Dô bơta gơ lòng dơng la lơh ñchi lơi nàng tòm gơgơl, mơ dô bơta gơlòng ndai la lơh ñchi lơi nàng cau ndai dòn lah he ngăn neh geh tòm gơl. Gơs ală cau geh Yàng bừ tùs, geh tòm gơl wil tơl bơh tòm dơlăm nùs, mơya rài kis yau bol khai di kùng găm lơh cau gùt dăr in pìn. Ngăn ò ƀuôn dô ềt lơi tŭ bơta lơh lòt yau he di kừ ting jat bol he sùm. Bulah ngăn bol he neh dòn kơnòm tòm Yàng, mơ nùs nhờm neh gơjrăñ săng glài, mơya gơs dơ̆, bol he găm càng dô nă cau khin chà ntao di đăp mơ rcăng sìr lơh cơng he in; “Cau do ngăn neh geh Yàng tòm gơl.”
Ngai dô, ngai 27/06/2025, tơnggu Hòi Dăn Kờp ngai dăn jà ông mò oh mi dô nùs bal kơlồi sơnờng jơnau Yàng kơnòm bơta dŏng Anne Ferrell Tata găn di tonggumê CƠNG TANG NGĂN BƠH BƠ TA TƠM GƠL.
Sră Goh:“Mơya Banaba rò khai mơ lam tùs hơ ală cau gơnoăr bơtô dờng, mơ yal wơl bol hơ̆ in git mbe lơi rò gùng khai neh gŏ Yàng mơ Kơnràñ neh đơs mơ khai, mơ mbe lơi khai neh ai sơnđăn Yàng Jesu mơ bơtô yal dô bă khin chà tom Damas.” (Broă 9: 27)
“Di gơlăn bau klau dô dơ̆ tai dòn kơnòm añ sơl? Mơ ñchi bơh tai bi păl dòn he?” Hơ̆ la bơta kơlồi mơ bơyô añ sùm kơlồi sơnờng. Mơ bơyô hơ̆ ràng tơlik mơ añ tŭ bàr nă bol hi lòt càfe tòm bơh bơr băl.
Mìng pa prau kơnhai bơh di tŭ khai pơndùt bơta tis glài rềs àr bơrnàn. Khai git lah he ngăn neh gơjrañ săng glài mơ ri wơl tòm bơta gơtòm klĕ mơ Yàng Dŏng Jesu. khai git lah he neh tòmgơl. Khai git nền lah he ò tŭ lơi rê wơl hơ gùng yau. Mơya…. lơh mbe lơi nàng bau klau khai kùng geh git bơta hơ̆?
Bơyô añ là cơng tàng kis jơnau sŏng hơ̆ in geh cih tờm 2kôrintô 5:17: “Behơ̆, dilah cau lơi ơm tòm Bơtau Krist, hơ̆ la cau neh crơng gơs pa, ală bơta yau neh roh rau, dô ală bơta gơlik gơs pa lơm.”
Bau klau khai di neh đơs jơnau toh glài. Mơya loh làng, tòm nùs bi găm pìn rngòt. Cau mò wơng lah broă bơtao wơl bơta dòn tòm nùs păl hòi lùp tŭ tơngai, mơ ya mò dùh nùs kờñ lơh cơng lah bơta tòm gơl tòm hwềng nùs he là ngăn.
Añ đơs mơ bơyô añ lah: “Ai càng dô nă bau klau be Ba-na-an.” mò sền añ, gơlơh be kalkê wờng, gèn añ yăl wơl dô nơm yau bơh cau gơnoăr bơtô
Pol.
Lai mơtŭ geh Yàng tròm gơ hơđăng gùng lòt Damas, Pol gơs sơnđăn la Sol. Broă 9:1 ch lah: “Tòm tŭ hơ̆ Sol mìng gơboh hur pơrhin mơ tơnchơt ală cau bơtê Yàng dê.”
Mơya, tŭ ông găm hơđăng gùng, Yang tơlik măt mơ ông. Mơ bơh di tŭ hơ̆, rài kis Sol di neh tòm gơl wil tơl. Yàng nh ai ông in dô sơnđăn pa, hơ̆ la Pol.
Tơnơ̆ mơ tŭ geh tòm gơl, ông sơtòm bơtô yalbơh Yàng Dong Jesu. mơya kùng buôn wơng: ală cau pìn rngòt. Bol khai dơs is bal mơ gơp: “ Do ò di la cau neh tơnchơt ală cau hòi sơnđăn hơ̆ tòm Jerusalem?” Nisơna ông tùs Jerusalem mơ kờñ gơtòm klĕ mơ ală cau dòn, be hơ̆ gèn cau lơi kùng kơrhia. Ò gơs cau dòn lah ông jơh nùs ngăn.
Mơ gè….Banaba tơlik!
Broă 9: 27 yal wơl lah: “Mơya Banaba rò khai mơ lam tùs hơ ală cau gơnoăr bơtô dờng, mơ yal wơl bol hơ̆ in git mbe lơi rò gùng khai neh gŏ Yàng mơ Kơnràñ neh đơs mơ khai, mơ mbe lơi khai neh ai sơnđăn Yàng Jesu mơ bơtô yal dô bă khin chà tom Damas.”
Banaba neh ai jơnau dong tò Pol. mơ kùng behơ̆, bơyô añ càng dô nă cau dong tò he- dô nă cau ntao lơh cơng bơh bơta tòm gơl tòm khai, dong bau klau khai di sền gŏ lah bơta don mò di tòm Bơtau Dong Klàs wil tơl sŏng ngăn.
Mơ cau hơ̆ ò di la cau lơi ndai hơ̆ la cau Gơnoăr Bơtô Ăt Bồ Hiu Jum Goh bol khai di. Cau Gơnoăr Bơtô hơ̆ neh lòt bal mơ mò tòm pah tơngai mò yăl glài, gơjrăñ săng glài, sơm bời mơ geh lơh pa wơl. Ông git broă mò di. Behơ̆ tàng bol khai rơndăp dô tŭ nàng tìp is digùl pe nă.
Cau Gơnoăr bơtô lơh čơng lah mò ngăn neh gơjrañ săng glài ngăn, mơ lah hwềng nùs mò kùng neh tòm gơl wil tơl. Kơnòm tềng hơ̆, bau klau mò mòr wơng bơta tòmgơl tòm bau ùr he la song ngăn. Bàr nă ùr klau bol khai dòp rò bơta dong kòl cau Gơnoăr bơtô dê. Ală dà măt gơhòr- dơ̆ do ò di bơh bơta jê sồt, mơ la bơh chò hòp, bơh bơta gơtòm sòr ngăn. Bau klau neh sền gŏ dô nă bau ùr pa, ò di bơh mò pơnđơl pràn lah hêh tòm gơl, mơya bơh Yàng ngăn neh tòmgơl mò bơh tòm dơlăm.
Broă hơ̆ neh gơlik gơs bơh dô 20 năm. Mơ tŭ do, hiu nhă bol khai găm gơs rìng lơngai mơ pràn rlau kơl dăng rlau jơh.
Kòn mơnùs rgơi tòm gơl. Sol neh tòm gơl. Bơyô añ kùng behơ̆. Mơya bulah ông mò oh mi ngăn neh tòmgơl, cau ndai kùng găm càng tŭ jơ nàng dòn kơnòm ông mò oh mi. Mơ gơs tŭ, bol he càng dô nă cau ndrờm be Banaba- dô nă cau rcăng sìr ntao di gah bol he, lơh cơng mơ lơh nền cê bơta dòn pa bol he dê.
Tŭ cau gơnoăr bơtô at bồ dong cau bau klau dòn lah boyô añ neh tòm gơl, gèn ò gơs bơta lơi rgơi kơryăn bơta tòm bau bol khai dê bơt bơtao wơl. Tŭ mơ Banaba dong ală cau gơnoăr bơtô dờng dòn lah Pol jơh nùs, gèn ò gơs bơta lơi kơryăn bơta bơtao tơngguh Hiu Jum Goh de. Broă 9:31 yăl wơl: “Behơ̆ Hiu Jum Goh tòm lơgăr Juđe, lơgăr Galile, mơ lơgăr Samải geh rìng-lơngai, bơt bơtao, mơ lòt tom bơta dùh rngòt dê Yàng, mơ tòm bơta pơndòm- pơniang Yàng Hwềng Goh dê, behơ̆ gèn geh gơbơntơl tơngguh tai.”
Jơh ală broă sơntòm bơh tŭ Banaba yal wơl mơ ală cau gơnoăr bơtô dờng ală broă neh gơlik gơs. Bơh hơ̆, cau gơnoăr bơtô Pol neh ơn jơh rài kis he nàng bơtô sồr, bơtô yăl mơ lơh Baptem ală cau dòn in.
Mơ di lah ngai do ồng mò oh mi kùng la dô nă cau neh geh tòmgơl, gèn ồng mò oh mi git loh lah he la dô nơm hăn geh crơng gơs pa. Ală bơta yau neh roh rau, mơ dô ală bơta neh gơlik gớs pa lơm. Ồng mò oh mi git bơta hơ̆. Yàng git bơta hơ̆. Mơya nàng cau ndai kùng sền gŏ mơ dòn tòm bơta gơ tờm gơl ồng mò oh mi dê, di gơlăn pal càng dô tŭ jơ. Mơ gơs tŭ, ồng mò oh mi kùng păl càng dô nă “Banaba” – dô nă cau khin chà ntào mơ đờs: “Añ dòn bơta tòmgơl hơ̆ la song ngăn!”
Dan jà bol he dô nùs bal tòm bơta hòi dan:
Khoai Yàng kòn dê! Ưn ngai Yàng bơh Kơnràñ neh toh glài mơ tòm gơl pa kòn. Bulah kòn neh gơtùp pừ, mơya kơnờm bơta nđàc Kơnràñ, kòn git he neh gơlik gơs cau pa. Dăn dong kòn kis ràng tơlik bơta nđàc tơm gơl hơ̆ kòp ngai, bulah cau ndai găm ò rgơi dòn. Dan ai kòn in bơta pơndềt să, nùs kơ̆ dơn, dong kòn dòn kơ̆ lah Kơnràñ găm lơh broă. Mơ dăn Kơnràñ ơn digah kòn dô nă cau be Banaba, nàng chồl bơtrồt, dong tò, mơ lơh cơng bơh bơta tòmgơl Kơnràñ dê hơđăng rài kis kòn. Kòn jơh nùs hoi dăn tòm sơnđăn Yàng Jêsu Krist, Amen.
Ơ ală ông mò oh mi kờñ gơboh, ò gơs dô nă cau lơi tòm bol he kis dô rài kis wil tơl, ò sồt ò rmàñ. Mơya kơnòm bơta nđàc Yàng, bol he rgơi tòm gơl pa mơ sơntòm gùng lòt chò hòp lơngai. Mơ tŭ ngăn bol he geh tòm gơl, Yàng rờp ơn digah bol he ală cau sùm dòn kơnòm, lòt băl mơ bol he. Cau hơ̆ rờp lơh cơng lah rài kis bol he neh geh tòm gơl wil tơl kơnờm Bơtau Krist. Behơ̆ tàng ƀañ gơplơ̆ nùs tŭ cau ndai găm ò hềt dòn kơnòm ông mò oh mi – kừ jơh nùs tĕ mơ kờp gơn Yàng lơh broă crìh crài Kơnràñ dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply