Peb lub neej niaj hnub nim no muaj ntau txoj haulwm maj nroos vuaj ncig peb tej zaug ua rau peb ntsi tsis pom ntau yam zoo nyob ib ncig ntawm peb lub neej. Peb tsis nco qab saib teb yem zoo uas Vajtswv tsim. Peb maj nroos thiab tso dhau ntau yam zoo ntawm peb lub qhov muag. Ua neej maj mam thiab tig mus ntsia saib txhua yam tej zaug yuav coj txojkev zoo siab los rau koj.
Hnub no, yog hnub 20/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kill Dube dhau ntawm Zaj kawm PUAS YOG KOJ, TUS TSWV?
“Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas nws ua tiav lawm rau peb paub.” (Ntawv Nkauj 19:1)
“…Yog li ntawd, lawv yuav hais tias lawv tsis paub Vajtswv yeej tsis tau li” (Loos 1:20).
Tos tso! Dabtsi? Yuav hais daws tsis tau ib nyuag qhov li los? Tsis tau li los? Yog li tshuav cov neeg uas tsis tau hnov txog Tswv Yexus ne yuav zoo li cas, Tus Tswv?” Kuv tsis paub tias ua cas kuv ho paub “tag nrho cov neeg” uas tsis tau hnov txog Vajtswv lub npe, tiamsis thaum nyuam qhuav ntseeg Vajtswv, kuv tsis txaus siab thiab nrog Vajtswv sib tham. Kuv muaj kev xav ntawm kuv tus kheej txog ib tug Vajtswv zoo thiab muaj kev hlub yuav tau coj zoo li cas thiab nqe Vajluskub saum toj no cuag li nws hais tawv heev. Tsis ntev tom qab, kuv tau yws Vajtswv tias ua cas “Vajtswv tsis pub rau tag nrho cov neeg ntawd” ib lub sijhawm, qhov tseeb tiag, kuv thiaj yog tus uas tsis pub sijhawm rau Vajtswv!
“Vajtswv rau txim rau lawv, rau qhov Vajtswv twb ua ib puas tsav yam qhia kom lawv paub Vajtswv, tiamsis lawv tseem tsis paub Vajtswv thiab.” (Loos 1:19)
Qhov no yooj yim xwb. Txij thaum Vajtswv tsim lub ntiajteb los, txawm yog neeg tsis porn Vajtswv tus muaj hwjchim uas nyob mus ibtxhis thiab qhov uas nws yog Vajtswv los yog lawv saib ib puas tsav yam uas Vajtswv tsim, lawv yeej paub hais tias muaj Vajtswv tiag. Yog li ntawd, lawv yuav hais tias lawv tsis paub Vajtswv yeej tsis tau li (Loos 1:20). Thaum uas kuv tseg kuv lub siab paub thiab nkag siab txog lub ntiajteb ib ncig kuv, tamsim ntawd kuv tau ntsib Vajtswv. Tsis yog los ntawm kuv ob lub pob ntseg lossis qhov muag, tiamsis yog thaum kuv ua pa. Wow! Fuab cua! Kuv nco txog Eliyas txoj kev ntsib Vajtswv.
Vajtswv tsis tshwmsim hauv “nthwv cua” lossis hauv “ntsus av qeeg” thiab “nplaim taws” tiamsis “nyob hauv lub suab mos muag”. (I Vajntxwv 19:11-12) nyob hauv zaj kawm ntev li 15 giây hais txog txoj kev ua pa ntawd, kuv pom “Vajtswv tus cwjpwm” qhov muag ntsia tsis pom tshwm sim tuaj.. ib yam li tus uas tuav txojsia cia. Tsis muaj fuab cua, tsis muaj txojsia. Tsis muaj Vajtswv, tsis muaj fuab cua!!!
Thaum kuv xav txog qhov no, kuv pib kub siab lug. Ib puas tsav yam uas Vajtswv tsim los xav coj kuv mus rau ntawm Vajtswv thiab thaum no kuv tab tom xav txog. Kuv lub hlwb pib muaj tej pov thawj txog Vajtswv pub rau kuv. Dej tsaws tsag: yog ib yam uas zoo. Cov fuab thaum sawv ntxov: zoo kawg nkaus. Puag ib tug menyuam mos ntawm tes: txhawb zog, maj mam plhws. Noog lub suab quaj, tej menyuam sib zeg: zoo siab kawg li. Sawv daws nyob ua ke: Kev phooj ywg, tej cag ntoo: kev ruaj khov thiab lub zog. Tus duab zaj: Vajtswv lub siab hlub tshua. Hluav taws: kev kub siab. Qhov kaj. Qhov dawbhuv, lub hnub, lub hli thiab tej hnub qub: Vajtswv lub tshwjchim. Thiab tus sau Ntawv Nkauj los kuj hais meej meej tias: “Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas nws ua tiav lawm rau peb paub” (Ntawv Nkauj 19:1).
Peb yuav qhia txog Vajtswv lub tshwjchim nruab hnub hmo ntuj; yeej tsis muaj ib lo lus twg lossis ib lub suab twg tau hnov. Tiamsis lub ntiajteb lub suab ntxhia. Kuv pom meej tias kuv tau hnov qab Vajtswv ntau npaum cas. thiab qhov tseeb tiag yeej yog li ntawd.
Kuv tsis muaj txoj kev sib txuas uas Vajtswv xav kom kuv muaj. Kuv paub Vajtswv tsim txhua yam los, tiamsis kuv yeej tsis tau paub dua Vajtswv dhau los ntawm tej uas Vajtswv tsim los. Kheev lam kuv ntxov paub Vajtswv ntxov. Kuv cheem tsum Vajtswv. Ib qhov kev mob siab hauv lub neej yog thaum uas kuv raug tsev neeg thiab tej phooj ywg khiav deb. Kuv txoj kev ruam ua rau kuv raug txav deb. Thiab ruam tshaj, thaum uas kuv tau coj zoo li yam yus tsis quav ntsej. Vajtswv paub zoo yam kuv ua. Kuv raug cuab. Kuv cim civ tsim lub neej phomsij rau tus kheej. Kuv pom yus zoo li ib tug menyuam ntxhais me me nyob ib leeg thiab ntshai qhov tsaus ntuj. tiamsis Vajtswv tau ua rau kom kuv lub ntiajteb pom kev! Vajtswv siv Vajtswv lub hwjchim los tso kom kuv dim! Kuv tsis tsimnyog rau tej ntawd, tiamsis thaum uas kuv tig rov qab mus ntsia pom tej yam tshiab no, kuv ntsia pom Vajtswv txoj kev hlub thiab kev tshua. Zoo li kev ua pa, Vajtswv yeej nrog nraim kuv nyob.
Vajtswv ua siab ntev thaum nthuav qhia rau peb paub tias peb muaj cuab kav mus nyob ze Vajtswv thiab zoo siab hlo txais yuav. Dhau los ntawm tej uas Vajtswv tsim los, peb yuav paub Nws tiag. Yeej tsis muaj ib yam dabtsi yuav sib tham ntawm no. cia siab tias txawm yog dabtsi yuav tshwmsim tuaj los, peb yuav ua tau pa thiab nco ntsoov tias: Peb tsis nyob ib leeg. Vajtswv – yog cov mov uas cawm txojsia- tab tom nyob ntawm no thiab Vajtswv txoj kev hlub yuav rub peb tes dhau ntawm txhua yam.
Thov caw nrog kuv peb thov Vajtswv ua ke:
Tus Tswv, Kuv ua koj tsaug vim koj hlub kuv thiab nrog kuv nyob. Tus Tswv, Koj yog tus loj thiab tsimnyog qhuas. Kuv ua Koj tsaug rau tej uas koj tsim los zoo kawg nkaus. Ua Vajtswv tsaug vim dhau ntawm tej ntawd, kuv thiaj paub koj yog tus Vajtswv uas muaj kev hlub thiab ua siab ntev, zoo siab hlo pab kuv txhua yam, txhawb zog. Ua Vajtswv tsaug vim Koj yog tus uas tsim lub ntiajteb no thiab kuj yog kuv tus Vajtswv. Thov pab kom kuv yuav ntsib koj thaum uas kuv muaj sijhawm saib ib puas tsav yam nyob ib ncig kuv. Thov coj kuv mus rau hauv ib hnub tshiab los ntawm koj txoj kev hlub thiab kev paub koj. Kuv thov hauv Tswv Yexus Khetos lub npe. Amees.
Cov kwv tij txhua tus, cia siab tias koj yuav tseg mentsis sijhawm hnub no los xav txog Vajtswv thiab Vajtswv txoj kev hlub dhau ntawm ib puas tsav yam ib ncig, lossis tsuas yog dhau ntawm txoj kev ua pa ob peb zaug xwb. Koj yuav pom tias txhua zaug ua pa uas muaj sia ntawd, Vajtswv yuav nyob ntawm koj ib sab. Lossis tseg mentsis sijhawm los mus ncig lossis ua vaj, qhov chaw uas koj yuav ntsib thiab tau Vajtswv cob qhia. Txawm yuav nyob rau lub caijnyoog zoo li cas los qhib koj lub siab lub hlwb rau txoj kev nthuav tawm tshiab uas Vajtswv xav nchuav rau hauv koj lub siab hnub no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply