Peb tib neeg niaj hnub nim no pheej hnov qab? Peb tsis yog tsuas hnov qab tej haujlwm loj me txhua hnub xwb tiamsis tseem hnov qab kiag tej koob hmoov uas Vajtswv pub. Thaum peb hnov qab Vajtswv tej txujci, peb txoj kev ntseeg rau Vajtswv tus muaj hwjchim kuj yuav yoj yees. Peb yooj yim poob los ua ib tug neeg ua xyem xyav thiab txhawj xeeb txhua zaug uas muaj kev sim siab los raug, thiab hnov qab lawm hais tias tus uas kav tag nrho lub ntiajteb no tab tom nrog nraim peb nyob.
Hnub no, yog hnub 07/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lori Wilkerson Stewart dhau ntawm Zaj kawm HNOV QAB.
Vajntxwv Daviv sau nyob hauv Ntawv Nkauj 103:2 “Kuv lub siab, cia li qhuas tus Tswv thiab nco tsoov nws txiaj ntsig.”
Daviv cim civ ntuas nws tus kheej kom tsis txhob hnov qab tej koob hmoov uas Vajtswv tau foom rau nws. Peb kuj yuav tau txiav txim siab tsis txhob hnov qab tej koob hmoov uas Vajtswv tau foom rau peb lub neej thiab.
Thaum nyeem phau Ntawv Nkauj, kuv ceev faj txog tej tshooj uas hais txog “txoj kev hnov qab”. Ntawm tshooj 78, 103, 106 thiab 137. Ntawv Nkauj 78:41 ceeb toom tias qhov uas peb hnov qab tej txujci uas Vajtswv tau ua ces kuj txhais tias peb “sim Vajtswv thiab ua rau cov neeg Yixalayees tus Tswv tu siab”. Qhov no ua rau kuv nres thiab ua tib zoo xav! Kuv pom tias qhov uas hnov qab Vajtswv txoj kev hlub yog ib qhov kev txhaum. Vim li cas?
Hnov qab yuav ua rau peb muaj lub siab tsis ntseeg, tsis ntseeg thiaj ua rau muaj kev tawm tsam. Txawm yog cov neeg Yixalayees lawv nyuam qhuav ntsia pom 10 qhov txujci uas Vajtswv ua rau cov neeg Iziv thiab kawm tau ib zaj kawm tias Vajtswv twb cawm lawv dim ntawm txoj kev 400 xyoo ua cev qhev los, tiamsis “lawv tsis nco hais tias nws tau qhia nws txojkev hlub ntau zaus rau lawv, thiab thaum nyob rau ntawm Hiavtxwv Liab lawv tau ntxeev siab rau tus uas muaj Hwjchim Loj kawg nkaus. (Ntawv Nkauj 106:7). Tomqab qhov txujci hla hiav txwv liab, tamsim ntawd lawv rov qab tag kev cia siab vim tsis muaj dej haus. Tej xwm txheej zoo li no pheej tshwm mus tshwm los, cov neeg Yixalayees cia li hnov qab tej txujci uas Vajtswv tau ua pub rau lawv thiab yws mus yws los, xav rov qab mus rau qhov chaw qub thiab yuam kom muaj ib tug thawj coj tshiab.
Hnov qab yuav ua rau peb ua tej yam ruam. Nyob saum roob Xinais, cov pej xeem qaug zog thaum uas yuav tau tos Mauxes, lawv thiaj txiav txim siab muab “ tus mlom uas zoo li tus tsiaj noj zaub los hloov Vajtswv lub tshwjchim uas ci ntsa iab chaw (Ntawv Nkauj 106:20). Lawv hnov qab tej haujlwm uas Vajtswv tau ua pub rau lawv! Hnov qab ua rau peb dhau los ua tsis taus siab ntev thiab tsis tos Vajtswv ua tus coj kev (Ntawv Nkauj 106:13). Cov neeg uas ua tsis taus siab ntev feem ntau lawv pheej ua tej haujlwm uas ruam ruam.
Tsis tas li ntawd, hnov qab tseem ua rau Vajtswv chim. Lawv hnov qab Vajtswv, tus Tswv uas yog lawv tus Cawm Seej, tus tau ua “tej haujlwm loj” “tej haujlwm zoo” pub rau lawv, “Yog li, Vajtswv thiaj hais tias Vajtswv yuav rhuav tshem lawv” (Ntawv Nkauj 106:21-23). Ua Vajtswv tsaug qhov uas Mauxes tau tav thiab cawm cov pej xeem dim ntawm Vajtswv txoj kev chim.
Peb txhua tus puav leej hais tias Vajtswv twb ua tej yam zoo pub rau peb lub neej. Tiamsis, thaum peb ntsib tej kev sim siab, tsis paub peb puas tseem tuav rawv peb txoj kev ntseeg, nco ntsoov tej yam uas Vajtswv tau ua, lossis peb ho txhawj, tsis paub yuav ua cas rau tej yam uas twb tsis tau tshwmsim los?
Kom tsis muaj hnub hnov qab tej koob hmoov uas Vajtswv pub, peb yuav tau muab sau cia thiab nco ntsoov.
Sau cia rau ntawm no kuj zoo li peb sau ntawv tes. Koj tsuas yog npaj ib phau ntawv tes rau ntawm yus txhua zaug nyeem Vajluskub txhua hnub, thiab txhua zaug uas koj pom ib ntu Vajluskub twg txhawb koj, cia li sau cia rau hauv koj phau ntawv tes. Ntu Vajluskub ntawd tej zaug yuav hais txog tej teeb meem uas koj tab tom thov Vajtswv rau, xws li tej haujlwm lossis nyiaj txiag. Sau koj tej lus taij thov rau ntawm ib sab ntu Vajluskub ntawd. Tom qab ntawd, pheej rov qab nthuav koj phau ntawv los saib thiab thov Vajtswv, thiab kuj xav txog ntu Vajluskub ntawd. Thaum tau Vajtswv teb, koj cia li rov cim txog thiab sau lub sijhawm uas koj tau Vajtswv teb rau hauv.
Dhau ntawm uas muab sau cia, cia li sau tseg tej ntu Vajluskub uas Vajtswv siv los qhia koj nyob rau tej lub caijnyoog meej meej twg ntawd. Daviv hais nyob hauv Ntawv Nkauj 119:15-16: “Kuv yuav niaj hnub kawm koj tej kevcai thiab cim ntsoov koj tej Ius. Kuv txaus siab heev rau koj tej kevcai, thiab kuv yuav nco ntsoov koj tej Ius samhwm”.
Yog koj tsis yog tus cim nco zoo, muab ntu Vajluskub ntawd dai rau ntawm tej ntu uas koj pheej pom – tej zaug dai rau ntawm tsom iav, tej chaw ua haujlwm lossis ntawm lub tum txiag (tủ lạnh).
Nyob hauv kuv phau ntawv tes, txhua nplooj ntawv puav leej yog tej lus thov Vajtswv tau Vajtswv mloog thiab Vajtswv teb. Ib sab ntawm txhua lo lus taij thov puav leej muaj lo lus cim nco “Vajtswv twb teb lawm” nrog rau lub sijhawm uas kuv txais tau Vajtswv lo lus teb. Kuv txoj kev ntseeg rau Vajtswv tej lus txhua hnub yim hnub yim muaj zog, vim kuv muaj pov thawj txog Vajtswv txoj kev tshwm ntsej muag thiab Vajtswv tes haujlwm nyob rau hauv kuv lub neej!
Tiamsis muaj ntau zaug kuv kuj hnov qab qhov yuam kev no thaum uas tsis nco qab coj li no. Tej lub sijhawm Vaj Ntsujplig tshoov kuv siab, pab kom kuv pom txog qhov tseeb nyob hauv Vajtswv tej lus uas yav tas los kuv tsis nkag siab, tiamsis kuv ho tsis khoom muab sau cia. Ces txog hnub tom qab, kuv yeej tsis nco ib yam dabtsi txog tej uas Vajtswv tau qhia kuv lub sijhawm ntawd. Zoo li koj twb tau pom, hnov qab yog ib yam uas ruam kawg puas yog! Cia siab tias peb txhua tus yuav zoo li Daviv thov Vajtswv pab kom peb txhob muaj hnub hnov qab tej haujlwm zoo uas peb tau ua.
Thov caw nrog kuv peb thov Vajtswv ua ke:
Ua Vajtswv tsaug rau tag nrho tej koob hmoov nplua mias uas koj tau foom rau kuv lub neej. Thov Vajtswv pab kom kuv pom thiab saib tej yam zoo uas koj pub rau kuv ntawd muaj nqis. Thaum uas kuv lub neej muaj ntau yam haujlwm thiab kev sim siab los, thov Vajtswv pab kom kuv yuav tsis hnov qab Vajtswv txoj kev ncaj ncees. Thov Vajtswv pub rau kom kuv muaj lub siab nco Vajtswv tshav ntuj, cim ntsoov cia thiab nco Vajtswv txiaj ntsig txog Vajtswv txoj kev hlub tau muab pub rau kuv txhua hnub. Kuv thov hauv Tswv Yexus Khetos lub npe. Amees.
Cov kwv tij txhua tus, Vajtswv niaj hnub tshwm ntsej muag thiab yuav foom hmoov nplua mias rau peb txhua tus lub neej, tiamsis muaj ntau zaug peb tsis saib yam ntawd tseem ceeb, thiab yooj yim hnov qab tamsim ntawd. Zoo li Daviv, cia siab tias peb yuav tseg sijhawm txhua hnub los saj thiab nco ntsoov txog tej haujlwm zoo uas Tswv Yexus tau ua, thiab tsis muaj hnub hnov qab tej txujci uas Vajtswv tau pub rau peb lub neej.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.