Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơdah pơhmu rĭm čô kar hăng sa čơlŭ, nang ai ƀing ta či mơkar amăng dua mơta: sa anŭn jing cơlŭ pă ăt hmâo hơbŏ hiam rŏ phara, dua dơ̆ng jing čơlŭ pă ăt hmâo gru čơđang. Ƀu hmâo čơlŭ pă klă tum abih bang, hlơi pô ăt găn soh sel tơlơi pơčah hăng ruă kă. Samơ̆ Khua Yang hmâo rai hăng dôn laih anŭn pơklep glaĭ jing čơlŭ klă tum, rŏ hiam, hăng tŭ mă tơlơi khăp laih anŭn tơlơi pơyom mơ̆ng Khua Yang.

Hrơi anai, lơ 13/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Gene Markland tui hăng akŏ tơlơi hrăm PÔ HƠDUAH ČƠLŬ HM O PƠČAH

“Gơñu wơr bĭt hĭ laih kâo amăng pran jua gơñu kar hăng wơr mơnuih djai. Kar hăng čơlŭ hmâo pơčah laih yơh.” (Tơlơi Adoh Hơđăp 31:12)

Indiana Jones jing sa čô ngă sen amăng TV bơ kâo khăp biă mă. Kâo amoaih khul mông ñu nao hyu, tơdang ñu nao hơduah mơnơ̆ng yom rơnŭk đưm.

Gah rơngiao amăng tơlơi hơdip rĭm hrơi ƀing hơduah mơnơ̆ng yom đưm khŏm rongiă lu thŭn kah dưi pơƀut glaĭ hơdôm tơhneč pơčah čơlŭ. Gơñu klep glaĭ jing sa, ten en. Lu wơ̆t gơñu dưi pơklep glaĭ kar hăng mơnơ̆ng mơ̆ng phŭn aka pơčah.

Gơnam anŭn či jing kar hăng phrâo, kơnơ̆ng ƀiă gru pơčah jing gru pioh glaĭ sui thŭn. Tơdơi kơ pơkra glaĭ, gơnam tum num arăng či pioh ƀơi anih răk pioh, pơčrang hăng apui bơngač yom laih anŭn pioh ƀơi anih glông kiăng kơ abih bang mơnuih dưi lăng ƀuh.

Samơ̆ ăt hmâo mơ̆n ƀing mơnuih khăp hơduah gơnam yom anŭn. Sa mlăm dih amăng tơlơi rơpơi, kâo ƀuh sa tơlơi phara: kâo mŭt amăng sa boh sang prŏng hông hang, kâo rơbat tuai dring sang tap bơnal truh sa tơdŭ prŏng. Anih anŭn mơmŏt tĭt, samơ̆ hmâo bơngač gah ayao, anŭn kâo rơbat nao pơ anŭn.

Ƀơi anăp kâo jing sa pơnăng prŏng pik ia kolor rup wil, lăng kar hăng rup arăng čar hiam. Ƀơi pơnăng jing sa roaĭ mơnil rơđah, dŏ gah ngŏ kơ mơnil jing sa čơlŭ lŏn. Kar hăng sa tơdŭ anih răk pioh mơnơ̆ng đưm. Rĭm čơlŭ apui pơčrang nao rơđah, laih anŭn kâo dưi lăng ƀuh rơđah jum dar ñu yơh.

Tơdang nao jĕ kiăng ƀuh rơđah hloh, kâo ƀuh dua mơta. Blŭng hlâo, rĭm čơlŭ leng kơ hiam laih anŭn phara tui hăng hơbŏ ñu; tal dua, rĭm čơlŭ pă leng kơ hmâo gru čơđang. Hmâo mơ̆n đơđa čơđang gru prŏng, ăt hmâo mơ̆n čơđang anĕt kar hăng soai pêng. Samơ̆ ăt hmâo pơkra glaĭ hiam laih anŭn pioh ƀơi anih yom.

Kâo lăng ten čơlŭ blŭng hlâo gah iao. Arăng ngă ñu hăng lŏn, ƀu hmâo rup čar jum dar ôh. Hmâo sa gru čơđang prŏng mơ̆ng glông trŭn pơ yô̆, samơ̆ ăt hmâo sir glaĭ klă tum yơh. Samơ̆, ăt lăng ƀuh mơ̆n gru čơđang anŭn.

Tŏ tui jing sa čơlŭ prŏng hmâo čar hiam biă mă, rup tơdrŏn pơblah đưm. Čơlŭ sang pơtao mơtah ƀuh ƀu klă samơ̆ ăt hmâo pơkra glaĭ ten ñen yơh.

Truh kơ sa čơlŭ đưm hiam, glông hăng rơpih, čar rup hla mơtah laih anŭn kơñĭ. Wơ̆t dah hmâo pơkra glaĭ laih samơ̆ ăt ƀuh rơđah gru čơđang kar rup kơđĕ dar suer. Rŏ dah anŭn jing čơlŭ kơ sa čô mơnuih kơhnâu.

Tơdơi kơ anŭn jing sa čơlŭ ber prŏng, hmâo rup ia rơsĭ hăng khul akan. Gah rơngiao lăng đôč đač samơ̆ gah lăm hmâo gru čơđang prŏng, hmâo pơkra glaĭ laih anŭn pơklep ten ñen kiăng pơhiam glaĭ kar hăng hlâo.

Čơlŭ hnal tuč lăng rŏ dah ƀu rŏ đơi ôh, samơ̆ tơdang lăng ten hloh ƀuh ñu ăt hmâo pơčah laih anŭn ăt hmâo pơklep glaĭ lu wơ̆t. Rŏ dah khul tơhneč pơčah ăt hmâo pơčah thĭm dơ̆ng mơ̆n. Samơ̆ čơlŭ hmâo pơkra glaĭ laih anŭn pơklep glaĭ ten ñen biă mă.

Kâo kơdun glaĭ hăng pơmĭn, tơña glaĭ kâo kơ hơgĕt tơlơi kiăng pia kơ khul čơlŭ anai lĕ, tŏ tơnŏ hmư̆ asăp pơhiăp gah klon: “Ih kiăng thâo tơlơi kiăng pia kơ khul čơlŭ anŭn mơ̆?” Kâo ăt dŏ dơ̆ng kual tơngan ƀu wir glaĭ. Kâo pơmĭn anŭn jing pô khua kơ khul gơnam anai, kâo laĭ glaĭ: “Ơ kâo kiăng mơ̆n, laĭ brơi kâo thâo đa.”

“Lăng ten ƀơi hnal čih hăng glông kơƀang blŭng hlâo”

Ñu laĭ. Rơbat jĕ anŭn, kâo tơkui trŭn hăng đŏk ƀuh: “Ađam.”

“Ađam?” Kâo tơña glaĭ.

“Djơ̆.” Ñu laĭ glaĭ. “Ađam hmâo tơlơi kơƀah prŏng tơl Kâo khŏm kla nua prŏng glông. Samơ̆ nua khom kla anŭn jing nua Kâo kiăng kla brơi.”

Tŏ tui Ñu laĭ kơ kâo lăng hnal tŏ tui. Ƀơi anŭn čih “Đawit.”

Ñu laĭ: “Djơ̆ laih, sa čô pơtao hmâo tơlơi kơƀah tơdu, samơ̆ anŭn jing čơlŭ hiam biă mă. Ih tŭ ư mơ̆?”

“Ơ” kâo laĭ glaĭ.

Ñu laĭ tơdu un: “Anai jing čơlŭ Kâo pơyom.”

Čơlŭ hmâo rup so đưm tŏ tui, hmâo čar rup hla mơtah laih anŭn kơñĭ, čih ƀơi hnal anŭn jing “Pôl”.

“Pôl, Pôl” – asăp pơhiăp rơoang anŭn – “sa čô mơnuih rơgơi kơhnâo hăng bă tơlơi dưi. Gru čơđang kar rup kơđĕ ngă kơ čơlŭ tơdu biă mă, samơ̆ tơlơi pap Kâo jing tum laih.”

Čơlŭ ber hăng rơhaih čar rup ia rơsĭ hmâo hnal čih: “Pêtrôs”.

Ñu laĭ: “čơlŭ anai prŏng, kơjăp laih anŭn dưi pioh lu mơnơ̆ng, samơ̆ hmâo răm kơtang mơ̆ng amăng lăm. Kâo khŏm djă kơ̆ng glaĭ sui ƀiă tơl truh pơkra giơ̆ng. Ñu hmâo jing sa amăng lu mơnơ̆ng prŏng yom hloh kơ Kâo. Ră anai, lăng bĕ kơ čơ̆lŭ tŏ tui.

Kâo tơkui đŏk hnal čih ƀơi čơlŭ hmâo lu wơ̆t pơčah pơpheč laih anŭn lăng ƀuh anăn kâo pô. Ia mơta kâo tơbiă lu biă mă tơdang hơdơr nao kơ khul tơlơi ruă rơngot hmâo ngă kơ kâo pơčah pơpheč, khul nam rơka hlak čơđai yua kơ tơlơi pơčơlah amăng sang anŏ.

“Kar hăng čơlŭ hmâo pơčah laih yơh. (Tơlơi Adoh Hơđăp 31:12)

Kâo wir glaĭ anăp nao kơ pô pơƀut čơlŭ čơđang, hăng ƀuh Khua Yang! Mơta Ñu dlăm kar hăng ia rơsĭ, laih anŭn Ñu klao bă tơlơi mơđao biă mă. Kâo rơbuh nao ƀơi tơngan tơlơi dưi mơyang Ñu hăng pơhiăp: “Bơni kơ Ama hmâo pơsir glaĭ khul tơlơi pơčah kơ tơlơi hơdip kâo”. Tơlơi khăp pap laih anŭn tơlơi rŭ pơdơ̆ng Ñu hmâo rô amăng kâo hăng tơlơi hơgơ̆m.

Ñu rơbat rai laih anŭn djă čơlŭ Ađam đĭ. “Ơ ană đah rơkơi, mơ̆ng čơlŭ blŭng hlâo jing Ađam, abih čơlŭ tơdơi kơ anŭn leng ƀu klă tum lơi, leng hmâo gru čơđang.”

Ñu rơbat găn rĭm kơƀang mơnil, yŏng đĭ rĭm čơlŭ. Tơdơi kơ anŭn, Ñu pioh glaĭ ƀơi kơƀang, brơi apui bơngač pơčrang kiăng rơđah hloh čơlŭ anŭn.

Ñu laĭ dơ̆ng: “Kâo hmâo pha brơi Ană Ha Čô Kâo jing Khua Yang Yêsu rai kiăng song mă rĭm čơlŭ pơčah hăng ba khul tơhneč pheč anŭn kơ Kâo. Brơi ih hơdơr, kơnơ̆ng tơdang Kâo pơsir glaĭ gru čơđang anŭn kah čơlŭ anŭn hmâo tơlơi tŭ yua.”

Ñu pah rơnang ƀơi bra kâo hăng klao mơak tơdang găn ƀơi anăp kâo, laih anŭn anăp nao pơ anih kơnăm amăng tơdŭ. Tơdang Ñu rơbat rai, tơlơi bơngač blĭp rơđah, laih anŭn kâo kơtuă biă mă tơdang ƀuh tơdŭ rơhaih rơhông. Anih anŭn rơhaih biă mă. Mơta kâo tañ mơtăm hơduah Ama laih anŭn kâo ƀuh Ñu hlăk rơbat, pơ ataih tŏng krah khul čơlŭ čơđang bơ Ñu hmâo song mă laih, lu čơlŭ hmâo pơƀŭt glaĭ ƀu hmâo hlơi anăm tĭng ôh.

“’Samơ̆, Ơ Yêhôwa, ră anai Ih jing Ama ƀing gơmơi; Ƀing gơmơi jing lŏn kraĭ, Ih jing pô man gơmơi; Abih bang ƀing gơmơi jing bruă tơngan Ih ngă.” (Êsai 64:8)

Rơkâo ƀing ta pioh mông iâu laĭ hrŏm hơbĭt
Ơ Khua Yang, kâo jing sa čơlŭ pơčah laih! Bơni kơ Ih hmâo tui hơduah kâo, pap brơi kâo laih anŭn jing nua song mă kiăng pơklep sir khul tơhneč pơčah tơlơi hơdip kâo. Bơni kơ Ih hmâo rŭ pơdơ̆ng kâo jing čơlŭ phrâo, wơ̆t bă gru čơđang samơ̆ ăt hiam rŏ hăng bă tơlơi khăp Ih. rơkâo Ih yua kâo, pơblih kâo jing čơlŭ tŭ yua kơ bruă Ih. Kâo iâu laĭ amăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, mơ̆ng tơhneč pơčah rŏ dah ƀu dưi klep sir dơ̆ng tah, ră anai Khua Yang hmâo rŭ pơdơ̆ng jing čơlŭ rŏ hiam laih. Wơ̆t dŏ ƀuh gru čơđang samơ̆ ƀing ta thâo sĭt rĭm čô hiam rŏ phara ƀơi anăp Khua Yang, Pô hmâo pơsăn abih bang kiăng kơ song mă ƀing ta. Čang rơmang ƀing ta jing čơlŭ tŭ yua amăng tơngan Khua Yang Pô Pơklaih ƀing ta, kiăng kơ pơjing khul bruă tŭ yua kơ Dêh Čar Ñu.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.