Đei dôm lu kơplah, buăl hiôk chơt yua kơ kĕ jei đơ̆ng bơngai nai, mă lei jrŭ tơlăm, buăl đei ‘bôh sơ’ngon kơ akâu jăn kơdih. Đei dôm lu năr, buăl hlôh khan kơdih athei băt bơnê, mă lei chă ưh kơ’bôh đei tơdrong kiơ ‘lơ̆ng rŏ. Trŏ kơ lăm dôm lu kơplah jơ̆hngơ̆m ưh pă đei tơdrong hiôk chơt, lu bơ̆n kăl kơ lăng đêl dôm lu tơdrong hmă đĕch iĕ ioch hloh, wă kơ băt kơnăl khan: tơdrong mơnat ăn đĕch Kră Yang oei ling lang oei hơdai hăm lu bơ̆n, păng ti Sư oei ling lang chông anhăk lu bơ̆n hlôi kơ dôm trong yak pơmat tat.
Năr ‘nâu, ‘năr 20/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joanna Eccles kơ̆l ‘bai DÔNH PƠPÔI HIÔK HIAN ĂN KƠ DÔM NĂR KIAL HƠBŬT
Sơ̆p Hla Bơar ‘Bok Kei-Dei: “ Kră Yang đei tơgŭm lu bơ̆n truh tơ âu.” (I Samuel 7:12b)
Adrol kơ ‘nâu dôm sơnăm, mĭnh ‘nu bơngai buăl inh roi khan sư wă jê̆ sơkơ̆t. Inh ưh kơ đei tơchĕng tơdrong tơbăt ‘noh đei pơm kơ inh ưh kơ hiôk lăm jơhngơ̆m thoi noh. Kơplah ‘noh inh ưh tim mă đei kiơ lăm ti- păng tơpă lăm jơhngơ̆m, inh kŭm hơpơi kơ đei thoi sư. Inh đei sơ’ngon, na ‘bôh đei glăi yua kơ ‘nhĕng kơ sư, păng nŏng kơ nhen oei đom lăm tơdrong mơn đei ưh kơ ‘lơ̆ng noh hơnơ̆ng.
Lăm jơ akŭm krao khan giĕng đơ̆ng rŏng noh, inh krao wơ̆n đĭ đăng ră roi klah song tơdrong mă lu sư đei băt bơnê. Tơpă, inh băt kơdih inh oei kăl kơ pơhrăm hŏk lăi dơ̆ng ‘bai pơhrăm gah jơhngơ̆m băt bơnê pă mĭnh wơ̆t dơ̆ng. Kơplah truh tơ inh bơih, inh lăng tơ ala jơ̆ng, păng ‘bôh ‘bar pah chơ khŏ jơk rang ala măt ‘năr. Thoi noh na inh pơma: “Inh băt bơnê yua kơ ‘bar pah chơ khŏ ‘nâu.” Chơ khŏ inh răt hăm jên tơmam sĕt đơ̆ng lăm điê̆n thoăi. Hơbŏ inh kăl kơ bơnê yua kơ jơhngơ̆m pran dah tơdrong jang, mă lei lăm kơplah ‘noh, inh jê̆ gơh tơchĕng truh tơ chơ khŏ. Păng tă kơ, trŏ kơ tơdrong iĕ ioch ‘noh tă kơ jơ̆ jơ pơtơm blŭng a. Đơ̆ng chơ khŏ, Kră Yang dui inh lĕch hlôi đơ̆ng anih măng mu đơ̆ng lăm jơhngơ̆m inh, păng ‘net ăn kơ inh ‘bôh tơdrong ‘lơ̆ng lăm kơdih dang ei.
‘Lơ̆ng hơiă tơpă kơplah băt khan Kră Yang ling lang gô wă tơ‘bơ̆p lu bơ̆n- ‘bơ̆t trŏ kơ anih mă lu bơ̆n oei. Hơbŏ buăl kŭm oei lăm jơnăr ưh kơ hơđơ̆ng, ưh kơ đei ‘bôh yua kơ đơ̆ng tơdrong kiơ wă đei hiĕk chhôk. Hơbŏ buăl oei lăng tơ ala, jơhngơ̆m trăp păng tơchĕng: “Ưh kơ băt layơ kơdih wă yak hlôi đơ̆ng tơdrong ‘nâu?”
Tơdah thoi noh, athei pơlong apĭnh Kră Yang tơ’bôh kơ buăl ‘bôh dôm lu tơdrong ‘lơ̆ng rŏ mă Sư đei pơm kơ buăl. Pơjuăt lăng dơ̆ng. Pơjuăt băt bơnê. Yua kơ kơplah bơ̆n ‘blŏk dơ̆ng dôm lu tơdrong tih hloh Kră Yang đei pơm bơih, hơmĕng gô pơtơm lăng ‘bôh- mă khan lăm dôm kơ năr măng mu hloh.
Kơplah tơdrong arih oei hiôk hơđơ̆ng, athei “dônh pơpôi” dôm kơ jơ ‘blŏk ‘lơ̆ng rŏ wă ‘măn kơ dôm lu năr kial hơbŭt. Nhen thoi bơngai nai ngăl pơma gah “tơdrong mong ‘măn kơ dôm kơ năr pơmat tat”, buăl kŭm gơh mong ‘măn mĭnh “tơdrong mơnat ăn đĕch”- jơ̆ lu tơdrong dôm wơ̆t Kră Yang đei dŏng tơgŭm, pơklaih păng tơl tơwih nơ̆r buăl. Athei chih răk. Kơplah buăl ưh pă đei tơchĕng kơ tơdrong kiơ ‘lơ̆ng, lei trŏ kơ dôm lu tơdrong chih răk ‘noh gô tơ ‘blŏk kơ buăl ‘blŏk: Kră Yang ling lang ‘mêm kơ buăl, păng Sư ưh kơ layơ weh ataih đơ̆ng buăl.
Kon pơlei Isơrael sơ̆ kŭm đei tơ’bơ̆p kơ tơdrong ‘noh. Đơ̆ng rŏng kơ lu sư tơbral wih brŏk tơ Kră Yang păng krao apĭnh Sư dŏng tơgŭm lăm tơdrong tơblah hăm bơngai Philistin, Kră Yang đei ăn kơ lu sư kĕ jei. Na ‘bok Samuel pơdơ̆ng mĭnh pôm tơmo ‘blŏk hơdơ̆r păng krao anăn ‘noh Êbênêser, sư khan: “Kră Yang đei tơgŭm lu bơ̆n truh tơ âu.” (I Samuel 7:12)
Kon pơlei pơla Kră Yang chăl sơ̆ đei pơm tơdrong ‘noh- lu sư pơdơ̆ng tơdra tơmo ‘blŏk hơdơ̆r wă ‘blŏk răk bơnê kơ Kră Yang rim wơ̆t Sư bơ̆jang. Pơtao Đawit kưm thoi noh. Sư đei pơtơm lu Hơriso lăm tơdrong ơh sơ’ngon, mă lei đơ̆ng kơ noh đei tơplih tơ nơ̆r ư-ang kơplah ‘blŏk dơ̆ng tôm tơdrong jang mơsêh hlĭch Kră Yang đei pơm kơ sư.
Lăm Hơriso 77:10-12, sư chih:
“Inh khan: “Âu boih pơmat-tat kơ inh, Ti ‘ma Kră Yang Tih Hloh tơplih boih.” Inh tơ’blŏk dơ̆ng kơ dôm tơdrong jang Kră Yang, inh ‘blŏk dơ̆ng kơ lu tơdrong mơsêh hlĭch Ih pơm sơ̆ inh kư̆m gô tơchĕng kơ dôm tơdrong Ih pơm boih. Păng oei tơchĕng kơ lu tơdrong jang hlĭch Ih noh.”
Ưh kơ sĭ ‘blŏk răk đĕch, lu bơ̆n kŭm kăl kơ ră roi gah tơdrong pŭn hiôk Sư. Kơplah buăl roi dơ̆ng dôm lu tơdrong Kră Yang đei pơm, buăl đei pơlung tơgŭm bơngai nai, păng kơdih lu sư kŭm gô jơ̆ bơngai tơ ‘blŏk kơ buăl kơplah buăl hiơt kơ bơnê kơ Sư.
‘Blŏk dơ̆ng dôm lu tơdrong kiơ Kră Yang đei pơm kơ buăl gô đei jơhngơ̆m băt bơnê. Păng jơhngơ̆m băt bơnê jơ̆ mĭnh tơmam tơblah gah pơhngol, ba ăn tơdrong hơđơ̆ng lăm pơhngol.
Nơ̆r ‘Bok Kei-Dei lăm Philip 4:6-7 chih:
“Iĕm ‘nĕ kơ hli, ưh kơ hli kơ minh tơdrong kiơ ôh. Mă-lei iĕm athei krao khan apinh ‘Bok Kei-Dei wei-lăng păng tơgŭm iĕm lăm tôm tơdrong păng athei băt bơnê kơ Sư ling-lang. Thoi noh na ‘Bok Kei-Dei ăn kơ iĕm hiôk huay kơ tơchĕng lơ tơdrong păng huay kơ tơchĕng kơ tơdrong hli, yua kơ iĕm lui gơnang boih kơ Yêsu Krist. Tơ̆ng bơ̆n gơnang kơ đon bơ̆n tơchĕng kơdih đĕch bơ̆n ưh kơ hiôk ôh.”
Kră Yang ưh kơ chông buăl năm lăm teh đak ‘nâu na wă achăng buăl mĭnh puăt. Hơpơi apĭnh Kră Yang tơgŭm buăl chă ‘bôh dơ̆ng dôm lu tơdrong ‘blŏk rơngơp, ôn jrŭ lăm tơdrong mơnat ăn đĕch Sư, wă tơgŭm buăl hlôi kơ dôm trong yak pơmat tat.
Păng tơdah buăl oei ‘bơ̆t tŏk bŏk kial hơbŭt, athei krao apĭnh Kră Yang rei lăm jơhngơ̆m buăl dôm kơ hơdah đơ̆ng tơdrong hiôk chơt. Athei ăn tơdrong hơmĕng anih Sư glơng buăl tŏk, păng chông anhăk buăl yak gah hơdah.
Apĭnh đĭ đăng krao khan hơdai:
Kơkuh kơ Kră Yang ‘mêm mơnat kơ kon. Kră Yang ơi, đei kơplah jơhngơ̆m kon nhen hrĕng kro, chă ưh kơ ‘bôh tơdrong kiơ ‘lơ̆ng rŏ wă bơnê kơ Ih. Mă lei Ih oei kĕ chơ̆n tơ ‘blŏk kơ kon ‘blŏk dah tơdrong mơnat ăn đĕch Ih, đơ̆ng dôm kơ tơdrong iĕ ioch hloh mă Ih ling lang bơwei kon. Apĭnh pơih măt kon wă kơ kon ‘blŏk dơ̆ng dôm tơdrong jang tih hloh Ih đei pơm, păng ăn kơ jơhngơ̆m kon ‘bĕnh blai jơhngơ̆m băt bơnê pơyơ̆r kơ Ih. Apĭnh ăn kơ kon tơdrong hiôk hian truh đơ̆ng Ih, wă kơ kon dơ̆ng kơjăp mă khan oei ‘bơ̆t tŏk bŏk kial hơbŭt. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, mă khan buăl oei tơ yơ lăm trong yak năm đunh kơjung đơ̆ng tơdrong arih, tŏk bŏk dôm kơ năr hơđơ̆ng dah lăm chăl măng mu, athei pơtơm hăm mĭnh tơdrong iĕ ioch đĕch: mĭnh tơdrong mă buăl bơnê. ‘Noh rŏ lăng jơ̆ hơdah dang tŏ pơge hrôih, mĭnh pôm pơkao ‘lơ̆ng cheng trong, dah mĭnh trong nơ̆r apĭnh jet. Mưh lăp, trŏ kơ đơ̆ng dôm lu tơdrong iĕ ioch ‘noh, tơdrong hiôk chơt gô đei ‘bôh dơ̆ng, păng buăl gô băt kơ năl: Kră Yang oei ‘bơ̆t doh. Sư ưh kơ layơ achăng buăl. Athei ăn jơhngơ̆m băt bơnê pơih trong kơ tơdrong hơđơ̆ng mơ̆t. Păng athei lui khan Kră Yang oei pơm tơdrong ‘lơ̆ng hloh kơ buăl, mă khan buăl oei tơ anih ayơ hĭ!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply