Koj puas ntseeg tias Vajtswv yuav ua tiav Nws tej lus cog tseg rau koj? Thaum uas koj ntseeg Vajtswv, koj tab tom qhib qhov rooj rau Vajtswv ua tej yam zoo tshaj plaws hauv koj lub neej. Vajtswv tej lus cog tseg tsis yog lam hais, tiamsis yog kev sib cog lus dawbhuv muaj hwjchim, muaj peev xwm ua tiav txhua yam uas peb saib cuag li ua tsis tau.
Hnub no, yog hnub 22/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diona White dhau ntawm Zaj kawm VAJTSWV YUAV UA TIAV NWS TEJ LUS COG TSEG.
“Anplahas ntseeg Vajtswv tej lus cog tseg; qhov uas Anplahas ntseeg hajyam ua rau Anplahas cia siab rau Vajtswv, thiab nws ua Vajtswv tsaug. Anplahas paub tseeb hais tias Vajtswv yeej ua tau raws li Vajtswv coglus tseg” (Loos 4:21-22).
Kuv sawv ntawm lub tsev Buckingham, qhov muag rua loj loj thiab xav tsis thoob. Nyob rau lub sijhawm zoo kawg nkaus ntawd, kuv cim civ xav tias: “Tseeb tiag, kuv tab tom nyob rau London!” Kuv lub siab puv npo rov qab nco txog cov lus cog tseg coj kuv tuaj txog ntawm thaj chaw no.
Nyuam qhuav ob peb hlis tas los xwb, thaum tseem yog ib tug tub kawm yuav xaus, ke kawm ke ua haujlwm, kuv hnov cuag li kuv lub neej dhau mus yuav tsis muaj dabtsi nco cia. Muaj ib hnub los nag khuj khuav, kuv kwv kaus rau khaw thiab mus ncig ib ncig ntawm lub tsev kawm. Thaum tab tom mus, kuv pom ib cov kab ntawv sau tim phab ntsa. Thawj kab ntawv tias: “Koj xav kawm ntawv txawv teb chaws?” Tamsim ntawd, qhov ntawd ua rau kuv xav paub. Daim txuas ntxiv sau: “Cia li txuas kiag rau peb hnub no!” Kuv xav tias yog kuv mus nug ces kuv yeej yuav tsis poob dabtsi. Tsis muaj leej twg paub, qhov uas kuv mus ncig ntawd cuag li tsis muaj dabtsi tiamsis ho coj kuv mus txais tau ib yam loj, thiab kawm tau ib zaj kawm txog kev ntseeg uas yuav nco ntsoov.
Kuv mus rau hauv lub tsev kawm ntawv qhov chaw ua haujlwm thiab nug ntxiv. Tus neeg uas kuv cheem tsum ntsib tsis nyob ntawd, thiaj muaj dua lwm tus pab kuv. Nyob rau lub sijhawm luv luv ntawd, kuv tuav rawv ntawm tes txog tej kev kawm txawv teb chaws, thiab nrhiav tau ib lub rooj kawm nws phim rau kuv lub homphiaj thiab kuv txoj kev npau suav. Tom qab ntawd, kuv hu mus rau hauv chav uas lawv yuav qhia rau kuv paub txog tej yam uas cheem tsum paub. Thaum kuv hais qhia rau tus neeg saib xyuas paub txog qhov uas kuv tuaj ntawm no thiab xav kawm lub rooj kawm ntawv, pog tsa hau los thiab nug tias: “tau lawm, koj yuav mus rau London”.
“Tos tso… koj hais li cas no?” Kuv teb. Kuv twb tsis tau hais txog qhov nyiaj yuav kawm, lossis qhov uas kuv yog ib tug tub kawm tsis muaj nyiaj txaus them rau kev kawm txawv teb chaws. Tiamsis tus neeg saib xyuas nws ntsia kuv thiab cuag li pog nkag siab kuv txoj kev txhawj, pog txhawb kuv tias: “Kuv mam pab koj kawm tag nrho nyiaj txiag. Koj cia li mus kawm rau London xwb”.
Ob peb feeb ntawd, ua rau kuv nres ntsiag to, rau qhov khoom plig loj no. Kuv hais lus ua tsaug rau txoj kev pab no. Thaum kuv tawm hauv chav ua haujlwm los, kuv rov qab nco txog txhua zaug uas kuv thov Vajtswv rau lub neej tom ntej, thaum uas kuv nyuam qhuav mus rau hauv tsev kawm ntawv qib siab.
Tomqab lub sijhawm sib ntsib zoo ntawd, kuv pom tias Vajtswv tab tom ua raws li Vajtswv tej lus cog tseg, ua tiav kuv txoj kev npau suav.
Loos 4:3 sau tias: “Vajtswv txojlus hais tias, “Anplahas ntseeg Vajtswv, vim qhov uas Anplahas ntseeg ntawd Vajtswv thiaj suav hais tias Anplahas yog neeg ncaj ncees.”
Thaum peb txoj kev ntseeg koom ua ke nrog Vajtswv lub siab nyiam, yam uas zoo kawg nkaus yuav tshwm sim tuaj – ntawd yog txujci! Yog tias kev ntseeg muaj cuab kav coj kuv mus ib ncig lub ntiajteb no ua ntej uas mus txog rau ntawm vajntxwv lub tsev, ces kev ntseeg kuj muaj cuab kav ua tau txhua yam zoo ntxiv thiab.
“Koj yuav zoo siab heev, rau qhov koj twb ntseeg hais tias, yuav muaj raws li tej Ius uas tus Tswv hais rau koj lawm (Lukas 1:45).
Hnub no koj tab tom ntseeg Vajtswv tej lus cog tseg rau yam dabtsi? Puas yog kev kho zoo? Ib tsev neeg sib hlub? Kev kaj siab lossis zoo siab? Ib lub tsev uas npau suav? Lossis Vajtswv txoj kev muab pub? Lossis tsuas yooj yim yog ib hnub tshiab? Nco txog Anplahas, yawg ntseeg siab rau Vajtswv, txawm yog lub sijhawm nws yuav dhau mus lawm zuj zus, yawg thiab yawg poj niam uas yog Xalas ib hnub laus lawm zuj zus. Anplahas yeej ntseeg tias Vajtswv yuav ua tiav Nws tej lus cog tseg rau txhua haiv neeg, ib yam li Vajtswv tau cog lus. Nyob ntawm coob tug, txhua yam cuag li lig dhau, tiamsis ntawm Vajtswv, tsis muaj ib zaum twg yuav lig!
Thov kom Vajtswv txojlus nyob hauv Loos 4:20-21 txhawb koj lub zog: “Anplahas ntseeg Vajtswv tej lus cog tseg; qhov uas Anplahas ntseeg hajyam ua rau Anplahas cia siab rau Vajtswv, thiab nws ua Vajtswv tsaug. Anplahas paub tseeb hais tias Vajtswv yeej ua tau raws li Vajtswv coglus tseg”
Thov caw nrog kuv peb thov Vajtswv ua ke:
Kuv thov fij lo lus ua Vajtswv tsaug rau Vajtswv koj txoj kev ncaj ncees thiab Vajtswv tej lus cog tseg uas tsis hloov pauv. Thov ntxiv kev ntseeg rau kuv kom kuv muaj zog ua thiab vam khom Vajtswv, txawm yog thaum uas txhua yam cuag li ua tsis tau. Kuv ntseeg tias Vajtswv koj yuav ua tau tej yam uas cuag li ua tsis tau , thiab coj peb nkag los rau hauv Vajtswv koj lub siab nyiam. Kuv thov hauv Tswv Yexus Khetos lub npe. Amees.
Cov kwv tij txhua tus, ib lub neej ntseeg Vajtswv yog ib lub neej puv npo tej txujci. Thaum peb ua neej nrog txoj kev ntseeg ruaj khov rau Vajtswv tej lus cog tseg, Vajtswv yuav qhib kev rau peb thiab peb yuav saj tau tej yam zoo, siab tshaj peb txoj kev xav. Txhob ntshai ntseeg Vajtswv tej lus cog tseg, vim Vajtswv muaj hwjchim hloov pauv koj lub neej. Vajtswv tab tom tos yuav ua tej yam zoo rau hauv koj lub neej, koj tsuas yog ntseeg thiab mus raws li Vajtswv lub siab nyiam xwb.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply