Lub ntiajteb uas peb tab tom nyob no cheem tsum kev hlub. Ib txoj kev hlub siab tshaj sab nraud, siab tshaj tej khoom ntiajteb kom thiaj yuav chwv txog yam uas nyob tob tshaj plaws hauv tib neeg txhua tus lub siab. Leej twg los twb cheem tsum kev hlub. Tiamsis yuav hlub li cas thiaj yog? Peb tig rov qab mus rau hauv Vajtswv – yog lub hauv paus kev hlub tiag.
Hnub no, yog hnub 14/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm HLUB LI VAJTSWV HLUB.
“Peb muaj kev hlub rau qhov Vajtswv twb xub hlub peb lawm.” (I Yauhas 4:19)
Hlub lwm tus raws li txoj kev uas Vajtswv nyiam yog ib yam uas tsis yooj yim li. Rau qhov tseeb tiag hauv lub neej, tej zaug koj twb ntsib ib tug neeg twg ntawd ua rau koj nyuaj hlub tau nws. Lossis koj kuj yog ib tug neeg tsis yooj yim hlub zoo li ntawd. Tseeb tiag kuv kuj yog ib tug neeg zoo li ntawd yav dhau los.
Yav dhau los kuv yog ib tug neeg pheej xav txog tej yam tsis zoo thiab tsom tsoov rau tus kheej. Twb yog qhov uas kuv tsis pom thiab tsis nco txiaj ntsig txog tej yam zoo nyob rau hauv lub neej ua rau ntau tug khiav deb kuv thaum kuv cheem tsum lawv tshaj plaws. Nyob nrog ib tug neeg thaum twg twb xav txog tej yam tsis txhawb zog mas qaug zog heev, tshwj xeeb yog thaum uas lawv tsis xav mloog ib lo lus zoo twg lossis ib lo lus txhawb zog twg. Qhov tseeb tiag cov neeg uas tsis tshua kam nyob ze lwm tus ho yog cov neeg uas cheem tsum kom tau hlub thiab nthuav tawm Vajtswv txoj kev hlub ntau tshaj plaws rau lawv.
Vajluskub qhia tias peb yuav tau sib hlub rau qhov Vajtswv xub hlub peb ua ntej lawm. Peb tsis yog txhob txwm hlub tiamsis yog hlub tiag. Thaum peb muaj kev zoo siab thiab ib leeg hwm taus ib leeg, peb yuav xaiv hlub zoo li Vajtswv tau hlub. (I Yauhas 4:19; Loos 5:8, thiab Loos 12:9-10).
Vajtswv yog tus muaj kev hlub. Kev hlub tseeb yog txoj kev uas lwm tus yuav paub tias peb yog Vajtswv cov thwjtim tiag. Peb yuav tau hlub lwm tus vim Vajtswv twb hlub peb lawm – thiab thaum peb sib hlub zoo li Vajtswv txoj kev ces peb yuav coj tau lwm tus los cuag Vajtswv (1 Yauhas 4:7-12).
Vaj Ntsujplig tej koob hmoov thiab lub peev xwm Vajtswv muab cob rau koj puav leej tau npaj tseg los ua haujlwm ua ke nrog Vajtswv txoj kev hlub. Tej ntawd tsis yog tseg los pab tus kheej tiamsis yog tseg los pab rau Yexus Khetos lub cev vim Vajtswv lub koob meej. Thaum peb siv zog siv tej koob hmoov thiab yus peev xwm uas tsis muaj txoj kev hlub, ces peb yuav tsis tawg paj txi txiv.
“Txawm yog kuv hais tau txhua haivneeg tej lus thiab hais tau cov timtswv ceebtsheej tej Ius los yog kuv tsis muaj kev hlub, ces tej Ius uas kuv hais tau ntawd zoo li tej suab tswb tooj tswb hlau uas nrov nrov xwb. Txawm yog kuv yuav muaj lub tswvyim txawj qhuab qhia; muaj txhua yam kev txawj ntse, thiab totaub txhua yam uas tsis muaj neeg paub; thiab txawm yog kuv muaj kev ntseeg hais tau kom tej roob txav tau mus rau lwm qhov, tiamsis yog kuv tsis muaj kev hlub, ces kuv yeej tsis muaj nqis dabtsi hlo li. Txawm yog kuv yuav muab txhua yam uas kuv muaj pub rau lwm tus, thiab muab kuv lub cev rau luag hlawv l los yog kuv tsis muaj kev hlub, ces yeej tsis muaj nqis dabtsi hlo li.” (1 Kauleethaus 13:1-3).
Peb ib tes haujlwm uas yog Tswv Yexus ib tug thwjtim yog cia Vaj Ntsujplig ua rau kom peb dhau los zoo li Yexus Khetos. Hlub lwm tus zoo li Vajtswv tau hlub yog ib feem tseem ceeb hauv tes haujlwm ntawd.
“Tus uas muaj kev hlub, nws ua taus siab ntev, nws muaj lub siab dawb siab zoo; nws tsis khib, tsis khavtheeb thiab tsis muab hlob; tus uas muaj kev hlub, nws tsis ua nruj ua tsiv, tsis qia dub, tsis chim sai; tsis cim ntsoov luag tej kev txhaum rau nruab siab; tus uas muaj kuv hlub, nws tsis nyiam kev phem kev qias, tiamsis nws nyiam kev ncaj kev ncees. Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li.” (I Kauleethaus 13:4-7).
Vajluskub nthuav tawm txog txoj kev hlub ntawm no ua rau pom txog Tswv Yexus tus cwjpwm thiab txoj kev uas Vajtswv tau hlub thiab ua pub rau peb. Tswv Yexus ua siab ntev thiab ua siab mos siab muag. Nws yeej tsis khib, tsis khav theeb, lossis yeej tsis ua tej yam txhaum cai. Tswv Yexus yeej tsis xaiv nws txoj kev. Nws tsis chim lossis muab peb tej kev txhaum sau cia. Nws yeej tsis zoo siab txog tej yam tsis ncaj ncees tiamsis zoo siab txhua zaug uas qhov tseeb muaj yeej. Tswv Yexus tsis muaj ib zaum yuav tso peb tseg, tsis muaj ib zaum twg yuav poob kev ntseeg, nws yeej tos ntsoov, thiab tiv taus txhua yam. Yog li peb yuav tau vam khom Vajtswv, ua lub neej sib hlub txhua hnub kom nthuav tawm Vajtswv rau tej neeg ib ncig.
Thov caw nrog kuv peb thov Vajtswv ua ke:
Ua Vajtswv Koj tsaug rau qhov koj hlub kuv los ntawm txoj kev hlub loj tsis yuav dabtsi. Ua Vajtswv tsaug vim koj tau ua siab ntev ua zoo rau kuv, puv npo lub siab hlub tshua. Thov Vajtswv koj ntxiv koj txoj kev hlub loj rau kuv, txhawm kom puv nkaus rau kuv, tiv thaiv kuv los ntawm koj txoj kev hlub loj kawg nkaus. Thiab tus Tswv, thov koj hloov pauv kuv lub siab kom txhua hnub kuv yuav xaiv ua lub neej sib hlub zoo li tus Tswv koj tau hlub kuv. Thov koj siv kuv lub neej los nthuav tawm koj txoj kev hlub rau tej neeg ib ncig kuv. Kuv thov hauv Tswv Yexus Khetos lub npe. Amees.
Cov kwv tij, hlub yog ib yam uas tsis yooj yim, tiamsis nws muaj cuab kav ua tau. Ib hnub twg, peb xaiv los nyob ze thiab txais yuav txoj kev hlub tshiab uas Vajtswv hliv los rau hauv peb lub siab. Los ntawm qhov ntawd, peb yuav muaj lub zog los hlub thiab xaiv hlub zoo li Vajtswv tau hlub. Thov kom Vajtswv ntuas peb xyaum hlub lossis hais ib lo lus hlub pub rau lwm tus lub sijhawm no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.