Tơdrong arih tơplih plơ̆ng hrei âu đei lơ tơdrong jang lơlang lơlap. Kơplah lu bơ̆n druh kiơ̆ lăm tơdrong jang noh, pŭ iŏk tơdrong jang “jah tĕnh” kăl kơ pơm hloi, na jơ năr ‘măn kơ krao khan gah pơge hăm Kră Yang nhen thoi ataih atŏ. Lu bơ̆n đê̆ juăt kơ dan Kră Yang lăm minh jơ ayơ “rơhơi rơwơn” kơ đơ̆ng kơdih, mă noh ưh kơ trŏ ‘blep ăn kơ ‘Bok-Kei-Dei lăm chăl arih lu bơ̆n. Sư trŏ kơ pôk pơư dan hơdrol hloh kơ đĭ đăng, đơ̆ng lăm tôm tơdrong, păng đơ̆ng rim kơ anih!
Năr ‘nâu, ‘năr 03/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Shadia Hrichi kơ̆l ‘bai PƠTƠM NĂR PLƠ̆NG HĂM KRĂ YANG.
Sơ̆p Hla Bơar ‘Bok Kei-Dei: “Ơ Kră Yang! Pơgê hrôih Ih gô kơtơ̆ng nơ̆r inh; Pơgê hrôih inh gô roi dôm tơdrong kiơ ‘bơ̆t anăp Ih păng chang gô.” (Hơriso 5:3)
Inh pă đei layơ hiơt kơ năr noh.
Kơplah noh, inh oei ‘nao lui. Rim năr, inh adrin pơjuăt ‘măn jơ krao khan, mă inh băt jơ noh ưh kơ kơjung truh tơ đăm phŭt. Lăm jơhngơ̆m đei kơ tơ’blŏk, inh đei pơma hăm Kră Yang: “Kon băt đei tơdrong kiơ noh oei pơgăn tơdrong pơgơ̆p kon hăm Ih. Kon iung đơ̆ng tep, hăt hot kơ năm jang păng pă đei dan ‘măn jơ ayơ ăn kơ Ih. Apinh Ih huay kơ jô̆ yo kơ kon!”
Lăm măng noh, inh đei lăng TV păng kơ tơ̆ng đei bơngai ră roi gah ơ̆t kơ sŏng sa. Inh ưh kơ hlôh yua kơ kiơ, mă lăm kơplah noh, inh đei mơn inh kăl kơ ơ̆t kơ mĭnh tơdrong ayơ noh, mă lei gah tơdrong kiơ ‘mơ̆i lei, păng dĭng truh dang yơ?
Pơge đơ̆ng rŏng, kơplah pơm ka phê thoi kơ juăt rim pơge, inh hơoei wă krao khan. Inh jet Kră Yang: “Kră Yang ơi, kon kăl kơ ơ̆t kơ tơdrong kiơ?”
Đei nơ̆r tơl Kră Yang dan lăm jơhngơ̆m inh, inh đei chrêu, păng … ưh kơ ‘bônh wă drơ̆ng iŏk:
“Kon kăl kơ ơ̆t kơ ka phê.”
“Ô ưh, Kră Yang ơi! ‘Nĕ kơ ka phê lei! Kon tơchĕng kon mơ̆ng ưh kơ trŏ bơih…”
“Kon chang gô ly ka phê pơge hloh kơ chang gô jơ pơgơ̆p hơdai hăm Inh.”
Đei mơn thoi noh nhen thoi săng kăt lăm jơhngơ̆m inh. Mă lei inh băt tơdrong noh ưh kơ đei glăi. Inh tuh ly ka phê tơ anih ôp hơrao, păng đĭ kơ minh năr noh, inh đei jĭ kơ̆l dêh yua kơ ưh kơ đei ka phê!
Dôm kơplah inh đei jĭ pơm kơ inh ưh kơ kơnhăm kơ tơdrong jang, na tơplih kơ pơm ka phê dah et pơgang wă kơ dă ‘biơ̆ kơ jĭ, inh rơih iŏk tơdrong krao khan. Inh bơnê kơ Kră Yang yua kơ tơdrong jang, krao khan tơgŭm ăn kơ bơngai jang hơdai, krao khan ăn kơ tơdrong jang inh tơ anăp, dôm tơdrong kiơ mă ‘bôh lăm jơhngơ̆m đon inh, wă kơ wer đơ̆ng tơdrong jĭ kơ̆l.
Truh tơ gơsơ̆, inh ưh pă kĕ bơih. Inh oei lăm anih jang hăm tơmoi, păng đei 20 phŭt rơhơi tŏk bŏk đei ‘bar tơdrong wă pơđâu. Inh yak lĕch tơ’ngoaih păng krao điê̆n thoăi kơ buăl juăt inh, wă tơ tok kơ tơdrong jĭ kơ̆l, păng inh ‘nao pơdrơ̆ng iŏk ơ̆t kơ huch ka phê lăm 30 năr.
Buăl inh jet: “Hăm trŏ kơ Kră Yang krao wơ̆n ih ơ̆t kơ huch ka phê lăm 30 năr ưh, lei dah noh đơ̆ng kơdih ih đĕch?”
Inh mơ ơ̆ drơ̆ng: “Ơ …inh tam mă jet Kră Yang gô ơ̆t dĭng dang yơ. Inh tơchĕng ơ̆t kơ sŏng sa dang kơ 30 dah 40 năr đĕch noh huay bơih.”
Buăl inh pơ ‘lơ̆ng pơma: “Lei ih krao inh wă pơm kiơ? Athei apinh ‘maih wă đơ̆ng Kră Yang!”
Oei đei 15 phŭt hơdrol kơ wă pơtrơp pơđâu dơ̆ng, inh lĕch tơ gre, hơ oei tơ tangdŏ, iŏk sơ̆p hla bơar ‘Bok-Kei-Dei iĕ păng pơih ‘minh bar hlak. Măt inh dơ̆ng ‘bơ̆t: Hơriso 94:3: “Ơ Kră Yang … wă ding truh tơ dang yơ?”
Inh băt kơ inh đei rơih iŏk nơ̆r lăm sơ̆p hla bơar ‘Bok-Kei-Dei ‘nâu ưh kơ trŏ kơ hơrĭ tơdrong pơma, inh đei ngoi tơ bơ’bŭng gre păng tơ hôih:
“Ding truh tơ dang yơ, Kră Yang ơi?”
“Ding truh tơ kon pôk pơư kơ Inh tơ kơpal kơ đĭ đăng.”
“ Wă pơm kiơ, Kră Yang ơi?”
“ Wă kơ Inh dơ̆ng tơ anih mă noh trŏ kơ anih gah Inh. Kon ‘bôh bơih noh, tơdrong jĭ kơ̆l kon oei pŭ iŏk noh wă kơ kon ‘bôh hlôh đĕch. Bơhngol kon kư̆m oei jĭ dêh thoi noh, dôm kơ kon tŭk lê̆ jơ pơgơ̆p hăm Inh rim pơge.”
Kơplah inh đei hlôh tơpă. Ưh kơ trŏ Kră Yang wă kơ inh pŭ iŏk tơdrong jĭ, dah iŏk lê̆ tơdrong inh hưch wă. Kră Yang wă kơ ka phê ưh pă dan hơdrol lăm jơhngơ̆m inh dơ̆ng. Yua kơ anih hơdrol hloh ling lang ‘măn kơ ‘Bok-Kei-Dei. Yua kơ thoi noh, Sư ưh kơ tơ’bôh kơ inh băt kăl kơ ơ̆t kơ ka phê truh tơ dang yơ. Yua kơ ‘nâu ưh kơ trŏ jơ̆ tơdrong gah jơ năr, mă ‘noh jơ̆ anih kơ Kră Yang lăm jơhngơ̆m inh.
Kơplah lu bơ̆n rơih iŏk pôk pơư Kră Yang ‘bơ̆t ‘blŭng a rim pơge, noh kư̆m jơ̆ kơplah lu bơ̆n pơih jơhngơ̆m sơng iŏk tơdrong arih ‘nao tơ anih Yang Bơhngol Lơ̆ng. Păng kơplah sơng iŏk tơdrong ‘mêm mơnat ăn đĕch rơkah rơkai đơ̆ng Sư, lu bơ̆n gô ‘bĕnh ‘blai kơ jơhngơ̆m pran, tơdrong hiôk hian păng krăng kơchăng wă tơ’bơ̆p hăm dôm tơdrong kiơ oei gô tơ anăp.
Hơpơi kơ lu bơ̆n hŏk iŏk kơmĭl đơ̆ng Đawit, chang gô tơ’bơ̆p Kră Yang lăm pơge hrôih, wă kơ jơhngơ̆m lu bơ̆n đei pôk tơiung păng bơhngol đei klaih praih:
“Ơ Kră Yang! Pơgê hrôih Ih gô kơtơ̆ng nơ̆r inh; Pơgê hrôih inh gô roi dôm tơdrong kiơ ‘bơ̆t anăp Ih păng chang gô.” (Hơriso 5:3)
Apĭnh đĭ đăng krao khan hơdai:
Ơ Kră Yang ‘mă ‘mêm, apinh Kră Yang bơtho tơ’bôh kơ kon băt kơ pôk dan Ih hơdrol hloh lăm tôm tơdrong arih kon, lăm tơdrong tơchĕng păng tơdrong pơm lăm rim năr. Mă khan rim năr đei lơ tơdrong jang păng ‘bĕnh kơ hiơ̆k bơngơ̆t truh tơ dang yơ, apinh tơgŭm kon ling lang ‘blŏk kơ Ih hơdrol hloh, ling lang ‘măn jơ hơdrol hloh ăn kơ Ih. Hơpơi kơ Yang Bơhngol ‘Lơ̆ng chông anhăk kon rim năr, wă kơ bơhngol kon ‘bĕnh kơ jơhngơ̆m ‘nao păng ‘mêm mơnat đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ-eng, Kră Yang ưh kơ athei lu bơ̆n krao khan đunh kơ jơ, mă trŏ ‘blep. Mă Sư wă kơ lu bơ̆n dan Sư hơdrol hloh lăm chăl arih lu bơ̆n. Yua kơ kơplah Sư pôk pơ ư tơ kơpal đĭ đăng, lu bơ̆n pă đei yak năm lăm năr plơ̆ng hăm jơhngơ̆m hăt hot păng hiơ̆k bơngơ̆t, mă yak năm lăm jơhngơ̆m ‘nao, lăm tơdrong hiôk hian păng tơdrong ‘mêm mơnat rơkah rơkai đơ̆ng Kră Yang ăn. Nơ̆r Kră Yang lăm năr ‘nâu krao wơ̆n lu bơ̆n yak năm lăm năr plơ̆ng hăm jơ năr hơdrol hloh ‘bơ̆t anăp jơ̆ng Kră Yang, wă kơ mơ̆ng nơ̆r Kră Yang, păng pơma dơnuh hăm Sư. Pơtơm năr plơ̆ng hăm Kră Yang, lui ngeh kơ prăt năr lu bơ̆n gô tơplih tôm tơdrong! Kơplah Kră Yang pôk pơư trŏ kơ anih Sư, na tôm tơdrong nai kư̆m gô jing trŏ kơ anih sư!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!
Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.
Leave a Reply