Muaj tej yam kev coj qub lossis tej kevcai qub uas peb twb coj ntev los lawd, nws tuav peb txoj kev xav, cuam tshuam rau peb lub neej uas siv Vajtswv txoj lus . Peb pheej muab peb tej kevcai lossis kev xav qub ntawm tus kheej los quab yuam rau Vajtswv txoj kev coj peb, thiab peb ntseeg tias ua li no xwb thiaj yog. Tiamsis tej uas ib txwm coj no tsuas ua rau peb tso siab xwb nws tsis yog qhov tseeb.
Hnub no, yog hnub 08/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Macnab dhau ntawm Zaj kawm VAJTSWV LUB SIAB NYIAM LOSSIS YUS SIAB NYIAM?
“Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag” (Pajlug 14:12).
“Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag” (Pajlug 14:12).
Koj puas tau nrhiav tau txoj kev mus rau tom hauv ntej? Tsis paub tej kev txiav txim siab ntawd puas yuav yog raws li Vajtswv lub siab nyiam tiag?
Vajluskub yeej ceeb toom meej meej tias: muaj tej txoj kev saib cuag li yog raws li tib neeg txoj kev ntsia – muaj tej lub homphiaj saib cuag li nws yog thiab txawj ntse raws li lub ntiajteb no – tiamsis thaum kawg ho coj mus rau txoj kev tuag. Muab ua lwm lo lus hais, tej txoj kev ntawd yeej tsis coj mus txog rau qhov chaw zoo.
Nyob rau txhua txhua hnub, txhua tshiab tus tib neeg hauv ntiajteb no yuam kev thaum uas peb xaiv txoj kev uas peb ntseeg tias yog. Txawm yog cov ntseeg Vajtswv los lawv kuj tau saiv yuam kev vim ua raws li qhov uas yus xav tias yog. Peb tsim muaj tej txojcai tseg rau Vajtswv, peb cim civ txhais lub ntsiab ntawm Vajtswv tej haujlwm los ntawm peb txoj kev xav, thiab muab qhov ntawd los ua lub hauv paus rau peb txoj kev mus.
Tiamsis Vajtswv txojlus tsis lees yuav qhov no. Peb los saib Yaujj lub neej kom totaub meej dua. Vajtswv hais meej meej tias Yauj yog ib tug neeg ncaj ncees- yawg tsis ua txhaum thiab ua lub neej qhuas Vajtswv los ntawm lub neej ncaj ncees. Tiamsis muaj ib hnub, Yauj cia li raug tej kev mob uas tsis muaj leejtwg xav txog. Yauj poob tag txhua yam – dag zog, tsev neeg, thiab ib puas tsav yam uas Yauj muaj – txog qib uas yawg yuav tau nug Vajtswv tej lo lus nug uas yawg ua xyem xyav. Yauj nug Vajtswv yog yam uas peb tib neeg kuj pheej ua, tiamsis tsis tag li ntawd xwb, Yauj tseem npau taws thiab yws hais tias Vajtswv yeej tsis ncaj ncees raws li Vajtswv ib txwm hais.
Yauj tej phooj ywg tuaj cuag Yauj, thiab hais tej lus uas lawv suav tias yog lus “txawj ntse” tawm hauv lawv lub tswv yim tuaj raws li tej uas lawv ntsib dhau tiamsis yeej pab tsis tau dabtsi. Tsuas yog thaum uas muaj ib tug hluas npe hu ua Elihu tshwm los, txhua yam thiaj pib hloov pauv. Elihu hais lus tuaj Vajtswv tog, hais tias: “Vajtswv tus uas muaj hwjchim loj kawg nkaus yeej tsis ua txhaum li; nws ibtxwm ua ncaj rau sawvdaws (Yauj 34:12). Ntawm no tsis yog Elihu tus kheej lub tswv yim tiamsis yog qhov tseeb uas twb nthuav tawm Vajtswv tus yamntxwv. Nyob hauv txoj kev mob, Yauj tsis nkag siab tej uas tab tom tshwmsim, tiamsis tsim nyog Yauj yuav tsum ntseeg siab rau Vajtswv tus yam ntxwv uas ncaj ncess tsis hloov pauv. Tiamsis Yauj thiab nws cov phooj ywg puav leej totaub Vajtswv los ntawm lawv lub tswvyim thiab txojkev xav, yog li thaum kawg lawv thiaj yuam kev thiab tsis totaub txog Vajtswv lub haum phiaj.
Kuj muaj ib zaj xwm txheej yuav zoo li ntawd nyob hauv Vajluskub Tshiab, yog nyob hauv Tes Haujlwm tshooj 15. Pawg Ntseeg xub thawj pib huam vam, txog rau thaum muaj ib pab neeg hais tias kev cawmdim tsis yog los ntawm Yexus Khetos sawv hauv qhov tuag los xwb, tiamsis tseem cheem tsum yuav tau coj lwm yam ntxiv (Tes Haujlwm 15:1). Khuv xim tshaj, vim tej kev xav yuam kev no cia li huam vam mus rau coob tug, vim cov thawj coj Pawg Ntseeg thaum no feem coob yog cov neeg Yudais, nyob hauv muaj ib pab yog cov Falixais. Nyob hauv muaj cov uas raug Tswv Yexus cem vim tau “muab Vajtswv txojlus tshem tawm” vim lawv tej kevcai uas lawv ib txwm coj (Mathais 15:6).
Yeej yuam kev lawm yog tias peb muab neeg tej kevcai tso siab dua Vajtswv txojlus, thiab saib tej zaj kawm ntawm yus tus kheej tseem ceeb dua Vajtswv txoj lus tseeb. Nyob ntawm cov thawj coj Pawg Ntseeg xub thawj, txawm yog muaj ntau yam kev sib cav los, tej teeb meem tiag tiag nws tsis tau nyuaj daws. Lawv yuav tau muab tej kev xav ntawm lawv tus kheej tso ib sab thiab ntseeg tej uas Vajtswv nthuav tawm rau lawv. Lawv yuav tau ntseeg Vajtswv tej lus, ntseeg tias txhua tus puav leej yuav tau txais kev cawmdim los ntawm txoj kev ntseeg xwb. Thaum kawg lawv kuj txais yuav qhov tseeb no (Tes Haujlwm 15:11).
Peb kuj yuav tau ua ib yam li ntawd. Peb yuav tsum tig rov qab los rau ntawm Vajtswv txojlus, saib Vajtswv txojlus yog tib qhov kaj uas pab peb txiav txim siab ua txhua yam, cia Vajtswv ua tus kav peb lub neej. Vajtswv txoj kev siab tshaj tib neeg txhua txoj kev. Vajtswv paub yam twg yog, tiamsis tej yam peb lub siab xav tsis yog thaum twg twb yog tag huvsi. Peb tib neeg lub siab dag thiab phem heev: leej twg thiaj yuav nkag siab? Cia li cia Vajtswv txojlus dhau los ua daim tsom iav taw kev rau peb lub neej. Thaum kawg, thaum uas txhua yam cuag li tsis meej lawm, peb cia li pheeb rau qhov tseeb no: “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb (Pajlug 3:5-6).
Thov caw nrog kuv peb thov Vajtswv ua ke:
Tus Tswv Koj tib leeg xwb thiaj yog qhov tseeb, thov Koj pab kom kuv tsis txhob mus rau kuv tej kev xav yuam kev, tiamsis kuv yuav qhib kuv lub siab thiab lub hlwb los txais koj ua tus coj kev. Thov Vajtswv pub kom kuv muaj kev txawj ntse paub faib cais qhov twg yog koj siab nyiam qhov twg yog kuv siab nyiam. Thov Koj pab kom kuv tig los nrhiav Koj txojlus uas yog qhov tseeb taw kev rau kuv ua txhua yam kom yog nyob hauv kuv lub neej. Kuv ua Koj tsaug thiab taij thov los ntawm Tswv Yexus lub npe, Amen!
Cov kwv tij txhua tus, qhov tseeb yuav tsis txawj hloov pauv li: Vajtswv qhov tseeb tsuas muaj ib thiab tau nthuav tawm meej meej nyob hauv Vajtswv tej lus. Peb yuav tau tig rov qab los thiab cia Vajluskub dhau los ua lub hauv paus qhov kaj, dhau los ua txoj kev rau peb lub neej. Pauv qhov uas pheej coj raws li txoj qub kev uas ib txwm paub nyob hauv peb lub hlwb, cia Vajtswv txojlus coj peb kev hauv txhua txoj kev peb mus. tTuas yog thaum no xwb, peb thiaj yuav nkag siab thiab ua tau raws li Vajtswv lub siab nyiam.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply