Hăm đei layơ buăl apĭnh Kră Yang tơplih mĭnh ‘nu bơngai bu nai, lăm đunh jơnăr, phŏ kŭm lơ khei sơnăm, mă lei nhen thoi sư ưh kơ đei kiơ tơplih ưh? Nơ̆r krao khan nŏng kơ hlôi thĕng hreh, na jơhngơ̆m lu bơ̆n lei rai gleh lap, bơ̆l hăl. Lu bơ̆n đei jet kơdih: “Lei Kră Yang tơpă hăm đei mơ̆ng nơ̆r krao khan đơ̆ng kon dah ưh?” Dôm kơplah thoi noh, lu bơ̆n ‘bônh dêh kơ ngĭl ngŭl păng ‘maih wă achăng. Mă lei, nơ̆r krao khan đĭ jơhngơ̆m đei pran tih dêh, păng nơ̆r krao khan kơjăp tơpă gô ba truh tơ pŭn hiôk tơplih hloh kơ tơdrong tơchĕng đơ̆ng lu bơ̆n.
Năr ‘nâu, ‘năr 02/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bob Segress kơ̆l ‘bai CHƠ̆N JƠHNGƠ̆M KRAO KHAN KHŎM KHŎM.
Sơ̆p Hla Bơar ‘Bok Kei-Dei: “Kră Yang Tơ’ngla wei-lăng inh…… Inh gô oei lăm hnam Kră Yang ling-lang hlŏng hloi.” (Hơriso 23:1-6)
Mĭnh năr ei kơplah inh oei huơ̆r gre, akăn inh thar jet: “ ‘Nhŏng ơi hăm đei layơ đei jet kơdih gô lôch thoi yơ ưh?”
Inh pơm ưh kơ băt yua kơplah ‘noh rok trong lơ bơngai. Mă lei nhen thoi tơdrong juăt, kơplah akăn đei wă băt kơ nơ̆r tơl lei ưh kơ ‘bônh kiơ na sư wă ăn hlôi. Inh đei pơma mĭnh ‘bar nơ̆r weh wer. Băt kơ ưh kơ jei ră, mă lei đei pơhiơ̆ tŏ sĕt.
Kơplah tơ’bơ̆p gơ ‘bang roi tơbăt “Dơ̆ng”, inh kăl kơ dơ̆ng gre. Akăn inh hue lăng tơ inh, hăm măt kơnhăm:
“Thoi noh…. ‘Nhŏng tam đei tơchĕng truh tơdrong ‘noh ưh?”
Inh thĕng hreh. Yua kơ inh băt kơplah akăn inh jet thoi noh, lei tơpă sư đei ‘maih wă ră roi mĭnh tơdrong kiơ ‘noh.
Dôm phŭt đơ̆ng rŏng, akăn inh pơma hiơ̆:
“Oh tơchĕng… oh ‘maih lôch rok thoi ‘bă anhŏng. ‘Bă oei sŏng sa pơge tơ’ngoaih pơgar, ala chrơng plei hơmu, sŏng sa rah đŏk rah hla ar ‘bao. Mĕ ‘noh đei mơ̆t tơhnam iŏk thim ly caphê kơ ‘bă. Kơplah ‘noh, mĭnh pôm sem kơtơp kok păr hơtŭt ‘bơm ‘măng ‘mŏk hnam gŏ, tơteh pơnăr nhen wă ‘maih mơ̆t tơ lăm. Mĕ kơdrăt hăt hot na kơdou lĕch tơ pơgar lăng, păng ‘bôh ‘bă đê̆ kơ’ngŭng kŭp kơ̆l tơ hla ar ‘bao. Thoi noh na ‘bă đei brŏk tơ Kră Yang. Kơplah mĕ ngơk lăng tơ kơpal, mĕ ‘bôh sem kơtơp tơgơ̆ pơnăr oei păr hloi. Mưh kơplah tơchĕng truh tơ jơ phŭt ‘bă brok tơ plei ‘lơ̆ng, oh đei hơdrôt…”
Nhen tơdrong juăt, kơplah inh wă kơ akăn inh đei pơma tơlĕch dôm lu tơdrong tơchĕng đơ̆ng lăm jơhngơ̆m, inh đei sơng iŏk mĭnh hơ’mon đei gĭt kăl păng trŏ kơ tơchĕng pơwao.
‘Blŏk kơ năr ‘bă inh đei Kră Yang pơklaih đei truh. Mĕ inh đei krao khan kơ sư lăm đĭ 25 sơnăm. ‘Bă inh đơ̆ng đei hơmui kơ sik tơdrô dêh, kơplah sư oei bơ̆jang bơngai pơgơ̆r anih jang traih ming ‘long. Sư bơngai khĕnh, phŏ kŭm đei mĭnh wơ̆t tơlơ̆ gơ̆p pơ̆k huŏng đơ̆ng kung yua kơ đơ̆ng dêh hnang kơ blĕk. Mă lei inh oei krao khan hơnơ̆ng păng lui gơnang kơ Kră Yang gô tơplih ‘bă. Mĕ ưh kơ layơ tơchĕng truh kơ tơdrong wă achăng băl, yua kơ sư lui kơ mĭnh năr ayơ ‘noh Kră Yang gô pơklaih ‘bă.
Mĭnh ‘măng ei, kơplah lăm pơyan pơdơh, inh pơprơ̆n pơma hăm ‘bă khan:
“ ‘Bă ơi, kon hli kơ ‘bă gô ưh kơ gơh mơ̆t oei tơ plei ‘lơ̆ng hăm mĕ, păng lu kon… thoi noh lei lu kon gô ‘blŏk kơ ‘bă dêh.”
‘Bă inh hlĭch dêh păng tơl tơwih:
“Tơdah kon hiơ̆k bơngơ̆t kơ ‘bă thoi noh, lei dang ei ba mơ̆t tơ hnam hum, hơdai krao khan lui kơ Kră Yang hloi.”
Thoi noh na lu nhôn mơ̆t tơlăm hnam hum iĕ, sơtơ̆p kŭl tăng. ‘Bă inh krao apĭnh Kră Yang huay kơ jô̆ yo, apĭnh Sư dŏng pơklaih pơhngol sư, mă khan sư đei pơm lơ tơdrong yoch kơnê̆. Kơplah ‘bă tơbral, inh ‘bôh dôm kơ lu đak măt đei lĕch ro tơ tơ’bŏk sư. Đơ̆ng jơ phŭt ‘noh, inh đei mĭnh ‘nu ‘bă ‘nao. Bơngai drŏ nglo mă bu bu kŭm hli tơrơ, ‘nâu đei tơplih ming ‘nao. Păng Nơ̆r Kră Yang lăm Hơriso 23 jing tơmo gĭt kăl lăm jơhngơ̆m ‘bă inh.
‘Bă chĕp tuh hŭt đĭ tơdrô gĭt mă lu bơngai jang đei ăn kơ sư wă iŏk jơhngơ̆m lăp đon đơ̆ng sư. Mă khan tơdrong jang hơnơ̆ng kơ kăl kơ ‘bă sơng iŏk bơngai tơmoi tơlăm anih tĕch sik tơdrô, sư oei tơ’bôh tơdrong lui đơ̆ng kơdih hăm tơdrong ‘băk ‘long pơglang iĕ tơ kơpal tra wat, păng sư lăp krao đak ‘ngam tơplih kơ sik tơdrô nhen thoi sơ̆. Lăm rim kơ’năr dơ̆ng lơ sơnăm đunh, sư hơ oei lăm gre ‘bơ̆t anăp anih jang, pơih brŏ mơ̆ng ‘bok bơtho Nơ̆r ‘Bok Kei-Dei, păng mơ̆ng na pơ’lơ̆ng chih hơmet lăm hla bơar.
Inh đei mĭnh ‘nu bơngai ‘bă ‘nao! Mă khan sư oei đei lơ tơdrong ưh kơ ‘lơ̆ng, mă lei đơ̆ng năr ‘noh, sư đei pơjao akâu sư lăm tơpang ti ‘lơ̆ng tơpăt đơ̆ng Bơngai Thơ̆ Man. Nơ̆r krao khan kơjăp lơ sơnăm đơ̆ng mĕ inh tuch luch kŭm đei Kră Yang mơ̆ng nơ̆r. Păng lăm pơge năr ‘noh, năr mă ‘bă inh lôch, kơplah mĭnh pôm sem kơtơp hăm pơnăr tơgơ̆ păr, nơ̆r ‘Bok Kei-Dei arih tơpă tơ’blŏk kơ inh khan ‘bă inh đei “achăng akâu jăn ‘nâu wă kơ gơh oei hăm Kră Yang!” (II Kôrintô 5:8)
Tơdrong lôch thoi noh- pŭn hiôk tơpă!
Apĭnh đĭ đăng krao khan hơdai:
Kơkuh kơ Kră Yang ‘mêm, năr ‘nâu kon năm ‘bơ̆t anăp Ih hăm pơhngol trăp trĭn, hăm dôm lu nơ̆r krao khan đei đunh ưh kơ ‘bôh đei yua. Apĭnh Kră Yang ‘nĕ kơ ăn kon hiong tơdrong hơmĕng, ‘nĕ kơ ăn kon wih rŏng hăm Ih yua kơ kăl kơ chang gô đunh dêh hnang. Hơpơi kơ Kră Yang ăn kơ kon jơhngơ̆m pran wă bơwei jơhngơ̆m kĕ chơ̆n, wă kơ kơjăp lui khan Ih oei bơ̆jang hăm mĭnh tơdrong ‘lơ̆ng tơpăt kiơ̆ kơ tơdrong proh hơmet ‘lơ̆ng rŏ đơ̆ng Ih. Kon lui khan Ih ling lang mơ̆ng kơtơ̆ng nơ̆r kon, păng Ih gô tơl tơwih nơ̆r krao khan đơ̆ng kon hăm tơdrong mơsêh tơplih hlĭch chrơp đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, kĕ chơ̆n krao khan hăm Kră Yang ưh kơ trŏ jơ̆ mĭnh trong yak năm ‘bônh đĕch, mă lei ‘noh jơ̆ mĭnh trong ‘noh đĕch ba truh tơdrong tơplih tơpă lăm tơdrong arih, mĭnh tơdrong tơplih mă ưh kơ đei mĭnh ‘nu bơngai nai, ưh kơ đei tơdrong kiơ nai đei gơh pơm. Kơplah lu bơ̆n bơwei kơjăp đon lui păng ưh kơ pơdơh ăn jơhngơ̆m lăng tơ Kră Yang, Sư gô tuh ‘bĕnh tơdrong mơnat ăn, Sư gô tơplih ming ‘nao pơhngol lu bơ̆n, păng tơplih tơdrong kơnê̆ hloh jing tơdrong ‘lơ̆ng rŏ hloh. Mĭnh tơdrong arih đei Kră Yang tơplih gô đei ba ăn tơdrong kơnhăm gĭt kăl, truh tơ jơ tuch luch. Bơnê kơ Kră Yang! Tơdrong krao khan kơjăp chơ̆n jơhngơ̆m gơh tơplih tơdrong arih buăl păng dôm lu bơngai buăl ‘mêm mơnat!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply