Rai kis ngai do gil gal mơ oă ngan broă. Tú bol he kừ ơm tòm bơta lơh broă, broă he pal lơh mhar, tú jơ he hòi dan kòp ang drim mơ Yàng la do bơta ò hoan gơs. Bol he neh mong mơ bơta ơn Yàng tòm “tú jơ lơmpah” he dê, mơya hớ ò tú lơi di pal mơ Yàng Tòm Trồ tòm rai kis he dê. Kơnràn pal ơn hơđang rlau jơh, tòm oă pơnah tòm rai kis he dê, mơ tòm kòp tú jơ!
Ngai do, ngai 01/07/2025, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Shadia Hrichi bơh tơnggume SƠNTÒM NGAI PA MƠ YÀNG.
Sră Goh: “Ơ Yàng Jehôwa, tòm àng drim Kơnràñ kơno jơnau añ; Tòm àng drim añ yal tơlik jơnau añ jê di đap Kơnràñ, mơ drơng kơp.” (Đơs Crih 5:3)
An rơp ờ tú lơi híu ngai hớ.
Tú hớ, an gam là dồ nă cau pa dờn. Kờp ngai, an ai pràn nàng lời jơ hòi dan, bulah an git tú jơ hớ mìng lòt gan tòm dồ ết fuk lơm. Tòm nùs an gơkòl lah pơrhơng, an đơs mơ Yàng lah: “kon git gơs dồ bơta lơi gam kup kơryan kon tòmklac bal mơ Yàng. kon guh bic, sơrbac sơrbang lòt lơh broă mơ ờ lời tú jơ tus mơ Yàng. dan Yàng toh glài kon in!”
Tòm măng hớ, an sền TV mơ kơno cau đơs bơh bơta ơt sa. an ờ git nchi bơtài, mơya tòm tú hớ, an sền git pal ơt sa dồ bơta lơi, mơya ờ git loh làng bơta lơi? Mơ pal lời tú jơ kàr lơi tai?
Àng drim ngai hớ, an lơh dồ nơm gri cafe jat bè ờs mờng, an nggui nàng hòi dăn. An lùp Yàng lah: “Ơ Yàng, kon pal ơt sa bơta lơi tiah?”
Sèng hơ wơl Yàng dê ơn tòm nùs an, … gơlơh kal ke nàng dờp rò ngan:
“Con pal ơt nhô cafe”
“Ơ Yàng! Nchi bơtài la cafe! Ngan kon kơlôi tìs gơ dê…”
“Kon kơpgơn gri cafe kòp àng drim rlau mơ kơpgơn tú jơ mơ An”
Bơta hớ gơlơh bè dồ nơm sồt tòm nùs an dê. Mơya an git bơta hớ ờ di là tìs. An tuh gri cafe a dê, mơ tòm jơh dồ ngai hớ, an gơkòl jê bồ oă ngan tài bơh siuớ cafe!
Kờp tú bơta jê lơh an in ờ rgơi lơh broă, rlau mơ sac gri cafe hala jòi phan lơi nàng hùc, an tus mơ Yàng hòi dan. An ừn ngài Yàng tài bơh broă lơh, hòi dan ala ală cau lơh broă bal mơ an, hòi dăn tus dê broă lơh an dê, hala kờp ală broă lơi tus dê tòm bồ tơngoh an dê, nàng pleh bơta jê bồ.
Tus dê trồ mho, an ờ rgơi kong jai tai. An gam ơm tòm ơdu wă rò nac, mơ gơs 20 fuk rlô lài mơ tú bơyai broă. An lik bơrdìh mơ hòi điện thoại tus dê cau bơyô đềt mềr an dê, nàng đơs bơh bơta jê bồ, mơ yal khai in git la an neh lơh nền ơt hùc cafe tòm 30 ngai.
Cau bơyô an dê lùp an: “ngan să tờm Yàng hòi jà mê ơt hùc cafe tòm 30 ngai, hala do la jat nùs nhơm mê dê taih?
An đơs wơl “ờ… an ờ hềt lùp Yàng là ơt hùc tòm nđờ ngai. An kơlôi is lah ơt sa pal la 30 hala 40 ngai la di rau.”
Cau bơyô an dê đơs niam mơ an lah: “gen bè hớ nchi bơtài mê hòi điện an in taih? Mê pal lùp nùs kờn Yàng dê!”
Gam 15 fuk lài mơ tú tus jơ bơyai broă, an lik tus tiah ơn rơndeh, nggui tòm rơndeh, ai Sră Goh dềt mơ pờ tòm dồ êt pang sră. An sền mơ ơm wơl tòm sră Đơs Crih 94:3: “Khoai Yàng Jêhôwa … jơl tus dê tú lơi taih?”
An git an ờ sền dồ bă tòm toh jat bè jơnau do pal đơs, mơya an kung tơng gờr sền rcàng rơndeh mơ tắ nhơm dờng:
“Jơl tus dê tú lơi taih, ơ Yàng?”
“Jơl tus dê tú kon ơn An lài đap”
“Nàng lơh bơta lơi, ơ Yàng?”
“Nàng An geh ơm tiah di pal gơrê mơ An”
“Kon git sơl, bơta jê bồ kon dê mìng la dồ nơm rùp sơnio lơm. Hwềng soàn kon kung gam kong jê sồt bè hớ, kờp tú kon sang lời bơta hòi dăn mơ An kờp àng drim.”
Tú hớ an dờp git. Ờ di Yàng kờn an jê sồt, hala tă tơlik bơta an kờn gơboh. Yàng kờn cafe ờ di la phan dờng rlau mơ Yàng. Yàng pal là dờng rlau. Gen bè hớ, Yàng ờ ràng tơlik an pal ơt hùc cafe tòm nđờ ngai. Do ờ di la broă bơh tú jơ tơngai, mơ la broă Yàng gơs tiah lơi tòm nùs nhơm an dê.
Tú bol he sac jòng rơ Yàng tòm kờp àng drim, hớ kung la tú bol he pờ nùs he dê nàng dờp bơta pràn pa tòm Yàng Hwềng Goh. mơ tú dờp bơta nđàc bềng lìu Yàng dê, bol he rơp bềng bơta pràn, bơta lơngap lơngai mơ drơng nàng tom dră mơ ală broă rơp tus.
Kơp kờn ngan bol he rơp bơtê jat krớh ồng David, kơp gơn lòt tus mơ Yàng tú trồ àng drim, nàng nùs nhơm he dê geh yò tơng guh mơ hwềng soàn geh bơtơl pràn:
“Ơ Yàng Jehôwa, tòm àng drim Kơnràñ kơno jơnau añ; Tòm àng drim añ yal tơlik jơnau añ jê di đap Kơnràñ, mơ drơng kơp.” (Đơs Crih 5:3)
Dan jà bol he dô nùs bal tòm bơta hòi dan:
Khoai Yàng kờn gơboh, dan Yàng bơtê kon git ơn Yàng dờng rlau jơh tòm rài kis kon dê, mơ tòm ală bơta kơlôi sơnơng mơ broă lơh kờp ngai sơl. Bulah kơp ngai oă broă mơ bềng bơta kơlôi rcang kàr lơi, dan dong kon sùm kah Yàng lài đap, sùm git ơn tú jơ tơngai niam rlau jơh Yàng in. dan Yàng Hwềng Goh tề lam kon kờp ngai, nàng hwềng soàn kon sùm geh pràn pa mơ bềng bơta kờn gơboh Yàng dê. Kon jơh nùs hòi dan ai sơnđan Yàng Jesus Christ, Amen.
Ơ ală ồng mò oh mi kờn gơboh, Yàng ờ jòi bol he pal gơs tú jơ mơ Yàng nàng hòi dăn jó jòng. Mơya Yàng kờn bol he pal ơn Yàng lài đap tòm rài kis bol he dê. Mơ tú Yàng geh ơn tiah dờng rlau jơh, bol he rơp ờ mut dồ ngai pa tòm bơta kơlôi rcang, mơya rơp cơnđoà tòm bơta pràn pa, tòm bơta lơngap lơngai mơ bơta kờn gơboh tơng kah tơngkan Yàng pà ai. Jơnau Yàng ngai do hòi jà bol he cơn đoà mut tòm ngai pa bơh tú jơ he tomklac mơ Yàng, kơnơ iat Jơnau Yàng, mơ hòi dan mơ Yàng. sơntờm dồ ngai pa mơ Yàng, gen dờn nền ngan dồ ngai bol he dê rơp geh tomgơl! Tú Yàng geh ơn tiah di pal, gen jơh ală broă ndai kung rơp geh ơn tiah di gơ dê!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply