Kơnhai Yàng Lik Ling la jơnau tơngkah niam rlau jơh bơh gùng Yàng Tom Trồ lơh gơs ală bơta crih crài gan di ală cau be òs. Bơh bon dềt Na-sa-ret tùs rài kis cau ơrùh Mari, bơta yal yau Yàng Lik Ling đơs nền lah tòm tŭ jơh nùs dòn kơnòm tòm gơnăp gơnoăr Yàng Tom Trồ dê mơ dòn jăt Jơnau Kơnràñ neh bơtô sôr, bol he ngăn rgơi tòm gơl jơh dun-nia.
Ngai do, ngai 14/12/2024, tơnggu hoi dan kòp ngai dan jà ồng mo oh mi kơlồi sơnờng băl jơnau Yàng kơnòm bơta dong kờl Wally Odum bơh tơnggu mê GƠNĂP GƠNOĂR YÀNG LIK LING
“Bơh ò gơs bơta lơi la Yàng Tom Trồ ò rgơi lơh” (Luka 1:37)
Bơta yăl yau Yàng Lik Ling sơntòm tòm dô bă tiah ò gơs cau lơi kơlồi tùs- bòn dềt Nasaret. Yàng Tom Trồ sôr cau gơnrơh Gabriêl tùs hơ Galilê, ala bơh Judê. Càu gơnrơh ò tùs hơ Jerusalem, mơya tùs hơ bòn dềt Nasaret. Bơta do ngăn ai lơh nisơsa, tai bơh tòm pah rai hơ̆, Galile ò tŭ lơi geh sền màng ryŭ. Bơh ù tiah do bơh lai neh kol cau lang bơdih pit ai bơh yau mơ găm gơkòl cau Juda ngăn sền ò sơp. Di gơlăn Nathanael neh đơs tòm toh bơta kơlờlồi sơnờng jơh dô pah rài in, tŭ ồng lùp Philip:
“Gơs ñchi lơi niam gơlik bơh Nasaret sơl ơ?”( Jang 1:46)
Nathanael git loh lang bơh tiah do.
Mơya Yang Tom Trồ ò ơn nus kơlồi tùs hơ tiang pơnrờ Nasaret dê hala Galilê. Kờnràñ rcăng nùs nàng tùs tòm tiah dềt rhền do, ò gơs cau lơi wèt tùs, nàng joi dô nă cau ơrùh gơs bơta dòn. Kơnràñ neh sền lam jơh dun-nia nàng săc rwah cau ùr nàng bŭn Kòn Kơnràñ dê.
Mơ Mari la cau neh geh săc wil niam! Khai rờp bŭn mơ ò càng gơs dô nă càu klau. Dô nă cau Ơruh rờp deh Kòn Yàng Tom Trồ. Kơnò ală jơnau cau gơnrơh dê đơs, Mari mìng git lùp dô sèng di pàl tòm tŭ hơ̆ di:
“Añ ò git cau klau lơi, gèn mƀe kòñ gơs bơta hơ̆ taih?” (Luka1:34).
Cau gơñrơh hơ wơl bơta do rờp gơlik kơnòm gơnăp gơnoăr Yàng Hwềng Goh dê:
“Yàng Hwềng Goh rờp tus hơđăng ai, gơnap gơnoăr Botau Hơđang Rlau Jơh rờp jơm gòm ai, gen tàng kòn sàng goh lik ling păl sơnđan la Kòn Yàng Tom Trồ dê.(Luka 1:35).
Bơta krơi ò rgơi gơlik gơs dilah siơŭ bơta lơh broă Yàng Hwềng Goh dê. Bơta do tòm toh mơ bơta yal yau krơi is ngai hơ̆ dê, mơ kùng di ngăn tòm rai kis bol he dê ngai dô. Bơta yal yau bơh Yàng Lik Ling tơngkah bol he lah, ò di mìng tom ngai pơjum mơya kòp ngai, bol he kùng cang gơnap gơnoăr Yàng Hwềng Goh dê nàng kis jat nùs kơñ Yàng dê mơ lơh sir ală gơnoăr sồr Kơnràñ neh rcăng bol he in
Sền kơlồi tĕ ồng mo oh mi pơnđơl pràn tơl bơta mơ găm ò rđà rơndeh he dê. Mơ lồi dùt ồng mo oh mi đal gŏ động cơ nel kol cau kơñau roh thit.
Kùng ndrơm be rơndeh ò rgơi ntoat di lah siơŭ động cơ, bol he ò rgơi kis mơ siơŭ gơnap gơnoăr Yàng Hwềng Goh.
Bơta krơi la broă lơh Yàng Tom Trô dê, mơya Mari kùng gơs gơnoăr broă he dê. Cau gơnrơh neh đơs mơ Mari:
“Añ do la dĭ ùr Yàng dê; dan bơta hơ̆ gơlik gơs añ ĭn jăt be jơnau ồng dê” (Luka1:38).
Tòm bơta tòmbơh bơr dò, jơnau tòm Hi-lạp gơs bơh “rhema” gơs dồ jơnau gơtha jrồ ơnang- gơs gơtha la Yàng Tom Trồ la Bơtau lơh jơh ală bơta, mơ jơh ală jơnau Kơnràñ neh đơs kùng rờp geh gơlik gơs di ngăn. Mơ Mari neh hơ wơl jơnau hơ̆ bơh bơta dòn wil tơl.
Bơh krơh Mari dê, bol he geh bơti lah ƀañ tŭ lơi săng lòi jơnau hơ Yàng Tom Trồ dê. Bulah rgơi tìp oă bơta kơryăn, mơya dilah bol he sơmbat kơ̆ jơnau Kơnràñ, gèn ò gơs bơta lơi kơryăn bol he. Jơnau Yàng sùm bềng gơnap gơnoăr, mơ gơnap gơnoăr Yàng Hwềng Goh sùm lơh broă kờp tŭ, kờp bă tiah.
Do la tŭ nàng bol he in kờp gơn mơ sền gŏ ală bơta krơi mơ Yàng rơp lơh. Bơta hơ̆ neh gơlik gơs mơ Mari, mơ kùng rơp gơlik gơs mơ să tòm kờp nă bol he sơl.
Dan jà bol he dô nùs bal tòm bơta hòi dan:
Khoai Yang, kòn ưn ngai Kơnràñ bơh sèng yal yau Yàng Lik Ling tơngkah wơl kòn lah ò gơs ñchi lơi la ò rgơi gơ wèt mơ Kơnràñ. Dan dong kòn gơs nùs dòn be Mari, rcang sìr dòp rò jơnau Kơnràñ mơ cơnđoà lòt tom bơta dòn duh. Kòn dan gơnap gơnoăr Yàng Hwềng Goh dê tề lăm rài kis kòn, nàng kòp ngai kòn geh kis jat nus kờñ Kơnràñ mơ sền gŏ ală bơta krơi mơ Kơnràñ lơh. Kòn jơh nùs hoi dan tòm sơnđăn Yàng Jesu Krist, Amen.
Ơ ală ồng mo oh mi kờñ gơboh, tòm tŭ sơmbat geh jơnau hơ Yàng Tom Trồ dê mơ cơnđoà lòt tom gơnap gơnoăr Yàng Hwềng Goh dê, bol he rgơi lot găn bơta kơryăn. Bơta krơi ò dê mìng gơlik gơs tòm ală tŭ dờng màng lơm ò, mơya tòm ală cơnđoà lòt dềt rhền rlau jơh bơta dòn dê kờp ngai. Bơta mơ Yàng neh lơh Mari in, Kơnràñ kùng rgơi lơh bol he in. Rcang sìr tĕ nàng sền ală bơta krơi mơ Kơnràñ rơp lơh tòm rài kis ồng mò oh mi dê.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply