Zaj nkauj muaj lub npe tias “Caij Nkoj Tawm” muaj ib ntu hais tias: “Ntau tus vim ua xyem xyav thiaj li tsis paub kev mus, tsuas sawv ntawm ntug ntsia pom hiav deb, tsis kam tsis mus yeej tsis tau paub hiav deb hiav dav li cas”.
Tseeb tiag, peb muaj coob tug tsis kam “caij mus” rau ntawm tej thaj chaw “tob”, yog qhov chaw uas peb tsis tso siab. Ua lub neej pub rau tswv Yexus yog peb yuav tsum tso peb tej thaj chaw tso siab tseg, ua Vajtswv haujlwm thiab pab cov neeg txomnyem, txhawb nqa Vajtswv hauv lub ntiajteb no.
Hnub no, yog hnub 06/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ana Zugheri dhau ntawm Zaj kawm KHIAV TAWM NTAWM QHOV CHAW TSO SIAB.
“Thaum lawv hnov li ntawd, lawv tsis thuam Petus lawm; lawv ua Vajtswv tsaug hais tias, “Nimno Vajtswv qhib kev rau lwm Haivneeg los ntseeg kom lawv thiaj tso lawv tej kev txhaum tseg thiab tau txojsia.” (Tes Haujlwm 11:18).
Kuv nyob nraum ntus nroog Houston hauv cheeb tsam Texas. Thaj chaw kuv nyob huam vam sai heev rau ob peb xyoos dhau los. Twb yog vam meej li no yog li kuv thiaj tsis txhua mus rau hauv plawv nroog lawm. Muaj qee zaug kuv tseem hais ua si tias kuv tab tom ua neej rau ib thaj chaw ywj pheej thiab tau zoo dhau heev lawm tiag.
Leej twg los twb paub txoj kev loj hlob, kev kawm, thiab txoj kev koom tes pab tej pej xeem nws tseem ceeb npaum cas. Ntau xyoo dhau los, kuv koom tes rau tej tsev kawm ntawv, tej Pawg Ntseeg, thiab tej haujlwm hauv lub zej zog kuv nyob. Kuv mus pab lwm tus thiab koom tes rau ntau txoj haujlwm hauv cov pej xeem. Kuv ntseeg hais tias, dhau tej haujlwm no, kuv yuav ua tau qauv zoo rau kuv tej menyuam txog Yexus Khetos – uas yog ib tug muaj lub siab ua dejnum, paub pab lub zej zog ris nra. Tiamsis qhov tseem ceeb dua ntais, tej lub sijhawm zoo li ntawd yog lub sijhawm zoo rau peb qhia Txojmoo Zoo rau tej neeg ib ncig peb. Dhau lub sijhawm mus, peb tsev neeg yeej nyiam ua tej haujlwm no.
Muaj ib tes haujlwm uas kuv hnov nyiam ua tshaj yog pab cov neeg uas thawj zaug tuaj rau hauv Tuam Tsev. Kuv nyiam nrog lawv thiab txhawb lawv, tsis yog cov uas tuaj tshiab xwb, tiamsis tseem yog cov uas nyuam qhuav los txais yuav Tswv Yexus thiab. Kuv hnov txaus siab rau txoj haujlwm no thiav xav tias kuv twb ua tiav Tswv Yexus lo lus samhwm tseg lawm, thiab txhua yam ntawd tabtom yog qhov chaw uas kuv hnov tso siab, vim thaj chaw ntawd kuv tau ntsib tej tus neeg zoo ib yam li kuv.
Tiamsis kuv kawm tau tias thaum peb hnov tau zoo rau peb lub neej tamsim, ces tej zaug ntawd ho yog lub sijhawm uas peb yuav tau khiav tawm – khiav tawm ntawm qhov chaw tso siab – mus raws li Vajtswv lub suab hu tseg rau peb lub neej.
Vajtswv twb nthuav tawm qhov no rau peb nyob hauv phau Tes Haujlwm tshooj 11. Peb pom Petus qhia Txojmoo Zoo rau lwm haiv neeg, tsis yog Petus haiv neeg. Petus tau “mus saib lwm Haivneeg uas tsis ua kevcai txiav thiab tseem nrog lawv noj mov ua ke thiab”, twb yog li no nws thiaj raug cov ntseeg uas ua kevcai txiav thuam (11:2,3). Petus twb tau tawm ntawm qhov chaw tso siab mus nrog cov neeg uas tsis tau paub dua yawg sib tham ua ke. Txawm yog yuav raug thuam los Petus hais tias nws tab tom ua raws li Vajtswv tej lus samhwm tseg, thiab qhia Txojmoo Zoo rau lawv yam tsis ntshai li. Thaum kawg lwm haiv neeg thiaj txais tau kev cawmdim.
“Thaum lawv hnov li ntawd, lawv tsis thuam Petus lawm; lawv ua Vajtswv tsaug hais tias, “Nimno Vajtswv qhib kev rau lwm Haivneeg los ntseeg kom lawv thiaj tso lawv tej kev txhaum tseg thiab tau txojsia.” (11:18).
Ua ntej uas muaj kabmob kis Covid, kuv tsev neeg txiav txim siab tawm ntawm peb qhov chaw tso siab mus. Txhua hnub so, peb npaj khoom thaum sawv ntxov thiab tsav tsheb mus rau ib qhov chaw deb thaj chaw uas peb nyob. Peb coj Vajtswv txojlus hnub so mus rau thaj chaw ntawd, yog ib thaj chaw tsis vam meej li ntawm peb nyob. Pom tej menyuam pluag thiab txomnyem, thiab yog tej menyuam uas tsis tau hnov dua txog Tswv Yexus. Tseeb tiag, peb twb kav tawm ntawm peb qhov chaw tso siab thiab mus.
“Vajtswv twb pub Vaj Ntsujplig tus Dawbhuv rau lwm Haivneeg ib yam li nws pub rau peb cov uas ntseeg tus Tswv lawm thiab. Vajtswv twb pub rau lawv lawm, kuv yuav txwv Vajtswv los yeej tsis tau li.” (11:17).
Thaum peb tawm ntawm peb qhov chaw tso siab thiab mus, peb yuav ntsib tej kev sim siab. Qhia Txojmoo Zoo tseem yog ib yam nyuaj rau peb tiamsis kuv ntseeg tias Vajtswv tabtom pob peb mloog Nws lus thiab Vajtswv yuav pab peb. Thaum kuv pib qhib qhov ncauj, Vajtswv tus ntsujplig pib ua haujlwm hauv cov ntseeg ntawd thiab hauv kuv tus kheej (11:15). Txawm yog kuv yuav muaj ntsis tshee thiab ntshai los Vajtswv twb cawm tau ntau tug.
Koj yuav ua li cas kom koj thiaj kav tawm ntawm koj qhov chaw tso siab thiab mus? Koj yuav qhia Txojmoo Zoo rau leejtwg? Thiab koj tab tom tos yam dabtsi?
Thov caw nrog kuv peb thov Vajtswv ua ke:
Tus Tswv, ua lub neej nyob ywj siab ntev los ua rau kuv ntshai thiab thaub qab thaum kuv ntsib tej kev sim siab ntawm txoj kev ntseeg, lossis yuav ntsib lwm yam loj dua uas Vajtswv xav hu kuv. Thov ntxiv lub zog rau kuv kom kuv kam tawm hauv qhov chaw tso siab thiab mus raws li koj lub suab hu. Kuv thov hauv Tswv Yexus Khetos lub npe. Amees.
Cov kwv tij sawv daws, lub neej lawv Tswv Yexus qab tsis yog tsuas mus koom nrog cov ntseeg uas peb paub thiab swm xwb, tiamsis tseem yog tawm mus coj coob tug los ntseeg Tswv Yexus thiab. Yog cov ntsev thiab lub teeb rau lub ntiajteb, Vajtswv tab tom nqua hu peb kom peb tawm ntawm qhov chaw tso siab mus qhia Txojmoo Zoo rau tej neeg ib ncig.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply