Lơ 06/12/2023: PƠYƠR PRAN JUA KƠ ɃING TA BRƠI KƠ KHUA YANG YÊSU.

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi
Ƀing ta ƀu dưi ôh hmâo tơlơi kiăng kơ Khua Yang jing khua kơ tơlơi hơdip ƀing ta samơ̆ ƀu pơyơr ôh abih pran jua ƀing ta brơi kơ Khua Yang. Yua kơ kơnơ̆ng hơjăn Khua Yang đôč dưi klơ̆p bă abih bang tơlơi rơhông amăng pran jua ƀing ih laih anŭn ba rai tơlơi hơdip, tơlơi pơsuaih kơ khul tơlơi ruă nuă amăng ƀing ih. Ƀing ih hmâo prăp pre laih aka kiăng kơ Khua Yang mŭt dŏ laih anŭn ngă khua abih bang adŭ amăng pran jua kơ ƀing ih?

Hrơi anai, lơ 06/12/2023, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Marsha Brickhouse Smith tui hăng akŏ tơlơi hrăm PƠYƠR PRAN JUA KƠ ɃING TA BRƠI KƠ KHUA YANG YÊSU.

“Ơi Adai jing Pô mă bruă amăng ƀing ta hăng tơlơi dưi mơyang Ñu, dưi ngă rơgao hloh kơ abih bang tơlơi ƀing ta rơkâo ƀôdah tơlơi ƀing ta pơmĭn.” (Êphêsô 3:20)

Kâo mưn ƀuh gleh glan tơdơi kơ sa hrơi mă bruă. Yua kơ gleh hnŭn yơh kâo rơbat nao pơ hơnoh ia rơiăt jĕ giăm anih kâo dŏ. Khul hla kơyâo prŏng rơyuh hyao hyao ƀơi khul angĭn thut. Hnŭn jing sa hrơi bơyan hla răng hiam klă biă mă. Wơ̆t kơ tui anŭn, samơ̆ kâo mưn ƀuh hial măl biă mă. Hmâo lu mơta tơlơi truh amăng tơlơi hơdip ngă kơ tơlơi pơmĭn kâo bă hăng tơlơi sư̆ bư̆.

Tơdang truh pơ hang ia, kâo čơdơ̆ng pơhiăp hăng Khua Yang kơ khul tơlơi pơmĭn dlam biă mă amăng pran jua kâo. Kâo thâo klă Khua Yang jing Pô hluh kâo rơđah laih anŭn khăp kơ kâo prŏng prin biă mă. Khua Yang yơh jing Pô hrih pơjing kâo laih anŭn pơsăn tơlơi hơdip djai pơala kơ tơlơi soh kâo. Anăn Ñu jing Yêsu. Hlăk anŭn kâo pơhiăp hăng Khua Yang:
“Ơ Khua Yang, rơkâo kơ Ih dŏ amăng pran jua kâo yua kơ lu wơ̆t pran jua kâo rơhông rơhang. Djơ̆ mơ̆ Khua Yang dŏ hrŏm hơbĭt hăng kâo. Rŏ dah rĭm wơ̆t tơdang kâo iâu laĭ tơlơi kâo iâu laĭ ƀu truh ôh pơ tơngia Khua Yang.”

Kâo mưn asăp Khua Yang rơun tơdu pơhơdơr pơtô amăng pran jua kâo, “Ơ ană Kâo khăp hơeng, Kâo dŏ tơguan ih jăk Kâo. Hmâo lu tơhnal ngă kơ pran jua ih rơnguă. Rĭm wơ̆t tơdang Kâo kiăng mŭt dŏ amăng pran jua ih, ih krư̆ krĕp hĭ amăng. Kâo khăp kơ ih biă mă yua kơ anŭn Kâo pha brơi kơ ih kơmla kăl kiăng kơ dưi pŏk abih bang adŭ. Samơ̆ hmâo khul amăng krư̆ hĭ yua kơ anŭn yơh Kâo ƀu dưi mŭt ôh. Ih kơwưh rơkâo kơ Kâo ngă khua pơtao amăng tơlơi hơdip ih samơ̆ tơdang Kâo kiăng yak mŭt khul bah amăng anŭn krư̆ hĭ krĕp.

Kâo thâo krăn ih pơyơr pran jua ih brơi kơ Kâo samơ̆ ƀu kiăng ôh Kâo yak mŭt amăng khul adŭ yom amăng pran jua ih. Yua kơ anŭn, Yang Bơngăt Hiam ƀu dưi mŭt dŏ amăng pran jua ih yua kơ ñu krư̆ klĕp hĭ.”

Kâo laĭ hăng Khua Yang: “Samơ̆ ơ Khua Yang ah, khul adŭ anŭn bă hăng tơlơi ruă nuă, rŭng răng laih anŭn rơngot hơning. Kâo ƀu kiăng ôh hmâo tơlơi rơngot ruă dơ̆ng tơdang pŏk khul adŭ anŭn. Kâo kiăng khul adŭ anŭn krư̆ klĕp hĭ bah amăng hlŏng lar dưi mơ̆, ơ Khua Yang?”

Laih anŭn, tŏ tui kâo mưn Khua Yang pơhơdơr kâo: “Ơ ană ah, brơi bĕ Kâo pơhlao hĭ tơlơi rơngot hơning amăng pran jua ih. Kâo yơh jing Pô pha brơi tơlơi hơdip kơ ih yua kơ anŭn Kâo khŏm dŏ amăng abih bang anih amăng pran jua ih. Kơnơ̆ng tui anŭn đôč. Ih khŏm pŏk khul bah amăng adŭ hmâo anăn ‘Ƀu Pap Brơi’ kiăng kơ dưi pap brơi kơ arăng. Rơngiao kơ anŭn, Kâo kiăng ih pap brơi sĭt laih anŭn wơr hĭ tơlơi rơngot hơning.

Tŏ tui dơ̆ng jing adŭ “Tơlơi Ruă Nuă”. Brơi bĕ Kâo klơ̆p bŏ hĭ adŭ anŭn hăng tơlơi pơalum laih anŭn tơlơi khăp. Ăt brơi mơ̆n hơnoh drah Kâo sut lui hĭ adŭ “Rơgao Laih” kơ ih. Brơi bĕ kâo mă đuaĭ hĭ khul adŭ anŭn laih anŭn klơ̆p bŏ gơñu hăng tơlơi khăp, hăng pran jua pap drap laih anŭn hăng tơlơi Kâo pap brơi. Kâo či mă đuaĭ hĭ khul tơlơi ruă nuă, pơsuaih nam rơka amăng pran jua ih laih anŭn ih či hơduah ƀuh hip pioh gơnam yom amăng anŭn.

Năng ai ih thâo Kâo tơkeng rai amăng war rơmô tong rơ̆k laih anŭn ƀu hmâo anih brơi Kâo amăng sang jưh dơ̆ng tah. Năng ai ih rơngot tơdang hmư̆ tơlơi anai samơ̆ ih ƀuh yơh, mông pă ih ƀu brơi Kâo yak mŭt amăng khul adŭ anŭn ih ăt ƀu jak jum Kâo mŭt dŏ amăng pran jua ih mơ̆n. Yua kơ anŭn ih laĭ ƀu hmâo anih brơi kơ Ñu. Brơi bĕ Kâo yak mŭt amăng khul adŭ anŭn kiăng kơ Kâo ngă abih bang bruă amăng tơlơi hơdip ih.”

Sĭt biă mă, lu thŭn đuaĭ rơgao kâo krư̆ krĕp hĭ khul adŭ anŭn. Kâo ƀu brơi ôh Khua Yang yak mŭt khul adŭ anŭn. Ƀing ta ƀu dưi hmâo tơlơi kiăng kơ Khua Yang ngă khua pơtao amăng tơlơi hơdip ƀing ta, samơ̆ ƀu pơyơr ôh abih pran jua ƀing ta kơ Khua Yang.

Hlăk amăng mông anŭn yơh, kâo iâu laĭ ƀơi hang ia laih anŭn jak jum Khua pơtao amăng pran jua kâo, git gai abih bang tơlơi rơhông amăng pran jua kâo. Bơni kơ Khua Yang yua kơ Ih hmâo hmư̆ tơlơi kâo kơwưh rơkâo laih anŭn pơhlao abih bang tơlơi ruă nuă amăng pran jua kâo.

Bơni kơ Khua Yang yua kơ Ih jing Pô pha brơi abih bang tơlơi rơgao hloh kơ abih bang tơlơi ƀing ta rơkâo ƀôdah pơmĭn hrup hăng Boh Pơhiăp Ñu hmâo čih amăng Êphêsô 3:20: “Ơi Adai jing Pô mă bruă amăng ƀing ta hăng tơlơi dưi mơyang Ñu, dưi ngă rơgao hloh kơ abih bang tơlơi ƀing ta rơkâo ƀôdah tơlơi ƀing ta pơmĭn.”

Rơkâo ƀing ta pioh mông iâu laĭ hrŏm hơbĭt:
Ơ Khua Yang tơlơi khăp, rơkâo kơ Ih pơsuaih kơ khul tơlơi ruă nuă, tơlơi rŭng răng amăng pran jua kâo hăng tơlơi khăp, tơlơi pap drap laih anŭn tơlơi khăp prŏng prin Ih. Kâo bơni hơơč kơ Ih amăng tơlơi khăp Ih, kâo tŭ mă tơlơi hơdip laih anŭn hmâo klơ̆p bă abih bang tơlơi rơhông hang. Hăng tơlơi pơpŭ kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, brơi bĕ Khua Yang mŭt dŏ laih anŭn ngă khua amăng tơlơi hơdip kơ ƀing ih. Brơi kơ ƀing ih pơyơr đĭ bĕ brơi kơ Khua Yang abih bang khul tơlơi ruă nuă, khul tơlơi rơngot hơning laih anŭn abih bang khul tơlơi hơgơ̆m amăng tơlơi hơdip rơgao. Kơ tơlơi khăp laih anŭn tơlơi pap drap kơ Khua Yang yơh či pơblih kơ tơlơi hơdip kơ ƀing ih jing hĭ kơphrâo laih anŭn mơboh brơi kơ Ñu. Ƀing ih či mưn găn lu mơta tơlơi prŏng prin Ñu hmâo ngă amăng tơlơi hơdip kơ ƀing ih tơdang ƀing ih pioh hrơi mông hơjăn păn kơ ƀing ih hăng Khua Yang laih anŭn hơduah sem Ñu hăng abih pran jua.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.