Lơ 28/01/2024: TƠLƠI YOM HLOH

Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀu hmâo tơlơi mơak pă dưi pơhơmu hăng bruă hơduah ƀuh glaĭ mơta tơlơi rŏ dah rơngiă laih. Hăng dêh čar pơtao hlŏng lar, ƀu hmâo hơgĕt yom hloh kơ bruă ba glaĭ bơngăt mơnuih rơngiă kơ sang Ama. Rĭm čô ƀing ta jing ƀing mơnuih Khua Yang pơkiaŏ nao kiăng tui hơduah hăng djru mơnuih soh pơlir glaĭ hăng Ơi Adai.

Hrơi anai, lơ 28/01/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Kimberly Poteet tui hăng akŏ tơlơi hrăm TƠLƠI YOM HLOH

“Yua kơ abih bang hlô glai leng kơ lơ̆m kơ Kâo soh sel, Khul hlô mơnơ̆ng rong amăng rơbâo rơbâo bol čư̆ ăt kar kaĭ mơ̆n. (Tơlơi Adoh Hơđăp 50:10)

Kâo rŭng răng biă mă tơdang kâo thâo kâo hmâo pơrơngiă hĭ rơbưn pơkol.

Kâo hơdơr kâo toh rơbưn hăng jek amăng kơdŭng sum laih. Anŭn jing tơlơi kâo juăt ngă rĭm wơ̆t kâo čao akŏ, hlăk prăp mơnơ̆ng ƀơ̆ng huă, mă bruă amăng đang ƀôdah ngă lu bruă pơkŏn huĭ răm hĭ rơbưn yom kâo. Kâo pơyom biă mă rơbưn anŭn yua anai jing kơnol pơgop tơ̆ng krah rơkơi bơnai gơmơi tơdang ƀing gơmơi ƀuăn ƀơi anăp Ơi Adai hăng Sang Ơi Adai hlâo dih.

Tơdang ngă giơ̆ng bruă, kâo lăng amăng kơdung sum ƀu ƀuh dơ̆ng tah. Mông anŭn, kâo sul kul tui hơduah čang rơmang dưi ƀuh rơbưn anŭn.

Rơkơi bơnai gơmơi tui hơduah rơbưn anŭn amăng sang mơnơi, ƀơi bah amăng sang pơanăp, tơdring sang. Rơkơi kâo čơ kâo tui hơduah rok jơlan, suek uek amăng deh, tap nang nao hơduah pơ sang sĭ pơdro jing anih kâo hmâo nao blơi gơnam amăng klăm hrơi anŭn.

Kâo hrŏm hăng ƀing mơnuih amăng sang anŏ laih anŭn ƀing mơnuih mă bruă amăng sang sĭ pơdro ăt tui hơduah rơbưn anŭn yơh. Tơdơi kơ anŭn kâo iâu laĭ kiăng kơ Khua Yang djru gơmơi dưi hơduah ƀuh rơbưn anŭn tap nang gơmơi pơthâo brơi kơ police hăng pơthâo amăng internet. Samơ̆ ƀu hmâo hlơi ôh hơduah ƀuh rơbưn yom anai.

Hlâo dih kâo ăt hmâo rơngiă gơnam mơ̆n samơ̆ ƀu tui hơduah gleh glăn kar hăng anŭn ôh. Lu wơ̆t kâo khưp ư lui hơduah yua kơ mưn gleh glăn đơi. Kâo či pơplih gơnam pơkŏn pơala kơ gơnam rơngiă anŭn tơdang kâo kiăng.

Samơ̆ tal anai kâo ƀu dưi hơduah rơbưn plah plơ̆t ôh. Yua kơ anŭn yơh, gơmơi črong pơmĭn nanao ngă hiưm pă kiăng dưi hơduah ƀuh rơbưn rơngiă anŭn.

Anŭn yơh, kâo pơmĭn nanao kơ bruă hơduah anai hrơi hăng mlam.

Hnal tuč gơmơi hơ̆k mơak biă mă tơdang rơkơi kâo hơduah ƀuh laih rơbưn anŭn. Rơbưn lĕ hĭ gah krôm sưng mơ̆ng hrơi kâo ngă rơngiă. Nang ai rơbưn lĕ trŭn tơdang kâo hlăk pơplih sum ao.

Gơmơi mơak biă mă tơdang hơduah ƀuh rơbưn. Tơlơi anai ngă kơ kâo hơdơr nao kơ Boh Pơhiăp Khua Yang amăng hră Luk 15:10 čih ruai glaĭ kơ bruă ling jang hiam Ơi Adai hơ̆k mơak tơdang ƀuh sa čô mơnuih kơhmal.

Tơlơi čih ruai kơ ană triu rơngiă amăng hră Mathiơ 18:12-14 pioh glaĭ kơ ƀing ta sa tơlơi sĭt kiăng kơ pơmĭn:
“Hyư̆m ƀing gih pơmĭn? Tơdah sa čô hmâo sa rơtuh drơi triu, samơ̆ sa drơi amăng ƀing gơñu čơlah hĭ, ƀu djơ̆ hă ñu lui ƀing dua rơpăn pluh dua rơpăn drơi ƀơi ngŏ čư̆ laih anŭn nao sem sa drơi čơlah laih? Sĭt biă mă Kâo laĭ kơ ƀing gih, tơdah ñu ƀuh laih triu anŭn, ñu hơ̆k mơak kơ triu anŭn hloh kơ ƀing dua păn pluh dua rơpăn drơi ƀu čơlah ôh. Kar hăng tui anŭn mơ̆n Ama ƀing gih amăng adai ƀu kiăng ôh sa čô amăng ƀing čơđai anĕt anai răm rơngiă hĭ.”

Lu mơnuih pơmĭn nang ai Khua Yang ƀu lăng nao kơ ƀing mơnuih čơlah hĭ mơ̆ng khul triu Ñu. Samơ̆ ƀu djơ̆ tui anŭn ôh yua kơ Khua Yang jing Pô pơmĭn lăng nao kơ abih bang mơnuih laih anŭn prăp kiăng tui hơduah kơ hlơi pô đuaĭ ataih mơ̆ng Ñu.

Wơ̆t amăng Hră Ơi Adai Pơhiăp ƀu laĭ djơ̆ anăn kơ ƀing čơlah mơ̆ng khul. Ƀing ta ƀu thâo krăn rơđah rơđong gơñu jing hlơi hăng khul tơlơi yom pơphan gơñu. Ƀing ta khŏm thâo anŭn jing Ơi Adai jing Pô Wai Triu Hiam Klă jing Pô thâo krăn hlơi hlăk rơbat taih mơ̆ng war laih anŭn Ñu či tui hơduah mơnuih anŭn kiăng ba glaĭ.

Ơi Adai yơh jing Pô Wai Triu Hiam Klă jing Pô ƀuh nua yom amăng rĭm čô ƀing ta. Mơ̆ng drah yom Khua Yang Yêsu, Ană Ñu hmâo song mă ƀing ta hăng nua yom biă mă. Abih bang ƀing ta leng kơ yom ƀơi anăp Khua Yang.

Rơkâo ƀing ta pioh mông iâu laĭ hrŏm hơbĭt
Ama khăp hơi, kâo bơni kơ Ih yua Ih hmâo pơklaih tơlơi hơdip kâo laih anŭn ba kâo glaĭ mơ̆ng tơlơi djai rơngiă. Sĭt ƀu hmâo hơgĕt yom kar hăng nua Ih song mă kiăng pơklaih bơngăt kâo hlŏng lar. Rơkâo Ih djru kâo hla tui gru Pô Wai Triu Hiam Klă kiăng tui hơduah ƀing ayŏng adơi dŏ ataih mơ̆ng sang Ama. Rơkâo Ih djru kâo gir run hăng tŏng ten tui hơduah ƀing mơnuih čơlah laih anŭn ba gơñu glaĭ amăng sang anŏ Ih. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, Khua Yang jing Pô lăng ba abih bang mơnuih laih anŭn ƀing ta hmâo nua yom ƀơi anăp Ñu. Khua Yang pha brơi ƀing ta mông hrơi kiăng kơ tui hơduah laih anŭn ba glaĭ ƀing bơngăt mơnuih soh kơhmal đaŏ kơ Ñu. Yua bĕ mông hrơi gal kiăng kơ lu mơnuih thâo krăn gơnam pơklaih mơ̆ng Khua Yang Yêsu. Rơkâo Khua Yang yua ih jing pô pơthâo tơlơi pơklaih kơ dêh čar Pơtao Plei Hiam hăng tơlơi tŏng ten găn tơlơi pơhiăp laih anŭn bruă ngă ih rĭm hrơi.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.