Ib txoj kev sim siab loj yog yuav ua li cas thiaj hloov pauv, thiab lwm txoj kev nyuaj yog yuav ua li cas kom lwm tus thiaj ntseeg tias yus lub neej tau hloov lawm tiag. Muaj tej tus neeg tau Vajtswv chwv txog, tau hloov pauv puag hauv lub siab, tiamsis lawv lub neej yav tag los ua rau tej neeg ib ncig tsis ntseeg lawv siab. Tseeb tiag yeej tsis yooj yim thaum lub neej yav dhau los pheej caum yus qab, txawm yog lub neej twb hloov dua tshiab lawm. Txawm yog peb yeej ntseeg Vajtswv tiag thiab twb lees kev txhaum lawm los, muaj tej zaug, peb yeej cheem tsum ib tug neeg kam sawv ua tim khawv thiab txaus siab ua pov thawj rau peb hais tias: “Tus neeg no twb tau Vajtswv hloov lawm tiag.”
Hnub no, yog hnub 27/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Anne Ferrell Tata dhau ntawm Zaj kawm UA POV THAWJ TXOG TEJ KEV HLOOV PAUV
Vajluskub: “Tiamsis Npananpas coj Xaulus mus cuag cov povthawj. Npananpas qhia tej uas Xaulus porn thiab tau ua lawm rau lawv mloog. Npananpas qhia hais tias, thaum Xaulus tabtom taug kev mus pem lub nroog Damaxes, Xaulus twb pom tus Tswv Yexus, thiab tus Tswv twb nrog Xaulus tham lawm.” (Tes Haujlwm 9:27)
“Tsis paub yus tus txiv puas tseem yuav ntseeg yus dua ib zaug ntxiv? Thiab vim li cas ho yuam kom nws ntseeg yus?” Ntawd yog tej kev xav uas kuv tus phooj ywg khuam ncuv hauv nws. Nws tau tham qhia kuv thaum wb mus zaum haus café ua ke.
Nyuam qhuav yog rau hli tom qab uas nws tso tseg txojkev ua hluas lawm. Nws paub tias nws twb lees txim tiag tiag thiab tig rov qab los rau hauv txoj kev sib raug zoo nrog Tswv Yexus. Nws paub tias nws twb hloov lawm. Nws paub tias nws yuav tsis muaj hnub rov qab taug txoj kev qub. Tiamsis… yuav ua li cas kom nws tus txiv thiaj paub tau qhov no?
Kuv tus phooj ywg yog qhov pov thawj ciaj sia tau sau nyob hauv 2 Kauleethaus 5:17: “Tus uas nrog Yexus Khetos koom ib txojsia, tus ntawd yog neeg tshiab. Nws lub neej qub twb dua lawm nimno nws muaj lub neej tshiab”
Txawm Nws tus txiv twb hais tias zam txim lawm, los hauv nws tus txiv lub siab yeej tseem ua xyem xyav. Kuv tus phooj ywg nkag siab tias qhov uas rov qab ua kom muaj kev sib ntseeg siab cheem tsum sijhawm, tiamsis nws xav qhia tias txojkev hloov pauv ntawm nws tus kheej yeej tseeb tiag.
Kuv thiaj hais rau kuv tus phooj ywg tias: “Koj cheem tsum muaj ib tug neeg zoo li Npananpas” nws saib kuv, cuag li tsis nkag siab, kuv thiaj tham txog zaj xwm uas hais txog Paulus lub neej.
Ua ntej tau Vajtswv hloov pauv thaum tab tom taug kev mus rau Damaxes, Paulus muaj dua lub npe hu ua Xaulus. Tes Haujlwm 9:1 sau: “Thaum ntawd Xaulus tseem ua nruj ua tsiv yuav tua cov uas ntseeg tus Tswv pov tseg, Xaulus mus cuag tus Povthawj Hlob”
Tiamsis, thaum Xaulus tab tom taug kev mus, Vajtswv tshwm los ntsib yawg. Thiab lub sijhawm ntawd, Xaulus lub neej tau hloov pauv. Vajtswv tis ib lub npe tshiab rau Xaulus, hu ua Paulus.
Tomqab uas lub neej hloov dua tshiab lawm, Paulus txawm pib mus qhia txog Tswv Yexus. Tiamsis kuj yooj yim nkag siab xwb: luag tsis kam ntseeg. Lawv sib ntxhi twj ywm: “Tus neeg no tsis yog tus neeg tsimtxom cov ntseeg hauv Yeluxalees los?” Yawg ho mus rau hauv Yeluxalees thiab xav txuas nrog cov ntseeg ua ke, twb yog li ntawd leejtwg los ua xyem xyav. Thiab tsis muaj leejtwg ntseeg tias yawg lub neej tseeb tiag tau hloov.
Dhau ntawm… Npananpas tshwm los!
Tes Haujlwm 9:27 qhia tias: “Tiamsis Npananpas coj Xaulus mus cuag cov povthawj. Npananpas qhia tej uas Xaulus porn thiab tau ua lawm rau lawv mloog. Npananpas qhia hais tias, thaum Xaulus tabtom taug kev mus pem lub nroog Damaxes, Xaulus twb porn tus Tswv Yexus, thiab tus Tswv twb nrog Xaulus tham lawm.”
Npananpas tau tawm suab tiv thaiv Paulus. Ib yam li ntawd, kuv tus phooj ywg nws kuj cheem tsum ib tug neeg pab tiv thaiv nws – ib tug neeg sawv los lees paub tej kev hloov pauv hauv nws lub neej thiab pab kom nws tus txiv pom tias nws txoj kev ntseeg ntawm tus Cawm Seej yeej muaj tseeb tiag.
Thiab tus neeg ntawd kuj yog lawv tus xibhwb uas saib xyuas lawv Pawg Ntseeg. Tus xibhwb ntawd tau pab txhawb nws thaum nyob rau lub sijhawm uas nws lees txim, tso kev txhaum tseg thiab Vajtswv kho zoo nws. Xibhwb paub kuv tus phooj ywg qhov teeb meem. Yog li lawv thiaj teem ib lub sijhawm sib ntsib rau lawv peb leeg ua ke.
Xibhwb lees paub tias kuv tus phooj ywg tau tso kev txhaum tseg lawm tiag, thiab nws yeej hloov siab lawm. Yog li, nws tus txiv yuav tau nkag siab txog tej kev hloov pauv hauv nws tus pojniam yog qhov tseeb. Ob niam txiv txais xibhwb tej lus pab tswv yim. Tej kua muag poob los vim zoo siab – zaum no tsis muaj kev mob siab lawm, tiamsis yog zoo siab, vim muaj txoj kev hais sib haum tiag. Tus txiv ntsia pom nws tus pojniam hloov dua tshiab, tsis yog vim nws tus pojniam siv zog kom dhau los ua neeg tshiab, tiamsis vim Vajtswv tau hloov pauv sab hauv tawm sab nraud.
Zaj xwm txheej ntawd twb tshwm sim tau 20 xyoo dhau los lawm. Thaum no nkawd lub neej txijnkawm yeej tseem kaj siab thiab muaj zog tshaj.
Tib neeg lub neej yeej hloov pauv tau. Xaulus twb hloov pauv. Koj los kuj ib yam li ntawd. Tiamsis txawm yog koj lub neej twb hloov pauv tiag lawm los, lwm tus yeej tseem cheem tsum sijhawm los ntseeg koj. Thiab ntau zaug, peb cheem tsum ib tug phooj ywg zoo li Npananpas – ib tug neeg zoo siab hlo tuaj peb tog, ua tim khawv txog peb txoj kev ntseeg tshiab.
Thaum xibhwb pab kom tus phoojywg tus txiv ntseeg tias nws hloov pauv lawm tiag, ces yeej tsis muaj dabtsi yuav tav tau tsis pub kom nkawd rov qab muaj lub neej txij nkawm zoo. Thaum uas Npananpas pab cov thwjtim ntseeg tias Paulus yeej ntseeg tiag, ces yeej tsis muaj dabtsi yuav tav kom Pawg Ntseeg tsis huam vam. Tes Haujlwm 9:31 sau tseg tias: “Thaum ntawd cov ntseeg uas nyob thoob plaws hauv lub xeev Yudas, lub xeev Kalilais thiab lub xeev Xamalis tsis muaj kev ntxhov siab tau ib ntus. Vaj Ntsujplig tus Dawbhuv txhawb cov ntseeg lub zog, ua rau cov ntseeg muab siab rau ntseeg; muaj neeg los ntseeg coob zuj zus ntxiv, thiab lawv ua lub neej hwm Vajtswv.”
Txhua tes haujlwm pib thaum uas Npananpas qhia rau cov thwjtim paub txog tej uas tau tshwmsim los. Txij thaum ntawd mus, Paulus thiaj muab tag nrho nws lub neej los qhia, los tshaj tawm thiab ua kevcai raus dej rau cov ntseeg tshiab.
Yog tias hnub no koj yog ib tug neeg tau hloov pauv lawm, ces koj yuav tau paub tias koj yog ib tug neeg tshiab. Tej yam qub twb dhau mus lawm, txhua yam dhau los ua tshiab. Koj paub qhov no. Vajtswv paub tej no. tiamsis yuav kom lwm tus ntsia pom thiab ntseeg koj mas, tej zaug lawv yuav cheem tsum ib lub sijhawm. Thiab ntau zaug, koj kuj yuav cheem tsum ib tug neeg zoo li “Npananpas” – ib tug neeg kam sawv los hais lus ua tim khawv: “Kuv ntseeg txoj kev hloov pauv ntawd yog tiag!”
Thov caw nrog kuv peb thov Vajtswv ua ke
Kuv tus Vajtswv! Ua Koj tsaug koj tau zam txim thiab hloov dua tshiab. Txawm yog kuv tau ntog los, vim Koj txoj kev hlub, kuv paub tias kuv dhau los ua ib tug neeg tshiab. Thov pab kom kuv ua tau lub neej nthuav tawm txoj kev nco txiaj ntsig rau tej kev hloov pauv ntawm txhua hnub, txawm yog lwm tus yeej tseem tsis tau ntseeg kuv. Thov pub kom kuv txo hwjchim, ua siab ntev, pab kom kuv sawv khov kho thiab ntseeg tias koj yeej tseem tab tom ua haujlwm. Thov Vajtswv tso rau hauv kuv ib tug neeg zoo li Npananpas, los txhawb, los tiv thaiv, thiab ua tim khawv txog Koj txoj kev hloov pauv hauv kuv lub neej. Kuv thov hauv Tswv Yexus Khetos lub npe. Amees.
Cov kwv tij txhua tus, yeej tsis muaj leej twg lub neej yuav zoo uas tsis muaj qhov yuam kev. Tiamsis los ntawm Vajtswv txoj kev hlub, peb tau hloov dua tshiab thiab pib ib ncua kev taug los ntawm Vajtswv txoj koob hmoov. Thiab thaum peb hloov pauv tiag lawm, Vajtswv yuav tso tej neeg ntseeg siab tau ntawm peb ib sab, nrog peb ua ke. Tus neeg ntawd yuav ua tim khawv tias peb lub neej twb hloov pauv tiag tiag los ntawm Yexus Khetos. Yog li txhob qaug zog thaum uas lwm tus tseem tsis tau ntseeg siab rau koj – yuav tau ncaj ncees thiab tos Vajtswv ua Vajtswv tej haujlwm zoo.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply