Gơs tú lơi he dan mơ Yàng tomgơl dồ nă cau, mơ neh lòt gan oă ngai, sơnam, mơya he kung ờ gó bơta lơi geh tomgơl dê rài kis cau hớ sơl ơ? Jơnau hòi dan gen kứ hòi, mơya nùs nhơm he dê gen gơlơh bòl glar, dil rmil. Bol he lùp is lah: “Yàng kơno iat jơnau he hòi dăn sơl ơ?” ală tú jơ bè hớ, bol he mhar ngan pin wil wơl mơ gơplơ nùs. Mơya, jơnau hòi dan dờn song geh gơnoar pràn dờng ngan, mơ jơnau hòi dăn kơ cê rơp cèng wơl bơta lơngai mơ tomgơl dờng rlau mơ nùs kơlôi he dê.
Ngai do, ngai 02/07/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ ồng Bob Segress bơh tơnggume KƠ̆ NÙS HÒI DĂN Ờ DƠH
Sră Goh: “Yàng Jehôwa la Bơtau ê gàr añ … Añ rơp ơm tòm hìu Yàng Jehôwa dê” (Đơs Crih 23:1-6)
Dồ ngai tòm tú an at ke rơndeh, bau ùr an lùp an lah: “Mê gơs tú lơi lùp is să tờm re rơp sang rài bè lơi sơl ơ?”
An kờn ờ đơs tus tài bơh tú hớ gùng lòt oă cau. Mơya bè mờng ờs, tú bau an kờn geh sèng hơ wơl gen ờ tú lơi khai sang lời. An đơs dồ êt jơnau nàng pleh bơta do. Bulah git là ờ tơl, mơya kung rgơi pleh ală jơnau lùp bau ùr an dê tòm dồ êt.
Tú tìp biển báo “ơm wơl” an kung pal mơ rơndeh wơl. Bau ùr an dê wơlke hơ an, mơ sền an mơ đơs lah:
“Gen bè hớ … me neh kơlôi tus broă hớ sơl ơ?”
An ơm mo mó. Tài bơh an git bau ùr an lùp bè hớ, gen ngan khai kờn tom pà dồ bơta lơi.
Tơ nớ dồ êt, bau ùr đơs mơ an lah:
“Oh kơlôi … oh kờn sang rài bè cau bàp bi dê. Bàp gam sa drim tòm suơn, hơđơm tờm nho, sa ndang sền jơnau tơngit ndang. Mẹ gen mut tòm hìu cèng dồ gri cafe bàp in. tòm tú hớ, dồ nơm kòn sềm ntờp kọ par dê mpồng dềt hìu gơmsa, gơ kờn mut tòm dơlam hìu. Mẹ nrơt nrơl mơ ntoat tòm suơn nàng sền, mơ sền gó cau bàp neh kun bồ hơđang sră yal tơngit. Bè hớ là cau bàp neh rê mơ Yàng. tú mẹ tơnggờr sền, mẹ sền gó kon sềm ntờp neh pá nđar gam gơ par. Kòp tú kah wơl tú jơ bàp sang rài mơ rê hơ lơgar trồ, oh kung gam gơlơh rơmsă sơl …”
Bè mờng ờs, tú an lời bau ùr an dê ràng tơlik nùs nhơm, an dờp git gơs dồ nơm jơnau jrô ndơp ngan nàng kơlôi sơnơng.
An kah kơlôi wơl ngai Yàng dong klàs cau bàp an dê. Mẹ an neh hòi dan ồng in tòm 25 nam. Cau bàp an dê gơkòl tòm bơta nô sa, tú ồng gam là cau at bồ tòm tiah lơh broă ồng dê. Nùs nhơm cau bàp an dê ờ niam, gơs tú neh chồl cau ndai tian gơs gơplơ bơh ntùng tài bơh nùs duh khai dê. Mơya mẹ an sùm hòi dan mơ gơn kơnờm Yàng rơp tomgơl bàp an dê. Mẹ ờ tú lơi kơlôi tus broă cah is, tài bơh mẹ an dờn nền tòm dồ ngai tus Yàng rơp dong klàs bàp an.
Tòm dồ măng, tú an gam ơm tòm ală ngai rlô kơnhai phàng, an khin cha mơ đơs mơ bàp an lah:
“Ơ bàp, kon rngòt bàp ờ geh mut tòm lơgar đang trồ mơ mẹ, bal mơ bol kon … bè hớ ală kon rơp kah bàp ngan”.
Cau bàp an dê hơ wơl: “Dialh kon kơlôi bè hớ, gen tú do he mut tòm hìu um, nàng hòi dan dờn dờp Yàng Jesus tơn”.
Gen bè hớ bol he mut tòm hìu um dềt, cùn gơltang mơ hòi dan. Cau bàp an dê dan Yàng toh glài, dan Yàng dong klàs hwềng soàn ồng dê, bulah ồng neh lơh oă broă tìs. Tú cau bàp an gơjran sang glài, an sền gó dà mat hòr bơh dê mat ồng. Bơh tòm tú jơ hớ, an gơs dồ nă cau bàp pa. Lài òr cau lơi kung rngòt dê ồng, mơya tú do khai neh geh deh wơl pa. Mơ Jơnau Yàng tòm Đơs Crih 23 gơlik gơs phan kas màng tòm nùs nhơm cau bàp an dê.
Cau bàp an dê neh túh jơh dà ơlah kas mơ cau ndai pà khai in. bulah broă lơh ờs mờng cèng cau bàp an dê mut tòm tiah nô ơlac, mơya ồng kung neh ràng tơlik bơta dờn ồng dê bơh dồ broă là ồng tơndau chi pơng hơđang kà vạt ồng dê, mơ ồng mìng hòi dà tơngồt rlau mơ hòi dà ơlac bè ngai lài òr. Tòm jơ ngai oă sơnam rlau, ồng nggui tòm rơndep mpồl cau lơh broă dê, ồng pờ radio nàng kơnơ cau bơto Sră Goh, kơno ndang, cih wơl tòm sră ndang.
An gơs dồ nă cau bàp pa dê! Bulah ồng gam gơs oă pơnah ờ niam, mơya bơh tòm ngai hớ, ồng neh ơn jơ să jan ồng dê tòm mpàng tê wil tơl cau Lơh Ù Kơnàng dê. Jơnau hòi dan kớ cê cau mẹ an dê dut ndơl kung neh geh Yàng dờn dờp. Mơ tòm àng drim, ngai mơ cau bàp an dê sang rài, tú sềm ntờp par bal mơ nđar neh pắ, sèng Sră Goh neh tơngkah an in lah cau bàp an dê neh “sang să jan do nàng rê ơm mơ Yàng!” (2 Kôrinhtô 5:8)
Bơta sang rài bè hớ – ngan la bơta lơngap lơngai ngan!
Dan jà bol he dô nùs bal tòm bơta hòi dan:
Khoai Yàng kòn kờn gơboh, ngai do kon tus mơ Yàng bơh hwền nùs kơn jớ ngan, bal mơ ală jơnau hòi dan ờ hề geh dờp. Dan Yàng ban lòi kon roh bơta gơn kơnờm, ban lời kon sang lòi Yàng tài bơh pal kơp gơn jó jòng. Dan Yàng bơtơl bơta pràn kon in nàng kon kớ nùs, nàng kớ bơta dờn hớ la Yàng gam lơh broă dồ bă wil tơl jat bè rơndap niam Yàng dê. Kon dờn lah Yàng sùm kơno iat kon, mơ rơp hơ wơl jơnau kon hòi dan bơh gơnap gơnoar krơi is Yàng dê. Kon jơh nùs hòi dan, ai sơnđan Yàng Jêsus Christ, Amen.
Ơ ală ồng mọ oh mi kờn gơboh, kớ nùs hòi dăn mơ Yàng ờ di là dồ gùng buơn he in, mơya hớ la dồ nơm gùng tề lăm he tòm bơta tomgơl rài kis he dê, dồ bơta tomgơl mơ cau ndai, hala bơta lơi kung ờ rgơi lơh. Tú he kớ bơta dờn mơ sùm wèt sền hơ Yàng, Kơnràn rơp tuh bơta nđàc, Kơnràn rơp lơh pa hwềng soàn he dê, mơ tom gơl bơta iơh rmơh de dê gơlik bơta niam rlau jơh. Dồ rài kis geh Yàng tomgơl rơp lời wơl bơta niam, jơl tus dê jơh rài. Ừn ngài Yàng oă ngan! Bơta hòi dan kớ nùs rgơi tom gơl rài kis he dê mơ ală cau he kờn gơboh sơl!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply