Koj puas tau ntsib dua ib tug tib neeg uas koj nyiam thiab hwm, vim lawv lub neej nto npe vam meej thiab mus txog qhov twg los yeej ci ntsa iab? Tej zaug ntawd yuav yog ib tug xibhwb txawj ntse, ib tug coj kev pehawm, lossis ib tug muaj kev ntseeg ua rau koj pom tias koj me heev. Tiamsis, txawm yog koj yuav txawj npaum twg los, tag nrho peb tsuas yog tib neeg uas yeej puaj qhov phem qhov zoo. Tsuas muaj ib tug thiaj zoo kawg nkaus thiab tsim nyog rau peb pehawm Nws xwb.
Hnub no, yog hnub 07/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Benjamin Brittain dhau ntawm Zaj kawm PEB TSUAS YOG TIB NEEG XWB.
“Wb yog neeg ib yam li nej thiab xwb! (Tes Haujlwm 14:15).
Muaj qee tus tib neeg lawv ua lawv lub neej nto npe lug tshaj tej uas ib txwm ua. Lawv khwv tau tag nrho tej yam uas cuag li peb tsuas yog npau suav pom xwb. Koj sim xav txog ib tug tub ntaus taub nws siv tej suab taub ntawd ua rau tib neeg lub siab qaug laim, ib tug tub txawj ncaws pob saum tshav pob, ib tug txawj ua movies lossis ib tug tub sib tw Olympic twv yeej nce mus txais yeebkoob.
Cov neeg nyob hauv Lixithas kuj nyiam thiab hwm Paulus thiab Npananpas nkawd ib yam nkaus li ntawd. Thaum lawv tab tom ua ib lub neej tsis muaj qab hau, ob tug neeg no tuaj txog kho tau ib tug tuag tes tuag taw. Tab meeg ntawm lawv qhov muag, tus txiv neej no sawv mus taus kev thiab tau kho zoo tamsim (Tes Haujlwm 14:8-10). Yog tias peb tshwm muaj ntsej muag rau ntawd, tej zaug peb kuj yuav xav tsis thoob txog qhov txujci no. Tiamsis txhua yam nws muab los ua dhau tshaj qhov uas yuav tswj tau. Cov pej xeem ntseeg tias Paulus thiab Npananpas nkawd yog ob tug mlom vajtswv uas lawv pehawm tau txia los ua neeg, thiab tus pov thawj hlob hauv nroog thiaj cab nyuj tuaj ntawm ntus zos npaj yuav tua tsiaj hlawv fij rau nkawd (Tes Haujlwm 14:13). Paulus thiab Npananpas nkawd xav tsis thoob thaum uas lawv nkag siab yuam kev li no tamsim ntawd thiab nkawd hais tias: “Nej ua dabtsi li no? Wb yog neeg ib yam li nej thiab xwb! Wb tuaj ntawm no, yog tuaj qhia Txojmoo Zoo rau nej , kom nej tso tej uas nej ua tsis muaj qabhau tseg thiab los ntseeg tus Vajtswv uas muaj sia nyob. Nws yog tus uas tsim lub ntuj , lub ntiajteb, dej hiavtxwv thiab ib puas tsav yam uas nyob saum nruab ntug thiab hauv hiavtxwv (Tes Haujlwm 14:15). Nkawd hais rau cov pejxeem hais tias nkawd kuj zoo li lwm tus thiab xwb. Nkawd thiaj tig cov pej xeem txoj kev xav mus rau ntawm tus uas muaj sia nyob, tsis zoo li cov ntsujplig uas tsis muaj sia, tsis muaj nqis uas lawv tab tom pehawm (Tes Haujlwm 14:15-16).
Cov pej xeem nyob hauv Lixithas lawv tau muab lawv lub siab hwm ntawd tso yuam kev rau cov neeg uas tab tom qhia txog Vajtswv, lawv ho tso Vajtswv tseg. Koj puas saib leej twg ua tus tseem ceeb ntawm sab ntsujplig thiab? Nco ntsoov tias lawv kuj yog tib neeg thiab xwb! Ib sab ntawd, Paulus thiab Npananpas nkawd twb yuav raug cov pej xeem muab coj los pe. Nkawd maj nroos hais rau cov pej xeem tias nkawd kuj yog tib neeg thiab xwb, koj xav li cas txog yus tus kheej, ntawm sab nqaij tawv thiab ntsujplig tib si? Nco qab ntsoov tias ua ntej uas saj tau Tswv Yexus txoj kev cawmdim, peb tsuas yog cov tib neeg txhaum thiab xwb.
Txawm yog peb txhua tus yuav yog leej twg nyob hauv lub neej tshiab uas Vajtswv tabtom hloov pauv peb los, nco qab ntsoov tias tag nrho peb puav leej koom ua ib ua ke, txij li thaum uas peb tso tej kev pehawm tsis muaj nqis thiab los ua Vajtswv tus muaj sia nyob tes haujlwm! Nco ntsoov tias, thaum peb ua siab ntev hauv txoj kev nrog tus Tswv mus uas twb npaj txhij lawm, cov neeg uas mus ua ntej peb lossis ua qab peb puav leej yog Vajtswv cov menyuam. Txhob saib cov neeg txawj ntse muaj koob nto npe ntawm sab kev ntseeg li ib tug vajtswv, thiab kuj tsis txhob ua saib tsis taus cov ntseeg tshiab. Pauv rau qhov ntawd, yuav tau koom siab khiav mus rau tom ntej uas yog tus ciam kawg, cia peb ob lub qhov muag tsom ntsoov mus rau ntawm Tswv Yexus, thiab nco ntsoov tias Vajtswv tab tom nqua hu peb mus nrhiav coob tug ntxiv los koom rau txoj kev sib tw zoo kawg nkaus no (Henplais 12:1-2).
Thov caw nrog kuv peb thov Vajtswv ua ke:
Tus Tswv, thov pub kom kuv muaj kev txawj ntse tig kuv lub siab los pehawm koj ib leeg – yog kuv tus Vajtswv uas muaj sia nyob. Txawm yog ib ncig ntawm kuv muaj ntau tus tib neeg tsimnyog hwm los thov pab kom kuv tswj kuv lub siab tig rau ntawm koj, kom tsis muaj ib yam dabtsi yuav npog tau Vajtswv koj txoj kev zoo. Thov coj kuv txoj kev ntseeg, kom kuv yuav tig rau ntawm Koj yog qhov khoom plig pub kuv mus ib txhis. Kuv thov hauv Tswv Yexus Khetos lub npe. Amees.
Cov kwv tij txhua tus, txawm yog yuav muaj ntau tus neeg muaj koob nto npe txawj ntse hauv lub neej no los, peb tsis txhob hnov qab tias tsuas muaj tib tug thiaj tsimnyog rau peb pehawm xwb, ntawd yog Vajtswv tus muaj sia nyob. Tuav peb lub siab tig mus rau ntawm Vajtswv kom peb tsis txhob raug dag ntxias mus rau qhov uas pe thiab hwm tib neeg. Vajtswv tib leeg thiaj yog tus yuav coj, yuav kho zoo thiab pub kom peb muaj lub neej muaj yeej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply