Geh duh broă Yàng Tòm Trồ la dô bơta nđàc dờng mơ Yàng ai pà bol he in, mơya gơs tŭ lơi bol he gơlơh bòl glar tòm tŭ duh broă Yàng sơl? Digơlan bol he neh phi oă ngăn phan nàng duh broă Yàng; mơya ồng mò, oh mi git sơl, ală bơta phi să bol he dê Yàng in, kung be broă Yàng dê la di pal mơ rơp geh Yàng dòp hơ.
Ngai do, ngai 04/08/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Tori Troncone bơh tơnggume: BƠTA NĐÀC MÀNG RYŬ
‘Mơya Yàng Jesu đơs lah: “Lòi tĕ dò khai dê. Ñchi bơh tài bol mê lơh kalke khai in taih? Khai neh lơh broă niam Añ in. ‘ (Mak 14:6)
Añ la dô nă cau kơrhia ngan tòm broă ngùi jền priă. Ò dê la añ ò gơboh gơ bài bơta ngùi jền priă ò, mơya añ kơp kòñ lòi ròng jền priă mơ ngùi gơ dô bă jak chài.
Lài mơ tŭ blơi dô nơm phăn lơi kas ngăn, añ pal lòi kòp ngai, tian gơs kòp poh nàng pơn dròm khà jền gơ mơ ală tiah pa is ndai tai, kung be sac rwah oă nàng lòng sền rgơi blơi ală phăn hơ̆ gơwèt mơ khà jền gơ mù rlau tai hala ò. Lài mơ tŭ lơh nền blơi behơ̆, añ sùm lùp is să tòm he lah: “Blơi behơ̆ di pal sơl?”
Bulah añ jòng să la añ chài rgơi tòm broă blơi phan gơwèt mơ priă gơ mù rlau, mơya añ ò gơ dan yoăm mơ Yàng tŭ cơn đòa lòt mơ Yàng. Cơn đòa lòt mơ Yàng os pal cang bol he pal phi să gan dê oă broă pa is.
Digơlan bơta gơ wèt mơ jền priă, tŭ jơ, ală bơta rơndap tap sèng is să tòm dê hala tòm broă lơh bol he dê, ò dê mìng behơ̆ lơm ò mơya găm oă bơta ndai tai mơ bol he pal cang ơn pơdơng Yàng in. Tŭ añ git añ pal ơn dô êt pơnah Yàng in, añ neh lùp is să tòm he, digơlan dê pal hala ò?
Mak 14:3-9 yal wơl sèng yal bơh YàngJesu geh bong mơñà tòm Bethani. Dô nă cau ùr neh cèng at dô nơm gri mơ lŭ màng gơs mơñà ƀô bơlhu kas ngan, khai jan bơcah gri tuh mơñà hơđang bồ Yàng Jesu. Bơta hơ̆ gơtha lah cau ur do neh ngùi jơh ală priă lơh ơpah tòm dô nam khai dê tài bơh mò kòñ yò tơngguh Yàng Jesu la Bơtau mơ la Bơtau Dong Klàs mò dê. Gơs bàr pe nă cau nggùi gùt dar tềng hơ̆ neh gơhào gơjràñ dê ală bơta bol khai bàn:
‘Gơs bàr pe nă cau gơjrañ mơ đơs bal lah: “Ñchi bơh tài lơh pròng preh mơñà ƀô bơlhu behơ̆ taih? ‘ ‘Bơh mơñà do rgơi tac geh rlau pe rhiang dơnie nàng pà cau rƀah lơòi in.” Mơ bol hơ̆ yoam lah khai. ‘ (Mak 14: 4-5)
Mơya Yàng Jesu ò lah pơrhơng mò.
‘Mơya Yàng Jesu đơs lah: “Lòi tĕ dò khai dê. Ñchi bơh tài bol mê lơh kalke khai in taih? Khai neh lơh broă niam Añ in…. làm jơh dunnia tòm tiah lơi Jơnau Niam geh bơto yal, gen kung yal wơl broă khai neh lơh hơ̆ nàng kah bơh khai.” ‘ (Mak 14: 6,9)
Do la dô bơta duh khoai hàng mơnĕ ngan, bềng tơl bơta phi să, gơwèt mơ tơnggu yò tơngguh Yàng Jesu – la Bơtau Dong Klàs, hơ̆ kung la bơta găm tơngkah kòp nă bol he tus ngai do tơn! Bol he gŏ mò pal phi phan kas ngan tŭ kơp kòñ bong mơña Yàng Jesu in. Ò dê mìng ngùi dô êt mơña lơm, hala mìng dô êt bềng gòi, mơya cau mò do ò pơlai ñchi lơi nàng geh duh broă Yàng Jesu.
Bol he rcang sir nàng lơh bơta dròm be hơ̆ ò ơ? Digơlan bol he gam rngòt tŭ pal ơn rài kis he dô bă wil tơl Yàng in tài bơh bol he rngòt cau ndai kơlôi sơ nơng bol he la bơrngơl gơla. Tŭ bol he phi să tài bơh sơn đan Yàng dê, ală cau gùt dar war wĕ digơlan ò rgơi wờng jơh. Kung dròm be ală cau tòm Bethani, bol khai kơlôi lah phi să Yàng in mìng la jơh tŭ jơ, jền priă hala pràn kơldang lơm. Mơya Yàng Jesu ho lah: “Dilah cau lơi kòñ gơboh di Añ, gen rơp prap gàr jơnau Añ jê, Bèp Añ rơp kòñ gơboh di khai, bol hi rơp lòt tus hơ khai mơ ơm sùm mơ khai. ‘ (Jang 14:23)
Tŭ bol he kòñ gơboh Yàng mơ kis Yàng in, bol he git lah să tòm rơp mut tòm rài tơnơ̆ gam sum sum mơ Yàng. Lài òr, digơlan bol he neh pơnđơl lơh bềng tơl nùs nhơm he gan dê bơta ntoat jat ală bơta roh lơm dunnia dê, mơya jơh bơta hơ̆ ò rgơi dròm mơ bơta tòm klac kòñ gơboh Yàng Jesu dê.
‘Yàng rơp sơnio añ in git gùng bơta kis; Di đap Yàng gơs bềng lìu bơta hòn chò, Di đah ma Yàng gơs bơta chò hòp gam sùm sùm.’ (Đơs Crih 16:11)
Dan jà bol he dô nùs bal tòm bơta hòi dan:
Khoai Yàng, ò gơs bơta lơi chò hòp rlau bol kòn in tŭ geh git Yàng mơ geh kis tòm Yàng. Ưn ngài Yàng tài bơh neh ai pà bol kòn in bơta nđàc nàng lơh gơs ală gri mơ ù tòm tê Yàng dê. Dan Yàng dong kòl bol kòn sum git ưnngài tài bơh geh duh broă tòm dà lơgar òhềt lơnggơr. Dan Yàng bơtơl tai bơta pràn kơldang hơđang bol kòn in, nàng bol kòn ò gơplơ̆ nùs hala bol glar, mơya sơlo cơn đòa rlau tai mơ gơlik cồng nha tòm bơta duh broă Yàng.
Ơ ală ồng mò oh mi kòñ gơboh, đal git bơta nđàc mơ bơta nđàc mơ Yàng Tòm Trồ ai pà bol he in, ồng mò, oh mi ho be lơi mơ Yàng tiah? Bol he kơp kòñ geh duh broă Yàng hala ò, hala kư̆ ơm tòm bơta kis yau mơ lơh òbat đah pơnah hwềng soàn sơl? Kư̆ pơnjat kơnòm dê Yàng nàng Kơnràñ dong bol he geh ntào dờng tòm bơta duh broă Yàng. Dan bơta duh rngòt ồng mò oh mi dê cèng tus bơta tòm gơl ală cau gùt dar war wĕ in.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply