Koob tsheej yog lub caij ntawm txoj kev npaj tos, txoj kev zoo siab nrog ntau txoj haujlwm zoo siab nrog tej qhov khoom plig kev hlub. Nyob ntawm tej menyuam yaus, txhua zaug koob tsheej Tswv Yexus yug dhau mus yog lub caij uas lawv yuav sawv ntxov los nrhiav tej qhov khoom plig uas lawv txais tau. Tshuav nyob ntawm cov ntseeg Vajtswv, koob tsheej Tswv Yexus yug yog lub sijhawm tseg rau peb zes lub teeb ntawm txoj kev cia siab hauv peb txhua tus lub siab – tos qhov khoom plig loj tshaj plaws tau muab pub rau peb, yog Cawm Seej Tswv Yexus.
Hnub no, yog hnub 21/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Daphne Delay dhau ntawm Zaj kawm TXOJ KEV TOS ZOO TSHAJ PLAWS
“Muaj ib tug menyuam twb los yug hauv peb cov lawm! Vajtswv muab ib tug tub pub rau peb! Thiab nws yuav ua tus kav peb” (Yaxayas 9:5).
Kuv nyiam tej zaj nkauj koob tsheej, nrog tej ntsiab lus zoo siab txog tej tus neeg daus, tus yawm laus Noel thiab tej khoom plig. Thaum tseem me, thaum twg twb tos ntsoov kom tau pom tus yawm Noel nrog tej txiv heev tshis kub ntev ntev coj khoom tuaj pub rau txhua zaug koob tsheej los. txawm yog cov neeg ntawd yeej tsis muaj tiag los, kuv lub siab me me hnub ntawd yeej tseem kub lug txog qhov uas pw tsis tsaug zog…
Thaum no kuv loj hlob zog thiab kuv nkag siab tias koob tsheej muaj lub ntsiab lus tob dua tej uas kuv xav txog thaum tseem yau. Tiamsis kuv yeej tseem nyiam tej zaj nkauj hu koob tsheej, vim tej ntsiab lus ua rau kuv nco txog txoj kev kub siab lug, tos ntsoov thaum tseem yau.
Tiamsis sim xav saib, tsheej txhiab xyoo dhau los, txhua yam nws tseem tshwj xeeb dua, coj ntau txoj kev cia siab thiab tos ntsoov yam loj dua. Thaum ntawd, pauv qhov uas tej zaj nkauj koob tsheej, cov ua txiv, ua niam yuav tham rau lawv tej menyuam mloog txog tej lus tau cev txog nyob hauv Yaxayas:
“Muaj ib tug menyuam twb los yug hauv peb cov lawm! Vajtswv muab ib tug tub pub rau peb! Thiab nws yuav ua tus kav peb, nws lub npe yuav hu ua “Tus Tuavxam, tus uas muaj Txujci” , “Vajtswv tus muaj hwjchim” “Vaj Leej Txiv tus uas nyob mus ibtxhis,” “Vajntxwv tus uas muaj kev thajyeeb.” Nws kev tswjhwm yuav nthuav loj zuj zus, thiab kev thajyeeb yuav muaj tsis paub kawg nyob saum Daviv lub zwmtxwv thiab thoob plaws nws lub tebchaws. Txij no mus, nws yuav txhim kho lub tebchaws thiab tswjhwm mus rau qhov tseeb thiab coj ncaj ncees mus ibtxhis tsis kawg. Tus Tswv uas muaj hwjchim loj kawg nkaus txiav txim siab yuav ua raws li tej no.” (Yaxayas 9:5-6).
Thaum ntawd, tej menyuam lawv tau mloog tham txog tus Mexiyas, tus Cawm Seej uas sawv daws tab tom tos. Lawv tseem npaj tej kev pehawm raws li lub sijhawm tau teem tseg kom nco ntsoov txog tej lus cog tseg tseem ceeb no. kuv xav tias thaum txog tej lub koob tsheej ntawd kuj yog txoj kev tuav kom cia siab ntsoov. Tiamsis xyoo no tas rov txog lwm xyoo, tus Mexiyas yeej tseem tsis tau tshwm los… sawv daws yeej tseem ua siab ntev tos, lawv yuav tau siv zog tuav lawv txoj kev ntseeg dhau ntawm txhua hnub. kom ib hnub dhau ib hnub, lawv pom tias yeej tsis muaj dabtsi tshwmsim tuaj. Qhov no tej zaug yeej tsis yooj yim. Ntau zaug, tsheej tiam dhau tom qab no los, Yauhas Npatitus kuj tseem nug tus Tswv tias: “Lawv tuaj nug Yexus hais tias: Thov koj qhia rau peb saib koj puas yog tus uas Yauhas hais tias yuav los, lossis peb tseem yuav tos dua lwm tus” (Mathais 11:3).
Peb txhua tus puav leej paub, txoj kev zoo siab yuav ploj zuj zus raws lub caijnyoog. Yog li, yeej tsis muaj dabtsi yuav xav tsis thoob thaum cov yug yaj lawv xav tsis thoob thaum lawv pom muaj cov timtswv tshwm saum nruab ntug hmo ntawd.
“Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj, tus Tswv ib tug timtswv los cuag lawv, thiab tus Tswv lub tshwjchim ci ntsa iab tuaj rau lawv, lawv poob siab thiab ntshai kawg li, tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub. Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv! Nej yuav porn ib tug menyuam mos qhwv khaubncaws pw hauv lub dab zaub, qhov ntawd yog lub cim uas qhia hais tias, tus ntawd yog tus uas kuv hais.” Tamsim ntawd muaj ib pab timtswv ceebtsheej coob coob los nrog tus timtswv ntawd hu nkauj qhuas Vajtswv li no: “Thov kom Vajtswv tus uas nyob saum ntuj ceebtsheej tau koob meej , thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug! (Lukas 2:8-14).
Thaum nyeem zaj xwm txheej no, peb tsuas xav zoo li tib neeg xav xwb. Tiamsis koj puas tau muaj zaum twg xav tias ntuj ceebtsheej kuj zoo siab tos ntsoov lub sijhawm uas Vajtswv ua tiav Nws tej lus cog tseg? lawv tau ua siab ntev tos… thiab ua twjywm npaj. Thiab koj puas tau muaj ib zaum twg ceev faj txog txoj kev uas Txojmoo Zoo tau tshaj tawm rau cov yug yaj lawm tau? Zoo tag npaum no tiamsis ho tsuas tseg rau ib pab neeg tsawg tsawg xwb! Tseeb tiag, tsuas cheem tsum ib tug timtswv xwb txaus tshaj tawm Txojmoo Zoo txog tus Mexiyas los yug lawm.
Kuv xav txog txoj kev zoo siab nyob saum ntuj ceebtsheej, tej zaug Vajtswv kuj tab tom txib ib tug timtswv los rau hauv ntiajteb tshaj xo txog tus Mexiyas yuav los rau hauv ntiajteb. Tiamsis ntawm no yog yam uas cov timtswv lawv tau tos los lawm ntev ntau tiam dhau los! kuv xav txog qhov uas ib tug timtswv nws kub siab tos ntsoov thov cai mus kom pom kiag tim ntsej tim muag… tas muaj dua lwm tus timtswv kuj thov nrog mus ua ke thiab, pheej ua li no txog thaum kawg thiaj muaj coob tug. Tej zaug thaum ntawd Vajtswv hais tias: “Yog tseem muaj leej twg xav mus thiab ces kav tsij mus!” Yog li no tag nrho cov timtswv thiaj puav leej mus! lawv txoj kev tos ntsoov no loj dhau heev, tsis muaj leej twg xav tso tseg lub sijhawm tseem ceeb no. Ntawm no tsuas yog tej uas kuv cim civ xav xwb, tsis muaj leej twg paub. Tiamsis kuv ntseeg tias qhov xwm txheej Tswv Yexus los yug loj kawg nkaus. Oh, kheev lam kom tag nrho lub ntiajteb no yuav paub txog tej uas tab tom yuav tshwmsim los!
Tej menyuam yaus nrog ob lub qhov muag cig lam lug lawv yuav tsis qi muag rau hmo ntawd. Tej menyuam lawv paub tias tus Cawm Seej tab tom los. ntau zaug, kuv tseem xav tias tej menyuam tus twg los twb xav pom Tswv Yexus!
Yog lawm, yog tias lub ntiajteb lees paub qhov khoom plig uas tau muab pub no, ces txoj kev tos ntsoov, txoj kev cia siab thiab kev zoo siab ntshe yuav puv npo saum ntuj ceebtsheej thiab hauv ntiajteb! “Rau qhov Vajtswv hlub neej ntiajteb kawg txog qhov uas txib Nws tib leeg tub los… (Yauhas 3:16).
Txawm yog thawj lub koob tsheej Tswv Yexus yug twb dhau mus lawm los, txog niaj hnub nim no tej menyuam lawv yeej tseem sawv ntxov ntxov los saib yus txais tau qhov khoom plig dab tsi. Yog ib tug ntseeg Vajtswv, peb kuj yuav tau ua li ntawd… tos ntsoov ib yam li tej menyuam tos! Cawm Seej Tswv Yexus los tsis tau txhais tias peb yuav tsis tos lawm, vim Nws yog qhov khoom plig tau muab pub rau peb txhua hnub! koj puas nco Nws tej lus hais rau tus pojniam nyob ntawm lub qhov dej? “Yog tias koj paub Vajtswv qhov khoom plig…” (Yauhas 4:10).
Thov kom tag nrho peb txhua tus yuav ceev peb lub siab kom ruaj khov tos ntsoov tus Tswv ib yam li tej menyuam yaus. Nyob rau lub koob tsheej no, thiab txhua hnub hauv lub neej, peb cia li zoo siab txog tus Cawm Seej Tswv Yexus ib yam li cov timtswv lawv tau hu nkauj qhuas: “Peb cia li ua Vajtswv tsaug, rau qhov Vajtswv twb pub Vajtswv txoj koob hmoov uas muaj nqis kawg nkaus rau peb lawm” (2 Kauleethaus 9:15).
Thov caw nrog kuv peb thov Vajtswv ua ke:
Tus Tswv Yexus muaj kev hlub, Koj yog qhov khoom plig tsis muaj nqi uas Vajtswv tau pub rau kuv, yog qhov kaj ci rau lub ntiajteb tsaus ntuj nti no. thov pab kom kuv tuav kuv lub siab tos thiab ntshaw kom tau nyob ze koj. Thov qhia kom kuv ua lub neej txhua hnub los ntawm txoj kev nco koj tshav ntuj thiab muaj kev zoo siab tsis so, vim qhov khoom plig uas koj tau muab pub – yog qhov khoom plig uas tsis muaj ib yam dabtsi yuav piv tau. Kuv thov hauv Tswv Yexus Khetos lub npe. Amees.
Cov kwv tij txhua tus, koob tsheej xyoo no tshoov kom peb txhua tus tos ntsoov, ntshaw nrhiav Vajtswv ib yam li tej menyuam yaus lawv tos ntsoov tau txais khoom plig. Txawm yog sijhawm yuav dhau mus los, txoj kev zoo siab ntawd tsis muaj hnub yuav qub. Cawm Seej Tswv Yexus – yog qhov khoom plig uas tsis muaj nqi yeej tseem nyob ntawd, zoo siab hlo muab pub rau txhua tus uas tos ntsoov Nws. cia siab tias peb yuav ua neej nyob rau hauv txoj kev zoo siab thiab tos ntsoov ntawd, vim qhov khoom plig loj ntawm koob tsheej Tswv Yexus yug yog Nws txoj kev tshwm ntsej muag nyob hauv peb lub neej.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply