Lub neej nyob rau tiam tshiab no cuag li tsis muaj sijhawm khoom thiab tsis muaj sijhawm so. Thaum peb pheej raug rub mus rau hauv tej haujlwm, tej lub nra peb yuav tau ris thiab tej haujlwm yuav tau ua “tamsim”, ces lub sijhawm thov Vajtswv thaum sawv ntxov nrog Vajtswv ua ke cuag li yog ib yam uas nyob deb heev. Peb twb hnov qab cia Vajtswv tso rau ib lub “sijhawm khoom”ntawm yus tus kheej, tiamsis ntawd ho tsis yog qhov chaw uas tsimnyog rau peb tus Vajtswv nyob hauv peb lub neej. Nws tsimnyog muab tso ua ntej, hauv txhua txoj kev, thiab nyob rau txhua lub sijhawm!
Hnub no, yog hnub 03/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Shadia Hrichi dhau ntawm Zaj kawm PIB IB HNUB TSHIAB NROG VAJTSWV UA KE
Vajluskub: “Koj yeej hnov kuv lub suab thov thaum sawv ntxov; thaum lub hnub tawm tuaj kuv thov koj thiab tos rawv koj teb kuv (Ntawv Nkauj 5:3).
Kuv yuav tsis muaj hnub hnov qab hnub ntawd.
Thaum ntawd, kuv yeej tseem nyuam qhuav yog ib tug ntseeg tshiab. Txhua hnub, kuv siv zog xyaum txoj kev thov Vajtswv, txawm yog paub tias lub sijhawm ntawd nws tsis ntev txog tsib feeb. Hauv kuv lub siab hnov cuag li raug ceeb toom, kuv hais rau Vajtswv tias: “Kuv paub muaj ib yam dabtsi tab tom tav kuv txoj kev sib txuas lus nrog Vajtswv ua ke. Kuv sawv los, maj nroos mus ua haujlwm thiab cuag li yeej tseg tsis tau ib nyuag me ntsis sijhawm pub rau Vajtswv. Thov Vajtswv zam txim rau kuv!”
Hmo ntawd, kuv cia li saib Tivi thiab hnov muaj ib tug hais txog qhov uas ua kevcai yoo mov. Kuv tsis nkag siab tias vim li cas, tiamsis tamsim ntawd, kuv hnov cuag li kuv cheem tsum yoo mov txog ib yam dabtsi twg, tiamsis yam dabtsi ne? Thiab yuav yoo mov hov ntev?
Kaj ntug hnub tom qab, thaum tab tom tov tais café li txhua zaug, kuv zaum thov Vajtswv. Kuv thiaj nug Vajtswv: “Tus Tswv, kuv yuav ua kevcai yoo mov txog yam dabtsi?”
Vajtswv muab lo lus teb tso rau hauv kuv lub siab ua rau kuv xav tsis thoob… thiab kuj tsis tshua xav txais yuav pes tsawg”
“Kuv yuav tau caiv café los.”
“Puas yog, tus Tswv! Yuav tsum txhob yog café! Kuv hnov yuam kev lawm puas yog…”
“Koj tseem tos ntsoov koj tais café txhua taig kis sawv ntxov ntau dua li uas koj tos kom txog lub sijhawm tau nrog kuv nyob ua ke.”
Txoj kev xav ntawd zoo li ib tug riam hlais kuv lub siab. Tiamsis kuv paub tias qhov ntawd yeej tsis yuam kev. Kuv hliv kuv tais café rau hauv qhov chaw ntxuav tais diav, thiab hnub ntawd, kuv mob taub hau heev vim tsis haus café!
Txhua zaug uas txoj kev mob tau hau ua rau kuv ua tsis tau haujlwm, ces pauv qhov uas kuv mus tov lwm tais café ces kuv haus tshuaj mob taubhau, kuv xaiv thov Vajtswv. Kuv ua Vajtswv tsaug rau tej haujlwm, thov Vajtswv pab rau tej neeg nrog kuv ua haujlwm, thov Vajtswv pab rau kuv lub homphiaj, thiab yam twg uas tshwm hauv kuv lub hlwb, kom txhob xav txog kuv tus mob taub hau.
Thaum yav tsaus ntuj, kuv tiv tsis taus lawm. kuv tab tom nyob ntawm lub chaw cov qhua ua haujlwm, thiab tshuav 20 feeb thiab yuav mus sablaj. Kuv tawm mus nraum zoov, hu xov tooj rau kuv tus phooj ywg uas txheeb tshaj, nroo rau nws txog kuv tus mob taub hau, thiab qhia rau nws paub tias kuv caiv yuav tsis haus café 30 hnub.
Kuv tus phooj ywg nug kuv: “Puas yog Vajtswv hais kom koj yuav tau caiv tsis haus café 30 hnub los yog ntawd yog koj lub tswv yim xwb na?”
Kuv teb: “O… kuv tsis tau nug Vajtswv saib yuav caiv hov ntev. Kuv xav tias tej zaug yuav yog 30 lossis 40 hnub ces tau lawm”.
Kuv tus phooj ywg maj mam hais tias: “Yog li koj tseem hu rau kuv ua tus dabtsi? Koj sim nug Vajtswv saib Vajtswv lub siab nyiam yog li cas!”
Tseem tshuav 15 feeb thiab mam txog lub sijhawm rov qab mus sablaj, kuv tawm mus rau nraum tsheb, zaum hauv tog, muab phau Vajluskub me nyob hauv tsheb los nthuav ob peb nplooj. Kuv lub qhov muag nres rau ntawm Ntawv Nkauj 94:3 “Tus Tswv… yuav txog thaum twg?”
Kuv paub tias kuv tab tom qiv nqe Vajluskub no tsis yog raws li lub ntsiab ntawm ntu Vajluskub no, tiamsis kuv tsa muag saib saum kuv lub tsheb thiab nroo tias:
“Txog thaum twg, tus Tswv?”
“Txog thaum kuv muab koj tsa ua tus ib”.
“tseg ua tsi, tus Tswv?”
“Kom kuv tau nyob ntawm qhov chaw uas ib txwm yog kuv tug. Koj puas pom lawm tau, tus mob taub hau uas koj tab tom raug tsuas yog daim duab ua piv txwv xwb. Koj tus ntsujplig tab tom mob ib yam li ntawd, txhua zaug uas koj hla dhau lub sijhawm nrog kuv sib tham ua ke txhua taig kis sawv ntxov.”
Thaum ntawd kuv thiaj nkag siab tias. Tsis yog Vajtswv xav kom kuv tiv tus mob, lossis tshem tawm yam uas kuv nyiam. Vajtswv xav kom café nws tsis yog yam uas nyob ua ntej hauv kuv lub siab. Thawj qhov chaw yuav tsum tseg rau Vajtswv. Yog li, Vajtswv thiaj tsis qhia rau kuv paub tias yuav caiv café ntev npaum cas. Vim ntawm no tsis yog qhov teeb meem txog sijhawm, tiamsis txog Vajtswv qhov chaw nyob hauv kuv lub siab.
Thaum peb xaiv txhawb nqa Vajtswv rau qhov chaw siab rau txhua taig kis sawv ntxov, ntawd kuj yog lub sijhawm uas peb txais txojsia tshiab ntawm Vaj Ntsujplig los. Thiab thaum peb txais Vajtswv txoj kev hlub nplua mias, peb kuj yuav tau puv npo lub zog, kev kaj siab, ceev faj los ntsib txhua txhia yam uas tab tom tos tom hauv ntej.
Cia siab tias peb kuj yuav kawm tau Daviv tus qauv, tos ntsoov Vajtswv rau thaum sawv ntxov, kom peb lub siab tau Vajtswv rub thiab peb tus ntsujplig tau Vajtswv pauv dua tshiab.
“Koj yeej hnov kuv lub suab thov thaum sawv ntxov; thaum lub hnub tawm tuaj kuv thov koj thiab tos rawv koj teb kuv (Ntawv Nkauj 5:3).
Thov caw nrog kuv peb thov Vajtswv ua ke
Tus Tswv uas muaj kev hlub, thov qhia rau kuv paub kom hnub no kuv yuav muab Koj tso ua ntej hauv txhua yam ntawm kuv lub neej hauv tej kev xav thiab tej haujlwm txhua hnub. txawm yog yuav muaj haujlwm ntau npaum cas thiab muaj kev txhawj npaum twg los, thov Vajtswv pab kom kuv xub nco txog Vajtswv ua ntej, tseg sijhawm zoo tshaj plaws rau Koj ua ntej. Thov Vaj Ntsujplig coj kuv txhua hnub, kom kuv tus ntsujplig puv npo lub zog tshiab thiab puv npo Vajtswv txoj kev hlub. Kuv thov hauv Tswv Yexus Khetos lub npe. Amees.
Cov kwv tij txhua tus, Vajtswv tsis yuam kom peb yuav tseg sijhawm los thov Vajtswv ntev ntev, thiaj yog. Tiamsis Vajtswv xav kom peb muab Vajtswv tso ua ntej hauv peb lub neej. Thiab thaum Vajtswv tau muab tso ua ntej lawm, peb yuav tsis ua lub neej rau hnub tshiab los ntawm txoj kev maj nroos thiab txhawj lawm, tiamsis tau nrog Vajtswv mus ua ke hauv lub zog tshiab, hauv txoj kev kaj siab thiab Vajtswv txoj kev hlub phwjyaws uas Vajtswv pub. Vajtswv txojlus hnub no caw kom peb nkag mus rau hauv ib hnub tshiab los ntawm mus nyob ntawm Vajtswv xub ntiag ua ntej, mloog Vajtswv tej lus thiab nrog Vajtswv sib tham. Pib ib hnub tshiab nrog Vajtswv ua ke, ces ntseeg tias ib hnub peb yuav hloov pauv! Thaum Vajtswv tau muab tso yog Nws qhov chaw ces lwm yam kuj yuav nyob yog nws qhov chaw thiab!
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.
Leave a Reply