Ală bơta gơlòng gơtơntus tòm rài kis gơs dơ̆ rlau ir mơ bơta kong jai mơ gơlơh moat jrùng, mơya Jơnau Yàng chồl bơtrut bol he jong rơ Yàng bulah tòm tŭ bòl glar rlau jơh. Duh khoai Yàng digùl bơta bòl glar ò dê la gơhŭi tŭ jơ do, mơ la sac rwah dòn kơnờm dê bơta ring niam mơ gơnap gơ noar at bồ Yàng dê bulah bơta gơlik gơs gùt dar be lơi.
Ngai do, ngai 13/09/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Carolyn Fraiser bơh tơnggume: JONG RƠ YÀNG DIGÙL BƠTA BÒL GLAR.
“Ơ hwềng soàn añ jê, ñchi bơh tài mê gơplơ̆ nùs mơ ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ.” (Đơs Crih 42:5)
Añ neh cih sèng bơta hòi dan kòp ngai do tòm tŭ nggùi kơp gơn bơta phẫu thuật ung thư dơ̆ bàr bau klau añ geh sir rau.
Đơs nền lah, añ kalke ngan nàng gơs bơta nàng rgơi jong rơ Yàng tòm tŭ bơta gơlik gơs be do. Bồ dơngoh añ kơlôi sơ nơng oă ngan, mơ añ gơ wèt mơ bơta gơlik gơs jơ do la bơta dơrcul. Añ rngòt ngăn bơta iơh rlau jơh rơp gơtơntus. Mơya, do ò dê la gùng dà Yàng kòñ bol he lơh tŭ pal ơm tòm ală tŭ jơ be do. Mơ Yàng kơp kòñ bol he pal jong rơ Yàng.
Hơ̆ la bơta ñchi bơtài añ sum geh pơndom pơniang tòm Jơnau Yàng gan dê sră Đơs Crih. Jơnau Yàng sum tơngkah añ bơh bơta tơlik mat mơ bơta gơnap gơ noar at bồ Yàng dê tòm ală tŭ jơ sơ bơng rơng. Gan dê ală sèng Đơs Crih, bol he đal git lah: jong rơ Yàng la dô bơta sôr lam, bơta jong rơ Yàng ò dê kơnờm dê bơta gơboh hala ò gơboh gơbài, kơp kòñ hala ò bol he dê.
‘Ơ ală cau dòn song Yàng Jehôwa dê, đơs chò tĕ jòng ro Kơnràñ, Ưnngài tĕ sơnđan sàng goh Kơnràñ dê. Bơh bơta gơjrañ Kơnràñ dê gơs tòm dô ơthoa; ai bơta kòñ nđàc Kơnràñ dê jơh dô rài. Bơta ñìm rac tus ơm ing dô mơnang, Mơya àng drim gen gơs bơta hòn chò. ‘ (Đơs Crih 30:4-5)
Ală tap Đơs Crih jong rơ Yàng tơngkah bol he gơrê mơ Yàng. Bol he geh hòi jà pal sền dê Yàng mơ ò sền dê bơta gơlik gơs gùt dar. Ală tap Đơs Crih dong kòl bol he đal git: tŭ bol he niam nùs jào phi mơ duh rngòt Yàng tòm ală bơta, bol he rơp git làm bơta lơngai bulah tòm càl rbut lơi. Mơ bol he rgơi kơp gơn lah càl rbut rơp lòt gan, bơta chò hòp rơp geh jòi bàn wơl.
Să tòm cau gơ noar cih Dabit la dô nơm cơng tàng ring niam, tŭ bơta kis ồng kong lơh tơnchơt, kong ntoat dô, brồ lơh be dô nơm phan poan jơng tòm bri. Dròm be bol he, Dabit kung neh lòt gan ală bă tiah rngòt rngơt mơ dơrcul; mơya ồng git bơta pha lin mìng rgơi geh bàn gan dê bơta jong rơ.
‘Ơ hwềng soàn añ jê, ñchi bơh tài mê gơplơ̆ nùs mơ ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, La Bơtau dong kòl añ mơ la Yàng Tom Trồ añ. ‘ (Đơs Crih 42:5)
Bol he khin cha jong rơ Yàng tòm bơta rngòt bol he dê hala ò? Tŭ bơta gơlik gơs gùt dar bơcah lề, bol he kòñ jong rơ Yàng tai sơl? Pơn dròm be Dabit, cau bơtê Pol kung kong bòl glar mơ kup kơryan. Rài kis ồng dê kung neh ơm tòm bơta lơh iơh. Ồng kong pù lơh, kup jàm, mơ kong jàm bơh dơ̆ do tus dơ̆ ne. Mơya, tòm hiu jàm – ồng kư̆ jong rơ Yàng. Bơta jong rơ Yàng cau bơtê Pol neh dong tă cau at bồ hiu jàm mơ jơh hiu nhă ồng geh dong klàs. (Broă 16:23-32).
Bơta jong rơ ò dê mìng cèng tus bơta gơs kwơ bol he in, tài bơh Yàng Tòm Trồ ngùi bơta jong rơ nàng dong kòl nùs nhơm bol he gơwèt hơ Yàng, mơ Kơnràñ kung ngùi nơta jong rơ, bơta ưn ngài nàng dong tò ală cau ndai tòm ală tŭ jơ sơ bơng rơng bol khai dê tai. Jong rơ Yàng tòm tŭ sơ bơng rơng buôn sơl ơ? Nền ngăn la ò gơ dê. Mơya rgơi lơh behơ̆ tiah? Ngan la dê lơh gơ di.
Tŭ bol he gŏ ò rgơi tòm lơh mơ bơta gơlik gơs gùt dar, bol he kư̆ sac rwah nàng jong rơ Yàng. Dabit neh ràng tơlik bơta do gan dê dô êt sèng Đơs Crih:
‘Ơ Yàng Jehôwa, añ jòng ro Kơnràñ’ (Đơs Crih 30:1)
‘Gơn kơnòm tĕ di Yàng Tom Trồ ‘ (Đơs Crih 42:5)
‘Kòp ngai añ rơp jòng ro Yàng, Mơ jòng ro sơnđan Kơnràñ sùm sùm ò lồi. ‘ (Đơs Crih 145:2)
Gơs dơ̆, bơta jong rơ gơs gơtha kòp tŭ kòp bă tiah. Tŭ nggùi tòm ơdŭ kơp gơn hiu sơ nơm dê, añ neh sac rwah dòn dê jơnau ho pơgon Yàng dê lah: Kơnràñ sùm gam tơlik mat mơ ai pà añ in bơta lơngai tòm ală bơta gơlik gơs gùt dar, ò dê la sac rwah kis tòm bơta kơlôi rcang mơ rngòt. Bơta jong rơ bulah ò rgơi tòm gơl bơta gơlik gơs gùt dar, mơya neh tòm gơl añ. Tŭ añ kis tòm bơta lơngai Yàng dê, ală càl rbut tòm añ geh gơtơn mù tơn. Kơnờm dê pràn Yàng, añ rgơi pơnjat lòt – tài bơh git nền lah Yàng sơmbat rài tơnơ̆ añ jê Mơ kơnờm dê bơta nđàc Yàng dê, ală cau ndai kung rơp jòi bàn Yàng tŭ rac dan.
Ngai do, ồng mò oh mi rơp sac rwah lơh mbe lơi wèt mơ ală bơta gơlik gơs tòm rài kis tiah?
Dan jà bol he dô nùs bal tòm bơta hòi dan:
Ưn ngài Yàng tài bơh Kơnràñ ơm rềp mơ ală cau gơs nùs moat jrùng, sùm tơlik mat mơ niam nùs ai pà bơta lơngai bol kòn in bulah bơta gơlik gơs gùt dar be lơi. Dan Yàng sum prap kòn tòm bơta dòn kơnờm mơ jào phi Yàng in tŭ bol kòn geh tìp mơ ală bơta bòl glar ngai do mơ tòm rài tơnơ̆. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, ò gơs bơta gơlik gơs lơi, tŭ jơ lơi hala bă tiah lơi rgơi kơryan bol he tus mơ bơta tơlik mat Yàng dê tòm bơta jong rơ duh khoai Yàng. Kư̆ ưn ngai Yàng bulah tòm tŭ sơ bơng rơng, tài bơh git lah nùs kòñ Yàng Tòm trồ tòm Yàng Krist Jesu gơwèt mơ oh mi la be hơ̆.”
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply