub dua yav dhau los tau thov Vajtswv rau kuv tej lub sijhawm zoo li ntawd. Kuv nco muaj lub sijhawm, kuv cheem tsum kom Vajtswv teb kuv tej lus thov txog kuv tej kev txomnyem tsis muaj nyiaj them nqi tsev kawm ntawv qib siab, thiab kuv txais tau kev thov Vajtswv pab los ntawm tej kwv tij ib ncig. Tomqab ntawd Vajtswv pab kuv muaj nyiaj los kawm kom tias kuv txoj kev kawm, thiab paub tias txoj kev zoo siab puv npo rau hauv kuv lub siab thaum kuv paub tias Vajtswv tau teb kuv tej lus thov. Kuj muaj tej lub sijhawm, kuv cheem tsum Vajtswv ua tus coj kuv nyob rau hauv kuv tej haujlwm uas kuv ua nyob rau hauv CBN. Thiab thaum uas sib tham ua ke nrog cov phooj ywg ua haujlwm ua ke, Vajtswv pub rau kuv tawm tau ib lub tswvyim tshiab. Tej tswv yim no kuj yuav tau ua nrog tej phooj ywg ua ke nyob thoob hauv lub qab ntuj no.
Lub zog ntawm lo lus thov nthuav tawm meej meej nyob hauv 1 Vajntxwv 17. Eliyas thiab tus pojntsuam uas tu yawg tau saj tau lub zog loj ntawm Eliyas thov Vajtswv rau pog tus tub uas tab tom yuav tuag.
Eliyas thov Vajtswv, “Ces Eliyas txawm qhau cev hlo pw tsuam tus tub ntawd lub cev peb zaug thiab thov Vajtswv hais tias, “Tus Tswv uas yog kuv tus Vajtswv, thov koj rau siav rau pa rau tus tub no kom rov muaj sia lauj!” (1 Vajntxwv 17:21). Eliyas paub tias Vajtswv muaj cai ua rau txojsia rov qab muaj nyob rau hauv tus me tub no dua. Eliyas ntseeg Vajtswv thiab cia Vajtswv ua qhov txujci no tshuav yawg siv nws txoj kev ntseeg los thov Vajtswv.
Vajluskub rov qab hais ntxiv zaj xwm txheej “Tus Tswv teb Eliyas tej lus thov, ces tus tub ntawd txawm ua pa thiab rov muaj sia lawm” (1 Vajntxwv 17:22). Tsis yog tsuas yog Eliyas tej lus thov tseem ceeb heev rau Vajtswv kho zoo tus menyuam mos xwb, tiamsis nws tseem yog tus pojntsuam no txoj kev ntseeg thiab thaum uas nws ntseeg tias Eliyas muaj cuab kav thov Vajtswv rau pog tus tub sawv rov qab los kuj tseem ceeb ib yam li ntawd. Thiab lub hwjchim tau ua rau pog tus tub sawv rov qab los puag thaum ub los txog niaj hnub nim no.
Txawm yog hnub no koj muaj teeb meem dabtsi los Vajtswv yeej zoo siab hlo mloog thiab cawm koj.
Thov caw nrog kuv peb thov Vajtswv ua ke:
Tus Tswv peb ua Koj tsaug vim peb muaj feem tau thov Vajtswv pab rau peb tej kwv tij nyob ib ncig peb. Thov Vajtswv pab kom peb muaj lub siab tawv thov Vajtswv pab thiab ib leeg pab ib leeg ris nra, kuj ntuas kom peb nco ntsoov tias Vajtswv muaj cuab kav ua tau txhua yam tshaj peb txoj kev xav, kom koj cov menyuam tsis qaug zog tiamsis ib leeg yuav siv zog thov Vajtswv pab rau ib leeg.
Kuv thov hauv Tswv Yexus Khetos lub npe. Amees.
Cov kwv tij txhua tus, koj puas tseg sijhawm los thov Vajtswv pab rau tej neeg nyob ib ncig ntawm yus? Cov npe uas koj pheej hais rau Vajtswv paub nyob hauv yus tej lus thov? Tej yam zoo twg koj tau saj tau thaum uas koj ntsia pom Vajtswv teb koj tej lus taij thov? Ruaj siab rau txoj kev thov Vajtswv, thiab yuav saj tau Vajtswv lub hwjchim nyob rau hauv koj tej kev cheem tsum thiab tej neeg ib ncig.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.