Tơdrong arih lu bơ̆n mưh lăp đei gleh lap tơpă. Rim năr nŏng kơ pơlơ̆k dơ̆ng pơlơ̆k dơ̆ng nhen thoi mĭnh tơmam dăr: wei lăng hnam, pơkeh tơdrong jang, hiơ̆k bơngơ̆t kơ hnam dơnŏ…. Lu bơ̆n hiĕk tơ’ngoaih muh măt, mă lei tơ lăm jơhngơ̆m đĭ păkĕ. Nhen thoi ưh kơ đei bu băt hlôh kơ lu bơ̆n oei rơdu rơmơ̆n, gleh lap truh dang yơ. Mă lei hăm đei layơ buăl tơchĕng khan, dôm lu tơdrong jang mă Kră Yang pơjao kơ buăl tă kơ ưh kơ trŏ jơ̆ tơdrong bơ̆jang gleh hrat? Gô thoi yơ tơdah ‘noh bơih jơ̆ tơdrong pơjao ăn đơ̆ng plĕnh?
Năr ‘nâu, ‘năr 26/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Pauline Hylton kơ̆l ‘bai TRŎ KƠ TƠDRONG JANG DAH PƠCHĔP ĂN
Sơ̆p Hla Bơar ‘Bok Kei-Dei: “Inh ‘Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm.” (Yôhan 13:14)
Tơpă inh ưh kơ ‘maih năm hnam akŭm tŏ sĕt hloi. Yua kơ rim wơ̆t truh tơ noh, bu kŭm jet gah ‘bă inh. “ ‘Bă ih thoi yơ bơih?” Lu sư nŏng kơ pơlơ̆k dơ̆ng pơlơ̆k dơ̆ng nơ̆r jet ‘noh. Inh đei gleh lap dêh kơplah nŏng kơ athei roi gah tơdrong jơhngơ̆m pran sư. Lăm jơhngơ̆m, inh jê̆ ‘maih ôr re: “Lei inh thoi yơ? Inh jơ̆ bơngai oei wei lăng mĕ ‘bă, wei rong ‘bar ‘nu kon ‘nao wơ̆ ‘lŏ, wei lăng kơ klo, kơplah oei kăl kơ bơ̆jang đĭ kơ jơnăr păng wei lăng đĭ kơ anih bơ̆jang lăm hnam dơnŏ! Liơ ưh kơ đei bu jet lăng inh thoi yơ bơih?!”
‘Bă inh ‘nao hlôi kơ raih kơting jơ̆ng pah ‘ngiĕo, păng hơmet wă brok tơhnam arih hơdai hăm lu nhôn. Inh hli tơrơ tơpă. Năr ‘noh kơplah năm tơ hnam akŭm, inh đei blư tơ’bơ̆p mĭnh ‘nu duch kră mơlôh. Kiơ̆ kơ inh băt, duch ei đei ‘măn đĭ jơnăr wă wei rong ‘bă sư.
Inh jet duch ei: “Duch ơi, tơchĕng truh kơ tơdrong sơng iŏk ‘bă brok tơ hnam mă lei mon hli dêh. Mon ưh kơ pơ̆n nuih khan mon đei gơh wei rong ‘bă. Duch đơ̆ng đêl wei rong ‘bă duch hăm trŏ ưh? Duch pơm thoi yơ lei?”
Duch ei hiĕk, lăng tơ inh păng pơma:
“Mon ơi, huei kơ đei kiơ ôh. Gơh wei rong kơ ‘bă jơ̆ mĭnh tơdrong mơnat ăn đĕch mon ă.”
Inh gô ưh kơ layơ hiơt kơ nơ̆r pơma ‘noh.
Dĭng truh dôm sơnăm đơ̆ng rŏng, tơdrong wei rong bơngai lăm hnam dơnŏ ‘noh tơpă jing “tơdrong pơjao ăn” lăm măt inh, tơplih kơ lăp jơ̆ tơdrong jang. Mă lei bơnê kơ Kră Yang, tuch luch inh kŭm gơh lăng sơng iŏk tơdrong jang gĭt kăl ‘noh kiơ̆ thoi noh.
Sơ̆p Hla Bơar ‘Bok Kei Dei đei chih roi lăm Yôhan 13:12-14:
“Sư ôp tôm kơ jơ̆ng lu sư boih, na Sư iŏk hrŭk ao ‘ngoaih Sư, na wih tơ anih Sư. Lăm anih Sư ei Sư jet lu đe ei: “Iĕm hăm hlôh Inh pơm kiơ kơ iĕm thoi noh hei? Iĕm krao Inh ‘Bok Thây iĕm păng Yŏng iĕm. Iĕm krao Inh thoi noh bưh mơ̆n yua kơ Inh ‘Bok Thây iĕm păng Yŏng iĕm tơpă. Inh ‘Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm.”
Kră Yang Yêsu ling lang lăng tơdrong jang bơwih bơwăn jơ̆ tơdrong pơjao ăn, păng Sư kŭm pơtho kơ lu bơngai pơhrăm tơdrong ‘noh.
Kon bơngai lu bơ̆n ngăl đei pơtho khan bơ̆n gơh đei yua kơ kơdih, păng bơ̆n kăl kơ pơjei kơ dôm lu tơdrong gơh yua kơ akâu jăn kơdih. Mă lei, jơ̆ Bơngai Lui, trŏ bơih lu bơ̆n đei gơh pơm, mă lei tơdrong achăng tơdrong đei yua kơ kơdih ‘noh wă bơwih bơwăn kơ bơngai nai ‘noh bơih jơ̆ mĭnh tơdrong pơjao ăn.
Buăl ưh kơ lui ah? Athei apĭnh Kră Yang Yêsu. Athei lăng nơ̆r Sư khan lăm Mathiơ 16:24-25:
“Klaih kơ noh Yêsu khan kơ lu bơngai pơhrăm păng Sư: “Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih ‘long pơglang chu lôch yua kơ wă kiơ̆ Inh. Bơngai bu ưh kơ chu lôch yua kơ tơdrong Inh, bơngai noh gô lôch hoh hoh đĕch ưh kơ yua kiơ. Bơngai bu chu lôch yua kơ tơdrong Inh, sư ‘noh gô arih ling-lang.”
Mĭnh ‘nu bơngai pơjing gah ‘bai hơri Bơngai Lui đei pơma khan: “Bơngai Lui jơ̆ dôm lu bơngai hưch hanh kơ ‘Bok Dŏng Pơklaih Yang Yêsu.” Nơ̆r tơm ‘nâu tơpă trŏ dêh! Kơplah buăl hưch hanh ‘mêm kơ Sư păng rơhing yak kiơ̆ Sư, buăl gô achăng kơdih kâu wă arih nhen thoi Sư.
Bơnê kơ Kră Yang, Sư ưh kơ achăng mơ̆ng kơ lu bơ̆n pơm tôm tơdrong mĭnh drô̆. Sư đei ăn Yang Bơhngol ‘Lơ̆ng mơ̆t oei lăm jơhngơ̆m wă tơgŭm lu bơ̆n. Ưh kơ đei khan inh thar tơplih kơ tơdrong tơchĕng gah tơdrong wei rong mĕ ‘bă ôh- ‘noh bơih jơ̆ tơdrong tơplih hlĭch chrơp Kră Yang ăn.
Apĭnh đĭ đăng krao khan hơdai:
Kơkuh kơ Kră Yang, kon băt khan tơpă ưh kơ ‘bônh ôh wă achăng dôm tơdrong đei yua kơ kơdih. Mă lei Ih đei jur tơ teh đak lăm rup mĭnh ‘nu bơngai ‘lơ̆p nghe ưh kơpran, wă arih tŏk bŏk teh đak ‘bĕnh tơdrong yoch, lăp yua kơ Ih ‘mêm mơnat kơ kon. Apĭnh pơtho kon băt ‘mêm mơnat thoi Ih đei ‘mêm. Apĭnh tơgŭm kon gô ăn jơhngơ̆m bơwih bơwăn kơ bơngai nai, yua kơ ‘noh jơ̆ mĭnh tơdrong pơjao ăn gĭt kăl tơpă. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, ‘Bok Dŏng Pơklaih Yang Yêsu ưh kơ ‘mêm kơ lu bơ̆n hăm nơ̆r pơma đĕch ôh. Sư đei sơtơ̆p kŭl tăng, ôp jơ̆ng kơ lu bơngai pơhrăm. Păng Sư krao lu bơn bơwih bơwăn kơ lu đĭch đam Sư hăm jơhngơ̆m ‘mêm mơnat lơ lăi thoi Sư. Thoi noh na tơdah năr ‘nâu buăl oei hiơ̆k kơ tơdrong jang lơ dêh mă bơngai nai ưh kơ băt, apĭnh ‘nĕ kơ tơchĕng khan ưh kơ đei bu hiơ̆k bơngơ̆t kơ buăl. Kră Yang lăng ‘bôh păng Sư gĭt dêh kơ rim tơdrong jang bơwih bơwăn đơ̆ng buăl. Sư gô pơm kơ dôm tơdrong jang kơ buăl gô jing tơmam ‘bâu phu đei ‘bâu phu pơyơ̆r kơ Sư. Yua kơplah buăl iŏk tơdrong ‘mêm mơnat pơm tơdrong pơtrŭt, lei tơdrong bơwih bơwăn ưh pă jơ̆ pŭ trăp- mă jơ̆ tơdrong pơchĕp ăn!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply