Tồi glài la bơta lơh he ơm ngai mơ Yàng, mơ kon mơnùs he òs pồn ndơp mơ ò sên dơng mang di tồi glài. Tòm ală tú bol glar, tú bol he kơp gơn bơta dong tă bơh Yàng, gơjrẵn sang glài la bơta Yàng rang tơlik nùs nđàc sơngit mơ kơno jơnau hòi dan bol he dê.
Ngai do, ngai 27/09/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Beth Patch dê bơh tơnggume: GƠN KƠNÒM NÙS NĐÀC SƠNGIT YÀNG DÊ.
“Cau lơi pồn prap tồi glài he rơp ò geh bơtoah; mơya cau lơi yal tơlik gơ mơ sang lòi gơ gen rơp geh nđàc sơngit.” (Jơnau Pơnđik 28:13)
“Roh bơta gơn kơnnòm” la jơnau di rlau jơh nàng ràng tơlik nùs nhơm ẵn jê tòm ang drim ngai hớ, dô ngai tòm kơnhai 1 nam 1988. Kon tòm kơndul ẵn jê ò găm wẵn tai, mham ẵn jê hor sum, ală cau gơnoar sơnơm ò rgơi lơh bơta lơi tai. Kon klau ẵn jê geh yal lah rơp geh deh tòm kơnhai pram, poan kơnhai tai lơm. Hiu sơnơm dềt tiah do ò gơs tiah nàng dong kơl duh deh, ò gơs bơta lơi rngơi kơno plai nùs oh dềt dê, bơh hớ, ẵn ò rgơi git kon ẵn jê găm kis hala neh chơt.
Cau gơnoar sơnơm neh hòi ẵn in dô nơm rdeh pơndiang cau ur bun nàng ceng ẵn tus tòm hiu sơnơm ngai bơh hớ 45 phút. Ẵn ơm gơn tòm 6 jơ tơnớ, mơ ală cau gơnoar sơnơm oă dớ đơs mơ ẵn lah rdeh rơp tus gỡn. Ẵn kung ơm gơn mơ dòn tòm jơnau đơs cau gơnoar sơnơm dê.
“Rơndeh neh tus” dô nă cau gơnoar sơnơm đơs.
Ală cau gơnoar sơnơm dong ẵn mơ ceng ală phan tòm rdeh. Lôi dut, ẵn kung neh lơngai hao rdeh, mơ rơp dong ẵn tú ẵn rơp duh deh.
Krơi ngan, ală cau gơnoar sơnơm neh ceng ẵn hao tòm rdeh neh yau tòm blang ơn rdeh bêng piar. Cau at rdeh dong cau dong kơl bêng bơta kơlôi rcang khai tê yò cơnong ẵn jê ơn tòm rdeh.
“Neh jơl jơh rau” cau at rdeh đơs mơ til mpông, mơ lòt tus tiah at rdeh.
Ẵn ò git lơh bơta lơi hala đơs mbe lơi tòm tú hớ. Ẵn ò kỡn rê wơl tòm hiu sơnơm yau, la tiah mơ ẵn neh kơp jó ngan. Kon dềt ò găm wẵn tai, mơ ẵn pal dòn lah behớ.
Ẵn lùp cau kơnòm să nggui dô gah: “Ting dô gơs bơta lơi dong ẵn duh deh sơl?”
Khai hơ: “Bol he gơs drap lă cơnong mơ dô êt ồi lơm”, khai sơnio ẵn in gó tòm hộp dụng cụ y tế hơđang.
Ẵn ò gam gơn kơnòm tai tòm hiu sơnơm hala cau gơnoar sơnơm tòm tú do. Ẵn ming git gơn kơnòm tòm Yàng. Kon ẵn jê mơ ẵn cang bơta dong kơl Kơnrẵn dê! Mơya ẵn neh ngài mơ Yàng jó ngan, mơ dà mat ẵn hor. Tòm bơta kah kơlôi ẵn jê, ẵn kah wơl bơta bơto cau gơnoar bơto dê đơs Yàng rơp kơno jơnau hòi dan, bol he pal gơjrẵn sang glài he dê.
“Dilah nùs añ neh kơlôi gơboh di tồi glài, Gen Yàng ò bài iat añ.”
(Đơs Crih 66:18)
Behớ, ẵn đơs mơ cau dong kơl lah “ẵn git ncau at bồ rai kis ẵn jê tú do. Ẵn pla hòi dan mơ Yàng.” Mơ ẵn sơntòm yal glài ẵn jê mơ ẵn ò rgơi kah. Ẵn ò kỡn bơta lơi kơryan jơnau hòi dan ẵn jê mơ Yàng. Ẵn yal tồi glài ẵn jê mơ dan Yàng toh glài. Ẵn đơs mơ Kơnrẵn lah ẵn gơjrẵn săng glài bơh ală bơta tis ẵn jê lài or mơ ò tis tai, mơ ưnngai Yàng bơh bơta toh glài Kơnrẵn dê. Ẵn ò git neh hòi tòm nđò jó, tú ẵn ò rgơi kơlôi tai bơta tồi glài lơi, ẵn neh pơndut mơ sơntòm jong rơ Yàng. Mơ ẵn dan Yàng dong kon klau ẵn jê. Dà mat hor mơ jơnau hòi dan ẵn dê kừ ơn Yàng in.
Tú tus hiu sơnơm, ẵn neh nggà driau tòm dà mat. “Kon ẵn neh wẵn”. “Khai gam kis! Ưnngai Yàng, ưnngai Yàng oă ngan! Kon ẵn jê gam kis! Ngan behớ!”
Cau at rdeh mơ cau dong kơl kung neh sên gó têl krơi. Mat bol khai ngar dà mat tú ceng ẵn lik bơh rơndeh mơ đơs: “Yàng ai lơngai me ló in.”
Ngan Kơnrẵn neh tuh lơngai hơđang ẵn. Kon klau ẵn neh lik tơnớ bàr kơnhai, bulah gỡn rlau mơ ngai lơh nên mơya pràn kơldang.
Tú hòi san, bẵn sang ală tồi glài mơ ồng mò oh mi ò hềt yal glài Yàng in. Yal té Yàng in jơh ală bơta tis he dê Yàng in nàng ò gơs bơta lơi rgơi kơryan ồng mò oh mi mơ Kơnrẵn. Tú hớ ală bơta ồng mò oh mi jao Yàng in rơp geh Kơnrẵn kơno. Nùs nđàc sơngit mơ bơta nđàc Yàng dê dơng rlau mơ bơta he kơlôi.
“Cau lơi pồn prap tồi glài he rơp ò geh bơtoah; mơya cau lơi yal tơlik gơ mơ sang lòi gơ gen rơp geh nđàc sơngit.” (Jơnau Pơnđik 28:13)
Dan jà bol he dô nùs bal tòm bơta hòi dan:
Ưnngai Yàng bơh Kơnrẵn sum rang tơlik nùs nđàc sơngit mơ kon bulah kon ò di pal. Mơ gơs tú tồi glài lơh Kơnrẵn ò kơno jơnau hòi dan kon dê, gen dan dong bol kon kòp ngai sên swì mơ gơjrẵn sang glài he dê mơ Yàng, mơ kơnòm pràn Yàng nang sang sơrbì gơ. Kon jơh nùs hòi dan, tòm sơnđan Yàng Jesus Krist, Amen.
Ơ ală ồng mò oh mi kỡn gơboh, ò di tê Yàng liah nàng ò rngơi dong hala tôr Kơnrẵn tí gen ò rgơi kơno bol he; mơya bơh bơta tồi glài mơ iơh bơsak bol he dê lơh Kơnrẵn pôn mat mơ ò kơno he. He kah sền swì nùs mơ yal Yàng in mơ lơh nên sang sơrbì ală bơta tis he kỡn lơh hala ò kỡn. Yàng Tòm Trồ gơboh bơta gơjrẵn sang glài mơ mhar toh glàil cau lơi in git pơndềt să don bơr Kơnrẵn.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply