Nyob hauv lub neej, peb pheej npaj txoj kev rau peb taug tiamsis peb ho hnov qab lawm hais tias Vajtswv muaj lub homphiaj zoo tseg rau peb lub neej. Tej lub sijhawm muaj kev txomnyem, peb lub hlwb nug ntau lo lus nug tias vim li cas, ntau zaug tseem chim rau Vajtswv; tiamsis nyob rau hauv Vajtswv txoj kev ntsia, Vajtswv paub yam dabtsi yog yam uas zoo tshaj plaws tseg rau peb, qhov tseem ceeb saib peb puas yuav kam ntseeg Vajtswv tej lus thiab ua lub neej raws li tej lus lossis tsis kam xwb.
Hnub no, yog hnub 03/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm HNOV THIAB NTSEEG.
“Kuv qhia tseeb rau nej hais tias: tus uas mloog kuv Ius thiab ntseeg tus uas txib kuv los, tus ntawd thiaj tau txojsia ntev dhawv mus ibtxhis. Nws yuav tsis raug txiav txim, rau qhov nws twb tawm hauv txojkev tuag los tau txojsia lawm.” (Yauhas 5:24a).
Tau ob peb lub hli los kuv nrhiav seb puas nrhiav tau ib lub tsev phim kuv. Thaum no kuv twb kawm tiav tsev kawm ntawv qib siab thiab tab tom nrog niam txiv nyob ua ke, tiamsis kuv yeej xav kom muaj lub neej ywj pheej. Yog li kuv thiaj nrhiav tej xov xwm luag tso rau saum fuab cua nrog rau tej ntaub ntawv tshaj xo, nug tej neeg txheeb ze saib puas muaj lub tsev twg lawv muab ntiav nyob ze thaj chaw kuv ua haujlwm.
Tej qhov chaw uas kuv saib dhau puav leej kim tshaj tej nyiaj uas kuv khwv tau, lossis nyob rau tej qhov chaw tsis ncaj kev, lossis tsis phim rau kuv txoj kev cheem tsum. Kuv tag kev cia siab. Kuv cia siab tias kuv yuav nrhiav tau ib qhov chaw zoo los nyob, thiab kuj yog ib lub sijhawm pib dua tshiab hauv kuv lub neej. Ntawd yog: Kawm tiav tsev kawm ntawv qib siab, tawm mus nyob sab nraud, pib mus ua haujlwm. Kuv twb ua tau ob yam tau hais saum toj, thiab kom ua tiav qhov haujlwm txuas ntxiv, thaum no kuv yuav tau mus nrhiav ib qhov chaw nyob.
Tiamsis Vajtswv lub sijhawm tsis zoo li tej uas kuv cia siab. Ua ntej uas nrhiav tau qhov chaw nyob phim kuv, kuv yuav tau nrog niam txiv nyob ua ke ib xyoos ntxiv thiab. Thaum pib, kuv hnov nkees, kuj tsis tshua ntseeg rau tej uas Vajtswv ua hauv kuv lub neej, tiamsis yuav ntxov pom tias tej uas ntiajteb tab tom hais rau kuv, nws tsis zoo li lub homphiaj uas Vajtswv npaj tseg rau kuv.
Vajluskub nyob hauv Yauhas 5 sau tseg: thaum Tswv Yexus kho tus neeg tuag tes tuag taw tau 40 xyoo zoo, cov thawj coj saib xyuas tau nkag los thiab nkaug Tswv Yexus vim Tswv Yexus kho tus neeg mob no rau hnub Xanpataus. Pauv qhov uas lawv zoo siab thiab xav tsis thoob txog tej uas Tswv Yexus tau ua pub rau tus mob no, lawv ho tsis lees yuav Tswv Yexus txoj kev kho zoo vim yog lub caijnyoog.
Ntau zaug peb yuav hnov yooj yim thaum uas tsuas nyeem Vajluskub thiab hais tias cov thawj coj no yuam kev lawm, vim li cas lawv ho ntsia tsis pom tej uas Tswv Yexus ua, lossis peb tseem hais tias peb yuav tsis muaj hnub ua raws li txoj kev no. Tiamsis puas muaj tseeb yuav zoo li no, vim ntau zaug peb tsuas saib tej nyuag xwm txheej tsis muaj qab hau (yam li cov thawj coj tsuas saib hnub Xanpataus xwb) tsis ntsia pom Tswv Yexus lub hwjchim tiag.
Tsis yog tias muaj tej lub sijhawm kuj zoo li cov thawj coj no thiab los? Peb tsuas ntsia pom tej yam tsis muaj zog, thiab ntsia tsis pom tej yam uas Vajtswv xav npaj tseg rau peb. Tsis paub peb puas tab tom muab tej yam zoo uas Vajtswv npaj tseg rau peb ua poob lawm, ntau zaug peb tsis zoo li tej uas peb cia siab tos?
Kuj nyob rau hauv tshooj no, Tswv Yexus hais tias:
“Kuv qhia tseeb rau nej hais tias: tus uas mloog kuv Ius thiab ntseeg tus uas txib kuv los, tus ntawd thiaj tau txojsia ntev dhawv mus ibtxhis. Nws yuav tsis raug txiav txim, rau qhov nws twb tawm hauv txojkev tuag los tau txojsia lawm” (Yauhas 5:24a).
Lub ntsiab lus ntawm no saib nws yooj yim heev puas yog? Tsuas mloog thiab ntseeg xwb, thiab koj yuav muaj lub neej txojsia ib txhis. Tiamsis, peb pheej ua raws li peb tus kheej lub siab nyiam, tsis nrhiav Vajtswv lub siab nyiam. Yog li, ntau zaug peb xav nrhiav kev khwv txhua yam los ntawm peb lub zog, tshwj xeeb nyob rau hauv tej lub caijnyoog hloov pauv hauv lub neej, ces nqe Vajluskub no rov qab ntuas kuv tias Vajtswv yog Vajtswv, thiab Vajtswv ua tiav raws li tej uas Vajtswv tau hais. Yog li, peb muaj kev cia siab thiab ntseeg Vajtswv nyob rau hauv peb txhua txoj kev cheemtsum!
Thov caw nrog kuv peb thov Vajtswv ua ke:
Tus Tswv, tej lub caij hauv lub neej, peb tsis nkag siab tas thiab kuj ntsia tsis pom tej yam zoo uas Vajtswv twb npaj txhij tseg rau peb. Thov Vajtswv koj muab peb lub siab thiab lub hlwb tig los rau ntawm koj thaum uas peb nyob hauv tej kev sim siab thiab tsis ntseeg koj; thov pab kom peb muaj kev txaus siab thiab tau so hauv koj txoj kev kaj siab. Kuv thov hauv Tswv Yexus Khetos lub npe. Amees.
Cov kwv tij, hnov, ntseeg thiab ua raws li yog ib txoj kev uas cov ntseeg Vajtswv tau loj hlob nyob hauv txoj kev ntseeg ntawd; Hniaj hnub nim no, koj puas tseem tab tom mloog Vajtswv tej lus thiab ntseeg rau tej lus ntawd? Vajtswv lub hwjchim yeej tsis muaj ib yam dabtsi tav kom muaj nrim, tsuas yog koj ntseeg siab rau Vajtswv thiab mus raws li Vajtswv ua tus coj xwb. Kav tsij ntseeg Vajtswv dhau ntawm txhua lub caijnyoog hauv koj lub neej, thiab koj yuav nrhiav tau koob hmoov nrog Nws mus ua ke.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply