Peb txhua tus puav leej tab tom ua qhua taug txoj kev mus kom txog rau qhov chaw kawg uas yuav mus – yog ntuj ceebtsheej. Tiamsis nyob hauv lub neej uas muaj txhua yam puv npo thiab tab kaum li no, peb pheej hnov qab yam ntawd, cia peb raug cab mus rau tej yam uas yog ntiajteb li, thiab khiav caum tej yam uas puas tsuaj. Nyob hauv txoj kev taug hauv lub neej, peb yuav tau ceev faj kom yus npaj txhij rau hnub Tswv Yexus vim hnub ntawd tshuav tsis deb lawm.
Hnub no, yog hnub 10/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm PEB TWB MUS YUAV TXOG LAWM.
“Tiamsis hnub ntawd thiab lub sijhawm ntawd tsis muaj leejtwg paub. Txawm yog cov timtswv ceebtsheej lossis Neeg Leej Tub los twb tsis paub; tsuas yog Leej Txiv tib leeg thiaj paub xwb. Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd” (Malakaus 13:32-33).
Kuv loj hlob hauv ib tsev neeg nyiam txav chaw mus rau ub rau no. Koj yuav pom kiag ib tsev neeg zoo li ntawd. Niam txiv muab peb coj mus tso rau hauv tsheb, npaj ncuav tseg rau pluas su, thiab ua tej kev ua si saum tsheb. Peb lub sijhawm so lub caij ntuj sov thaum twg twb yog taug txoj kev deb, mus thoob plaws teb chaws, txawm yog hnub ntawd ntev los, kuv yeej muaj tej yam zoo khaws cia tom qab taug txoj kev deb thiab zaum tsheb tsheej sij nrog tsev neeg ua ke.
Tus twg uas tau nrog tej menyuam mus ncig ua si ua ke ces puav leej swm lo lus nug tias: “Peb puas tau mus txog chaw lawm tau?” Peb kuj pheej nug lo lus no nyob rau hauv txhua zaug peb taug kev, feem ntau ib sij rov qab nug ib zaug. Niam thiab txiv yuav teb tias: “Tsis tau txog os. Peb twb yuav txog lawm os.”
Thaum xav txog lub sijhawm “ntiajteb yuav kawg” lossis Tswv Yexus txoj kev rov qab los zaum ob, kuv kuj cim civ nug ib lo lus nug zoo li thaum tseem yog menyuam mos: “Peb puas tau mus txog lawm tau?” Saib ib ncig lub ntiajteb niaj hnub nim no, yeej tsis muaj dabtsi txawv thaum uas muaj ib txhia neeg hais tias ntawm no yog lub cim rau hnub uas lub ntiajteb yuav kawg. peb tab tom ua neej nyob rau lub ntiajteb muaj kev puas tshuaj, tag kev cia siab, kev tsov rog puv npo, tshaib nqhis dej nyab kub nyhiab txhua qhov. Peb cheem tsum ib tug cawm seej, thiab ntau zaug, cuag li hnub uas Tswv Yexus rov qab los ze heev lawm. Vajluskub hais meej meej tias peb tsis paub meej lub sijhawm, tiamsis peb muaj cuab kav npaj kom txhij.
Thaum nyeem Vajtswv txojlus nyob hauv Malakaus 13:32-33:
“Tiamsis hnub ntawd thiab lub sijhawm ntawd tsis muaj leejtwg paub. Txawm yog cov timtswv ceebtsheej lossis Neeg Leej Tub los twb tsis paub; tsuas yog Leej Txiv tib leeg thiaj paub xwb. Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd”
Vajluskub hais meej tias peb yeej tsis paub Tswv Yexus yuav los rau hnub twg. Tiamsis peb yuav tau npaj kom txhij thaum tos Nws. peb lub neej txhua hnub yooj yim ua rau peb tsau tsawv rau hauv lub ntiajteb ua rau peb hnov qab txoj kev los mus txais txojsia ntev dhawv ib txhis. Peb yuav tau nco ntsoov ntuas peb tus kheej kom yuav tau ceev faj npaj txhij tos hnub Tswv Yexus rov qab los zoo li Vajtswv tej lus tau ntuas peb nyob hauv Malakaus.
Yog li, peb yuav tau ua li cas kom peb thiaj ceev faj, npaj txhij rau hnub Tswv Yexus rov qab los? peb muaj cuab kav nrog pawg me hauv pawg ntseeg pe hawm ua ke, sib pab ua tej haujlwm zoo pub rau lwm tus, qhia yus txoj kev ntseeg rau tej txheeb ze thiab cov phooj ywg uas tsis tau paub Vajtswv. Peb kuj tseg sijhawm txhua hnub los thov Vajtswv, nyeem Vajluskub, thiab muaj txoj kev sib txuas ua ke nrog Tswv Yexus, tus uas yog peb tus Cawm Seej. Tsis muaj ib zaum twg yuav lig rau peb tig rov qab los cuag Vajtswv. Ntawd yog txoj kev cia siab zoo tshaj plaws rau peb txhua tus! Zoo li II Kauleethaus 6:2 sau tseg: “Lub sijhawm no yog lub sijhawm uas Vajtswv porn zoo pab nej. Hnub no yog hnub ua nej yuav dim tau nej lub txim.”
Tswv Yexus tab tom xyab nws txhais tes dav tos peb. nws txais tos peb thiab hu peb los ua vajntxwv cov Menyuam (II Kauleethaus 6:18). Yog tias hnub no peb pom tias peb tab tom “pw tsaug zog” tsis hnov Tswv Yexus tej lus ceeb toom, ces peb puas yuav txiav txim siab sawv los zov? Tsis paub peb puas caw Tswv Yexus los ua tus Tswv hauv peb lub neej hloov pauv peb lub siab, thiab thov Vajtswv siv peb kom peb ua tim khawv rau tej neeg ib ncig?
Nco ntsoov tias ntuj ceebtsheej yog tus ciam kawg rau peb txoj kev taug hauv ntiajteb no. kom thaum peb tab tom taug kev mus, peb thiaj yuav npaj txhij, rau hnub Tswv Yexus rov qab los.
Thov caw nrog kuv peb thov Vajtswv ua ke:
Tus Tswv hauv txoj kev ua neej muaj ntau yam teeb meem tshwmsim tuaj no, thov Vajtswv pab kom kuv nco ntsoov txog tus ciam kawg uas kuv yuav mus kom txog, kom kuv tsis muaj hnub yuam kev lossis pw tsaug zog. Thov Vajtswv pab kom kuv ceev faj thiab ua lub neej nyob hauv qhov kaj saum ntuj ceebtsheej, npaj kuv lub siab tos ntsoov hnub Tswv Yexus rov qab los. Kuv thov hauv Tswv Yexus Khetos lub npe. Amees.
Cov kwv tij txhua tus, tsis paub peb puas tab tom caum tej yam uas yog ntiajteb no thiab hnov qab peb tus ciam kawg lawm tiag? Thaum uas peb txhua tus taug txoj kev hauv ntiajteb no nco ntsoov peb tus ciam kawg nyob qhov twg, txhua hnub txhua sij puav leej yog lub sijhawm peb nthuav tawm txoj kev cawmdim mus rau txhua tus. Ceev faj thiab ua lub neej tig mus rau ntuj ceebtsheej – thiaj yog peb tus ciam kawg.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply