Koob tsheej Tswv Yexus yug yeej ib txwm coj txoj kev zoo siab thiab sov siab los rau peb, tiamsis koj puas tau muaj zaum twg xav tias koob tsheej Tswv Yexus yug nws kuj muaj tej txoj kev ntshai nrog thiab? Muaj coob tug nyob hauv zaj xwm txheej rau thawj hmo koob tsheej Tswv Yexus yug, tsis yog tsuas zoo siab tiamsis tseem yog lub sijhawm lawv ntsib txoj kev txhawj, tej yam uas lawv tsis paub, tej haujlwm cuag li ua tsis tau. Zoo ib yam li Yauxej thiab cov neeg Yug yaj, tej zaug nyob rau lub sijhawm ntawd, peb kuj yuav nrhiav pom txoj kev ntseeg thiab muaj lub siab tawv tiv dhau txoj kev ntshai txhawj xeeb nyob rau hauv lub neej no.
Hnub no, yog hnub 13/12/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Wally Odum dhau ntawm Zaj kawm KOOB TSHEEJ TSWV YEXUS YUG THIAB PEB TXOJ KEV NTSHAI
“Tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub” (Lukas 2:10).
Tus xibhawb sau ntawv C.S.Lewis tham txog ib zaj xwm txheej yawg hnov luag tham txog muaj ib tug pojniam nyob rau hauv ib lub koob tsheej Tswv Yexus yug. Nws ntsia pom luag muab tsab zam txog tus metub Yexus rau ntawm lub tuam tsev lub tshav puam, pog yws hais tias: “Oh,tam tseeb nim no mas tib neeg coj kev ntseeg mus rau hauv txhua yam! koob tsheej los tsis tseg li thiab!”
Zaj xwm no hnov los zoo luag thiab kuj yuam kev thiab, vim koob tsheej Tswv Yexus yug yeej ib txwm yog lub caij nco txog hnub uas Tswv Yexus los yug!
Yam uas kuv nyiam tshaj plaws rau hnub Tswv Yexus yug, tej zaug suab nkauj yog yam uas tshwj xeeb tshaj plaws. Hnov zoo heev thaum nkag mus rau hauv tej tsev muag khoom, hnov tej suab nkauj nrov “Txhawb nqa Tswv Yexus los yug” zaj nkauj uas kuv nyiam tshaj yog “Oh! Npelehees yog lub zos me” thiab nqe uas kuv nco mus li yog: “Ntau txoj kev cia siab, txaus ntshai txhua qhov thaum no ntsib kiag hauv nruab hmo”. Rov qab xav txog, koob tsheej Tswv Yexus yug tej zaug kuj yog lub sijhawm uas peb yuav ntsib peb tej kev ntshai.
Koob tsheej thawj thawj yog lub sijhawm uas Vajtswv nthuav tawm Vajtswv tus tub rau lub ntiajteb. Nyob rau zaj xwm txheej ntawd, cov neeg uas sawv cev rau txoj kev cia siab thiab kev ntshai hauv ntiajteb puav leej los sib sau ua ke. Nyob hauv lub nroog Npelehees me ntawd, ntau txoj kev cia siab thiab kev txhawj ntawm ntau tiam puav leej sib ntsib ntawm tus metub pw hauv lub dabzaub.
Yav dhau los, kuv yeej tsis tau xav tias koob tsheej Tswv Yexus yug ho txuas ua ke nrog txoj kev ntshai zoo li ntawd, tiamsis tseeb tiag thawj zaug kuv ntsib tus Tswv, tus twg los yeej muaj kev ntshai thiab txhawj – ib txoj kev ntshai tej yam uas tshiab tshiab tsis tau paub dua. Yauxej yog Malis tus txiv, kuj ntsib ib yam li ntawd. Ib tug timtswv thiaj los cuag yawg hauv kev npau suav, coj txoj xov tseem ceeb los qhia rau yawg. Phau Mathais sau cia zaum sib ntsib ntawd li no:
“Yauxej tus uas qhaib Malis yog ib tug neeg ncaj ncees, nws tsis xav cia Malis poob ntsejmuag, nws txawrn xav hais tias, nws yuav tso Malis twjywrn tseg. Thaum Yauxej tseem xav txog zaj ntawd, Yauxej txawm ua npau suav porn tus Tswv ib tug timtswv los hais rau nws hais tias, “Yauxej uas yog Daviv tus xeebntxwv, koj tsis txhob nyuaj siab. Koj cia li mus yuav Malis los ua koj pojniam. Rau qhov twb yog Vaj Ntsujplig tus Dawbhuv ua rau Malis xeeb tub (Mathais 1:19-20).
Cov timtswv tej lus hais “Txhob txaj muag cia li yuav Malis los ua koj pojniam” nws tseem ceeb heev. Tseeb tiag Yauxej txhawj txog txhua yam uas tab tom tshwm sim los, qhov no kuj yooj yim nkag siab xwb. Ntawm no yog yam uas ib txwm tsis tau muaj li: Yus tus txijnkawm xeeb tub tiamsis yeej hais tias tsis tau nrog txiv neej pw li. Thaum uas tim tswv hais tias “txhob ntshai” cov lus no chwv txog yawg qhov mob. Kuj ib yam li peb, Yauxej kuj txhawj txog tej yam uas nws tsis nkag siab. Thaum tus Tswv ua haujlwm siab tshaj peb txoj kev nkag siab, peb hnov ntxhov siab, tsis muaj kev kaj siab ces yog yam uas ib txwm pom.
Timtswv hais rau Yauxej: “Txhob ntshai”. Txhob txhawj rau yus lub koob npe, kuj tsis txhob ntshai tej yam uas yus tsis tau nkag siab, vim Vajtswv tab tom ua haujlwm hauv txhua yam! Thaum uas paub tias Vajtswv tab tom ua haujlwm, peb tau tso dim ntawm txoj kev ntshai.
Ntawm no tsis yog ib qhov kev ntshai nyob rau hmo koob tsheej Tswv Yexus yug hauv Npelehees hmo ntawd xwb. Peb tseem pom txoj kev ntshai tshwm sim los thaum uas tib neeg ntsib Vajtswv.
“Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj, tus Tswv ib tug timtswv los cuag lawv, thiab tus Tswv lub tshwjchim ci ntsa iab tuaj rau lawv, lawv poob siab thiab ntshai kawg li” (Lukas 2:8-9).
Koob tsheej Tswv Yexus yug yeej ib txwm zoo li no, txawm yog Yauxej, cov yug yaj lossis peb niaj hnub nim no: Txhob ntshai! Koob tsheej Tswv Yexus yug yog lub sijhawm Vajtswv nkag los rau hauv peb lub neej coj txoj kev zoo siab los rau peb, tsis yog kev txhawj ntshai. Tus metub hauv Npelehees yeej tseem tab tom ua tiav raws li tej lus uas cov timtswv tau tshaj tawm:
“Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv!” (Lukas 2:11).
Peb txhua txoj kev ntshai tau pab rau hmo ntawd, thiab peb muaj cuab kav zoo siab tias: “Ua Vajtswv tsaug!”
Thov caw nrog kuv peb thov Vajtswv ua ke:
Tus Tswv, Kuv ua Koj tsaug vim Koj txoj kev hlub loj thiab txoj kev kaj siab uas koj tau muab pub rau kuv dhau ntawm koob tsheej Tswv Yexus yug. Thov pab kom kuv muaj lub siab tawv tiv dhau tej kev txhawj, kev ntshai qhib siab los txais yuav txoj kev zoo siab los ntawm koj los. thov kom lub siab puv npo kev kaj siab thiab muaj kev ntseeg, kom kuv yuav coj tau txoj kev hlub thiab kev cia siab rau tej neeg ib ncig, zoo li qhov kaj ntawm koob tsheej Tswv Yexus yug tau ci mus rau hauv qhov tsaus ntuj. Kuv thov hauv Tswv Yexus Khetos lub npe. Amees.
Cov kwv tij txhua tus, koob tsheej xyoo no, thov kom peb txhua tus nco ntsoov tias: txawm yog nyob rau lub sijhawm txhawj xeeb lossis tsis tso siab los, Vajtswv yeej nyob ntawd coj txoj kev kaj siab thiab kev zoo siab los pub rau peb. ib yam li cov timtswv thaum ub, lub ntsiab lus ntawd yeej tseem muaj nyob: “Txhob ntshai” thov kom nyob rau lub caij tsis khoom los peb kuj yuav txais tau txoj kev kaj siab uas Vajtswv tau cog lus yuav muab pub, kom koob tsheej Tswv Yexus yug yog lub koob tsheej muaj kev thiab kev kaj siab tseg rau txhua tus.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tag kis!
Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email:[email protected]. Tswv Yexus hlub koj. Thiab peb xav kom txuas tau nrog koj.
Leave a Reply