Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
Nàng geh sơn rbòng gơlik plai đo, cau lơh tòm suơn pal lơh lơbơn tiah, tong phân mơ sền gar tiah. Cơnđòa mut tòm nam pa, kòp nă bol he pal càng lòi tŭ jơ ơn nùs ơn tồr mơ sền gar rài kis đah hwềng soan he dê. Broă lòi tŭ jơ nàng ơm is mơ Yàng tòm bơta rac dan, sền Sră Goh, lơh jat ală bơta kơrmap gar đah hwềng rơp dong kòl bol he dô nam sùm be chi sro ryas mơ ơm kơ̆ tòm Yàng.
Ngai do, ngai 01/01/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Kathy Schultz bơh tơnggume SÒ RYAS MƠ KƠ̆ WỀN TÒM YÀNG
‘Tồ Bơtau Krist in bơh bơta dòn mơ ơm tòm nùs ală oh mi, nàng tơnơ̆ mơ tŭ oh mi ơm kơ̆ be chi sro ryas mơ bơtào kơ̆ tòm bơta kòñ gơboh. Añ dan oh mi bal mơ jơh ală cau sàng goh rgơi git wă bơta ơnàng, bơta jòng, bơta jơnhoa, bơta jrô bơta kòñ gơboh Bơtau Krist dê la mbe lơi, mơ geh git bơta kòñ gơboh Bơtau Krist dê la rlau mơ bơta git wă, tồ oh mi in geh bềng lìu bơta bềng tơl Yàng Tom Trồ dê. ‘ (Ephesô 3:17-19)
Hiu nha bol hi gơs dô nơm suơn hang mơnĕ bềng tơl bơkào mơ chi che. Bau klau añ la cau gơboh gơ bài broă lơh suơn mơya añ ò gơ boh broă do dô êt lơi. Tơnơ̆ bơh tŭ bau klau añ rê mơ Yàng gen añ pal gơs gơnoar broă tòm mơ lơh suơn. Bơh sơnròp añ kơ lôi gùng dà mhar rlau jơh lơh suơn la koh sang ñhơt. Mơya dô êt jŏ añ sền sơwì gen añ neh git jơh ală broă pal lơh dô nă cau lơh suơn dê.
Tŭ jơ do, kơnhai phàng neh tus mơ hơđang ală sră tạp chí bềng tơl rùp ală suơn niam jrùh mơ hàng mơnĕ ngan. Tŭ lòt kòp ba tiah lơi gen bol he kung rơp bàn bơkào jrùh niam hàng mơnĕ ngan geh bro làm ba tiah tian gơs geh bro tòm tiah rwat phan. Tài bơh añ os sền gar suơn gen gơ sơlo ngai sơlo niam rlau tai. Ngan gơ dê lah añ gŏ suơn añ jê kung niam dròm be ală suơn tòm sră tạp chí. Kòp tŭ đal gŏ suơn gơs chi ò jrùh tai mơ ro rañ mơ neh chơt rau gen kòn ùr añ chồl bơtrut ngan pal jì sang mơ tam chi pa tòm ntềng hơ̆. Añ gŏ broă do buơn ngan gen añ jơh nùs lơh mhar tơn. Rlau mơ hơ̆, añ kung kòñ dròm be ală cau gơp bơyo añ jê la ală cau lơh suơn jak chài ngan.
Gen be hơ̆ añ lòt rwat bơkào nàng tam. Lài ngan añ ai phan lơh tiah nàng lơh lơbơn tiah. Niam ngan tŭ sơn tòm lơh broă tòm sươn. Lài ngan añ pal càng lơh tiah in lơbơn. Ò gơs dô nă cau lơi tề lam añ bơh broă hơ̆. Tơnơ̆ mơ lơh niam tiah rau añ pal tò trồm pal di nàng bơ kào rgơi ntào dờng. Tơnơ̆ mơ oă bơta pơnđơl gen añ kung neh tò sìr rau. Tơnơ̆ tai añ mơ kòn ùr sih phân, tuh dà mơ hòi dan rac dan mơ Yàng dong kòl bơkào ntào dờng niam.
Tŭ lơh jơh ală broă hơ̆ gen añ kơno iat jơnau Yàng lơbơn niam tơngkah añ lah: “Ơ kòn, dilah nùs kòn kră kơldang mơ ò dòp rò Añ gen kòn kung dròm be suơn do.” Ưn ngài Yàng tài bơh Kơnràñ neh lơh kah rngal hwềng soan añ jê. Ngan lah, añ ò kah kơ lôi tus suơn do tai mơ tian gơs añ sang sơrbì phan iơh tòm nttềng hơ̆. Tài bơh la bơh sơnròp añ ò kòñ lơh suơn. Gen tàng, añ lơh nền lòt tòmbơhbơr mơ dô nă cau gơ boh gơ bài lơh suơn he dê mơ bi đơs la pal cang dô dơ̆ dô nam sih phân nàng tiah in niam gơ dê.
Kung be hơ̆, ală cau lơh tòm suơn os git loh tơnơ̆ mơ tŭ jơh tơrgùm plai đo rau gen bol khai pal càng sih gar nàng plai đo nam tơnơ̆ in tai. Bol khai pal cang lơh tiah lơbơn niam mơ sih phân. Kung be hơ̆, bol he kung pal lơh dròm be hơ̆ wèt mơ rài kis đah hwềng he dê. Bol he pal lòi tŭ jơ mơ Yàng nàng sùm lòi Yàng tơlik mat tòm bồ dơngoh he. Mơtai, bol he pal cang rac dan, iat kơno mơ sền Jơnau Yàng. Rlau tai, tŭ geh tìp mơ broă lơi iơh tòm rài kis do gen bol he pal kơnòm dê Yang mơ kơp gơn jơnau Yàng ho. Ngan be hơ̆, bol he pal duh rngòt mơ lơh jat Jơnau Yàng. Tŭ bol he git làm gơnap gơ noar Yàng dê hơđang bol he gen bol he mơ rgơi dong kòl cau ndai tòm bơta iơh bol khai geh tìp.
Jơnau Yàng tòm sră 1 Pier 3:15 chồl bơtrut bol he pal gơs nùs nhơm sùm rcang sir nàng dong kòl cau ndai git loh bơh bơta dòn bol he dê tòm Bơtau Krist.
‘Mơya duh rngòt tĕ di Bơtau Krist la sàng goh mơ bơtào Kơnràñ lơh gơs Yàng tòm nùs oh mi dê. Pal sùm sùm rcang sir nàng ho wơl mơ cau lơi lùp bơh bơta gơn kơnòm tòm oh mi, mơ lơh bơta hơ̆ dô bă niam lơnhơn mơ duh rngòt. ‘
Pơnah añ jê, añ kơp kòñ suơn añ jê sơlo ngai sơlo jrùh niam mơ hàng mơnĕ rlau tai tòm nam ngkòi tŭ añ lòi tŭ jơ tòm kơnhai prang nàng lơh lơbơn tiah nàng tam chi tòm kơnhai phàng. Dan Yàng dong ồng mò oh mi mơ añ lòi tŭ jơ ngai do nàng rac dan Yàng dong kòl bol he tòm gùng lòt rài tơnơ̆. Gơ wèt mơ añ, gơs oă sèng Sră Goh đơs bơh tiah brê mơya do la sèng Sră Goh mơ añ gơ boh rlau jơh. Dan Yàng dong ồng mò oh mi lơh jat sèng Sră Goh tòm Sră Ephesô 3:17-19 tòm rài kis he dê mơ añ kơp gơn rài kis ồng mò oh mi geh bềng tơl bơta kòñ gơboh Yàng Tòm Trồ dê mơ dòp geh bơta chò hòp bơh Yàng
‘Tồ Bơtau Krist in bơh bơta dòn mơ ơm tòm nùs ală oh mi, nàng tơnơ̆ mơ tŭ oh mi ơm kơ̆ be chi sro ryas mơ bơtào kơ̆ tòm bơta kòñ gơboh. Añ dan oh mi bal mơ jơh ală cau sàng goh rgơi git wă bơta ơnàng, bơta jòng, bơta jơnhoa, bơta jrô bơta kòñ gơboh Bơtau Krist dê la mbe lơi, mơ geh git bơta kòñ gơboh Bơtau Krist dê la rlau mơ bơta git wă, tồ oh mi in geh bềng lìu bơta bềng tơl Yàng Tom Trồ dê. ‘
Tus tŭ jơ do dô êt chi tòm suơn añ jê neh sơntòm gơlik bơkào. Ưn ngài Yàng tài bơh Kơnràñ dòp jơnau hòi dan añ jê. Dilah añ tơryiang tơryồng lơh suơn gen sơlo ngai rơp geh oă bơkào niam rlau tai. Tŭ jơ do añ sơntòm lơh suơn rbòng nam tơnơ̆ in.
Dan jà bol he dô nùs bal tòm bơta hòi dan:
Ưn ngài Yàng tài bơh ală sèng bơtê ring niam kòn geh bơtê bơh ală bơta os mòng tòm rài kis do. Kòn jào phi suơn đah hwềng kòn dê tòm tê Yàng, dan Bèp lơh pa wơl đah hwềng kòn dê tòm nam tơnơ̆. Dan Yàng dong kòn sùm be chi sro ryas mơ ơm kơ̆ tòm bơta kòñ gơboh Yàng dê. Dan Jơnau Yàng ngai do tơngkah kòn lòi tŭ jơ tòm bơh bơr mơ Yàng kòp ngai nàng kơnòm dê Yàng tề lam kòn tòm ală broă. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, bol he rcang sir nàng Yàng lơh lơbơn niam ba tiah đah hwềng he dê tòm nam pa do hala ò? Bol he pal sùm sùm kơnòm Yàng lơh pa wơl đah hwềng mơ tă sang ală bơta ò niam nùs Yàng. Lòi tŭ jơ kòp ngai nàng bơtê jơnau Yàng, ròng siam rài kis đah hwềng ồng mò oh mi dê mơ kơnòm Yàng koh sang ală bơta kră kơldang tòm nùs ồng mò oh mi dê. Dan Yàng ai pà ồng mò oh mi in dô nam pa chò nùs mơ bềng tơl bơta kòñ gơboh tòm Yàng dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply