Ngai Noel sùm cèng bơta lơngai lơngọ mơ bơta hon chò, mơ oh mi găm kơlôi lah ngai Noel gơ kung găm bơta rngòt sơl ơ? Gơwet mơ oă cau tom ngai Noel sơn rợp, hớ ò di lah tú nàng hon chò mơya lah tú gơs oă bơta klôi rcăng, ală bơta he ò git, ală bơta he kơlôi lah ò rgơi gơs. Kung be JôSép mơ ală cau ê gar be lạt, tom tú jơ hớ, be bol he kung joi bàn bơta dòn mơ nus khin cha nàng pha lin mơ bơta rngòt digul rài kis li bơta kơlôi rcăng sir.
Ngai do, ngai 13/12/2024, Bơta Hòi Dan Kơp Ngai dan jà ală ồng mò oh mi bơtê bal jơnau Yàng kơnòm dê bơta dong kơl ồng Wally Odum bơh tơnggume: NOEL MƠ BƠTA RNGÒT BOL HE DÊ
“Bañ rngòt, do, añ yal bol mê in dô nơm jơnau niam hòn chò dờng, gơ rơp dờng màng ală làng bol in; ( Luka 2:10)
Cau cih sră ală cau dòn Yang C.S. Lewis yal wơl pơnyô gơwet mơ ồng neh kơnô iat bơh dô năn cau ur ne tom ngai Noel. Khai neh gó rup Yang Kon Jesu mơ cau neh pơka tom tiah hiu jum goh tom ngai Noel, mọ neh woam lah “ Ơ Yang, ngan lah bol khai neh ai bơta dòn bawl mơ ală bơta! Tom ngai gen tus di ngai Noel bol khai kung ò lời!”
Dô nơm pơnyô gơ gơs bơta tom plơdră, Tài bơh ngai Noel lah ngai kah kissơnre ngai Yang Jêsu neh lik ling!
Tơm jơh ală bơta ăn neh kờn tom ngai Noel, bơta ăn kờn rlau jơh hớ lah ntas kơni ngai Noel. Tơm tú mút tơm trung tam mua sắm, gơlơh chơ hợp mơ niam ngan tú ntas kơni chò “ Hon Chò Yang Lik Ling”. Khà chờ goh ăn kờn rlau jơh lah “ Ô! Bọn Dit BetLeHem “ , mơ sèng ăn kah sùm lah “ bơta kơp kờn, bơh tơm rài yau, neh gơlik gơs măng do”. Tú Kơlôi wơl ngai Noel kung lah tú he găm ơm tom bơta rngòt he dê.
Noel sơn rơp lah tú Yang Tom Trồ yăl tơlik Kon Yang dê mơ dunnia. Tơm bơta hớ, gơs ală cau ala mat bơta kơp gơn mơ kung gơs cau ala mat bơta rngòt, gơ tom klac băl. Tơm bòn dệt BetLeHem, ală bơta kơp gơn mơ bơta rngòt ală rài dê tom tịp băl tom rup să Kòn Goh lik ling tom wang belat.
Bơh lài or, ăn ò kơlôi lah ngai Noel gơ đệt băl mơ bơta rngòt, mơya ngan lah, tú sơn rơp tịp Yang, cau lơi kung gơs nus rngòt mơ kơlôi sơnơng – rngòt bơh bơta gơlơh ngai ngăn, he ò rgơi git. Jôsep, cau neh hơ bau Mari, neh ơm tơm bơta do. Dô nă cau gơnrơh Yàng dê tơnggŏ mơ khai tòm mpau , cèng dô bơta yăl tơnggit kwơ màng. Sră Mathio neh cih wơl bơta tip mat do:
“Jôsep bau klau khai dê, la cau song ring, ò bài lơh Mari in ƀàssìl, gen kòñ lòi òm. Mơya tòm tŭ Jôsep kơlôi sơnơng bơh bơta hơ̆, gen dô nă cau gơnrơh Yàng dê tơnggŏ mơ khai tòm mpau mơ đơs lah: “Ơ Jôsep, kòn sau Dabit, bañ rngòt dòp tĕ Mari la bau mê, bơh kòn mơ khai neh bun hơ̆ la bơh Yàng Hwềng Goh. (Mathiơ 1:19-20)
Jơnau cau gơnrơh dê đơs “ bañ rngòt dòp tĕ Mari la bau mê” dô bơta kwơ màng ngan. Tơm toh ngan lah Jôsep rngòt bơh ală bơta neh tus, ală bơta do ngan lah be hớ. Tài bơh bơta do ò rgơi geh : Cau neh hơ bau mơ he gơs bun mơ tơm toh ngan lah khai ò ơm rệp mơ dô nă cau klau lơi. Tơm tú cau gơnrơh đơs “ bañ rngòt” , jơnau hớ gơlơh tom toh ngăn nus nhờm ông dê. Jôsep neh rngòt bơh ală bơta ồng ò git wă. Tơm tú Yang lơh broă pha rlau mơ bơta git wă he dê, nus klôi rcăng, rngòt lah bơta păl gơs.
Cau gơnrơh neh đơs mơ Jôsep: “ bañ rngòt”. bañ rngòt bơh tiang pơnrơ he dê, kung bañ rngòt bơh ală bơta he ò git wa, tài bơh Yang neh lơh broă, Bol he geh dô pleh bơh bơta rngòt.
Bơta hớ lah dô bơta rngòt tơm jơh ală bơta rngòt tom măng Noel tom BetLeHem. Bol he găm gó bơta rngòt gơ tơm tus nisơna tơm tú kon mơnus tip mat mơ Yang Tơm Trô.
“ Mơ tai, tòm kơnhwàl hơ̆ gơs ală cau ê belàt ơm tòm ƀlàng, drơng mang kơp gàr mpồl belàt. Nisơna gơs cau gơnrơh Yàng dê tơlik mat mơ bol khai, mơ bơta gơklŏ Yàng dê gơcrà gùt dar, bol khai rngòt rngơt ngan.” ( Luka 2:8-9_)
Jơnau yăl tơnggit tom ngai Noel kung drờm băl be hớ, gơwet mơ Jôsep, ală cau ê belàt, hala bol he ngai do kung be hớ sơl, bañ rngòt! Noel lah tú Yang mut tom rài kis bol he dê nàng cèng bơta hon chò, ò di lah bơta rngòt. Kon Goh BetLeHem găm lơh sir jơnau yal tơnggit cau gơnrơh dê:
“ Hơ̆ la ngai do tòm ƀòn dờng Dabit dê neh deh bol mê in dô Bơtau Dong klàs, la Krist, la Yàng.” ( Luka 2:11)
Ală bơta rngòt bol he dê neh geh tă tơlik jơh tơm măng hớ, gen bol he rgơi chò nus mơ driau dơng : “ Ưn ngai Yang!”
Dan jà bol he dô nùs bal tòm bơta hòi dan:
Khoai Yang, kon ưn ngai Yang bơh bơta kờn gơboh dơng mơ bơta lơngai Yang neh ai kon in tơm ngai Noel. Dăn dong kơl kon gơs nus khin cha nàng pha rlau mơ bơta rngòt, kơlôi rcăng nàng kon pợ nus dợp geh bơta hon chò bơh Yang. Dăn nus kon dê bìng lìu bơta lơngai mơ bơta dòn, nàng kon cèng bơta kờn gơboh mơ bơta kơpgơn tus ală cau gut dar kon, be bơta àng tơm ngai Noel pơnđăng sol tom trồ măng. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, Ngai Noel do, dan bơtô tơngkah bol he lah: bulah ơm tơm bơta rngòt hala kơlôi rcăng, Yang găm gơs nàng ai bơta lơngai mơ bơta chơ hợp. Be jơnau cau gơnrơh lai or, jơnau yal tơnggit găm lời wơl “ bañ rngòt!” Digul bơta kơlôi rcăng, bol he kung dợp geh bota lơngai mơ Yang neh hơ ai, tồ ngai Noel sum geh bơta kờn gơboh mơ lơngai jơh tơl nă bol he.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply