Hăm đei layơ buăl đei pơm tơdrong glăi kiơ? Păng mă adrin wă kơ hiơt, adrin ôn, mă lei jơhngơ̆m pă đei hiôk? Buăl băt kơ kơdih pơm kơ Kră Yang sơ’ngon. Na buăl weh wer, chơchă tơdrong pơma pơdŏng kơdih, păng tơchĕng khan “Kră Yang gô hlôh khăn!” Mă lei, đei minh tơdrong sĭt tơpă: Kră Yang ưh kơ đei layơ lê̆ hlôi tơdrong yoch đêl pơm noh, kơplah Kră Yang khan noh tơdrong yoch, noh sĭt jơ̆ yoch, lu bơ̆n ‘nĕ kơ lăng hmă đĕch. Păng Kră Yang oei chang gô lu bơ̆n wih wơ̆t dơ̆ng, ưh kơ sĭ wă hil phak, mă wă pơklaih lu bơ̆n, pơklaih lu bơ̆n thoi đêl.
Năr ‘nâu, ‘năr 25/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai KƠPLAH KRĂ YANG KHAN “ ‘NOH JƠ̆ TƠDRONG YOCH”
Sơ̆p Hla Bơar ‘Bok Kei-Dei: “Inh tơbral yoch hăm Kră Yang ‘Bok Kei-Dei, Ưh pă đei ôn dôm yoch kơnê̆ inh. Inh khan: “Inh tơbral roi đĭ dôm tơdrong yoch glăi inh kơ Kră Yang. Ih huay pă jô̆ yoch inh.” (Hơriso 32:5)
Buăl hăm đei rơhing lăm chăl arih gah bơhngol kơdih đei pơklaih ming jing ‘nao ưh? Kơplah noh, ‘nĕ kơ hiơt tơbral păng achăng lê̆ tơdrong yoch noh jơ̆ kăl tơpă. Lu bơ̆n kăl kơ năm tơ Kră Yang păng tơpă tơpăt apinh Kră Yang: “Kră Yang ơi, đei tơdrong kiơ lăm tơdrong arih kon oei pơgăn kon sơng iŏk tôm tơdrong mă Ih ‘măn wă ăn kơ kon?”
Gô thoi yơ tơdah lu bơ̆n mơn ‘bôh dôm tơdrong kơdih oei pơm ‘lơ̆ng mă lei noh jơ̆ tơdrong yoch? Kơplah Kră Yang dan ti Sư tơ lăm jơhngơ̆m lu bơ̆n, Sư pơma khă păng tơ’bôh tơdrong kiơ noh jơ̆ “tơdrong yoch”, na trŏ tơpă pă đei hiôk tŏ sĕt hloi. Lu bơ̆n ‘maih wă pơma khan tơdrong kơdih pơm ưh kơ trŏ hăm anăn “gơh mơ̆ng”, tơplih kơ pơdrơ̆ng noh jơ̆ tơdrong yoch. Dah mă băt noh jơ̆ tơdrong yoch, lu bơ̆n gô đei chih kơjung dôm nơ̆r pơma pơdŏng kơdih.
Rŏ lăng lu bơ̆n đei hiơt bơih thoi âu: kơplah Kră Yang pơma khan tơdrong kiơ noh jơ̆ yoch, mă dôm tơdrong lu bơ̆n pơdŏng kơdih thoi yơ? Lu bơ̆n hăm đei kăl kơ tơ’blŏk dơ̆ng thoi âu: ‘bơ̆t anăp ‘Bok Kei-Dei, ưh kơ đei khan tơdrong yoch tih dah tơdrong yoch iĕ, tơdrong yoch thoi yơ kư̆m khan yoch ngăl? Hăm đei layơ lu bơ̆n pơma hơlĕnh kơdih, truh tơ tơchĕng Kră Yang gô ‘brơ̆k mơnat kơ dôm nơ̆r pơdŏng kơdih akâu lu bơ̆n, păng pơm ưh kơ ‘bôh tơdrong yoch mă lu bơ̆n đei pơm? Kư̆m đei lăm jơhngơ̆m lu bơ̆n đei pơma khan thoi âu: Kră Yang đei “lê̆ hlôi” gah đei pŭ iŏk đơ̆ng tơdrong yoch bơih ưh?
‘Bok Kei-Dei ‘mêm mơnat kơ lu bơ̆n. Păng tơm kơ đơ̆ng ‘mêm mơnat, Kră Yang ưh kơ wă kơ tơdrong yoch oei kiơ̆ lăm tơdrong arih lu bơ̆n. Mă lei tơdrong noh jơ̆: lu bơ̆n hăm tơpă đơ̆ng lăm jơhngơ̆m ơh sơ’ngon yua kơ tơdrong yoch kơdih ưh? Lu bơ̆n hăm wă tơbral, apinh huay kơ jô̆ yo, păng pơdrơ̆ng tơwih rŏng kơ tơdrong yoch ưh?
Bơngai chih Hơriso 32:5 chih thoi âu: “Inh tơbral yoch hăm Kră Yang ‘Bok Kei-Dei, Ưh pă đei ôn dôm yoch kơnê̆ inh. Inh khan: “Inh tơbral roi đĭ dôm tơdrong yoch glăi inh kơ Kră Yang. Ih huay pă jô̆ yoch inh.”
Hrei âu, lu bơ̆n đei ‘bôh lơ tơdrong pơgơ̆p pơjah pơjăng băl, ưh kơ pơdrơ̆ng băl. Păng kơplah ‘moi kiơ̆ truh tơ tơm rơh, na tă tơ ‘bôh đơ̆ng tơdrong yoch tam mă tơbral. Kră Yang khan noh jơ̆ tơdrong yoch, mă dôm kơ lu bơngai khŭl hơdai adrin pơma khan tơdrong noh hăm anăn nai. Tơdrong noh jơ̆: kơplah Kră Yang khan tơdrong noh jơ̆ yoch, na noh jơ̆ yoch.
Lu bơ̆n athei lăng ming lăm jơhngơ̆m kơdih. Athei jet kơdih: “Hăm đei tơdrong kiơ lăm kon kăl kơ Kră Yang huay kơ jô̆ yo ưh?” Rŏ lăng tơnat wă tơ’bơ̆p hăm tơdrong noh, na Kră Yang gô pơ’lơ̆ng tơ’bôh dôm tơdrong Sư ‘maih wă tơplih lăm jơhngơ̆m lu bơ̆n. Rim năr, lu bơ̆n kăl kơ wơ̆ ‘lŏ lăm Kră Yang. Păng tơbral tơdrong yoch noh tơm kơ trong yak năm noh.
‘Nĕ kơ ôn tơdrong yoch. Athei chĕp ba tôm tơdrong pơjao kơ ‘Bok Dŏng Pơklaih Yang Yêsu. Athei ăn tơdrong huay kơ jô̆ yo Kră Yang ôp rơgoh dôm tơdrong măng mu lăm jơhngơ̆m buăl. Mă khan ưh kơ wă drơ̆ng iŏk, mă lei lu bơ̆n huay kơ pơjah hăm ‘Bok Kei-Dei. Kơplah Kră Yang pơma khan tơdrong kiơ noh yoch, na noh jơ̆ yoch.
Athei krao apinh Kră Yang thoi kơ Đawit đei apinh: “Ôn muh măt Ih ‘nĕ pă lăng tơdrong yoch inh, Păng sut rơgoh đĭ yoch kơnê̆ inh. Ơ Kră Yang ‘Bok Kei-Dei! Apinh Ih pơjing lăm Inh đei minh jơhngơ̆m ‘lơ̆ng rơgoh, Păng pơjing ming ‘nao lăm inh minh pôm bơhngol tơpăt.” (Hơriso 51:9-10)
Apĭnh đĭ đăng krao khan hơdai:
Kơkuh kơ Kră Yang mă ‘mêm kơ kon, jơ ‘nâu kon ưh kơ wă arih lăm măt ưh kơbang gah bơhngol dơ̆ng. Apinh Kră Yang mơnat păng huay kơ jô̆ yo dôm tơdrong yoch kon oei adrin pơklơ̆p lê̆, adrin pơdŏng kơdih akâu. Apinh pơklaih lăm kon minh jơhngơ̆m ‘lơ̆ng rơgoh, păng pơjing ming ‘nao bơhngol kon, wă kơ kon đei iŏk tôm tơdrong ‘lơ̆ng rŏ mă Ih đei ‘măn kơ kon. Bơnê kơ Kră Yang yua kơ tơdrong ‘mêm mơnat Ih oei ling lang ăn kơ kon, mă kơplah kon ưh kơ trŏ kơ đei. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, Kră Yang oei chơchă dôm jơhngơ̆m băt kơ tơbral, băt kơ wih brŏk, păng băt kơ krao apinh tơdrong ‘mêm mơnat đơ̆ng Sư. Tơdah năr ‘nâu buăl đei mơn lăm jơhngơ̆m kơdih đei tơdrong kiơ tam mă tơpăt, ‘nĕ kơ ôn ‘bơ̆t anăp Sư. Yua kơ kơplah buăl pơjao tôm tơdrong ăn kơ Kră Yang, Sư huay pă jô̆ yo kơ tơdrong yoch, jơhngơ̆m đei tơplih ming ‘nao, păng trong yak năm buăl gô pơtơm đơ̆ng lăm tơdrong ‘lơ̆ng rơgoh đơ̆ng Kră Yang ăn.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply