Đunh sơnăm yak kiơ̆ Kră Yang, kư̆m lơ wơ̆t lu bơ̆n đei mơ̆ng kơ tơ̆ng khan ‘Bok Kei-Dei jơ̆ Tơ’ngla Wei Rong, Tơ’ngla ling lang tơgŭm bơngai lui kơ Sư. Na thoi noh, tŏk bŏk tơdrong arih đei lơ tơdrong, tŏk bŏk hiơ̆k bơngơ̆t, rŏ lăng tơ âu tơ noh lăm jơhngơ̆m lu bơ̆n oei đei nơ̆r jet: “Ơ Kră Yang, pơm liơ wă kơ kon đei jơhngơ̆m kơjăp băt kơ Ih oei wei rong kon?” Buăl mă ‘mêm kơ-eng, năr ‘nâu, Nơ̆r Kră Yang krao wơ̆n buăl athei dơ̆ng ‘mơ̆i minh ‘bar phŭt păng trĕng lăng Kră Yang wei rong dôm kơ ‘nhĕt pơkao tơ kơdơ glă – iĕ đĕch, krô hmă đĕch, ‘bônh kơ jô kro mă lei Kră Yang oei tơhrŭk ăn ‘lơ̆ng rŏ tơpă.
Năr ‘nâu, ‘năr 29/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missey Butler kơ̆l ‘bai ATHEI LĂNG LU PƠKAO TƠ KƠDƠ GLĂ.
Sơ̆p Hla Bơar ‘Bok Kei-Dei: “Bĭ gah hơbĕn ao hrŭk, iĕm mah tơchĕng kơ kiơ? Iĕm lăng lu pơkao ‘nhĕt tơ bri brah. Sư ưh kơ bơ̆jang, ưh kơ tanh sĭt hơbĕn ao sư kơdih ôh, mă-lei bơ̆n lăng sư ‘lơ̆ng dêh.” (Mathiơ 6:28)
Minh ‘bar giĕng hơdrol, inh đei ngôi kơpal tơm ‘long kôih tih tŏk bŏk tơ lăm bri, păng ‘blŏk kơ dôm tơdrong rơnguơ̆ đêl so truh. Tơdrong noh pơm kơ inh đei mơn thoi kơ brŏk tơhnam. Inh hưch hơiă kơ tơmam đei kơdih tơ bri brah. Inh hưch wă kơ chă ngôi tơ ala ‘long hơngo tih kơjung, dah ngôi tơter glung hlăng ‘lơ̆ng, lăng dôm kơ ka iĕ glơi hrĕnh tơ lăm đak hlăng rơngơp. Noh jơ̆ tơdrong arih ling lang pơm kơ inh ‘bôh hiôk hơđơ̆ng.
Mĕ păng yă inh băt hơđăl kơ inh hưch wă kơ teh đak ‘nâu thoi yơ. Inh juăt kơ brŏk tơ hnam hăm akâu trôk đĭ, akâu ‘bĕnh kơ hla ‘long klep, jơ̆ng ti ‘bĕnh kơ pơ‘ngeh đêl mur sôch. Dôm wơ̆t truh tơ jơ sŏng sa jơ kơmăng, lu đê̆ ‘nhŏng inh ưh kơ kĕ gơ̆t kơ hiĕk kơplah lăng ‘bôh inh, yua kơ akâu inh ‘bĕnh kơ đêl pung pơgang kuă ăn mur sôch.
Dôm kơ năr đei rơhơi, inh đei yak năm ngôi tơ buăl inh tơ “lăm bri”. Dôm anih inh ‘maih wă noh anih ataih đơ̆ng anih kơpŭng. dôm kơ năr năm tơ bri, inh đei mơn inh nhen thoi yak năm tơ tơdrong arih nai. Inh hưch wă kơ sem hmoi, kial dơhlu hla. Inh thĕng hreh lăng lu prok kơdâu pơplŏng hơnul tơdruh băl. Inh đei kơdrăt kơplah kơtơ̆ng re sem tơtuh pơnăr kơchăn păr kơjung truh tơ kơ nhŏng ‘long kôih kră tih.
Inh đei tơ’blŏk thoi âu, tơdrong arih ưh kơ thoi bơ̆n ngăl juăt kơ đei noh tơdrong dui jơhngơ̆m dah plei nuih oei tơdrŏ, mă noh jơ̆ tơdrong đei ‘bôh gĭt kăl kơ lu bơ̆n. Đơ̆ng dôm kơ lu tơmam arih, ‘Bok Kei-Dei dan ăn pha ra băl, kơnhăm hơđăl, păng đei pơjing minh đĕch.
Kơplah kon sem đei cheh, ưh kơ đei bu roi kơ sư noh bu. Ưh kơ đei bu bơtho tơ’bôh kơ sư arih thoi kơ lu sem, bơtho tơ’bôh kơ sa hơdrông dah păr đơ̆ng dơng ‘nâu păr tơ dơng to, yua kơ dôm tơdrong noh đei đơ̆ng lăm tơdrong arih Kră Yang pơjing sư bơih
Tơdrong tơpă noh jơ̆, dôm tơdrong gơh hơgei thoi kơ đei pơcheh preh brŏ tơ tơpôl lơ ‘lơ̆ng tơpă, păng bơngai tơm gah preh brŏ noh jơ̆ ‘Bok Kei-Dei – Tơ’ngla pơjing hrĕp ‘lơ̆ng păng pơgơ̆p dôm tơmam sem dơrong Sư.
Athei tơchĕng tơdrong noh tŏ sĕt! Tơdrong arih kơ dôm lu sem dơrong yua kơ đơ̆ng Kră Yang, tơ’ngla pơjing lu sư. Kră Yang ưh kơ sĭ bơwei lu sư đĕch, mă ăn juăt kơ pơm, ‘lơ̆ng pha ra kơ lu sư.
Kơplah oei lăm bri, inh kư̆m đei ‘bôh pơkao hơhĭm, chăt jê̆ tơlei ‘nhĕt hro. Inh đei tơchĕng tơ lu pơkao nai mă Yang Yêsu đei pơma lăm sơ̆p hla bơar Mathiơ kơplah Sư pơma:
“Bĭ gah hơbĕn ao hrŭk, iĕm mah tơchĕng kơ kiơ? Iĕm lăng lu pơkao ‘nhĕt tơ bri brah. Sư ưh kơ bơ̆jang, ưh kơ tanh sĭt hơbĕn ao sư kơdih ôh, mă-lei bơ̆n lăng sư ‘lơ̆ng dêh. Inh khan kơ iĕm tơpă, pơtao Sôlômôn sơ̆ sư mơdrŏng tih tơpă, mă-lei hơbĕn ao sư ưh kơ mah ‘lơ̆ng dang pơkao ‘nhĕt bri brah ôh. Tơdrong lui iĕm rơdu dêh, iĕm kuă kơ kiơ tơchĕng kơ lu pơkao ‘nhĕt bri brah: Sư ‘bônh kơ hơlŭng, klaih hơlŭng đe soh hŭt lê̆ lăm ŭnh, mă-lei ‘Bok Kei-Dei kư̆m ăn kơ sư ‘lơ̆ng dang noh, pơma kiơ kơ iĕm kon bơngai kăl hloh kơ sư, ‘Bok Kei-Dei gô ăn kơ iĕm hơbĕn ao tơpă. Thoi noh na iĕm ‘nĕ pă tơchĕng khan: ‘Bơ̆n wă sa kiơ, hrŭk kiơ?’ Lu bơngai nai mă ưh kơ lui, lu sư tơchĕng kơ tơdrong noh ling-lang. Mă-lei ‘Bă bơ̆n tơ plĕnh ti kư̆m băt boih dôm tơdrong lu iĕm kăl yua, Sư gô tơgŭm iĕm tơpă. Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:28-33)
Đei nơ̆r tơtă hiôk hơ-iă tơpă! Kră Yang, tơ’ngla pơjing buăl hăm inh, hăm dôm kơ lu sem dơrong, sĭt ăn kơ lu bơ̆n pă đei hiơ̆k bơngơ̆t kiơ, yua kơ Tơ’ngla Pơjing gô wei rong lu bơ̆n. Nhen thoi pơkao tŏng mŏng tơ lăm kơdơ glă, dôm kơ tơdrong kiơ lu bơ̆n kăl kơ pơm noh jơ̆ tơ’bôh păng chơt hiôk sơng iŏk đơ̆ng Kră Yang ăn.
Tơdrong lui gơnang ‘nâu ưh kơ sĭ lu bơ̆n pơdơh kơ bơ̆jang dah pơdơh kơ hơdrin lăm tơdrong arih. Noh jơ̆ thoi âu, lu bơ̆n arih ưh kơ arih lăm hli tơrơ dah pă tôm mah, mă băt kơ Tơ’ngla Pơjing gô wei rong lu bơ̆n dôm kơ tơmam kiơ lu bơ̆n kăl wă, mă khan lu bơ̆n ưh kơ ‘bôh hơđăl mă Kră Yang gô pơm tơdrong noh.
Apĭnh đĭ đăng krao khan hơdai:
Kơkuh kơ Kră Yang mă ‘mêm. Bơnê kơ Kră Yang yua kơ Ih jơ̆ Tơ’ngla Pơjing tôm tơmam, păng Ih kư̆m Tơ’ngla Tuh ăn, bơwei, wei rong lu nhôn rim năr. Kră Yang ơi, jơhngơ̆m hiôk chơt kơplah kon băt kơ Ih kư̆m ưh kơ đei hơchăng lê̆ kon, mă ling lang bơwei kon đơ̆ng rim jơ phŭt chăl arih kon. Apinh Kră Yang tơgŭm kon lui gơnang đơ̆ng Ih wei rong, nhen thoi pơkao tŏng mŏng tơ kơdơ glă pă đei tơtăm, huay kơ hiơ̆k bơngơ̆t, mă oei tơlang lơ lăm tơdrong ‘lơ̆ng Kră Yang ăn. Kon kŭp kơ̆l krao khan hăm anăn Yang Yêsu krist, A-men.
Ơ lu bơngai mơ̆ng mă ‘mêm kơ-eng, tơdrong arih tôm tơ mam yua kơ đơ̆ng Kră Yang, kon bơngai kư̆m ưh kơ ‘ngoaih kơ noh. Yua kơ thoi noh, dôm kơ nơ̆r jet “Sa kiơ?”, “ Nhă kiơ?”, “Hrŭk kiơ?” huay kơ jing dôm kơ hiơ̆k bơngơ̆t tih, tơgar iŏk hiôk hian lăm chăl arih buăl, yua kơ nơ̆r tơl đei chă ‘bôh lăm Tơ’ngla Pơjing kơ jơ̆p jang kơ teh đak ‘nâu. Yang Yêsu đei pơma thôi âu: “ ‘Bă lu bơ̆n tơ kơpal plĕnh ti băt kơ tôm tơdrong bơ̆n kăl yua”.
Athei tơchĕng pơwao buăl oei kơ nhăm lăm dôm tơdrong kăl yua rim năr mă hiơt lê̆ kơ Kră Yang lu bơ̆n oei bơwei tôm tơmam Sư, mă lu pơkao tŏng mŏng tơ kơdơ glă? Năr ‘nâu, athei pơtơm blŭng a năr mă plơ̆ng hăm nơ̆r tơ’blŏk đơ̆ng Kră Yang, thoi âu: “ Ih jơ̆ ‘Bă kơ kon. Ih băt kơ tôm tơdrong kăl wă đơ̆ng kon.” Mă khan buăl oei tơ’bơ̆p tơdrong tơnat kơ jên tơmam, ưh kơ tôm mah, dah oei pŭ trăp kơ hre đom, athei ‘blŏk Kră Yang băt đĭ tôm tơdrong noh. Kră Yang ưh kơ đei hiơt achăng lê̆ buăl, mă Sư wă kơ buăl athei dan kơnhăm hơdrol hloh trŏ kơ anih: athei chơchă dêh char ‘Bok Kei-Dei păng tơdrong tơpă Sư. Kră Yang jơ̆ Tơ’ngla gô tơgŭm buăl wơ̆ ‘lŏ lăm đon lui gơnang păng tơgŭm ăn đơ̆ng Sư.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply