Geh tŭ lơi bol he gơ lơh sơ êt sơ ềl tian gớs ò rgơi dồ broă lơi, bơh dồ broă dêt rhền neh gơlik gớs sơl? Geh tŭ dơ̆, broă he kơ lôi lah ò gớs kwơ ò lơh he in kơ lôi mờ gơ tús mờ cồng nha he dê. Bol he mờng òs kơ lôi rơp toh sang dồ bă bwơn soh, mờ ya ò, bơta kơ lôi sơ nơng iơh gơ jat mờ kơn jơ̆ tòm nùs, rơ hời gơ tup tús dê bol he lơh. Gen tàng, lơh bè lơi bol he rgơi lòt găn ală bơta sơ êt sơ ềl do nàng dòp rò bơta niam rlau jơh?
Ngai do, ngai 10/8/2024, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl Lina Johnson bơh tơnggume BƠTA SƠ ÊT SƠ ỀL.
“ Behơ̆ oh mi là cau sac rwah Yàng Tòm Trồ dê, cau sàng goh mờ đềt mềr Kơnràñ dê, gen soh tĕ nùs nđàc sơngit, kơ̆ dơn, pơndêt să, niam lơnhơn, kong ơt. Dilah cau do gớs bơta yoam joh mơ cau ne, gen kong ơt tĕ bal mờ gơp mơ toh glài tĕ bal mờ gơp; be Yàng neh toh glài oh mi bè lơi, gen oh mi kung pal toh glài behơ̆ sơl.” (Kô-lô-se 3:12-13)
“Ơ Yàng, kòn ò git broă lơi neh gơ lik gớs! Kòn păl càng lơh sỉr broă mơ tŭ do! Ngai do là ngai lồi dut!” añ răc dăn ís mờ Yàng, pơn đơl cih tai baì hòi dăn kòp ngai mờ añ găm lơh dô bă sơ băc ngăn.
Sơn rờp là bè do, bơta cih sră añ di là bềng lìu ngăn, añ cih hơ đăng bàn phím dồ bă sơ bac sơ bang nàng ò loì hŭi bơta lơi tòm bồ tơng ngoh añ dê. Ni sơ na, bau klau añ tús, cau bơyô añ dồ broă lơi mò añ kung ò kah hơ là bơta lơi, bơh gơ sền dê là ò kwơ. Añ mìng kah añ neh rơng nô ƀồ, mờ tai, añ ò rgơi cih chi lơi tai..
Ò gớs chi lơi găm tai tòm añ. Añ ò git cih chi lơi tai. Añ đok wơl ală bơta añ neh cih mò ò geh bơta lơi pa. Ò gớs dồ chữ lơi gơ lik. Añ mìng git rac dăn ís mờ Yàng.
Ni sơ na, añ geh bơta chồl tòm nùs: Toh glài teh cau bơyô in?
Bơta lơi taih? Ò geh broă lơi nàng toh glài. Jơnau cau bơyô añ đớs là dêt rhền ngăn. Ñchi bơh tài añ păl toh glài bơta hơ̆ taih?
Mơ ya, añ sền gŏ dồ bă loh làng lah: Păl toh glài cau bơyô añ in. mờ añ neh lơh jat.
Gen dê tŭ hơ̆, jơnau añ koñ cih neh gơ tús dồ bă lìu làc ngăn, gen añ pơnjat wơl broă añ lơh. Tòm ngai hơ̆,añ neh họk dô bơta lah bol he rơp gớs bơta sơ êt sơ ềl, mờ bơta sơ êt sơ êl hơ̆ rơp cèng tŭs cồng nha ò niam dồ bă kơn jơ̆ ngăn.
Sền dê ală cau bơtê tòm sră Jăng tap 6: Tơ nơ̆ mờ Yàng Je-su neh ràng tơlik JơNau Kơnràñ dê, oă cau gớs bơta sơ êt sơ ềl. Bơta sơ êt sơ ềl hơ̆ lơh bol khai in lời hŭi bơta git wă ờ Yàng Jê-su ai bol khai in, mờ lơì hŭi bơta nđàc dong klàs mờ Yàng Tòm Trồ koñ bol khai dòp rọ̀.
“ oă cau bơtê Kơnràñ dê tŭ kơ no jơnau do gen đớs: “ Jơnau do là kal ke ngăn, ñcau rgơi git wă taih?”
Mơ ya Yàng Jê-su git lah ală cau bơtê yoam bơh jơnau hơ̆ gen đớs lah: “Jơnau do lơh bol kòn ís gơ tup tís ơ?” bè hơ̆, di lah bol kòn gŏ Kòn Mơ Nus guh hơ tiah Kơnràñ neh ơm lài òr, gen bè bol kòn rơp lơh taih? Hơ̆ là hwềng ai bơta kís, poac să ò kwơ dô êt lơi. Ală jơnau Añ neh đớs mơ bol mê hơ̆ là hwềng mờ bơta kís. Mơya dô êt nă tòm bol kòn gớs cau ò dòn.” Bơh Yàng Jesu neh git bơh sơnròp ñcau la cau ò dòn, ñcau la cau rơp pơrlơ̆ dră di Kơnràñ: “Kơnràñ đơs lah: “Tài bơh hơ̆ tàng Añ neh đơs mơ bol mê lah dilah Bèp ò ai, gen ò gơs cau lơi rgơi lòt tus hơ Añ.”
“Bơh tŭ hơ̆, gơs oă cau bơtê Kơnràñ dê ruc wơl, ò lòt jat Kơnràñ tai.”Behơ̆ Yàng Jesu đơs mơ jơt bàr nă cau bơtê lah: “Ai bol mê kung kòñ ruc wơl sơl ơ?”
“Simôn Pier ho Kơnràñ lah: “Ơ Kơnràñ, bol hi rơp lòt jat ñcau taih? Kơnràñ gơs ală jơnau bơta kis gam sùm sùm dê.” “Bol hi neh dòn mơ git lah, Kơnràñ la Bơtau sàng goh Yàng Tom Trồ dê.”(Jăng 6:60-69)
Mìng dồ jơnau đớs dêt rhền cau bơyô neh tơl lơh añ in sơ êt sơ ềl. Bơta hơ̆ lơh añ păl lùp ís să tòm, gen he rơp bè lơi tŭ kơ no jơnau đớs Yàng Jê-su đớs tòm ngai hơ̆… Mìng dồ jơnau đớs lòt găn cau bơyô neh lơh añ in sơ êt sơ ềl mờ ò rgơi lơh broă ndai. Gen tŭ añ sơ êt sơ ềl mơ jơnau đớs Yàng dê, gen ngăn añ sơ lơ ò rgơi lơh broă lơi Kơnràñ in.
Bơta sơ êt sơ ềl hơ̆ là pràn ngăn-mờ hơ̆ ngăn tàng Kơnràñ koñ bol he họk bơta toh glài băl.
Behơ̆ oh mi la cau sac rwah Yàng Tom Trồ dê, cau sàng goh mơ đềt mềr Kơnràñ dê, gen soh tĕ nùs nđàc sơngit, kơ̆ dơn, pơndêt să, niam lơnhơn, kong ơt. Dilah cau do gơs bơta yoam joh mơ cau ne, gen kong ơt tĕ bal mơ gơp mơ toh glài tĕ bal mơ gơp; be Yàng neh toh glài oh mi be lơi, gen oh mi kung pal toh glài behơ̆ sơl. Hơđang jơh ală bơta hơ̆, soh tĕ nùs kòñ gơboh, la che tơrbŏ bơta wil tơl dê. Lòi tĕ bơta lơngap lơngai Bơtau Krist dê at bồ tòm nùs oh mi, la bơta lơngap lơngai mơ oh mi neh geh hòi tus tòm dô nơm să jan; kung gơs tĕ nùs ưnngài” (Kô-lô-se 3:12-15)
Là ală cau lòt jat Yàng, păl pơn đơl kòp ngai băl mờ nùs pơndêt să mờ bềng lìu nùs koñ gơboh. Bañ lời bơta sơ êt sơ ềl gơ tup tòm raì kís bol he. Pơ lơ wơl mờ bơta sơ êt sơ ềl, kơp koñ bol he rơp sak rhwah bơta toh glài mờ geh ring lơngai
Dan jà bol he dô nùs bal tòm bơta hòi dan:
Khoai Yàng, dăn ai bol kòn in nùs koñ gơboh, dờng ơ nàng nàng lòt găn bơta sơ êt sơ ềl, gơ jrăñ rmăñ tòm raì kís kop ngai. Dăn Yàng sòl àng bồ tơng ngoh bol kòn, nàng bol kòn rgơi sền gŏ bơta niam tòm kòp broă, mờ ò ai bơta kơ lôi sơ nơng iơh gơ tup tòm rài kís kòn. Dăn dong kòl kòn git toh glài mờ sang sơ bì jơh ala bơta kơn jơ̆, sồt rmăñ, srằt bơtang găm gơ ơm tòm hwềng nùs, nàng bol kòn gớs bơta ring lơngai mờ cơn đoà jat Kơnràñ. Kòn hòi dăn tòm sơn đăn Yàng Jê-su Krist, A-men.
Ală ồng mọ, oh mi koñ gơboh, geh kòp tŭ mìng dồ bơta sền ò niam hala dồ jơnau đớs ò niam kung tơl lơh tơ lah dồ ngai ring lơngai. Mơ ya, bañ lời bơta sơ êt sơ ềl mut mờ kơr yăn rài kís gớs kwơ Yàng in. pơr lơ̆ mờ hơ̆, pờ dờng hwềng nùs, dòp rọ ală bơta bơh nùs koñ gơboh mờ dờng ờ nàng. Tŭ he sak rwha toh glài, bơta sơ êt sơ ềt rơp dô roh. Tŭ hơ̆, bol he ò mìng tăm bơta ring lơngai tòm nùs he, mờ kung cèng bơta nđàc hơ̆ tús dê cau gut dăr. Ngai do, bol he rơp sack rhwah toh glài dê bơta lơi?
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply