Tag kev cia siab yog ib feem uas peb yuav zam tsis dhau nyob hauv lub neej, thiab mob tug mob tu siab (trầm cảm) yog ib yam mob uas nim no muaj ntau tug raug. Thaum peb niaj hnub nyuaj siab thiab chim siab peb yooj yim poob mus rau qhov uas xav nyob ib leeg thiab xav muab txhua yam tso tseg, yam li uas tsis muaj dua ib txoj kev twg nyob tom hauv ntej. Tiamsis nyob rau tej lub sijhawm ntawd, nco qab ntsoov tias peb yeej tseem tshuav ib txoj kev cia siab: Leej Txiv saum ntuj yeej tseem xyab tes mus pab peb dim ntawm qhov chaw tsaus ntuj.
Hnub no, yog hnub 26/08/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dina Sleiman dhau ntawm Zaj kawm THAUM KOJ XAV TSO TSEG TXHUA YAM.
“Kheev lam kuv tuag thaum kuv tseem nyob bauvkuv niam plab lossis tuag thaum yug poob nthav los… Yog kuv ntxov tuag, ces nimno kuv twb tau so thiab.” (Yauj 3:11,13)
Puas tau muaj zaum twg koj poob mus rau txoj kev tag kev cia siab txog qib uas cim civ nug tias: “Kheev lam kuv tuag thaum kuv tseem nyob hauv kuv niam plab lossis tuag thaum yug poob nthav los… Yog kuv ntxov tuag, ces nimno kuv twb tau so thiab (Yauj 3:11,13)? Txoj kev tag kev cia siab yog ib feem uas peb yuav zam tsis dhau nyob rau hauv lub neej, ua rau peb tos ntsoov ib yam dabtsi twg kom peb tawm tau mus deb tshaj tej uas ntiajteb no yuav coj los.
Tej zaug koj yuav xav tsis thoob thaum uas paub txog tej no: Muaj txog cuaj tug tib neeg muaj kev ntseeg nyob loj hauv Vajluskub twb tau xav tau tuag mus , nyob rau lub sijhawm tsaus ntuj hauv lub neej. Ntawd yog Yauj, Lenpekas, Laxees, Mauxes, Daniyees, Eliyas, Yelemis, thiab Yaunas. Txoj xov zoo yog tsis muaj leej twg nyob hauv lawv cov no poob rau hauv txoj kev tag kev cia siab mus ib txhis li.
Yuav poob ib lub sijhawm ntev heev kom Yauj rov qab nrhiav tau txoj kev kaj siab. Nyob rau lub sijhawm txomnyem ntawd, Yauj tej phooj ywg cem yawg, hais tias yawg tau ua txhaum thiab tej zaug Vajtswv tab tom rau txim rau yawg. Tej lus ntawd yeej pab tsis tau li – thiab yeej tsis phim rau Yauj, vim Xatas thiaj yog tus nyob tom qab yawg tej kev txomnyem. Thaum kawg Yauj tau tiv thiab kov yeej txhua txoj kev sim siab los ntawm lub siab ntseeg Vajtswv, thiab Vajtswv tau cawm yawg dim ntawm lub caijnyoog txomnyem.
Nyob rau ntawm Eliyas, peb pom meej tias txoj kev uas Leej Txiv saum ntuj tau tshua txog nws tej menyuam nyob rau tej lub sijhawm tsaus ntuj hauv lub neej. Thaum Eliyas poob rau txoj kev tag kev cia siab, Vajtswv tau tu yawg thiab ua siab ntev rau yawg.
Nyob hauv 1 Vajntxwv tshooj 19, Vajtswv txib tim tswv los pab Eliyas, nqa mov thiab dej los rau yawg haus. Tom qab ntawd, Eliyas tau Vajtswv pab kom yawg pw tsaug ib tsig zog kom rov qab muaj zog. Thaum sawv, tim tswv thiaj txhawb yawg zog, thiab mus rau ib qhov chaw tshiab, ntsia pom ib yam tshiab. Nyob ntawd, Vajtswv txhawb yawg zog los ntawm ib lub suab mos muag, ua rau kom yawg rov qab muaj kev cia siab, thiab pub rau peb muaj ib lub homphiaj tom ntej.
Thaum koj ntsib ib txoj kev tag kev cia siab twg lossis poob rau ib txoj kev tu siab twg, nco ntsoov tu koj tus kheej ntawm sab nqaij tawv thiab sab ntsujplig tib si. Noj kom txaus, haus dej rau lub cev, so kom muaj zog. Nrhiav ib qhov chaw tshiab, mloog Vajtswv lub suab. Tej zaug Vajtswv yuav coj koj kev, saib xyuas koj lossis Vajtswv yuav coj koj mus rau ib tug neeg uas muaj kev txawj ntse, ib tug kws txawj nplig siab lossis ib tug kws tshuaj pab kom koj zoo.
Vajtswv niaj hnub nplig koj siab lub sijhawm uas koj ntsib tej kev txomnyem, saib xyuas koj thaum uas koj lub siab puas ntsoog, ntxiv zog rau koj thaum uas koj tab tom qaug zog, thiab Vajtswv xav kom kho zoo koj tus ntsujplig!
Vajtswv tsis xav ntsia pom peb tsis muaj kev cia siab thiab xav kom peb tuag mus. Tiamsis peb kuj tsis tas yuav ntshai txoj kev tuag. Pauv rau qhov ntawd, ib yam li Xetefanaus tau tuag rau tus Tswv lub npe, peb yuav tau npaj txhij los txais yuav txojsia ib txhis nyob hauv Vajtswv kev tshwm ntsej muag.
“Tiamsis Xatefanaus puv npo Vaj Ntsujplig tus Dawbhuv, nws tsa qhovmuag saib saum ntuj ; nws pom Vajtswv lub tshwjchim uas ci ntsa iab pom Yexus sawv ntawm Vajtswv sab xis… Thaum lawv tabtom muab pobzeb ntaus Xatefanaus, Xatefanaus thov Vajtswv hais tias, “Tswv Yexus, thov koj coj kuv tus ntsujplig mus nrog koj nyob! ” Xatefanaus txhos caug ntua thiab hais nrov nrov hais tias, “Tus Tswv! Thov koj zam txim rau lawv.” Thaum nws hais li ntawd tas, ces nws txawm tu siav nrho lawm (Tes Haujlwm 7:55, 59-60).
Thov kom Vajtswv ntxiv lub zog thiab lub siab tawv rau koj, ib yam li kho zoo tej qhov txhab nyob hauv koj lub siab. Hnub no, yuav tau tseg ib mentsis sijhawm los qhia txog tej kev mob siab, kev nyuaj siab pub rau Nws. Tseg sijhawm los txais yuav Vajtswv txoj kev txhawb zog – mloog Vajtswv lub suab coj koj kev mus ntxiv lawm tom ntej.
Thov caw nrog kuv peb thov Vajtswv ua ke:
Tus Tswv, kuv thov muab txhua txoj kev mob siab thiab kuv tej kev txhawj xeeb fij rau koj. Thov Vajtswv txhawb kuv zog thiab nplig kuv lub siab, coj txoj kev kaj siab thiab kev cia siab los rau kuv. Thaum kuv hnov qaug zog thiab tag kev cia siab, thov Vajtswv coj kuv kev, pab kom kuv ntsia pom koj qhov pom kev hauv qhov tsaus ntuj. Thov pub lub zog rau kuv kom kuv mus ntxiv, thiab muaj kev ntseeg kom muaj kev cia siab rau Vajtswv txoj kev hlub kev tiv thaiv. Kuv thov hauv Tswv Yexus Khetos lub npe. Amees.
Cov kwv tij, thaum koj hnov tias kov tsis yeej txhua yam hauv lub neej no, thov txhob muab tso tseg. Muab koj lub nra nyhav, kev mob siab fij rau Vajtswv. Vajtswv nrog nraim thiab saib xyuas koj txhua lub sijhawm, zoo siab rub koj thiab coj txoj kev kaj siab los rau koj. Vajtswv lub suab mos muag ntawd niaj hnub txhawb koj, thiab Vajtswv txhais tes yuav rub koj tes nce. Cia siab tias koj yuav xaiv tuav Vajtswv txhais tes, thiab cia Vajtswv coj koj tiv dhau txhua lub qhov tob hauv lub neej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply