Tej zaug nyob ntawm coob tug, tos teeb liab tom tej kev yog yam uas tsis zoo siab hlo li. Txawm yog tsuas yog tib pliag xwb los cuag li thaum tos teeb liab ntawd ntev heev! Peb lub neej kuj muaj tej lub sijhawm yuav nres zoo li ntawd: Thaum kev txomnyem pib los raug, peb hnov txhawj, tsis muaj kev kaj siab, thiab xav ua txhua yam kom peb dim ntawm lub caijnyoog muaj kev txomnyem ntawd. Tiamsis, “teeb liab” tej zaug yuav yog lub sijhawm ntsiag to uas Vajtswv coj los rau peb kom peb nres thiab tig los rau ntawm Vajtswv.
Hnub no, yog hnub 08/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm TEEB LIAB.
“Cov kwvtij, thaum nej raug ntau yam kev nyuaj siab, nej cia li suav hais tias yog nej tau koob hmoov zoo kawg. Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv.” (Yakaunpaus 1:2-3).
Ntshe koj twb muaj qee zaug ntsib dhau tej tagkis sawv ntxov uas maj nroos cuag li txhua yam ntxhov quav nyo puav leej tawm tsam koj lawm. Koj maj nroos nrhiav koj nkawm vuam txwv ntev, vim tsuas yog nkawm ntawd xwb thiaj yuav phim rau koj cev ris tsho mus ua haujlwm.
Koj saib sijhawm thiab pom tias tsuas tshuav tsib feeb thiab xwb koj yuav tau tawm hauv tsev mus.
Tsis tshuav sijhawm los nrhiav koj nkawm vuam txwv lawm, koj tshawb hauv tej chaw rau, koj ua lub siab ceev thiab thiab tos kom lub lauj kaub mov siav sai sai es yuav nqa mus ua haujlwm tamsim.
Thaum txhawj, koj lub siab dhia pes poog, tsis paub yus uas yuav mus yog sijhawm rau tom chaw ua haujlwm.
Thaum kawg, koj kuj nrhiav tau koj nkawm vuam txwv tso yuam kev thiab koj pluas tshais kuj nyuam qhuav siav nto. Koj txaus siab nce tsheb, ntseeg tias hnub no yuav yog ib hnub zoo. Koj tseem zoo siab hlo co co tes rau cov neeg cheb kev.
Tiamsis koj lub siab luag ntawd txawm cia li ploj kiag, thaum koj tsav tsheb ceev thiab cia li nres vim muaj teeb liab!
Tiamsis ntawm no tsis yog cov teeb liab zoo li txhua lub. Nws pheej tuav koj cia rau ntawd cuag li yog ib lub sijhawm uas ntev heev. Dabtsi tab tom tshwmsim? Koj twb taug txoj kev no tsheej txhiab zaug lawm, tiamsis cuag li tsis muaj ib zaum twg koj ntsib lub teeb liab twg li!
Koj qhib kev thov Vajtswv txhua hnub los mloog thiab cia siab tias Vajtswv txojlus yuav nplig tau koj lub siab maj ntawd. Ntau zaug koj tseem siv zog xav kom tau ntau txoj kev kom hnov qab tej kev txhawj mus. Tiamsis txawm yog koj yuav ua li cas los, lub teeb liab ntawd nws yeej pheej ua tab kaum koj.
Lub neej no nws yeej muaj ntau txoj kev ua rau peb yuav tau nres. Vajtswv kuj muaj kev ua rau kom peb yuav tau maj mam thaum peb tab tom ceev heev; tshwj xeeb yog thaum peb xav tias txhua yam tab tom mus tau zoo.
Tsis ntev los no, kuv kuj ntsib ib qhov teeb meem zoo tib yam nkaus li ntawd. Lub teeb liab ntawm kuv qhov muag cuag li pheej tsis dhia, ua rau kuv xav tsis thoob. Yog li kuv thiaj tshawb qhov txhua chaw kom txhawm rau kuv lub sijhawm tos ntawd.
Tiamsis, tag nrho tej txoj hau kev ib pliag ntawd yeej tsis txaus los pab kom kuv kov yeej lub sijhawm uas tos ntev li ntawd. Zoo li ib tug menyuam mus rau ub rau no tag kev cia siab, kuv thiaj qw tus Tswv, “Vim li cas”.
Vajtswv kuv xav tias koj twb npaj txhua yam cia kom kuv mus txog rau tom chaw ua haujwm ncav sijhawm.
Koj twb pab kom kuv nrhiav tau kuv nkawm vuam txwv yog sij. Tiamsis thaum no, kuv mus lig vim tib lub teeb liab, vim li cas, tus Tswv?”
Zaj xwm txheej no mloog cuag li tsis leej, tiamsis txoj kev xav tshwmsim thaum tos teeb liab yog lub cim ntawm qhov teeb meem loj dua, thiab tshwmsim nyob rau ntawm tej lub caijnyoog muaj kev tu siab ntau dua.
“Tus Tswv, kuv xav tias koj xav kom kuv mus ua haujlwm thiaj pab tau kuv tsev neeg, tiamsis txij li thaum ua tsheb sib tsoo los, kuv ko taw tuag tas thiab kuv pab tsis tau kuv tus kheej lawm.”
“Tus Tswv, kuv xav tias tshe tu neeg ntawm no yog koj xaiv rau kuv, tiamsis lawv hais tias lawv tsis hlub kuv ntxiv lawm.”
“Tus Tswv, vim li cas, vim li cas, vim li cas?”
Vajtswv txojlus nyob hauv Yauj 30:26 sau tseg tias:
“Kuv xav tau lub neej zoo thiab kaj siab lug; tiamsis kuv ua neej nyuaj siab thiab tsaus ntuj nti xwb”
Thaum ntsib kiag tej teeb meem tshwmsim los nyob rau hauv lub neej, peb pheej mus nrhiav lo lus teb nyob rau ntawm tej neeg ib ncig. Zoo luag thiab, lawv tsuas hais tias txhua yam yuav paub meej rau ib hnub twg ntawd, yam li uas tos ib lub neej tom ntej tsis pom tseeb txhawb peb lub siab tab tom yij fab yij fwj!
Kuv tsis ntseeg li ntawd. Tej zaug tom qab txhua yam yuav paub meej, los txawm yog qhov haujlwm ntawd puas yuav paub meej npaum twg los txoj kev mob siab hauv peb lub siab kuj tsis muaj dab tsi yuav nplig tau.
Peb cheem tsum ntau tshaj qhov ntawd. Peb yuav tau tso siab lug tamsim. Nyob rau lub sijhawm muaj kev txhawj xeeb, peb tau hu kom tig peb tus ntsujplig los mus rau ntawm Vajtswv. Thaum peb raug yuam kom yuav tau nres tos teeb liab hauv peb lub neej, peb yuav tau cia siab tias Vajtswv yuav teb peb tej lus taij thov. Peb yuav tau khiav deb tej lub suab nrov nroo ntws sab nraud los mloog Vajtswv lub suab mos muag. Peb tab tom ua Vajtswv haujlwm tus uas tab tom muaj ntsej muag thiab nrog peb sib tham txawm yog peb tab tom ntsib kev txomnyem. Yauj xaiv txoj kev ua siab ntev tos Vajtswv lub suab.
Ntawv Nkauj 40:1 ntuas kom peb: “Kuv ua siab ntev tos tus Tswv los pab kuv, nws mloog kuv tej lus thov thiab hnov kuv lub suab quaj.”
Thaum teeb liab tshwm hauv koj lub neej, suav tias ntawd yog ib lo lus ceeb toom kom koj tu koj txoj kev ntseeg. Txhob cia lub sijhawm tos ntawd dhau los tsis muaj nqis, pauv rau qhov ntawd, yuav tau saib txhua lub sijhawm ntawd muaj nqis vim nws yuav dhau mus sai thiab tsis rov qab los lawm.
Vajtswv tus tsim ib puas tsav yam los tab tom hu koj, Vajtswv xav kom koj ceev faj thiab ua tib zoo mloog txog lub ntsiab lus tseem ceeb los ntawm Vajtswv los ua ntej uas peb lub neej tsis muaj hnub so no ho rub tau peb mus.
Vajtswv tsis muaj hnub hnov qab koj. Txoj kev kho zoo uas koj tos ntsoov tab tom taug kev tuaj. Tiamsis ua ntej, koj yuav tau nres thiab ceevfaj, yog tsis li ntawd koj yuav ua poob yam uas zoo tshaj plaws lawm.
Yauj 14:14 sau tias: “Yeej tsis muaj ib yam huv yuav tawm ntawm qhov uas tsis huv li neeg los”.
Thiab tseg rau tus uas tab tom ua xyem xyav, kuv kuj mus txog rau ntawm chaw ua haujlwm ncav sijhawm hnub ntawd, thaum ntsib dhau tej kev sim siab cuag li tsis muaj hnub xaus ntawd, thiab kuv tau hloov pauv, hloov pauv lawm tiag.
Tej lub sijhawm uas cuag li yog teeb meem ntawm tus ncej teeb liab ntawd tau pauv los ua ib zaj kawm muaj nqis, pab kom kuv mus dhau txhua kaujruam, txhua txoj kev ncau hauv lub neej nrog kev ntseeg, thiab kev kaj siab tiag. Thiab thaum no, txhua zaug muaj teeb liab tshwm tuaj, kuv tsis yog tsuas tos xwb tiamsis tseem luag taus. Zoo kawg li ntawm no yog qhov tseeb.
“Cov kwvtij, thaum nej raug ntau yam kev nyuaj siab, nej cia li suav hais tias yog nej tau koob hmoov zoo kawg. Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv.” (Yakaunpaus 1:2-3).
Thov caw nrog kuv peb thov Vajtswv ua ke:
Tus Tswv thaum kuv ntsib tej ntu tsis zoo, thov Vajtswv pab kom kuv nco ntsoov txog Vajtswv txoj kev tshwm ntsej muag thiab Vajtswv txoj kev hlub. Thov Vajtswv pab kom kuv pom tias txhua txoj kev sim siab puav leej yog sijhawm kom kuv loj hlob nyob hauv txoj kev ntseeg. Thov kom kuv tig mus rau ntawm Vajtswv thaum uas lub neej tau txais yam zoo thiab muaj kev txomnyem tib si, kom kuv saj tau Vajtswv txoj kev hlub ncaj ncees rau kuv. Kuv thov hauv Tswv Yexus Khetos lub npe. Amees.
Cov kwv tij, thaum no txhua zaug uas ntsib “teeb liab” cia siab tias peb yuav tsis maj nroos tiamsis tso siab lug. Txhua lub teeb liab thaum no yuav tsis yog txoj kev tav kev, tiamsis yog lub cim tseg rau peb nres, tig lub siab mus rau ntawm Vajtswv thiab ntseeg siab rau Vajtswv. Ua siab ntev pom tias txhua feeb uas peb tos puav leej yog nyob hauv Vajtswv lub homphiaj loj uas Vajtswv tseg rau peb, thiab cia siab tias Vajtswv yuav nrog nraim peb nyob txhua feeb.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.