Puas muaj zaum twg koj hnov tsis txaus siab txog qhov uas tsis muaj siab ua ib yam dabtsi twg li, tsuas yog vim tej nyuag xwm txheej me me tshwmsim ib ncig ntawm koj? Ntau zaug tej nyuag lus ntawd saib cuag tsis muaj dabtsi ho cuam tshuam loj txog rau peb txoj kev ua haujlwm. Peb pheej xav tias tej ntawd nws yooj yim cia dhau mus, tiamsis tsis yog li ntawd, tej kev xav tsis zoo ntawd nws yuav ua ib tug mob thiab yog ib lub nra nyhav heev hauv peb lub siab, nws tswj peb txoj kev txiav txim siab thiab peb tej haujlwm. Yog li, yuav ua li cas kom peb thiaj yuav tiv dhau tej kev xav ntawd thiab txais yuav yam uas zoo tshaj plaws?
Hnub no, yog hnub 10/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm TSIS TXAUS SIAB.
“Nej yog Vajtswv haivneeg. Vajtswv hlub nej thiab xaiv nej cia ua nws cov menyuam lawm; yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev. Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm.” (Kaulauxais 3:12-15).
“Tus Tswv, kuv tsis nkag siab tias dabtsi tab tom tshwmsim tuaj! Kuv yuav tau ua kom tiav kiag qhov haujlwm no. Hnub no twb yog hnub kawg lawm!” Kuv taij thov Vajtswv twj ywm, siv zog sau kom tiav zaj lus thov uas kuv maj nroos ua.
Teeb meem yog li no, thaum pib kuv muaj ntau lo lus nyob hauv kuv lub paj hlwb. Kuv siv zog sau ceev li ceev tau kom tsis pub ib lo twg hauv kuv lub hlwb ploj mus. Xwb tim, kuv tus txiv tawm plaws ntawd. Nws hais ib yam dabtsi. Kuv tsis nco tias ntawd yog dabtsi lawm. Nws kuj tsis tseem ceeb pes tsawg. Tiamsis kuv nco tias kuv tau co co taub hau. Thiab dhau ntawd kuv cov lus hauv paj hlwb ploj tag.
Yeej tsis tshuav ib yam dabtsi li lawm. Kuv tsis paub yuav sau dabtsi ntxiv. Kuv tsuas nyeem mus nyeem los tej uas kuv twb sau tau lawm tiamsis yeej tsis muaj ib lub tswv yim tshiab twg tuaj. Tsis muaj ib lo lus twg. Tas kuv tsuas paub ua twjywm hu Vajtswv.
Tamsim ntawd, kuv pom ib yam tau tshoov kuv siab: Yuav tau zam txim rau kuv tus txiv.
Tus dabtsi? Yeej tsis muaj dabtsi yuav zam txim li. Yam uas nws hais ntawd yog tej nyuag me me xwb, vim li cas kuv ho yuav tau zam txim rau tej ntawd?
Tiamsis kuv pom meej meej tias: yuav tau zam txim rau kuv tus txiv. Thiab kuv tau ua li ntawd.
Tamsim ntawd, kuv rov qab muaj cov lus tshiab tuaj dua, kuv rov qab ua kuv qhov haujlwm ntxiv. Hnub ntawd, kuv kawm tau tias peb yooj yim tsis txaus siab rau ib yam dabtsi twg thiab yam ntawd yuav coj txoj kev puas tsuaj loj heev los raug rau peb.
Saib cov thwjtim nyob hauv Yauhas tshooj 6. Thaum Tswv Yexus qhia Vajtswv txoj lus, ntau tus tsis txaus siab. Vim kev tsis txaus siab thiaj ua rau lawv ua poob txoj kev nkag siab tej uas Tswv Yexus xav qhia rau lawv, thiab lawv ua poob txoj koob hmoov cawmdim uas Vajtswv xav kom lawv tau txais.
“Muaj Tswv Yexus ntau tus thwjtim hnov tej lus no: “Cov lus no khwv dhau leej twg yuav ua cas mloog tau?”
Tiamsis Tswv Yexus paub ntsoov cov thwjtim tab tom sib ntxhi txog tej lus no Tswv Yexus thiaj hais tias: “Cov lus no nyuaj kawg li. Leejtwg thiaj yuav totaub? “Tiamsis Yexus paub hais tias lawv yws txog tej lus uas Yexus hais, Yexus thiaj hais rau lawv hais tias, “Tej lus uas kuv hais ntawd ua rau nej nyuaj siab los? Yog hais tias nej pom Neeg Leej Tub rov qab mus nyob saum qhov chaw uas nws ibtxwm nyob los lawm, nej ho yuav xav li cas? Vajtswv tus Ntsujplig ua tau rau neeg muaj sia, tiamsis neeg nqaij tawv ua tsis tau li ntawd. Tej lus uas kuv qhia rau nej ntawd yog ntsujplig thiab yog txojsia. Tiamsis nej cov muaj qee leej tsis ntseeg kuv tej lus.” (Yexus hais li ntawd, rau qhov thaum chivthawj nws twb xub paub lawm hais tias, nws cov thwjtim tus twg yog tus tsis ntseeg thiab tus twg yog tus uas yuav ntxeev siab rau nws.) Thiab Yexus hais ntxiv tias “Twb yog vim li no kuv thiaj hais rau nej tia: yeej tsis muaj ib tug los cuag kuv, tsuas yog tus uas Leej Txiv tshoov nws lub siab thiaj los cuag kuv xwb.”
Vim li ntawd, cov neeg uas caum Yexus qab muaj coob leej thiaj tso Yexus tseg thiab tsis nrog nws mus lawm. Yog li ntawd, Yexus thiaj nug nws kaum ob tug thwjtim hais tias, “Nej ne, nej yuav tso kuv tseg thiab los? “
Ximoos Petus teb Yexus hais tias, “Tus tswv, yog peb tso koj tseg, peb yuav mus cuag leejtwg? Tsuas yog koj tib leeg tej Ius xwb, thiaj pub tau txojsia ibtxhis rau neeg. Nimno peb ntseeg thiab paub tseeb hais tias koj yog tus dawbhuv uas Vajtswv txib los.” (Yauhas 6:60-69).
Kuv tus txiv tsuas hais ib los xwb muaj cuab kav ua rau kuv hnov tsis txaus siab. Qhov ntawd ua rau kuv cim civ nug tias, tsis paub kuv yuav zoo li cas thaum uas hnov Tswv Yexus tej lus hnub ntawd… tsuas yog kuv tus txiv ib lo lus dhau mus xwb ua rau kuv tsis muaj siab xav ua haujlwm. Yog li yog tias kuv kuj tsis zoo siab rau Tswv Yexus tej lus ces tej zaug kuv yeej yuav ua tsis tau ib yam dabtsi rau Vajtswv li.
Txoj kev xav ntawd ua puas tsuaj loj heev rau peb thiab twb yog vim li ntawd Vajtswv xav kom peb yuav tau zam txim.
“Nej yog Vajtswv haivneeg. Vajtswv hlub nej thiab xaiv nej cia ua nws cov menyuam lawm; yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev. Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm. Qhov uas tseemceeb dua tej ntawd huv tibsi, nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke. Nej cov uas Yexus Khetos hu los koom ua ib lub cev, nej yuav tsum cia Yexus Khetos txojkev ncaj ncees coj nej lub neej. Nej yuav tsum niaj hnub ua Vajtswv tsaug.” (Kaulauxais 3:12-15).
Yog cov ntseeg Vajtswv, peb yuav tau siv zog txhua hnub los ntawm lub siab txo hwjchim thiab puv npo kev hlub. Txhob cia txoj kev tsis txaus siab ntawd cuam tshuam koj thiab tswj koj lub neej. Pauv qhov uas koj tsis txaus siab cia siab tias peb yuav xaiv txoj kev zam txim thiab txoj kev kaj siab.
Thov caw nrog kuv peb thov Vajtswv ua ke:
Tus Tswv thov pub kom kuv muaj lub siab hlub, ua siab ntev kom tiv dhau txoj kev tsis txaus siab, txoj kev chim nyob hauv lub neej txhua hnub. Thov Vajtswv qhib peb lub hlwb, kom peb yuav ntsia pom tej yam zoo nyob rau hauv txhua yam, thiab tsis cia tej kev xav tsis zoo tswj lub neej. Thov pab kom kuv paub zam txim paub muab tej kev tsis txaus siab, kev tu siab, kev iab siab uas tseem khuam rau hauv kuv lub siab tso tseg, kom tsis ua lub nra nyhav tsuam kuv, muaj kev kaj siab nrog Koj mus. Kuv thov hauv Tswv Yexus Khetos lub npe. Amees.
Cov kwv tij sawv daws, ntau zaug qhov uas peb saib luag lossis luag saib peb tsis zoo ntawd lossis ib lo lus hais nyhav xwb kuj txaus ua rau peb tsis zoo siab ib hnub. Tiamsis txhob cia txoj kev tsis txaus siab ntawd nkag los thiab tswj koj lub neej ua rau Vajtswv tsis tau ntsej muag. Pauv rau qhov ntawd, qhib koj lub siab los txais yuav txhua yam hauv txoj kev hlub thiab kev ua siab ntev. Thaum peb xaiv zam txim, ces txoj kev tsis txaus siab ntawd yuav ploj mus. Thaum ntawd tsis yog tsuas tseb kev kaj siab rau hauv peb lub siab xwb tiamsis tseem nthuav tawm txoj kev kaj siab ntawd mus pub rau tej neeg ib ncig. Hnub no koj yuav xaiv zam txim rau yam dabtsi?
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply