Tej zaug sawv daws yeej tseem nco txog zaj xwm txheej hais txog “cov txiv neeb dig muag mus saib tus ntxhw”. Yog ib tug ntxhw ntag tiamsis ib leeg nyias hais nyias lawm ib yam raws li nyias tus kheej ntsia pom. Kuj ib yam li ntawd, peb saib thiab ntsia lub ntiajteb no los ntawm ntau txoj kev sib txawv. Tiamsis muaj qhov tseeb uas peb cov ntseeg yuav tsum tau muaj ntawd yog: Ntsia li Vajtswv ntsia.
Hnub no, yog hnub 19/06/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Barbara Godfrey dhau ntawm Zaj kawm NTSIA LI VAJTSWV NTSIA.
“Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus” (Loos 12:2).
Thaum peb ntsia pom tej kev tu siab thiab tej yam tsis txaus siab nyob rau hauv lub neej, peb yuav pom tej yam tsis zoo. Tiamsis yog peb saib tej ntawd dhau los ntawm Vajtswv lub qhov muag, peb yuav ntsia pom lwm daim duab txawv.
Tsis ntev los no kuv saj tau qhov no thaum kuv niam tau tag sim neej. Kuv nco thaum nyuam qhuav mloog kws tshuaj qhia tas, kuv tau thov Vajtswv, kom Vajtswv muab tus yeeb ncuab uas tuaj txeeb kuv niam txojsia ntawm kuv niam lub cev khi cia, tas kuv thov kom Vajtswv lub hwjchim kho zoo mob nkeeg kho niam thiab pab kom niam zoo. Kuv tau nug Vajtswv tsis tseg: “Vajtswv koj lub siab nyiam tseg rau yam no yog dabtsi?”
Muaj ib hnub, kuv mus tom tsev tshuaj saib kuv niam thiab tseg ob teev los mloog niam nrog Tswv Yexus sib tham. Niam tsis qhib qhov muag txawm yog kuv twb nyob rawv ntawd, tiamsis kuv ntsia pom niam thiab Tswv Yexus nkawd sib tham thaum uas Tswv Yexus cia niam ntsia pom ntuj ceebtsheej ib pliag! Niam pib nug tias: “Tswv Yexus, kuv tab tom nyob qhov twg?” Thaum pog lub ntsej muag tshiab tshiab vim zoo siab heev.
Kuv hnov niam hais thaum uas niam tab tom ntsib kev khwv txog kev ua pa: “Tus Tswv kuv cheem tsum ib me ntsis pa” tas niam hais ntxiv: “Yog lawm, ib me ntsis thiab. Tau lawm, ua Tswv Yexus tsaug.”
Muaj dua lwm zaug pog hais tias: “Tus Tswv, kuv ob txhais kotaw no. Kuv cheem tsum txoj kev tiv thaiv.” Tas pog hais ntxiv: “Yog lawm. Kuv ua Koj tsaug, tus Tswv.” Lub sijhawm ntawd kuv saib ntsoov daim pam saib puas pom daim pam txav.
Vajtswv ceeb toom kuv sab ntsujplig txog tej lus nyob hauv Filipis 4:19 “Kuv tus Vajtswv uas muaj koob hmoov nplua mias, nws yuav pub txhua yam uas nej xav tau rau nej, rau qhov nej yog cov uas ntseeg Yexus Khetos.”
Hnub tom qab kuv niam yog ib tug neeg tshiab, nws sawv zaum saum txaj thiab noj mov, ua txhua yam uas pog ua tsis taus rau nag hmo.
Tomqab ntawd, kuv niam lub zog tsuag zuj zus. Kuv nug Vajtswv tias: “Vajtswv Koj lub siab nyiam tseg rau kuv niam yog dabtsi?” Thiab thawj zaug kuv muaj txoj kev kaj siab thaum hais tias: “Tus Tswv, thov kom tau ua raws li koj lub siab nyiam nyob hauv kuv niam lub neej.” Kuv kuj muaj cuab kav hais tias: “Tus Tswv thov koj coj kuv niam rov qab mus tsev” pauv qhov uas pheej saib niam tiv mob, vim Vajtswv twb ua rau kuv ntsia pom ib pliag txog txoj kev zoo siab uas pog muaj thaum pog nyob hauv Tswv Yexus.
Tiamsis yam uas kuv kawm tau, peb yuav tau ntsia txhua yam li Vajtswv ntsia kom thiaj yuav pom daim duab tiag.
Yog li txhua hnub peb ua neej nyob, lub caijnyoog peb ntsib dhau, yuav tau nug Vajtswv. Yuav tau muab txhua yam fij rau Vajtswv, thiab thov kom Vajtswv pab peb ntsia pom li Vajtswv ntsia thiab kom peb muaj kev ntseeg ua lub neej raws li Vajtswv lub siab nyiam.
Thov caw nrog kuv peb thov Vajtswv ua ke:
Tus Tswv, kuv ua koj tsaug vim koj saib ntsoov kuv lub neej. Kuv ua koj tsaug vim kuv lub neej tau tso siab plhuav thaum kuv nyob hauv koj txhais tes. Thov Vajtswv pub kom kuv muaj kev nkag siab thiab ntsia txhua yam kom yog rau tej uas tshwmsim ib ncig ntawm kuv. Thov qhia kom kuv ua neej nyob rau hauv Vajluskub thiab raws li Vajtswv lub siab nyiam kom kuv txhais ruam mus ntxiv thiab ua tiav kuv lub neej ntseeg raws li Vajtswv koj txoj kev npaj uas zoo. Kuv thov hauv Tswv Yexus Khetos lub npe. Amees.
Cov kwv tij, Vajtswv niaj hnub nrog nraim thiab pab tus uas thov txog Vajtswv. Tej zaug koj tab tom ua neej nyob rau hauv lub caijnyoog muaj kev txomnyem thiab muaj kev mob siab, tej zaug koj tab tom txhawj thiab ntshai vim tsis paub tag kis yuav zoo li cas. Tej zaug tej yam uas koj thov Vajtswv yeej tseem tsis tau pab raws li qhov uas koj ntsia pom. Tiamsis sim hloov pauv txoj kev ntsia thiab cim civ nug tias, “Vajtswv lub siab nyiam tseg rau qhov no yog dabtsi?” cia siab tias Vajtswv txojlus yuav txhawb kom peb ntseeg siab rau Vajtswv thiab hloov pauv peb lub hlwb raws li “Vajtswv lub qhov muag”.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply