Lub neej yeej ntsib kev sim siab thiab muab peb tsuj rau hauv pem teb los ntawm tej kev txhawj, kev txomnyem uas peb xam tsis tau ua ntej. Ntau zaug, nyob rau hauv tej teeb meem ntawd, txoj kev zoo siab saib cuag li nyob deb. Tiamsis, txoj kev zoo siab uas Cawm Seej Tswv Yexus coj los tsis muaj ib qhov teeb meem dabtsi twg tav tau. Txoj kev zoo siab ntawd tsis yog nyob rau ntawm kev nplua nuj lossis txomnyem, tsis nyob rau ntawm kev vammeej lossis puastsuaj. Txoj kev zoo siab no tsis xaiv leej twg ntsej muag, tsuas yog peb muaj ib lub siab npaj txhij txais yuav xwb.
Hnub no, yog hnub 15/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer Kennedy dhau ntawm Zaj kawm NTUJ CEEB TSHEEJ TSHAJ XO TXOJ KEV ZOO SIAB LOJ
“Tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub” (Lukas 2:10).
Nyob rau hmo tsaus ntuj nti tsiag to ntawd, thaum uas txhua yam cuag li twb ua twjywm ntsiag to, muaj ib txoj xov zoo tau nrov tuaj. Ib yam li Lukas 2:8-12 tau sau tseg rau peb:
“Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj, tus Tswv ib tug timtswv los cuag lawv, thiab tus Tswv lub tshwjchim ci ntsa iab tuaj rau lawv, lawv poob siab thiab ntshai kawg li, tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub. Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv! Nej yuav porn ib tug menyuam mos qhwv khaubncaws pw hauv lub dab zaub.”
Ib txoj xov zoo, ib txoj kev zoo siab loj. Ib tug Cawm Seej tau yug los rau koj thiab kuv! Cov timtswv tau tshaj tawm qhov xov no.
Cov neeg yug yaj yog cov neeg uas tsis muaj leej twg paub txog, tsis muaj leej twg quav ntsej txog lawv. Tiamsis tus Cawm Seej tau los cuag lawv.
Tomqab ntsib Vajntxwv, lawv rov qab los zov lawv pab yaj ib hmos rau hmo ntawd, tas txog hmo tom qab, tom qab thiab. Lawv yeej tsis dhau los ua neej muaj koob nto npe lossis yog neeg nplua nuj. Lawv lub neej yeej tsis hloov pauv – tshwj qhov uas thaum no lawv txais tau qhov khoom plig yog kev zoo siab loj. Tseeb tiag, txhua yam twb hloov pauv lawm.
Txoj kev zoo siab uas Yexus Khetos coj los rau lub ntiajteb nws tsis nyob ntawm peb kev ua neej tab tom zoo li cas. nws kuj tsis cog lus tias txhua yam yuav dhau los zoo thiab yooj yim, kom peb tau txais kev zoo siab. Lo lus cog tseg ntawd nws txawv: Nws hais tias lub ntiajteb yuav ntxub peb (Yauhas 15:19) thiab nyob hauv ntiajteb, peb yuav ntsib kev sim siab (Yauhas 1:20). Tiamsis nyob hauv Nws, peb yeej tau cog lus yuav muaj kev zoo siab – “Kev zoo siab loj”.
Txoj kev zoo siab no loj txog qib uas cuag li ntuj ceebtsheej tsim dheev, daim ntau thaiv ntuj thiab av tau muab yaws tawm, cia Vajtswv lub tshwjchim ci rau cov neeg yug yaj. Qhov xwm txheej no tseem ceeb heev txog qhov uas ntuj ceebtsheej tos tsis taus ntxiv, tas cov tim tswv cim civ qhia tsis tas yuav tos kom cov cev lus pab cev. Txoj xov zoo txog txoj kev zoo siab loj!
Txoj kev zoo siab no tseem ceeb heev, thiab txoj kev uas nthuav qhia txoj kev zoo siab no kuj ib txwm tau npaj tseg ua ntej uas tsis tau tsim ntuj tsim teb. Cov lus no yuav tau nthuav tawm kom tsim nyog rau txoj kev zoo siab ntawd. Ntawm no yog qhov khoom plig muaj nqis txog qhov uas ntuj ceebtsheej kuj yuav tau qhib qhov rooj qhia rau lub ntiajteb.
Tiamsis txoj kev zoo siab no nws tsis yog tshwm raws li tej uas tab tom tshwmsim hauv peb lub neej. Txoj kev zoo siab uas Vajtswv pub rau peb nws muaj nqis heev vim txoj kev zoo siab no nws tsis hloov pauv raws caijnyoog. Nws yog txoj kev zoo siab nyob hauv peb, tsis tso peb tseg txawm yog yuav ntsib cua daj cua dub.
Tswv Yexus yog txoj kev zoo siab hauv peb lub siab. Nyob hauv Nws txoj kev tshwm ntsej muag, peb yuav nrhiav tau txoj kev zoo siab tiag. Peb tsis tas yuav tos ib yam dabtsi ib ncig ntawm peb kom zoo kawg nkaus. Vajtswv yog txoj kev zoo siab loj – yog qhov khoom plig muaj nqis uas kuv tau txais.
Cov neeg yug yaj yeej xav tsis txog tias thaum uas lawv zov lawv cov yaj hmo ntawd, lawv yuav txais tau ib txoj xov zoo los saum ntuj los qhia txog tus Mexiyas los yug ua neeg. lawv tsis muaj hnub xav tias yus ho yog cov neeg thawj thawj txais tau txoj xov zoo txog tus Vajntxwv ntawm txhua tus vajntxwv. Lawv kuj tsis tas yuav saib saum ntuj kom pom lub cim. Lawv kuj tsis tas yuav tshawb nrhiav ntau xyoo npaj rau lub sijhawm Tswv Yexus yuav los. tiamsis Tswv Yexus yeej los cuag lawv.
Cov tub txawg lawv txawv. Lawv yuav tau caum lub cim qhia paub txog Tswv Yexus txoj kev los yug, thiab dhau ntawm tej uas lawv tshawb nrhiav, lawv tos ntsoov Tswv Yexus yuav ntxov los. lawv nrhiav thiab npaj rau lub sijhawm Tswv Yexus los yug. Thiab Tswv Yexus kuj los rau lawv.
Tswv Yexus ntsia pom peb txhua tus lub siab.
Txawm yog neeg muaj kev kawm txawj lossis yog neeg tsis paub dabtsi. Nws puav leej pom txhua tus lub siab tos ntsoov Nws kev tshwm ntsej muag. Nws tsis raug ib yam dabtsi sab nraud cuam tshuam. Qhov tseem ceeb ntawm nws yog tej uas pib hauv lub siab.
Txoj kev zoo siab no nws muaj cuab kav los rau ib tug twg lub neej, nyob rau txhua qhov. Tsuas yog lub siab npaj txhij xwb ces txaus lawm.
Ua Tswv Yexus tsaug vim peb tsis tas yuav ua ib yam dabtsi loj kom txais tau nws txoj kev zoo siab loj. Ua Tswv Yexus tsaug txawm yog cov tub txawg lawv yuav txawj npaum cas lossis cov neeg yug yaj lawv tsis paub dabtsi los, koj yeej tsis xaiv leej twg ntsej muag.
“Txoj xov zoo, kev zoo siab loj” tseg rau “txhua tus”
“Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li.” (Yauhas 15:11).
Thov kom peb txhua tus nyias yuav npaj nyias lub siab los txais yuav qhov khoom plig uas yog kev zoo siab zoo kawg nkaus nyob hauv Nws.
Thov caw nrog kuv peb thov Vajtswv ua ke:
Ua Vajtswv tsaug rau txoj kev hlub loj uas Vajtswv tau pub rau kuv lub neej. Koj txoj kev zoo siab tsis faib cais caijnyoog, thiab tsis muaj hnub hloov pauv. Thov Vajtswv koj tuav kom txoj kev zoo siab ntawd nws zoo kawg nkaus rau hauv kuv, pab kom kuv khov kho dhau ntawm tej kev sim siab, txawm yuav txomnyem npaum twg. Thov Vajtswv koj hliv txoj kev zoo siab ntawd kom puv nkaus rau hauv kuv lub siab, kom kuv ua lub neej zoo thiab qhia txoj kev zoo siab ntawd rau tej neeg ib ncig kuv. Kuv thov hauv Tswv Yexus Khetos lub npe. Amees.
Cov kwv tij txhua tus, txoj kev zoo siab uas Vajtswv muab pub tsis faib cais caijnyoog, thiab kuj tsis yuam kom yuav ua ib yam dabtsi dhau ntawm lub siab npaj txhij txais tos. Txawm lub neej yuav txomnyem npaum twg, txoj kev zoo siab ntawd yeej ib txwm nyob ntawm peb ib sab, ruaj khov dhau ntawm tej kev sim siab. Cia li qhib siab txais yuav txoj kev zoo siab hauv koob tsheej Tswv Yexus yug, kom Txojmoo Zoo ntawd tsis yog tsuas hloov pauv peb lub neej xwb tiamsis tseem nthuav dav rau tej neeg ib ncig, coj txoj kev cia siab thiab kev kaj siab los pub tag nrho rau lub ntiajteb.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply